1. ¿Imaraykun Jesuspas Jehová Diospas astawan munanakurqanku?

MANARAQ kay pachaman hamushaspan Jesusqa hanaq pachapi unay watakuna taytanwan kuska ‘llank’arqan’ (Prov. 8:30). Chaypin Jesusqa taytanmanta tukuy imaymanata yacharqan. Chhaynapitaqmi astawan munanakurqanku. Chaychá Jesusqa nirqan: ‘Yayaytan munakuni’, nispa. Nillarqantaqmi: ‘Yayapas Churitan munakun’, nispa (Juan 14:31; Juan 5:20).

2. ¿Ima tapuykunatan kay estudiopi kutichisun?

² Rey Davidmi takirqan: “Señor Diosníy, munakuykin, kallpachaqniymi kanki”, nispa (Sal. 18:1). Chhaynatan ñoqanchispas Jehová Diostaqa munakunanchis. Sichus payta kasukusun chayqa astawanmi munakuwasun (leey Deuteronomio 7:12, 13). Manataq Diosta rikunchischu chayqa, ¿atisunmanchu Dios munakuyta? ¿Iman Diosta munakuy? ¿Imaraykun Diosta munakunanchis? ¿Imaynatan rikuchisunman Diosta munakusqanchista?

3, 4. ¿Imaraykun llapa runakunapas Dios munakuyta atinchis?

³ “Diosqa Espiritun” chaymi mana rikuyta atinchischu (Juan 4:24). Chaywanpas atisunmanmi pay munakuyta. Bibliapunin  chayta ruwananchispaq kallpachawanchis. Moisesmi Israel llaqtata nirqan: “Diosninchis Señor Diosta munakuychis tukuy sonqoykichiswan, tukuy almaykichiswan, tukuy kallpaykichispiwan”, nispa (Deut. 6:5).

⁴ ¿Imaraykun Dios munakuyta atinchis? Diosmi kamawarqanchis payta yupaychananchispaq, munakuq kananchispaq, chayraykun payta munakunchis. Diosta reqsispaqa astawanmi munakunchis, aswan kusisqataq kanchispas. Chaymi Jesús nirqan: “Kusisamiyoqmi huch’uyyaykukuspa Diosta maskhaqkunaqa, paykunapaqmi hanaq pacha qhapaqsuyuqa”, nispa (Mat. 5:3). Hinaspapas askha runakunan ninku llapa runapas Diosta munakunanchispaq hina nacesqanchista. Abraham C. Morrison runan libronpi nirqan, llapa runapas Diosta maskhasqanta, Diospi iñiyta munasqantapas (“Manan sapallanchischu kashanchis”, inglés simipi).

5. ¿Imaynapin yachanchis Diosta tariy atisqanchista?

⁵ ¿Tarisunmanchu Diosta? Arí tarisunmanmi. Diosqa paywan amigontin kananchistan munan. Chaytan apóstol Pablo sut’incharqan Atenas llaqta runakunaman. Chay runakunaqa Atenas dioskunata yupaychaqmi templokunaman riq kanku. Ichaqa Pablon nirqan ‘kay pachata chaypi tukuy imaymana kaqtapas kamaq’ Diosta tariy atinankuta. Chaymantapas nirqanmi: ‘Payqa manan runakunaq ruwasqan wasikunapichu tiyan’, nispa. Kay hallp’apiña runakuna tiyanku chaypas, maskhaspankuqa atinkumanmi Dios tariyta. Pablon nirqan: “Diosqa manan sapankanchismantaqa karupichu kashan”, nispa (Hech. 17:24-27). Arí, Dios tariytaqa atisunmanmi. 7.900.000 más runakunañan Diosta tarirqanku, paykunan Jehová Diospa testigonkuna kanku.

6. ¿Mayqenmi Diospa kamachikuyninmanta aswan chaniyoq kamachikuy?

⁶ ¿Imaynatan Diosta munakunanchis? Fariseo runan Jesusta tapurqan: “Yachachikuq, ¿mayqentaq Diospa kamachikuyninmantaqa aswan chaniyoq?”, nispa. Hinan Jesusqa kutichirqan: “Señor Diosniykitan munakunki tukuy sonqoykiwan, tukuy almaykiwan, tukuy yuyayniykipiwan. Chaymi aswan chaniyoq ñawpaqkaq kamachikuyqa”, nispa (Mat. 22:34-38).

7. ¿Imaynatan Diosta munakusunman a) ‘tukuy sonqowan’? b) ‘tukuy almawan’? c) ‘tukuy yuyaywan’?

⁷ ¿Ima ninantan Jesús nisharqan Diosta munakunki “tukuy sonqoykiwan, tukuy almaykiwan, tukuy yuyayniykipiwan”, nispa? ‘Tukuy sonqowan’ nispaqa nishan sonqonchis ukhupi imayna sientekusqanchismanta, imakunata munasqanchismantawanmi. ‘Tukuy almawan’ nispaqa nishan imayna runa kasqanchismanta, imayna kawsayniyoq kasqanchismantawanmi. ‘Tukuy yuyaywan’ nispataq nishan tukuy yachasqanchiskunamanta. Chaykunan rikuchin Diosllapaqña kawsananchis kasqanta, Diosllapiña yuyayninchis kananta.

8. ¿Imaynatan rikuchinchis Diosta munakusqanchista?

⁸ ¿Imaynatan rikuchinchis Diosta tukuy sonqonchiswan, tukuy almanchiswan, tukuy yuyayninchiswan munakusqanchista? Bibliata allinta estudiaspa, kamachiwasqanchista tukuy sonqowan ruwaspa, gobiernonmanta willaspa iman (Mat. 24:14; Rom. 12:1, 2). Tukuy chaykunata ruwaspan astawan Diosman asuykusun (Sant. 4:8). Ichaqa, ¿imaraykun Diosta munakunchis? Wakinmanta yachasun.

9. ¿Imaraykun Jehová Diosta munakunki?

⁹ Jehová Diosmi kamaqninchis, paymi  tukuy imatapas qowanchis. Pablon nirqan: ‘Payraykun kawsanchispas, purinchispas, kashanchispas’, nispa (Hech. 17:28). Arí, Diosmi kay hallp’ata runakunaman qowarqanchis (Sal. 115:16). Hinaspapas kawsananchispaqmi qowanchis mikhunata, tukuy imaymanatapas. Chaymi Listra llaqtapi tiyaq runakunata apóstol Pablo nirqan idolokunata amaña yupaychanankupaq, aswanpas ‘kawsaq Diosta’ yupaychanankupaq. Nillarqantaqmi: “Diosqa imapas allinta ruwasqanwanmi reqsichikurqan. Paymi parachimun, chakrakunatapas tiemponpi ruruchin, mikhunatapas askhata qowanchis, sonqonchistapas anchata kusichin”, nispa (Hech. 14:15-17). Chhaynapunin Diosqa, payqa ancha munakuq kasqanraykun mana imatapas faltachiwanchischu. Chaymi kamaqninchistaqa munakunchis (Ecl. 12:1).

10. ¿Imaynan sientekunki Jesuspa sacrificakusqanmanta?

¹⁰ Diosmi huchamantapas wañuymantapas kacharichiwarqanchis (Rom. 5:12). Biblian nin: “Diosmi ichaqa munakuyninta rikuchiwanchis, huchasaparaq kashaqtinchis Cristoq wañupuwasqanchiswan”, nispa (Rom. 5:8). Sonqomantapuni pesapakuspa Jesuspa sacrificionpi iñisun chayqa, Jehová Diosmi huchanchiskunata pampachanqa (Juan 3:16). ¡Maytan Jehová Diosta gracias ninchis churin ñoqanchisrayku wañupusqanmanta!

11, 12. ¿Imakunatan Jehová Dios prometewarqanchis?

¹¹ Jehová Diosmi thak kawsayta prometewanchis (Rom. 15:13). Chay prometewasqanchismi yanapawanchis ima sasachakuykunapiña tarikuspapas Diospaq hunt’aqllapuni kananchispaq. Hanaq pachapaq akllasqa cristianokunan “wiñay kawsay coronata” chaskinqaku hunt’aq kasqankurayku (Apo. 2:10). Wakin hunt’aq runakunataq kay hallp’api wiñaypaq tiyanqaku huk sumaq paraisopi (Luc. 23:43). Chaymi “tukuy allin kaqkunatapas, tukuy chanin kaqkunatapas” qoq Diosta munakunchis, chaykunamantataq anchata kusikunchis (Sant. 1:17).

¹² Diosmi wañusqakunaq kawsarimpunanta prometewanchis (Hech. 24:15). Munakusqanchis runakuna wañupuqtinqa llakikunchismi, ichaqa manan ‘mana suyakuyniyoq’ runakuna hinachu (1 Tes. 4:13). Jehová Diosmi munan llapa runakuna kawsarichiyta, astawanqa pay sonqo runakunata (Job 14:15). ¡Maytachá kusikusun wañuqkuna kawsarimpuqtinqa! Chaypin tupasunchis munakusqanchis runakunawan. Chaykunamantan Jehová Diosta gracias nisunchis. ¡Maytan Jehová Diosta gracias ninchis chay promesankunamanta!

13. ¿Imaynapin yachanchis Jehová Dios cuidawasqanchista?

¹³ Jehová Diosmi cuidawanchis (leey Salmo 34:6, 18, 19; 1 Pedro 5:6, 7). Yachanchismi Diosqa llapa serviqninkunata yanapashasqanta, chaymi llaqtanpiqa mana imamantapas manchakunchischu (Sal. 79:13). Hinaspapas churin Jesucristowanmi kay pachapi millay kawsayta tukuchinqa, chanin runakunataqmi thakpi wiñaypaq kawsanqaku (Sal. 72:7, 12-14, 16). Chaykunata yachaymi kallpachawanchis Jehová Diosta tukuy sonqowan, tukuy almawan, tukuy kallpawan, tukuy yuyaywan munakunanchispaq (Luc. 10:27).

14. ¿Imapaqmi Jehová Dios akllakuwarqanchis?

¹⁴ Jehová Diosmi testigonkuna kananchispaq akllakuwarqanchis (Is. 43:10-12). Diostan munakunchis llank’aysiqmasin kananchispaq akllawasqanchismanta. Chay hinapin sasachakuykunapi kashaq runakunaman allin willakuykunata apanchis.  Mana iskayaspataqmi chaykunata willanchis. ¿Imarayku? Diospa cheqaq siminwan runakunata yachachisqanchisrayku. Hinaspapas, llapa prometesqantan Diosqa hunt’anpuni (leey Josué 21:45; 23:14). Tukuy chaykunaraykun Diostaqa anchata munakunchis. Ichaqa, ¿imaynatan rikuchisunman cheqaqtapuni munakusqanchista?

15. ¿Imaynatan yanapawanchis Bibliata estudiasqanchis chayman hina kawsasqanchispas?

¹⁵ Bibliata estudiaspa, yachasqanchisman hina kawsaspa. Chaykunata ruwaspan Dios munakusqanchista rikuchinchis, simin qelqawan yanapawananchista munasqanchistapas (Sal. 119:105). Ima sasachakuypipas tarikuqtinchisqa, Bibliapi Diospa promesankunata leeymi sonqochawanchis. Chaykunan kanman: “Qanqa manan qhawarparinkichu llakikuq huch’uyyaykukuq sonqoyoqtaqa”, nisqan. Chaymantapas kallanmantaqmi: “Señor Diosníy, munakuwaspayki yanapaykamuwarqanki. Sonqoyta llakikuna ñit’iykushaqtinmi, qanqa sonqochaykuwanki kusirichiwanki” nisqan (Sal. 51:17; 94:18, 19). Jehová Diospas Jesuspas khuyapayankun sasachakuypi tarikuqkunata (Is. 49:12; Mat. 15:32). Bibliata estudiaspan reparanchis Jehová Diosqa sapankanchista munakuwasqanchista. Chaytaqmi yanapawanchis astawan payta munakunanchispaq.

16. ¿Imaraykun Diosmanta sapa kuti mañakuqtinchis astawan payta munakunchis?

¹⁶ Sapa kuti mañakuspa. Mañakuqtinchisqa astawanmi Diosman asuykunchis (Sal. 65:2). Yaqapaschá yuyashanchis mana atipana hina sasachakuypi tarikushaqtinchis Diospa yanapawasqanchista (1 Cor. 10:13). Llakiq ñit’isqanpaschá tarikusharqanchis hinaspa Diosmanta mañakuqtinchis ‘thak-kayta qowarqanchis’ (Filip. 4:6, 7). Mayninpiqa Nehemías hinapaschá sonqonchis ukhullapi mañakurqanchis, hinaspa Diospa uyariwasqanchista repararqanchis (Neh. 2:1-6). Arí, Jehová Diosmanta sapa kutilla mañakuqtinchis paypa kutichimusqanta rikuspan,  astawan payta munakunchis astawantaq paypi confianchis (Rom. 12:12).

17. ¿Imaynatan huñunakuykunata qhawarinanchis?

¹⁷ Huñunakuyninchista ama saqespa (Heb. 10:24, 25). Israel runakunaqa Diospa siminta uyarinankupaq, Diosta yupaychanankupaq iman huñukuqku. Chayta ruwaspan Jehová Diosta astawan munakuqku, kamachikuynintapas kasukuqku (Deut. 31:12). Diosta munakuspaqa, manan mayqen huñunakuymanpas faltakusunchu, manataqmi sasapaqchu qhawarisun (leey 1 Juan 5:3). Chayraykun kallpachakunanchis llapa huñunakuykunaman rinanchispaq. Chay hinapin Jehová Diosta munakushallasun (Apo. 2:4).

18. ¿Ima llank’aytan ruwashanchis Diosta munakuspa?

¹⁸ Allin willakuykunata willaspa (Gál. 2:5). Diosta munakusqanchismi kallpachawanchis waranqa wata Jesuspa kamachikuyninmanta willananchispaq. Paymi Armagedonpi ‘cheqaq-kayta’ hunt’achinanpaq maqanakunqa (Sal. 45:4; Apo. 16:14, 16). Runakunamanmi willashanchis Diospa munakuyninmanta, huk sumaq paraíso qowananchismantapas. ¡Maytan kusikunchis chaykunata willaspa! (Mat. 28:19, 20.)

19. ¿Imaraykun agradecekunanchis iñiq t’aqapi umallikunata?

¹⁹ Umallikunaq llank’asqanta agradecekuspa (Hech. 20:28). Jehová Diosqa llapanchistan yanapayta munawanchis, chaymi umallikunata churapuwanchis. Paykunan kanku “wayramanta pakakuna hina, chikchi pukllaymanta pakakuna hina, ch’aki hallp’api qarpana unu yarqha hina, ch’in pampapi llanthuykukuna hatun qaqa hina” (Is. 32:1, 2). ¡Maytan kusikunchis sinchi wayra otaq sinchi ruphay kashaqtin pakaykukunata tarispa! Chay hinatan umallikunapas yanapawanchis sasachakuykunapi tarikuqtinchis. Hinaspapas umallikunata kasukuspan rikuchinchis Diostapas Jesustapas munakusqanchista (Efes. 5:23; Heb. 13:17).

20. ¿Imakunatan ruwananchis Diosta munakuspa?

²⁰ Jehová Diosta munakusun chayqa kamachikuyninkunatan kasukusun, ‘manan yanqa uyariqkunallachu kasunchis’ (leey Santiago 1:22-25). Kasukuq kaspaqa tukuy sonqowanmi predicasun, huñunakuykunamanpas manan faltakusunchu. Jehová Diostaqa tukuy sonqowanmi munakunchis, chaymi ‘hunt’asqa kamachikuy simintaqa’ kasukunchis (Sal. 19:7-11).

21. ¿Imamanmi rikch’akun mañakuyninchis?

²¹ Hinaspapas Diosta munakusqanchisraykun mañakunchis. Israel llaqtapi sacerdotekunaqa, sapa p’unchaymi inciensota Diospaq ruphachiqku. Chaychá rey Davidqa mañakuyninkunata inciensowan rikch’anachirqan, paymi takirqan: “Mañakamusqay ñawpaqeykiman incienso q’apay hina wicharimuchun, makiyta mast’arimusqaypas tardeyaykuy sacrificio hina kachun”, nispa (Sal. 141:2; Éx. 30:7, 8). Ñoqanchispas huch’uyyaykukuspa sonqomanta mañakusunchis chayqa, sumaq q’apaq incienso hinan mañakuyninchis Jehová Diospaq kanqa (Apo. 5:8).

22. ¿Imamantan qatimuq estudiopi yachasun?

²² Jesusmi nirqan Diosta munakunanchista, ichaqa nillarqantaqmi runamasinchistapas munakunanchista (Mat. 22:37-39). Jehová Diosta munakusun kamachikuyninkunatapas kasukusun chayqa, manan sasachu kanqa runamasinchiskunata munakuy. Chaytan qatimuq estudiopi yachasun.