1. Ngera uchul me a bltikerreng er a delongelel a Jesus me a Demal a mlukeroul?

 A JESUS a milsaod er a kmes el deleuill er ngii me a Demal el kmo: “Ng betik a renguk er a Chedam,” e dirrek el dilu el kmo, “A Chedam a betik a rengul er a ngalek.” (Jn. 5:20; 14:31) A uchei er a lemei er a chutem a Jesus e ngmla er a eanged el oureor el obengkel a Demal el betok el biliol el rak. (Osi. 8:30) Me seikid el taem e a Jesus a milsuub a betok el tekoi el kirel a blekerdelel a Demal, me a bltikerreng er a delongelir a mlukeroul.

2. (a) Ngera belkul sel dedu el kmo ngbetik a rengud er a chad? (b) Ngera el ker a bo dosaod?

² A lsekum ngbetik a rengum er a chad e ke blechoel el kerekikl el melatk er ngii. A David a milengitakl el kmo: “Ng betik a renguk er kau e RUBAK, el klisichek.” (Psa. 18:1) Tiaikid a kirel el mo uldesued el bedul a Dios. Ngii a tibir el kmo a lsekum kede mo olengesenges er ngii e ngmo betik a rengul er kid. (Monguiu er a Duteronomi 7:12, 13.) Engdi ngmekerang e sebechel el mo betik a rengud er a Dios el ngii a diak el sebeched el mesang? Ngera belkul sel dedu el kmo ngbetik a rengud er a Jehovah? Ngera uchul me ngkirel el mo betik a rengud er ngii? E kede mekerang e ochotii el kmo ngbetik a rengud er ngii?

3, 4. Ngera uchul me ngsebeched el mo betik a rengud er a Jehovah?

³ A Dios a diak a bedengel el rruul er a tech me a rasech me ngdiak el sebeched el mesang. (Jn. 4:24) Me nguaisei, engdi kid a dirk sebeched el mo betik a rengud er a Dios. Me a Biblia a mengelechel er kid el mo betik a rengud er Ngii. El ua tiang a Moses a dilu er a rechad er a Israel el kmo: “Bo le betik a rengum er a RUBAK el Dios er kau er a rengum el rokir ma klengar er kau el rokir ma klisichem el rokir.”​—Dut. 6:5.

⁴ Ngera uchul me ngsebeched el mo betik a rengud er a Dios? Ngii a ulemeob er kid el rruul el kired el mengull er ngii, e dirrek el milskid a duch er kid el mo oubltikerreng. Me sel bo dodengelii a Jehovah e a bltkil a rengud el mo er ngii a mukeroul, e tiang a rullid el mo dmeu a rengud. Tiakid a mle belkul a tekingel a Jesus er a ledu el kmo: “Te ngeltengat a re medengei el kmo te chebuul a lak lousbech er a Dios; ele te mediukes er a Rengedel a Dios!” (Mt. 5:3) Ngar er a babilengel a A. C. Morrison el Man Does Not Stand Alone, e ngmilsaod el kmo, ngkmal mengasireng el tekoi, e le ngar er a reksi er a klechad el me lmuut er chelechang e a rechad a blechoel el osiik er a Dios e sorir el mo oumerang er Ngii. Me ngua losaod ngika el chad, a rebetok a medengei el kmo kede mechell el ngar er ngii a urunguled el soad el mo medengelii a Dios.

5. Kede mekerang e medengei el kmo ngsebeched el mo medengelii a Dios?

⁵ Me kid ngsebeched el mo medengelii a Dios? Ochoi, ngkmal soal a lebo er ngii a deleuill er kid el obengkel. A apostol el Paulus a mileketeklii tiang er sera longedecheduch er a rechad el mle kldibel er a Athens er a irechar. A ruumesingd er tir a ulemdasu el kmo ngklou a ultutelel el kirir el mo er a templo el mo mengull er a chelid el Athena. Engdi a Paulus a dilu er tir el kmo ngsebechir el mo medengelii a mera el Dios el “ngikel milebii a beluulchad ma ikel bek el ngar a chelsel.” Ngmilsaod el kmo a Dios a diak lekiei er a chelsel a templo. Me a rechad el sorir el mo medengelii a sebechir el mo medengelii er a chelsel a ngii di el basio er a beluulechad. E sola e dilu el kmo: “Ngdi Dios a diak le cheroid er a derta er kid.” (Rel. 17:24-27) Me a rechad a sebechir el mo medengelii a Dios. Te kuk betok er a euid me a tedobech el miliol el Sioning er a Jehovah a mla mo medengelii e mera el betik a rengrir er ngii.

6. Ngera sel “kot el ngarbab el llach e kot el klou a belkul”?

⁶ Ngkirel el mo ua ngerang a delechel a bltkil a rengud el mo er a Jehovah? Sera loker er a Jesus a ta el Farisi el kmo: “Sensei, ng ngeral Llach a kot el ngarbab er ngii el rokui?” e a Jesus a dilu el kmo: “‘Bo le betik a rengum er a Rubak el Dios er kau er a rengum el rokir, ma klengar er kau el rokir, ma uldesuem el rokir.’ Tiaikid a kot el ngarbab el llach e kot el klou a belkul.”​—Mt. 22:34-38.

7. Ngera belkul a bo lebetik a rengud er a Dios er a (a) ‘rengud el rokir’? (b) ‘klengar er kid el rokir’? (c) ‘uldesued el rokir’?

⁷ Me ngera mle belkul a tekingel a Jesus er a ledu el kmo ngkirel el mo betik a rengud er a Dios er a ‘rengud el rokir, ma klengar er kid el rokir, ma uldesued el rokir’? A ‘rengud el rokir’ a melutk el kirel aike el mera el urunguled me aike el ngar er a rengud. E a ‘klengar er kid el rokir’ a mesaod er aike el rokui el doruul er a klengar er kid. E a ‘uldesued el rokir’ a mesaod el kirel sel rolel a domdasu a tekoi me aike el tekoi el domdasu. Ngokiu tiaikid el rolel e a Jesus a mileketeklii a belkul a bo lebetik a rengud er a Jehovah.

8. Kede mekerang e ochotii el kmo ngbetik a rengud er a Dios?

⁸ Kede ochotii el kmo ngbetik a rengud er a Dios er a rengud el rokir, me a klengar er kid el rokir, me a uldesued el rokir, sel deblechoel el mesuub er a Biblia, e doruul a soal, e leblak a rengud el ouchais er a rechad el kirel a Rengedel. (Mt. 24:14; Rom 12:1, 2) Me sel doruul aika el rokui e a deleuill er kid el obengkel a lmuut el mo mesisiich. (Jak. 4:8) Me alta ngdiak el sebeched el lmuches a rokui el uchul me ngkired el mo betik a rengud  er a Dios, engdi ngungil a bo dosaod a bebil er ngii.

9. Ngera uchul me ngbetik a rengum er a Jehovah?

⁹ A Jehovah a ngike el Ulemeob er kid e dirrek el meskid aike el rokui el dousbech. A Paulus a dilu el kmo: “Ngii a uchul e kede outeliil, e mengitengtik e ngar ngii a klengar er kid.” (Rel. 17:28) A Jehovah a mla meskid tia el kmal klebokel el beluulechad el delengchekled. (Psa. 115:16) Ngdirrek el meskid a keled me a lmuut el bebil er a tekoi el uchul me ngsebeched el melemolem el ngar. Seikid a uchul me a Paulus a dilu er a rechad er a Listra el kmo ngdiak el kirir el mengull a bleob el chelid, e ngbai kirir el mengull er a Jehovah el “di ngar el Dios.” Ngmilsaod er a Dios el kmo: “Ng oltengel er a chull er a eanged el ekor kemiu e meskemiu a dellomel er sel ungil belsechel, e meskemiu a keliu e omekeek a rengmiu er a deurreng.” (Rel. 14:15-17) Me ngoeak a bltkil a rengul a Jehovah e ngomeskid aike el rokui el dousbech. Me tiang a kmal ungil el uchul me ngkired el mo betik a rengud er ngika el Ulemeob er kid!​—Oli. 12:1.

10. Ngua ngera uldesuem el kirel a olubet el tenget?

¹⁰ A Dios a mo okngemedii a klengit me a kodall el demludiukes er ngii er a Adam. (Rom 5:12) A Biblia a kmo: A “Dios a ulechotii a bltkil a rengul er kid, ele ser a dirk de ngar a klengit, e a Kristus a mlad el kired.” (Rom 5:8) Me a lsekum kede mera el ouuchel er a rengud er a kngtid e obult e dirrek el mo oumerang er a olubet el tenget, e a Dios a mo ousubes a kngtid. Kede oba klou el omereng el saul el bedul a Jehovah e le ngbltkil a rengul er kid a uchul me nguldureklii a Ngelekel el me mad el kired.​—Jn. 3:16.

11, 12. Ngoeak a ngera el rolel e a Jehovah a meskid a omelatk?

¹¹ A Jehovah a meskid a omelatk el mo kiei el mo cherechar. (Rom 15:13) Tia el omelatk a ngosukid el mo outekangel a ngii di el omelsemai er a klaumerang er kid. A reblak a rengrir el ngellitel a oba omelatk el mo kiei er a eanged el diak a ulebengelel. (Och. 2:10) E a rebebil el blak a rengrir a oba omelatk el mo kiei er a Baradis el chutem el mo cherechar. (Psa. 37:29) Me ngua ngera uldesued el kirel a omelatk el dobang? Ngmeskid a klou el deurreng me a budech e smisichii a bltkil a rengud el mo er a Dios el ngike el omeskid “a bek el ungil e cherrungel sengk.”​—Jak. 1:17.

¹² A Jehovah a meskid a omelatk el kirel a okiis. (Rel. 24:15) Ngkmal mo mekngit a rengud sel lemad a betik er a rengud. Engdi a klengiterreng el dobang a diak leua kngtil a rengrir “itirkel chad el diak a omeltkir,” e le Jehovah a mla tibir el kmo ngmo olekiis er a rulekoad el lmuut el me ngar. (1 Th. 4:13) A Jehovah a kmal semeriar el omes el beduluchei el kirel seikid el taem. Ngkmal oureng el mo olekiis er a rebetok el miliol el chad el ileakl tirke el mle blak a rengrir el mo er ngii. (Job 14:15) Ka di molatk er sel taem el deluut el mo omes er a rengalek el mo teloi er a redemerir me a rederrir me a rebetik er a rengrir el sechelirir! A Jehovah a mildesuii a okiis, e tilbir el mei er kid, e dirrek el mo otutii ngii el telbilel. Ngkmal betik a rengud er a Jehovah el ngii a meskid tia el mengasireng el omelatk.

13. Kede mekerang e medengei el kmo a Dios a omekerreu er kid?

¹³ A Jehovah a kmal omekerreu er kid. (Monguiu er a Psalm 34:6, 18, 19; 1 Petrus 5:6, 7.) Me lmuut er chelechang e kede melechesuar a ulekerreu e le kede medengei el kmo a Jehovah a di kltmokl el olengeseu er tirke el blak a rengrir el mo er ngii. (Psa. 79:13) Engdi ka di molatk el kirel aike el bo loruul a Dios er a ngar medad el klebesei. A Jesus a King er a Rengedel a Dios e ngii a mo okngemed a rokui el uldikel, ringel me a mekngit el omeruul el ngar tia el chutem. E sola e a Dios a mo mesterir a rokui el chad a budech me aike el rokui el tekoi el lousbech me bo ledeu a rengrir. (Psa. 72:7, 12-14, 16) Me sel dolemolem el melatk aika el telbiil e ngrullid el lmuut el mo betik a rengud er a Dios el oba rengud, me a klengar er kid me a klisiched me a uldesued el rokir.​—Lk. 10:27.

14. Ngerang a ileakl el techall el bla lebeskid a Dios?

¹⁴ A Jehovah a mla meskid a ileakl el techall me  kede mo Sioning er ngii. (Isa. 43:10-12) Ngbetik a rengud er a Dios e le ngmeskid a techelled el mo melisiich er a omengederederel, e dirrek el ouchais er tia el omelatk el dobang el mo er a rechad el chuarm a klengar er tir. Ngdirrek el ulterekokl a rengud e ngar er ngii a klaumerang er kid, el ngosukid el mo ouchais er a ungil chais el mo er a rechad. Me ngera uchul me ngulterekokl a rengud? A klumech el domerk er ngii a mengai er a Tekingel a Dios el Biblia, e a telbiil el ngar er a chelsel a ulterekokl el mo tmaut. (Monguiu er a Josua 21:45; 23:14.) Me ngar er ngii a kmal betok el ungil el uchul me ngkired el mo betik a rengud er a Jehovah. Engdi kede mekerang e ochotii el kmo ngbetik a rengud er ngii?

15. Ngmekerang e sebechel a omesuub me a otutel a Tekingel a Dios el ngosukid?

¹⁵ Bo deblechoel el mesuub e doltaut a Tekingel a Dios. A doruul el uaisei e kede ochotii el kmo ngbetik a rengud er a Jehovah e kmal soad a Tekingel a bo lomekrael er a klengar er kid. (Psa. 119:105) Sel taem el dechelebangel a ringel, e ngsebechel el mo mechelaod a rengud er a telbiil el ua aikang: “A oltubokl e bekongesenges el reng a diak moltngakl er ngii.” “A diak le mengodech el bltkil a rengum a urrekedak. Sel lesal mo ouedikel a renguk, e ng kau a cholodak e rullii a renguk el mo ungil.” (Psa. 51:17; 94:18, 19) A Jehovah me a Jesus a olecholt a klechubechub el mo er tirke el rokui el chuarm. (Isa. 49:13; Mt. 15:32) Me sel dosuub er a Biblia e ngsebeched el mesuub el kirel a bltkil a rengul a Jehovah el mei er kid. E tiang a lmuut el smisichii a bltkil a rengud el bedul ngii.

16. Ngmekerang e a deblechoel el meluluuch e ngmekurulii a bltkil a rengud el mo er a Dios?

¹⁶ Bo blechoel el meluluuch el mo er a Dios. Sel doluluuch el mo er a Dios e lemonger a nglunguched e nglmuut el mukeroul a bltkil a rengud el mo er ngii. (Psa. 65:2) El ua tiang, nglocha ngar er ngii a tekoi el dilubech er a klengar er kid e Ngii a ngilsukid el mo sebeched el outekangel er ngii. (1 Ko. 10:13) Me a lsekum e ngsuebek a rengud er a tekoi e debo er a Jehovah el olengit a ngeso, e ngsebeched el mo melechesuar a “budech er a Dios,” el di ta el Jehovah a sebechel el meskid. (Fil. 4:6, 7) A lebebil er a taem e kede meluluuch el ngar er a rengud el ua Nehemia, e a uriul e kede mo medengei el kmo a Jehovah a ulenger a nglunguched. (Neh. 2:1-6) Me sel dolemolem el meluluuch e bo longer a nglunguched a Jehovah e a bltkil a rengud el mo er ngii a lmuut el mukeroul.  Me sel lebo lemeasem a klaumerang er kid e ngulterekokl a rengud el kmo a Jehovah a mo ngosukid el outekangel.​—Rom 12:12.

17. A lsekum e ngbetik a rengud er a Dios, e ngmo ua ngerang a uldesued el kirel aike el miting er kid?

¹⁷ Bo deblechoel el ngar er a miting me aike el meklou el ongdibel er kid. (Heb. 10:24, 25) A rechad er a Israel a mlo kldibel e orrenges e mesuub el kirel a Jehovah me bo losuub el mo meluu er Ngii e dirrek el olengesenges a Llechul. (Dut. 31:12) Me a lsekum e ngmera el betik a rengud er a Jehovah e kede mo blechoel el mo er aike el miting er a Rekristiano. (Monguiu er a 1 Johanes 5:3.) Me bo leblak a rengud el mo er aike el rokui el miting er kid. Ngkmal diak el kired el oridii sel bltkil a rengud el mo er a Jehovah el dulebang er a dekot el mo mesuub el kirel.​—Och. 2:4.

18. A bltkil a rengud el mo er a Dios, ngrullid el mo mekerang?

¹⁸ Bo leblak a rengud el ouchais er a klemerang el mo er a rechad. (Gal. 2:⁠5) A bltkil a rengud el mo er a Dios a rullid el mo soad el ouchais er a rebebil el kirel a Rengedel. Sel taem er a Armakedon e a Jesus a mo mesebechakl er a llemeltel a Jehovah el mengedereder. (Psa. 45:4; Och. 16:​14, 16) Ngdmeu a rengud el olengeseu er a rechad el mo mesuub el kirel a bltkil a rengul a Dios me sel telbilel el kirel a beches el beluulechad!​​​—Mt. 28:​19, 20.

19. Ngera uchul me ngkired el oba omereng el saul el bedul a remechuodel er a ongdibel?

¹⁹ Mochotii a omereng el saul er kau el kirir a remechuodel er a ongdibel. (Rel. 20:28) A Jehovah a mla meskid a Rekristiano el mechuodel e le ngmedengei el kmo ngmo uchul a klungioled. Me tirka el mechuodel a “ua omerotel er a eolt el ua ikel mengeluolu er kid er a meses el eolt. Te mo ua omoachel el omaoch er a cheliliik el beluu e mo ua chungel a kloul risois el ngar a medideriik el beluu.” (Isa. 32:1, 2) Ka di molatk er sel taem el lengar er ngii a chull me a ses el eolt e ke ngar er a chelsel a basio er a ulekerreu, me a lechub e ke ngar er a mechuu el basio er sel taem el kmal klou a kleald! Tiang a di osisiu el blekeradel el ua sel taem el remechuodel a olengeseu e melisiich er kid sel dousbech a ngeso me bo el sebeched el melemolem el mesiou er a Jehovah er a chelsel a meringel el taem er a klengar er kid. Me ngera uchul me kede olengesenges er a remechuodel? E le kid el oba omereng el saul el kirir tirka el odam el tir a ua “sengk,” e dirrek el betik a rengud er a Jehovah me a Kristus el Bdelul a ongdibel.​—Efe. 4:8; 5:23; Heb. 13:17.

MOLEMOLEM EL OMEKEROUL ER A BLTKIL A RENGUM EL MO ER A DIOS

20. A lsekum ngbetik a rengum er a Dios, e ke mo mekerang?

²⁰ A Jehovah a mla meskid “a diak a telemellel el llach,” el olisechakl er kid el kirel aike el rokui el soal a bo doruul. (Monguiu er a Jakobus 1:22-25.) Engdi a lsekum ngsoam a bo lemesisiich a deleuill er kau me a Jehovah e ngdiak el sebechem el di orrenges er ngii e lemerekong. (Psa. 19:7-11) Ngdirrek el kirem el oltaut a tekoi el mosuub. El ua tiang, kau el betik a rengum er a Dios a uchul, me ke melasem el ouchais er a rechad el kirel e dirrek el onger er a temel a miting.

21. Ngsebechem el omekesiu a nglunguchem el mo er a ngerang?

²¹ Kede blechoel el meluluuch el mo er a Jehovah e le ngbetik a rengud er ngii. Ngar er a beluu er a Israel e a reprist a millul a ochod el mo er a Jehovah er a bek el sils. Me a King el David a ulemekesiu a nglunguchel el mo er a ochod er a longitakl el kmo: “A nglunguchek bo le ua ochod er medam, ma kudars a chimak e le ua tenget a le kebesengei.” (Psa. 141:2; Exo. 30:7, 8) A Jehovah a rirenges a nglunguchel a David. Me a lsekum kede meluluuch el oba klengariourreng me a omereng el saul e a nglunguched a mo ua ungil a bul el ochod el odeuir a rengul a Jehovah.​—Och. 5:8.

22. Ngera kede mo mesuub er a ongingil el suobel?

²² A Jesus a dilu el kmo ngkired el mo betik a rengud er a Dios, e dirrek el dilu el kmo ngkired el mo betik a rengud er a rengar bita er kid. (Mt. 22:37-39) Sel lebetik a rengud er a Jehovah me a llechul e ngosukid el mo betik a rengud er a rengar bita er kid. Kede mo mesuub er a belkul tia el tekoi er a ongingil el suobel.