1. ¿Imamandata Jesusca paipa Taitata ashtahuan juyarca?

JEHOVÁ DIOSMANDA parlashpaca Jesusca nircami: ‘Ñuca Taitatami juyani’, ‘ñuca Taitapash juyahuanmi’ nishpa (Juan 5:20; 14:31). ¿Imamandata Jesusca paipa Taitata ninanda juyarca? Nara cai Alpaman shamushpaca ashtaca ashtaca huatacunatami Jesusca Jehová Dioshuan jahua cielopi causashpa tucuipi ayudajurca (Prov. 8:30). Ashtaca huatacunata Taita Dioshuan igual cashpami Jesusca Taita Dios imashina cajta ricushpa ashtahuan juyarca. Taita Diospash ashtahuanmi Jesustaca juyarca.

2. a) Davidpa ejemplota catishpaca ¿imashinata sintirinchi? b) ¿Ima tapuicunatata yachajugripanchi?

² Rey Davidca nircami: “Ñuca shinlli torreshna Mandaj Dioslla, candaca juyanimari” nishpa (Sal. 18:1). Ñucanchipash Jehová Diostaca juyanami canchi. Bibliapica ninmi, cazujpica Taita Diospash cangunata juyashcata ricuchingami nishpa (Deuteronomio 7:​12, 13, liingui). Shinapash ¿imashinata pipash na ricushca Taita Diostaca juyashun? Taita Diosta juyanaca ¿imata can? ¿Imamandata Taita Diostaca juyana canchi? Taita Diosta juyashcataca ¿imashinata ricuchishun?

3, 4. Gentecunaca ¿imamandata Taita Diosta juyai ushanchi?

³ ‘Taita Dios espíritu’ cajpimi paitaca na ricui ushanchi (Juan 4:24). Na ricushpapash Taita Diostaca juyai ushanchimi. Chaimandami Moisesca israelitacunataca nirca: “Canda Mandaj Taita Diostaca, cambaj tucui shunguhuan, tucui almahuan, tucui ushaihuan juyangui” nishpa (Deut. 6:5).

⁴ Shinapash ¿imamandata Taita Diostaca juyai ushanchi? Taita Diosllatami ñucanchitaca paita rijsina munaihuan, juyaita ricuchina munaihuan rurarca. Chaimandami Jehová Diosta ashtahuan rijsishpaca ashtahuan paita juyashpa cushilla sintirinchi. Taita Diosta rijsishpa cushilla sintirina cajpimi Jesusca nirca: ‘Diosmanda yachajungapaj, paicunapa shungupi ninanda munajcunaca, ninandami cushijun. Jahua pachamanda mandanaca paicunapami’ can nishpa (Mat. 5:3). Abraham C. Morrison escritorca nircami, ali cuenta japijpica tucui gentecunami Taita Diosta mascashpa Taita Diospi cringapaj munan nishpa (Man Does Not Stand Alone). Ashtaca gentecunapash pensanmi, gentecunaca Taita Diosta rijsina munaihuanmi nacirishcanchi nishpa.

5. ¿Imashinata yachanchi, Taita Diostaca tarinalla cashcata?

⁵ Taita Diosca paita mascashpa tarichunmi munan. Apóstol Pablopa tiempopi Atenas llactamanda gentecunata yarishun. Paicunaca Atenea nishca huarmi diosta adorangapami shuj temploman rin carca. Chaimandami apóstol Pabloca paicunapash Taita Diosta tari ushachun nirca: ‘Diosllatami cai pachatapash, cai pachapi ima tiashcatapash rurashca. Paica jahua pachata, cai pachata Mandaj cashpami, gentecuna rurashca huasicunapica na tiajun. Shujlla runamanda shuj shuj gentecuna mirashpa causanajuchunmi Diosca rurashca. Causashpallata Taita Diosta mascashpa, tuparichunmi munan. Paica ñucanchimandaca na carupi canllu’ nishpa (Hech. 17:​24-27). Imashinami ricunchi, Taita Diostaca tari ushanchimi. Chaimandami cunanbica 7 millón medio yali testigo de Jehovacuna Taita Diosta rijsishpa tucui shunguhuan juyanajun.

6. Jesús nishca shinaca ¿maijan mandashcata ashtahuan yali can?

⁶ Jehová Diostaca tucui shunguhuanmi juyana canchi. Shuj punllaca shuj fariseomi Jesustaca tapurca, Leypi mandashcacunamandaca maijandata ashtahuan yarina canchi nishpa. Shina nijpimi Jesusca nirca: ‘Canba Taita Diostaca, tucui shunguhuan, tucui almahuan, tucui yuyaihuan juyangui. Cai mandashcami, tucuimanda punda ashtahuan yali ali’ can nishpa (Mat. 22:​34-38).

7. Jesusca ¿imamandata nirca Taita Diostaca a) tucui shunguhuanmi juyana canguichi, b) tucui almahuanmi juyana canguichi, c) tucui yuyaihuanmi juyana canguichi?

⁷ ¿Imamandata Jesusca nirca, Taita Diostaca tucui shunguhuan, tucui almahuan, tucui yuyaihuanmi juyana cangui nishpa? Tucui shunguhuan nishpaca tucui cangunapa munaicunahuan juyaichi nijurcami. Tucui almahuan nishpaca tucui causaihuan, tucui rurashcacunahuan juyaichi nijurcami. Tucui yuyaihuan nishpaca tucui pensamientocunahuan juyaichi nijurcami. Shinaca, tucui ñucanchi causaihuan, tucui ñucanchi charishcacunahuanmi Taita Diostaca juyana cashcanchi.

8. Taita Diosta juyaimandaca ¿imatata rurana capanchi?

⁸ Taita Diosta tucui shunguhuan, tucui almahuan, tucui yuyaihuan juyashpaca empeñarishpami Bibliataca yachajushun. Paipa mandashcacunatapash cazushunmi. Villachitapash cushijushpami villachishun (Mat.  24:14; Rom. 12:​1, 2). Taita Diosta shungu ucumanda juyashpaca ashtahuan ashtahuanmi paiman quimirishun (Sant. 4:8). Shinapash ¿imamandata Taita Diostaca juyana canchi? Huaquin yuyaicunata ricupashun.

9. Quiquinga ¿imamandata Jehová Diosta juyapangui?

⁹ Jehová Diosmi causaitapash, tucui ima minishtishcacunatapash caran. Apóstol Pabloca nircami: “Paimandami causanchi, purinajunchi, imatapash ruranchi” nishpa (Hech. 17:28). Cai Alpatapash Jehová Diosmi cushca (Sal. 115:16). Ñucanchi munashca micunatapash, tucui ima minishtishcacunatapash paimi cushca. Chaimandami apóstol Pabloca Listra llactamanda yanga dioscunata adoraj gentecunataca nirca: ‘Pai juyaimandami tamiachishpa granocunatapash fucuchishpa, ñucanchiman carashpa cushichijun’ nishpa (Hech. 14:​15-17). Shinaca ¿nachu ñucanchiman tucuita carashcamandaca Taita Diosta juyana cashcanchi? (Ecl. 12:⁠1.)

10. Jesús ñucanchimanda huañushcata yachashpaca ¿imashinata sintiripanchi?

¹⁰ Taita Diosmi ñucanchitaca Adanba juchamandapash huañuimandapash salvashca (Rom. 5:12). Bibliaca ninmi: ‘Taita Diosca paipa juyaita ñucanchiman ricuchishpami ñucanchi juchayu cajpipash, Cristomi ñucanchimanda huañurca’ nishpa (Rom. 5:8). Juchacunamanda tucui shunguhuan arripintirishpa, Jesuspi feta churajpica Jehová Diosca ñucanchita perdonangami. Shinaca ¿nachu ñucanchimanda huañuchun paipa Churita cachamushcamandaca Diosta ashtahuan juyanchi? (Juan 3:16.)

11, 12. Jehová Diosca ¿imatata rurasha nishca?

¹¹ Jehová Diosmi shamuj punllacunapica cushilla, tranquilo causaita caranga (Rom. 15:13). Shamuj punllacunapi para siempre causanata yachashpami llaquicuna shamujpipash aguantanchi. Ungidocunaca jahua cielopimi causanga (Apoc. 2:10). Cutin ashtacacunaca Jehová Diosta ali sirvijuimandami shuj juyailla paraíso Alpagupi causanga (Luc. 23:43). Chashna ali causaita Taita Dios caranata yachashpaca ¿nachu cushilla, tranquilo sintirishpa tucuita ali caraj Taita Diostaca ashtahuan juyana cashcanchi? (Sant. 1:17.)

¹² Taita Diosmi huañushcacunata causachisha nin (Hech. 24:15). Shuj familia huañujpica tucuicunami ninanda llaquirinchi. Shinapash huañushcacunata Taita Dios causachinata yachaimandami, llaquirishpapash causarinata na yachaj gentecunashnaca na yapata llaquirinchi (1 Tes. 4:13). Jehová Diosca huañui tiachunga na munanllu. Chaimandami ashtaca huañushcacunata, ashtahuanbachaca paita sirvijcunata causachingapaj munan (Is. 25:8). Ñucanchi juyashca familiacuna o rijsicuna causarijpica ninandami cushijushun. Huañushcacunata causachisha nijpimi Jehová Diostaca ashtahuan juyanchi.

13. Jehová Diosca ¿imashinata ricuchishca ñucanchimanda preocuparishcata?

¹³ Jehová Diosca cada unomandami preocuparin (Salmo 34:​6, 18, 19; 1 Pedro 5:​6, 7, liingui). Ñucanchica cada punllami ricushcanchi imashinami Jehová Diosca paipa sirvijcunata ayudajta (Sal. 79:13). Ñucanchita juyaimandami shamuj punllacunapicarin, Jesusta paipa Reinopi mandachun churashpa tucuilla llaquicunata, tucuilla nalicunata tucuchinga. Shinami Jehová Diosta cazuj gentecunaca cushilla, tranquilo, imamandapash na pinarishpa causashun (Sal. 72:​7, 12-14, 16). Chashna ali causaita Taita Dios caranata yachashpaca ¿nachu tucui shunguhuan, tucui almahuan, tucui ushaihuan, tucui yuyaihuan juyana cashcanchi? (Luc. 10:27.)

14. Jehová Diosca ¿ima bendiciondata carashca?

¹⁴ Paipa testigo cana bendiciondami Jehová Diosca carashca (Is. 43:​10-12). Paipa Reinota  apoyachun saquishcamanda, sufrijuj gentecunata ali villaicunahuan animachun saquishcamandami Jehová Diostaca juyanchi. Bibliapi nishcacunapash siempremi pactarin. Chaimandami imatapash na manllashpa Bibliahuan villachinchi (Josué 21:45; 23:​14, liingui). Imashinami ricunchi Jehová Diostaca juyanami cashcanchi. Shinapash ¿imashinata paita juyashcataca ricuchishun?

15. Bibliata yachajuna, Bibliapi yachajushcacunata pactachinaca ¿imashinata ayudan?

¹⁵ Bibliata yachajunata na saquishpa, Bibliapi yachajushcacunatapash pactachishpami Jehová Diosta juyashcata, Biblia ñucanchita ayudachun munashcatapash ricuchinchi (Sal. 119:105). Llaquipi cashpaca Salmo 51:17​tapash liishpa animarishunchi. Caipica ninmi: ‘Taita Dioslla, ninanda llaquirishca ali shungutaca na yangapi churanata’ yachanguichu nishpa. Shuj textocunapipash ninmi: ‘Mandaj Dioslla canmi llaquishpa charihuarcangui. Ñuca shungu ucupi ashtacata musparijujpica, canba cushichishcacunami ñuca almatapash cushichihuarca’ nishpa (Sal. 94:​18, 19). Jehová Diospash Jesuspash gentecuna sufrijujpica llaquirishpami ricun (Is. 49:13; Mat. 15:32). Bibliata yachajunami ñucanchitaca Jehová Dios ñucanchimanda preocuparijta cuenta japishpa, paita ashtahuan juyachun ayudanga.

16. ¿Imamandata Jehová Diosta cutin cutin mañashpaca paita ashtahuan juyanchi?

¹⁶ Cutin cutin mañashpami Jehová Diosman ashtahuan quimirinchi. Ñucanchicuna mañajpi Jehová Dios ‘uyajujta’ sintishpami paitaca ashtahuan juyanchi (Sal. 65:2). Jehová Diosca ñucanchi oraciongunata uyashpami ñucanchi nali munaicunata o tentaciongunata aguantachun ayudashca (1 Cor. 10:13). Llaquipi cashpa mañajpica tranquilo, ali sintirichunmi ayudan (Filip. 4:​6, 7). ¿Nachu huaquinbica Nehemías shina shungu ucupilla mañashpapash jipamanga cuenta japishcanchi Jehová Dios ñucanchita ayudashcata? ( Neh. 2:​1-6.) Jehová Diosta cutin cutin mañashpami Jehová Dios uyajushcata cuenta japishpa paita ashtahuan juyanchi,  ñucanchita ayudanatapash seguro canchi (Rom. 12:12).

17. Jehová Diosta juyashpaca ¿imatata tandanajuicunamandaca pensashun?

¹⁷ Congregacionbi tandanajuicunaman, jatun tandanajuicunamanbash na faltashpami Taita Diosta juyashcata ricuchinchi (Heb. 10:​24, 25). Israelitacunaca Jehová Diosmanda uyangapaj munashpa, shinallata Jehovata rijsingapaj munashpami tandanajuicunaman rin carca. Shinami paicunaca Jehová Diosta tucui shunguhuan respetashpa adorarca, paipa mandashcacunatapash cazurca (Deut. 31:12). Ñucanchicunapash Jehová Diosta juyashpaca tucui tandanajuicunaman ringapami esforzarina canchi (1 Juan 5:​3, liingui). Imashinami Jehová Diosta rijsi callarishpaca cushijushpa tandanajuicunaman ri callarircanchi shinallatami rishpa catina canchi (Apoc. 2:4).

18. Taita Diosta juyaimandaca ¿imatata rurapanchi?

¹⁸ ‘Ali villaicunataca’ cushijushpami villanchi (Gál. 2:5). Jehová Diosta juyaimandami gentecunamanga Diospa Reinomanda villanchi. Armagedonbimi Jehová Dioslla mandana cashcata Jesusca ricuchinga (Sal. 45:4; Apoc. 16:​14, 16). Taita Dios ñucanchita juyashcata, shamuj punllacunapi ali causaiguta caranata gentecunaman yachachishpaca ninandami cushijunchi (Mat. 28:​19, 20).

19. ¿Imamandata ancianocunata churashcamandaca agradicina capanchi?

¹⁹ Ancianocunata churashcamanda agradicishunchi (Hech. 20:28). Jehová Diosca ñucanchipi pensarishpami congregacionbi ancianocunata churashca. Paicunaca ‘ninan huairamanda, jatun acapanamanda pacajunashnami can. Chaquishca pambapi yacu Ilujshishpa rijunshnami can. Ninan rupai pambapi, jatun rumi llandushnami can’ (Is. 32:​1, 2). Llaquicunapi o problemacunapi cajpica ninan huairamanda pacajuchinshna, ninan rupaimanda llanduchinshnami ancianocunaca Jehová Diosmanda ama caruyachun ñucanchitaca cuidarian. Jehová Dios churashca ancianocunata cazushpami ancianocunatapash, Jehová Diostapash, Jesustapash agradicishcata ricuchinchi (Efes. 5:23; Heb. 13:17).

20. Jehová Diosta tucui shunguhuan juyashpaca ¿imashinata Santiago 1:​22-25​pi nishcata cazushun?

²⁰ Jehová Diosta tucui shunguhuan juyashpaca, ‘paipa Shimitaca pactachishunmi, na yanga uyashpalla purinajushunllu’ (Santiago 1:​22-25, liingui). Diospa Shimita pactachishpaca tucui shunguhuanmi villachishun, tandanajuicunapipash comentashunmi. Taita Diosta juyaimandami paipa tucui mandashcacunata cazunchi (Sal. 19:​7-11).

21. Ñucanchi mañashcacunataca ¿imahuanda chimbapuranchiman?

²¹ Jehová Diosta juyaimandami cutin cutin mañanchi. Punda tiempo israelitacunapa sacerdotecunaca Jehovaman nishpami tucui punllacuna mishquilla ashnajuj inciensota rupachin carian. Chaimandami rey Davidca nirca: ‘Ñuca mañajuj shimicunaca, inciensota cushnichijpishna canba ñaupajman vichai ripachun’ nishpa (Sal. 141:2; Éx. 30:​7, 8). Shinaca mishquilla ashnajuj inciensotashna Jehová Dios chasquichunga ninanda agradicishpa, alabashpa, tucui shunguhuanmi mañana canchi (Apoc. 5:8).

22. Shamuj temapica ¿imatata yachajupashun?

²² Jesusca nircami, Taita Diosta tucui shunguhuan juyashca jipaca shujcunatapashmi juyana canguichi nishpa (Mat. 22:​37-39). Shinapash Diosta juyana, paipa consejocunata cazunaca ¿imashinata shujcunata juyachun ayudan? Chai tapuitaca shamuj temapimi yachajupashun.