1. Pakiko e amor entre Dios i su Yu a krese?

HESUKRISTU, Yu di Yehova, a deklará: “Mi ta stima e Tata.” (Huan 14:31) Tambe el a bisa: “E Tata tin kariño pa e Yu.” (Huan 5:20) Esei no mester sorprendé nos, ya ku promé ku Hesus a bini na tera, el a traha miónes i miónes di aña ku su Tata den shelu. E tabata Dios su “trahadó eksperto.” (Pro. 8:30) Durante e tempu ei, el a siña hopi tokante e kualidatnan di su Tata, i e amor ku nan tabatin pa otro tabata krese mas i mas.

2. (a) Kiko ta amor? (b) Ki preguntanan nos lo bai kontestá?

² Amor ta entre otro un sintimentu di kariño profundo pa un persona. Beibel ta bisa nos: “Yehova tin masha kariño.” (Sant. 5:11) Komo ku Dios tin e kariño ei pa nos, nos tambe mester tin e mesun kariño ei p’e. Si nos ta obedes’é Yehova, lo e demostrá su amor na nos. (Lesa Deuteronomio 7:12, 13.) Pero kon nos por stima un persona ku nos no ta mira? Kiko ta nifiká stima Dios? Ki motibu nos tin pa stim’é? I kon nos por demostrá nos amor p’e?

3, 4. Dikon nos por stima Yehova?

³ “Dios ta un Spiritu”; esei ta nifiká ku nos no por mir’é.  (Huan 4:24) Tòg nos por stim’é i Beibel ta animá nos pa hasi esei. Por ehèmpel, Moises a bisa e israelitanan: “Stima SEÑOR bo Dios ku henter bo kurason, ku henter bo alma i ku tur bo forsa.”—Deu. 6:5.

⁴ Dikon nos por stima Dios? Pasobra el a krea nos ku un nesesidat pa ador’é i ku e kapasidat pa demostrá amor. Ora nos satisfasé e nesesidat ei, nos amor pa Dios ta krese i esei ta hasi nos felis. Esei ta loke Hesus tabata ke men ora el a bisa: “Felis ta esnan ku ta konsiente di nan nesesidat spiritual, ya ku e Reino di shelu ta di nan.” (Mat. 5:3) Hopi hende ta di akuerdo ku di naturalesa e ser humano tin e deseo di adorá Dios. E eskritor A. C. Morrison a bisa: ‘E idea ku semper hende a buska Dios i ke kere den un ser supremo ta laga nos keda asombrá.’—Man Does Not Stand Alone.

5. Kon nos por sa ku tin sentido pa buska Dios?

⁵ Tin sentido pa buska Dios? Ta posibel pa hañ’é? Sí, pasobra e mes ke pa nos hañ’é. Apòstel Pablo a konfirmá esaki ora el a papia ku un grupo di hende den e Areópago. For di einan hende por a mira e Partenon, un tèmpel dediká na Atenea, diosa di e stat antiguo di Aténas. Imaginá bo einan den e multitut ora Pablo a papia tokante “e Dios ku a traha mundu i tur loke tin den dje,” i despues splika ku Dios “no ta biba den tèmpel ku man di hende a traha.” E apòstel a bisa tambe: “For di ún hende el a traha tur nashon, pa nan biba riba henter e superfisie di tera, i el a dekretá e tempunan stipulá i sierto límite kaminda hende por biba, pa nan por buska Dios—sí, busk’é fulando manera ora un hende ta buska den skuridat, i realmente hañ’é—maske e no ta masha leu for di kada un di nos.” (Echo. 17:24-27) Sí, hende por haña Dios. Mas ku shete mion i mei di Testigu di Yehova a “hañ’é” i ta stim’é di kurason.

6. Kiko Hesus a bisa ta “e mandamentu di mas grandi i esun di promé”?

⁶ Nos tin ku stima Yehova di kurason. Ora un fariseo a puntra Hesus kua ta e mandamentu di mas grandi di Lei, Hesus a kontest’é: “‘Stima Yehova bo Dios ku henter bo kurason, ku henter bo alma i ku henter bo mente.’ Esaki ta e mandamentu di mas grandi i esun di promé.”—Mat. 22:34-38.

7. Kiko ta nifiká stima Dios ku (a) ‘henter nos kurason’? (b) ‘henter nos alma’? (c) ‘henter nos mente’?

⁷ Kiko Hesus tabata ke men ora el a bisa ku nos tin ku stima Dios ku ‘henter nos kurason’? E tabata ke men ku nos tin ku stima Yehova ku henter nos kurason simbóliko, loke ta inkluí nos deseonan, emoshonnan i sintimentunan. Tambe el a bisa ku nos tin ku stim’é ku ‘henter nos alma,’ es desir, ku henter nos ser: loke nos ta i loke nos ta hasi den nos bida. Ademas, Hesus a bisa ku nos tin ku stima Dios ku ‘henter nos mente,’ esta, ku nos manera di pensa. Di e manera akí Hesus a enfatisá ku nos tin ku stima Yehova ku tur loke nos ta i ku tur loke nos tin.

8. Si nos ta stima Yehova kompletamente, kiko nos lo sinti nos motivá pa hasi?

⁸ Si nos ta stima Dios ku henter nos kurason, alma i mente, nos lo studia su Palabra na un manera diligente, kumpli ku su boluntat ku entusiasmo i deklará e bon notisia di e Reino ku zelo. (Mat. 24:14; Rom. 12:1, 2) Berdadero amor pa Yehova lo hala nos mas i mas serka dje. (Sant. 4:8) Klaru ku no ta posibel pa traha un lista di tur e motibunan pakiko nos tin ku stima Dios. Pero laga nos analisá algun di nan.

9. Dikon abo ta stima Yehova?

⁹ Yehova ta nos Kreador, i e ta duna nos  tur loke nos tin mester. Pablo a bisa: “Ta pa medio di dje nos tin bida i ta move i ta eksistí.” (Echo. 17:28) Yehova a duna nos e planeta presioso akí. (Sal. 115:16) Tambe e ta duna nos alimento i otro kos ku nos tin mester pa biba. P’esei Pablo por a bisa e habitantenan di Listra ku “e Dios bibu . . . no a laga di duna prueba ta ken e ta, ya ku el a hasi bon, dunando boso áwaseru for di shelu i tempu di bon kosecha, i asina a laga boso haña kuminda na abundansia i a yena boso kurason ku alegria.” (Echo. 14:15-17) Esei no ta un motibu pa nos stima nos Gran Kreador?—Ekl. 12:1.

10. Ora bo pensa riba kiko Dios a hasi pa kita piká i morto, ki sintimentu esei ta duna bo?

¹⁰ Dios a sòru pa un dia nos keda librá di e piká i morto ku nos a heredá for di Adam. (Rom. 5:12) Beibel ta bisa: “Dios a demostrá su amor pa nos di e manera akí: Kristu a muri pa nos miéntras ku nos tabata pekadó ainda.” (Rom. 5:8) Si nos arepentí di kurason i demostrá fe den e sakrifisio di reskate di Hesus, Dios lo pordoná nos pikánan. Esei no ta duna nos mas amor pa Yehova? I nos no ta gradisidu na dje ku el a manda su Yu bin muri pa nos?—Huan 3:16.

11, 12. Ki speransa Yehova a duna nos?

¹¹ Yehova a duna nos un speransa ku ta yena nos ku goso i pas. (Rom. 15:13) E speransa di biba pa semper ta yuda nos soportá prueba di fe. Kristiannan ungí ku muri fiel lo “haña e korona di bida” den shelu. (Rev. 2:10) Otro kristiannan ku ta mantené nan integridat tin e speransa di biba aki riba tera i disfrutá di bendishonnan eterno den Paradeis. (Luk. 23:43) Ki sintimentu e promesanan akí ta duna nos? Nan no ta yena nos ku goso, pas i amor pa Esun ku ta duna nos “tur don ku ta bon i tur regalo perfekto”?—Sant. 1:17.

¹² Dios a duna nos e speransa emoshonante di resurekshon. (Echo. 24:15) Sin duda, e morto di un ser kerí ta kousa hopi doló. Pero pa motibu di e speransa di resurekshon, ‘nos no ta tristu manera e hendenan ku no tin speransa.’ (1 Tes. 4:13) Yehova Dios ta anhelá pa resusitá e mortonan, spesialmente hende ku a sirbié fielmente, manera e hòmber hustu Yòb. (Yòb 14:15) Imaginá bo e goso ku lo reina ora hende por topa bèk nan sernan kerí ku a resusitá i amigunan íntimo por ta huntu atrobe aki riba tera! Esei no ta yena nos kurason ku un gran amor pa nos Tata selestial, kende a duna nos e speransa maravioso di resurekshon?

13. Kon nos por sa ku Yehova di bèrdat ta interesá den nos?

¹³ Yehova ta interesá den nos. (Lesa Salmo 34:6, 18, 19; 1 Pedro 5:6, 7.) Nos sa ku Dios ta semper kla pa yuda hende ku ta fiel na dje; p’esei nos ta sinti nos protehá komo parti di ‘e karnénan ku e ta pastoriá.’ (Sal. 79:13) I loke Dios a primintí di hasi den futuro ta konfirmá mas ainda e amor ku e tin pa nos. Pa medio di Hesukristu, Rei di e Reino di Dios, lo e kaba ku tur maldat i opreshon for di riba tera, i hende obediente lo disfrutá di pas i prosperidat permanente. (Sal. 72:7, 12-14, 16) Bo no ta haña ku e promesanan akí ta motivá nos pa stima Yehova ku henter nos kurason, alma, forsa i mente?—Luk. 10:27.

14. Ki privilegio impagabel Dios a duna nos?

¹⁴ Yehova a duna nos e privilegio impagabel di por sirbi komo su Testigunan. (Isa. 43:10-12) Nos ta stima Dios pasobra el a duna nos e oportunidat di apoyá su Reino i pa hiba un mensahe di konsuelo pa tur hende ku ta sufri den e mundu yen di problema akí. Ademas, nos por papia ku fe i konvikshon, pasobra nos mensahe ta basá riba e Palabra di e Dios berdadero,  kende semper ta kumpli ku loke e primintí. (Lesa Hosue 21:45; 23:14.) Manera nos por mira anto, nos tin hopi motibu pa stima Yehova. Pero kon nos por demostrá nos amor p’e?

15. Kon estudio i aplikashon di e Palabra di Dios por yuda nos?

¹⁵ Studia e Palabra di Dios regularmente i pon’é na práktika. Ora nos hasi esaki, nos ta mustra ku nos ta stima Yehova i ku nos ke pa su palabra ta un ‘lus pa nos kaminda.’ (Sal. 119:105) Si nos ta pasando den un situashon difísil, e siguiente ekspreshonnan lo duna nos un gran konsuelo: “Un kurason arepentí i kibrá, o Dios, bo no ta despresiá.” “Bo miserikòrdia, o SEÑOR, lo sostené mi. Den e multitut di mi preokupashonnan den mi, bo konsuelonan ta alegrá mi alma.” (Sal. 51:17; 94:18, 19) Tantu Yehova komo Hesus ta mustra kompashon pa hende ku ta sufri. (Isa. 49:13; Mat. 15:32) Ora nos ta studia Beibel, nos por mira kla kuantu interes amoroso Yehova tin den nos. Anto esei ta motivá nos pa nos demostrá nos amor profundo p’e.

16. Kon orashon regular por pone nos amor pa Dios krese?

¹⁶ Hasi orashon regularmente. Nos orashonnan ta hala nos mas i mas serka Esun “ku ta skucha orashon.” (Sal. 65:2) Ora nos mira kon Dios ta kontestá nos orashonnan, nos amor p’e ta krese. Por ehèmpel, kisas nos mes por a komprobá ku e no ta laga nos pasa den tentashon ku nos no por soportá. (1 Kor. 10:13) Kisas den momentonan di angustia nos a supliká Yehova p’e yuda nos, anto sinti kon “e pas [inkomparabel] di Dios” a protehá nos kurason. (Flp. 4:6, 7) Otro ora, kisas nos a hasi un orashon den silensio, manera esun ku Nehemías a hasi, i ripará despues kon Yehova a kontestá nos. (Neh. 2:1-6) Segun ku nos ta “perseverá den orashon” i mira kon Yehova ta kontestá nos petishonnan, nos amor p’e ta krese i nos konfiansa ku lo e yuda nos pa sigui enfrentá mas prueba di fe tambe ta krese.—Rom. 12:12.

17. Si nos ta stima Dios, kon nos lo mira asistensia na reunion?

 ¹⁷ Asistí sin falta na reunion di kongregashon, asamblea- i kongresonan. (Heb. 10:24, 25) E israelitanan tabata bini huntu pa skucha i siña tokante Yehova pa nan por a ador’é ku rèspèt profundo i obedesé su Lei. (Deu. 31:12) Si di bèrdat nos ta stima Yehova, lo no ta difísil pa kumpli ku su boluntat. (Lesa 1 Huan 5:3.) P’esei laga nos hasi tur loke ta posibel pa asistí na tur reunion. Nos no ke pa nada pone nos pèrdè e amor ku nos tabatin na prinsipio, ora nos a konosé Yehova.—Rev. 2:4.

18. Kiko amor pa Dios ta motivá nos pa hasi?

¹⁸ Prediká ku entusiasmo tokante “e bèrdat ku ta pertenesé na e bon notisia.” (Gal. 2:5) Nos amor pa Dios ta motivá nos pa papia ku otro hende tokante e Reino di Dios. Su yu stimá, kende lo ta Rei di e Reino ei, lo ‘sali bai bringa viktoriosamente pa kousa di bèrdat i hustisia’ na Armagedon. (Sal. 45:4; Rev. 16:14, 16) E echo ku nos por yuda hende siña tokante e amor di Dios i e mundu nobo ku el a primintí i hasi disipel ta duna nos un gran alegria!—Mat. 28:19, 20.

19. Pakiko nos mester gradisí Yehova pa e ansianonan di kongregashon?

¹⁹ Mustra gratitut pa e ansianonan di kongregashon. (Echo. 20:28) Yehova tin nos bienestar na pechu; p’esei el a duna nos ansiano. E hòmbernan akí ta “manera un refugio kontra bientu, i un protekshon kontra tempestat, manera koridanan di awa den un tera seku, manera sombra di un baranka masha grandi mes den un tera ku tin set di awa.” (Isa. 32:1, 2) Pensa kon kontentu nos lo keda ora nos haña un lugá di skonde pa un bientu fuerte òf e sombra ku un baranka ta duna na momento ku nos ta den un higra di solo. E komparashonnan akí ta yuda nos mira kon e ansianonan ta yuda nos i animá nos den sentido spiritual ora nos ta pasa den problema. Si nos obedesé e ‘regalonan akí den forma di hende,’ nos ta mustra kon gradisidu nos ta, i nos ta duna prueba di e amor ku nos tin pa Dios i pa Kristu, Kabes di e kongregashon.—Efe. 4:8; 5:23; Heb. 13:17.

20. Si nos ta stima Dios, kon nos lo kumpli ku e palabranan di Santiago 1:22-25?

²⁰ Si nos tin un relashon estrecho ku Yehova, nos lo ta un ‘hende ku ta kumpli ku e palabra, i no un ku ta tend’é so.’ (Lesa Santiago 1:22-25.) Komo “hende ku ta kumpli,” nos tin fe ku ta motivá nos pa prediká e bon notisia ku entusiasmo i partisipá den e reunionnan. Nos ta stima Dios di kurason i p’esei nos ta obedesé su ‘lei perfekto,’ ku ta abarká tur loke e ta rekerí di nos.—Sal. 19:7-11.

21. Ku kiko nos por kompará nos orashonnan?

²¹ Amor pa Yehova ta motivá nos pa akudí na dje den orashon tur ora bai. E saserdotenan di Israel tabatin ku kima sensia tur dia pa Yehova. I ta interesante ku Rei David a kompará su orashonnan ku e sensia akí, ora el a kanta: “Laga mi orashon wòrdu poní bo dilanti manera sensia; e halsamentu di mi mannan manera e sakrifisio di atardi.” (Sal. 141:2; Éks. 30:7, 8) Yehova a skucha e orashonnan di David. Si nos hasi orashon den un forma humilde, sinsero i gradisidu, nos orashonnan tambe lo ta manera sensia i lo agradá Yehova.—Rev. 5:8.

22. Kiko nos lo mira den e siguiente artíkulo?

²² Hesus a bisa ku nos tin ku stima Dios, pero el a bisa tambe ku nos tin ku stima nos próhimo. (Mat. 22:37-39) Manera nos lo bai mira den e siguiente artíkulo, ora nos ta stima Yehova i su prinsipionan, ta bira mas fásil pa nos stima nos próhimo tambe.