1. Yini leyabangela kutsi lutsandvo emkhatsini waNkulunkulu neNdvodzana yakhe lukhule?

JESU KHRISTU, indvodzana yaJehova yatsi: “Ngiyamtsandza Babe.” (Joh. 14:31) Jesu waphindze watsi: “Babe uyayitsandza iNdvodzana.” (Joh. 5:20) Loko akukafaneli kusimangalise. Phela ngesikhatsi asengaketi emhlabeni, Jesu wacitsa iminyaka leminyenti ‘ayingcweti yekwakha’ yaNkulunkulu. (Taga 8:30) Njengobe Jehova naJesu bebasebenta kanye kanye, Jesu wafundza lokunyenti ngebunguye baBabe wakhe futsi bekanetizatfu letinyenti tekumtsandza. Ecinisweni, kuba ndzawonye sikhatsi lesidze ngiko lokwakhulisa lutsandvo lwabo.

2. (a) Lufaka ekhatsi ini lutsandvo? (b) Ngumiphi imibuto lesitawucoca ngayo?

² Lutsandvo lufaka ekhatsi kuba nemuva lojulile ngalotsite. Umhlabeli Davide wahlabela: “Ngiyakutsandza, Simakadze, wena, longemandla ami.” (Hla. 18:1) Nguleyo indlela lokufanele sitive ngayo ngaNkulunkulu ngobe uyasitsandza. Nangabe simlalela Jehova naye utasitsandza. (Fundza Dutheronomi 7:12, 13.) Kodvwa singakhona yini vele kutsandza Nkulunkulu nanobe singamboni? Kusho kutsini kutsandza Jehova? Kungani kufanele simtsandze? Singalukhombisa njani lutsandvo lesinalo ngaNkulunkulu?

3, 4. Kungani singakhona kutsandza Jehova?

³ “Nkulunkulu unguMoya”; ngako ngeke sikwati kumbona. (Joh. 4:24) Nanobe kunjalo, singakhona kumtsandza Jehova, futsi imiBhalo isikhutsata kutsi sivete lutsandvo lesinalo ngaye. Nasi sibonelo: Mosi watjela ema-Israyeli watsi: “Tsandza Simakadze Nkulunkulu wakho, ngayo yonkhe inhlitiyo yakho, nangawo wonkhe umphefumulo wakho, nangawo onkhe emandla akho.”—Dut. 6:5.

⁴ Kungani singakhona kumtsandza ngalokujulile Nkulunkulu? Kungobe wasidala sinesidzingo sekufuna kumati futsi wasenta kutsi sikhone kukhombisa lutsandvo. Nangabe sidzingo setfu sekwati Nkulunkulu sisinakekela kahle, lutsandvo lwetfu ngaJehova luyakhula futsi siba netizatfu tekujabula. Jesu watsi: “Bayajabula labo labanakisisa tintfo letiphatselene naNkulunkulu, ngobe uMbuso welizulu ngewabo.” (Mat. 5:3) Mayelana nesifiso lesitalwa sinaso sekufuna kukhonta Nkulunkulu, incwadzi leyabhalwa ngu-A. C. Morrison letsi “Man Does Not Stand Alone” yatsi: “Kufanele kusimangalise kubona indlela bantfu labamfunisisa ngayo umuntfu lophakeme kakhulu futsi bakholelwe kuye.”

5. Sati njani kutsi kufuna Nkulunkulu akusiko kudlala ngesikhatsi?

⁵ Kukudlala ngesikhatsi yini kufuna Nkulunkulu? Cha, ngobe uyafuna kutsi simtfole. Umphostoli Pawula wakucacisa loku ngesikhatsi afakaza ecenjini lebelihlangene e-Ariyophagusi. Lapho bebakhona khona, bebayibukela bucalu iParthenon—lokulithempeli lebelinikelwe ku-Athena, nkulunkulukati webantfu base-Athene yasendvulo. Ticabange nawe ukhona njengobe Pawula akhuluma ‘ngaNkulunkulu lowadala umhlaba nako konkhe lokukuwo,’ bese uchaza kutsi “akahlali emathempelini lentiwe ngetandla.” Lomphostoli wengeta ngekutsi atsi Nkulunkulu “tive tonkhe watenta ngemuntfu munye kute tihlale emhlabeni wonkhe, futsi wabeka tikhatsi kanye nemikhawulo lapho bantfu bebatawuhlala khona, kute bafune Nkulunkulu ngekutimisela futsi bamtfole, nanobe ecinisweni angekho khashane kuloyo naloyo kitsi.” (Imis. 17:24-27) Bantfu bangamtfola Nkulunkulu. Tigidzi letingetulu kwesikhombisa nehhafu taBoFakazi BaJehova ‘timtfolile’ futsi timtsandza mbamba.

6. Ngumuphi umtsetfo Jesu latsi ‘ngumtsetfo lomkhulu newekucala’?

⁶ Lutsandvo lwetfu ngaJehova kufanele lusuke ekujuleni kwenhlitiyo. Jesu wakwenta kwacaca loko ngesikhatsi lomunye umFarisi ambuta atsi: “Mfundzisi, ngumuphi umtsetfo lomkhulu eMtsetfweni waMosi?” Jesu wamphendvula watsi: “‘Kufanele utsandze Jehova Nkulunkulu wakho ngayo yonkhe inhlitiyo yakho, nangawo wonkhe umphefumulo wakho, nangayo yonkhe ingcondvo yakho.’ Lona ngiwo umtsetfo lomkhulu newekucala.”—Mat. 22:34-38.

7. Kusho kutsini kutsandza Nkulunkulu (a) “ngayo yonkhe inhlitiyo” yetfu? (b) ‘ngawo wonkhe umphefumulo’ wetfu? (c) ‘ngayo yonkhe ingcondvo’ yetfu?

⁷ Bekasho kutsini Jesu nakatsi kufanele sitsandze Nkulunkulu “ngayo yonkhe inhlitiyo” yetfu? Bekasho kutsi kufanele sitsandze Jehova ngenhlitiyo yetfu yonkhe lengumfanekiso, lokufaka ekhatsi tifiso tetfu, imiva yetfu netinhloso tetfu. Kufanele simtsandze “nangawo wonkhe umphefumulo” wetfu, nobe ngemphilo yetfu yonkhe. Ngetulu kwaloko, kufanele sitsandze Nkulunkulu ‘ngayo yonkhe ingcondvo’ yetfu, nobe kucabanga kwetfu konkhe. Intfo lebalulekile kutsi sitsandze Jehova ngalokuphelele, ngaphandle kwekutigodla.

8. Kutsandza Nkulunkulu ngalokuphelele kutasikhutsata kutsi senteni?

⁸ Nangabe sitsandza Nkulunkulu ngenhlitiyo yetfu yonkhe, umphefumulo kanye nengcondvo, sitakukhutsalela kufundza liVi lakhe. Sitawenta loko lakufunako ngenhlitiyo yetfu yonkhe, futsi sitimisele kushumayela tindzaba letimnandzi teMbuso. (Mat. 24:14; Rom. 12:1, 2) Nangabe simtsandza mbamba Jehova, sitawusondzelana kakhulu  naye. (Jak. 4:8) Kuliciniso kutsi ngeke sikhone kutibala tonkhe tizatfu letisenta sitsandze Nkulunkulu. Nanobe kunjalo, asesicoce ngaletimbalwa tato.

9. Kungani utsandza Jehova longuMdali wetfu kanye neMuphi wetfu?

⁹ Jehova unguMdali wetfu kanye neMuphi wetfu. Pawula watsi: “Ngaye siyaphila, siyanyakata, futsi sikhona.” (Imis. 17:28) Jehova usiphe likhaya letfu lelihle lelingumhlaba. (Hla. 115:16) Uphindze asinikete kudla kanye naletinye tintfo lesitidzingako kuze sichubeke siphila. Kungako Pawula atjela takhamuti taseListra lebetikhonta tithico kutsi ‘ngekwenta kwakhe lokuhle, Nkulunkulu lophilako wativeta kini kutsi ungubani. Wanehlisela imvula ezulwini, waniletsela netikhatsi tenala, waninika nekudla lokunyenti futsi wagcwalisa tinhlitiyo tenu ngenjabulo.’ (Imis. 14:15-17) Leso akusiso yini sizatfu lesisenta sitsandze uMdali wetfu Lomkhulu kanye neMuphi lonelutsandvo?—Shu. 12:1.

10. Lilungiselelo laNkulunkulu lekususa sono nekufa kufanele lisitsintse njani?

¹⁰ Nkulunkulu wente emalungiselelo ekususa sono nekufa lesakutfola ku-Adamu. (Rom. 5:12) Kuliciniso kutsi “Nkulunkulu ukhombisa lutsandvo lwakhe kitsi, ngobe ngesikhatsi sisetoni, Khristu wasifela.” (Rom. 5:8) Asingabati kutsi tinhlitiyo tetfu tiphuphuma lutsandvo ngaJehova ngobe wente indlela yekutsi sitfole intsetselelo yetono tetfu nangabe siphendvuka futsi sikhombisa kukholwa emhlatjelweni wenhlawulo yaJesu.—Joh. 3:16.

11, 12. Ngutiphi tindlela Jehova lasinikete ngato litsemba?

¹¹ Jehova ‘usinika litsemba lelisigcwalisa ngenjabulo nekuthula.’ (Rom. 15:13) Litsemba lesiliniketwe nguNkulunkulu lisenta sikhone kubeketelela tintfo letivivinya kukholwa. Labo labagcotjiwe ‘labahlala betsembekile kuze kube sekufeni, batawunikwa umchele wekuphila kwasezulwini.’ (Semb. 2:10) Labo labagcina bucotfo labanelitsemba lekuphila emhlabeni, batawujabulela tibusiso taphakadze ePharadisi leletsenjisiwe. (Luk. 23:43) Sitiva njani ngalamatsemba? Awasenti yini sijabule, futsi sibe nekuthula kanye nelutsandvo ngeMuphi wato “tonkhe tipho letinhle naletiphelele”?—Jak. 1:17.

¹² Nkulunkulu usinikete litsemba lelijabulisako leluvuko. (Imis. 24:15) Kuliciniso kutsi siva buhlungu kakhulu nakufa lotsite lesimtsandzako, kodvwa ngenca yelitsemba lesinalo leluvuko ‘asidzabuki njengalabo labete litsemba.’ (1 Thes. 4:13) Ngenca yekutsi unelutsandvo, Jehova Nkulunkulu uyakulangatelela kuvusa labafile, ikakhulukati labo labetsembekile lokufaka ekhatsi Jobe. (Jobe 14:15) Asewucabange ngenjabulo letawuba khona ngalesikhatsi labavusiwe bemukelwa emhlabeni. Tinhlitiyo tetfu tigcwala lutsandvo ngaBabe wetfu losezulwini, losinikete litsemba lelijabulisako leluvuko!

13. Ngubuphi bufakazi lobukhombisa kutsi Nkulunkulu usikhatsalela mbamba?

¹³ Jehova usikhatsalela mbamba. (Fundza Tihlabelelo 34:6, 18, 19; 1 Phetro 5:6, 7.) Ngesizatfu sekutsi siyati kutsi Nkulunkulu lonelutsandvo uhlale akulungele kusita labo labetsembekile kuye, sitiva sivikelekile njengobe siyincenye ‘yetimvu telidlelo lakhe.’ (Hla. 79:13) Ngetulu kwaloko, lutsandvo Nkulunkulu lanalo ngatsi lutawubonakala kuloko latasentela kona asebentisa uMbuso wakhe lobuswa nguMesiya. Ngemuva kwekutsi iNkhosi layikhetsile lenguJesu Khristu isuse budlova, kucindzetelwa kanye nebubi emhlabeni, bantfu labalalelako batawubusiswa ngekuthula kwaphakadze nemphilo lenhle. (Hla. 72:7, 12-14, 16) Awuvumi yini kutsi letetsembiso tisiniketa sizatfu sekutsandza Nkulunkulu wetfu losikhatsalelako ngenhlitiyo yetfu yonkhe, umphefumulo, emandla kanye nengcondvo?—Luk. 10:27.

14. Nguliphi lilungelo lelikhulu kakhulu Nkulunkulu lasinike lona?

¹⁴ Jehova usinike lilungelo lelikhulu kakhulu lekuba BoFakazi bakhe. (Isa. 43:10-12) Siyamtsandza Nkulunkulu ngekutsi  usinike litfuba lekusekela bukhosi bakhe nekuletsela bantfu litsemba lelingulonalona kulelive lelinetinkinga. Ngetulu kwaloko, singakhuluma ngekukholwa nangekuciniseka ngobe simemetela tindzaba letimnandzi letisekelwe eVini laNkulunkulu weliciniso, futsi tetsembiso takhe tihlale tifezeka. (Fundza Joshuwa 21:45; 23:14.) Ecinisweni tibusiso tetfu netizatfu lesinato tekutsandza Jehova tinyenti kakhulu. Kodvwa singalukhombisa njani lutsandvo lwetfu ngaye?

15. Kutadisha nekusebentisa liVi laNkulunkulu kusisita njani?

¹⁵ Tadisha ngekutimisela futsi usebentise liVi laNkulunkulu. Kwenta njalo kukhombisa kutsi siyamtsandza Jehova futsi sifuna livi lakhe libe ‘kukhanya endleleni yetfu.’ (Hla. 119:105) Nangabe sikhatsatekile, singatfola indvudvuto kulamavi elutsandvo lafana nalawa: ‘Inhlitiyo ledzabukile Nkulunkulu ngeke ayibukele phansi.’ “Simakadze wangisekela ngemusa wakhe, ngabuye ngema futsi. Ngesikhatsi inhlitiyo yami iphitsiteliswa ngimicabango, kudvudvuta kwakho kuyawutfokotisa umphefumulo wami.” (Hla. 51:17; 94:18, 19) Jehova ubakhombisa umusa labo labahluphekako, futsi naJesu uyavelana nabo. (Isa. 49:13; Mat. 15:32) Kutadisha liBhayibheli kungasenta sikhone kubona lutsandvo Jehova lanalo ngatsi, futsi loku kungasenta kutsi simtsandze ngalokujulile.

16. Kuthantaza njalo kungalwenta njani lutsandvo lwetfu ngaNkulunkulu lukhule?

¹⁶ Thantaza kuNkulunkulu njalo. Imithantazo yetfu isisondzeta kakhulu kuloyo ‘lova imithandazo.’ (Hla. 65:2) Nasibona kutsi Nkulunkulu uyayiphendvula imithantazo yetfu, lutsandvo lwetfu ngaye luyakhula. Nasi sibonelo: Mhlawumbe sibonile kutsi akasivumeli silingwe ngalokungetulu kwemandla etfu. (1 Khor. 10:13) Nangabe sikhatsatekile futsi sincusa Jehova ngebucotfo, singatfola “kuthula kwaNkulunkulu” lokungacatsaniswa nalutfo. (Fil. 4:6, 7) Ngaletinye tikhatsi singase sithantaze ngenhlitiyo njengobe Nehemiya enta, futsi siyibone imithantazo yetfu iphendvuleka. (Neh. 2:1-6) Njengobe ‘siphikelela emthantazweni’ futsi sibona kutsi Jehova uyayiphendvula, lutsandvo lwetfu ngaye luyakhula, nekuciniseka kutsi utasisita sihlangabetane nekuvivinywa kwekukholwa kwetfu, nako kuyakhula.—Rom. 12:12.

17. Nangabe simtsandza Nkulunkulu, sitakutsatsa njani kuba khona emihlanganweni?

 ¹⁷ Bani khona njalo emihlanganweni yebuKhristu, emihlanganweni lekhetsekile, yesifundza neyesigodzi. (Heb. 10:24, 25) Ema-Israyeli bekahlangana kute alalele futsi afundze ngaJehova kuze amhloniphe futsi ente lokushiwo nguMtsetfo wakhe. (Dut. 31:12) Nasimtsandza sibili Nkulunkulu, ngeke kube ngumtfwalo kumlalela. (Fundza 1 Johane 5:3.) Ngako-ke, asingavumeli lutfo kutsi lusente sikutsatse njengalokungakabaluleki kuba khona emihlanganweni. Asifuni kutsi kube khona lokusilahlekisela lutsandvo lebesinalo ekucaleni ngaJehova.—Semb. 2:4.

18. Lutsandvo ngaNkulunkulu lusikhutsata kutsi senteni macondzana netindzaba letimnandzi?

¹⁸ Hlanganyela “liciniso letindzaba letimnandzi” nalabanye ngekutimisela. (Gal. 2:5) Lutsandvo lwetfu ngaNkulunkulu lusenta kutsi sikhulume ngeMbuso wakhe lobuswa yiNdvodzana yakhe letsandzekako, ‘letawugibela kute imele liciniso’ e-Amagedoni. (Hla. 45:4; Semb. 16:14, 16) Kujabulisa kakhulu kuba nencenye ekwenteni bantfu babe bafundzi ngekubasita kutsi bafundze ngelutsandvo lwaNkulunkulu nangemhlaba lomusha lawetsembisile!—Mat. 28:19, 20.

19. Kungani kufanele sikhombise kubonga ngelilungiselelo laJehova lekwelusa umhlambi wakhe?

¹⁹ Khombisa kubonga ngelilungiselelo laNkulunkulu lekwelusa umhlambi wakhe. (Imis. 20:28) Emadvodza lamadzala langemaKhristu asipho lesivela kuJehova, futsi yena uhlale enta tintfo letitawuzuzisa tsine. Lamadvodza lamadzala ‘afanana nesiphephelo emoyeni, abe ngumkhoselisi kuso sivunguvungu, abe njengemifula yemanti ehlane, afanane nelitfunti lelidvwala lelikhulu eveni lelomele emanti.’ (Isa. 32:1, 2) Sijabula kakhulu nasitfola indzawo yekukhosela nakunesivunguvungu nobe imvula lenkhulu! Nangabe lilanga lishisa likhipha umkhovu etjeni, sijabula kakhulu nasitfola umtfunti. Letinongo tenkhulumo tisenta sibone kutsi labadzala bayasisita ebuhlotjeni betfu naNkulunkulu futsi bayasicabula. Ngekulalela labo labaholako emkhatsini wetfu, sikhombisa indlela lesitijabulela ngayo ‘letipho letibantfu’ futsi sikhombise bufakazi belutsandvo lwetfu ngaNkulunkulu nangaKhristu, loyiNhloko yelibandla.—Ef. 4:8; 5:23; Heb. 13:17.

20. Nangabe umtsandza Nkulunkulu, utakutsintsa njani umbhalo waJakobe 1:22-25?

²⁰ Nangabe umtsandza Jehova, utawuba ‘ngumenti welivi, hhayi lovako kuphela.’ (Fundza Jakobe 1:22-25.) ‘Umenti’ welivi unekukholwa lokuveta imisebenti lemihle lefaka ekhatsi kushumayela ngenkhutsalo nekuhlanganyela emihlanganweni yebuKhristu. Ngesizatfu sekutsi umtsandza mbamba Nkulunkulu, utawulalela “umtsetfo [wakhe] lophelele” lofaka ekhatsi tonkhe tintfo latifunako kuwe.—Hla. 19:7-11.

21. Imithantazo yakho lesuka enhlitiyweni ingafaniswa nani?

²¹ Lutsandvo lonalo ngaJehova Nkulunkulu lutakwenta kutsi utfulule sifuba sakho kuye ngemthantazo. Akhuluma ngekushiswa kwemphepho onkhe emalanga ngaphansi kwesivumelwane seMtsetfo, umhlabeli Davide wahlabela: “Shangatsi umthandazo wami ungaba njengemphepho kuwe [Jehova]; nekuphakamisa kwami tandla akube kuwe njengemihlatjelo yakusihlwa.” (Hla. 141:2; Eks. 30:7, 8) Shengatsi ticelo takho, kuncusa, kanye nemavi akho ekudvumisa nekubonga Nkulunkulu lasuka enhlitiyweni, angaba njengemphepho lenuka kamnandzi lemelela kwemukelwa kwemithantazo yetfu.—Semb. 5:8.

22. Nguluphi luhlobo lwelutsandvo lesitawucoca ngalo esihlokweni lesilandzelako?

²² Jesu watsi kufanele sitsandze Nkulunkulu nabomakhelwane betfu. (Mat. 22:37-39) Njengobe sitawube sichubeka sifundza ngelutsandvo, kutsandza kwetfu Jehova netimiso takhe kutasisita kutsi sibe nebudlelwane lobuhle nebantfu, futsi sikhombise lutsandvo kubomakhelwane betfu.