1. Oinsá mak Jesus ho ninia Aman haburas sira-nia domin ba malu?

 JESUS hatete: “Haʼu hadomi Aman”, no “Aman hadomi Oan”. (João 5:20; 14:31) Ba tinan rihun ba rihun antes Jesus mai toʼo mundu, nia serbisu hamutuk ho ninia Aman Jeová. (Provérbios [Amsal] 8:30) Durante tempu naruk neʼe, Jesus aprende buat barak kona-ba ninia Aman nia hahalok, no sira-nia domin ba malu sai buras liután ba beibeik.

2. (a) Domin envolve hahalok saida deʼit? (b) Iha lisaun neʼe, ita sei koʼalia kona-ba pergunta saida deʼit?

² Domin envolve sentimentu neʼebé kleʼan. Bíblia hatete: “Jeová laran-diʼak tebes ho domin no laran-sadiʼa.” (Tiago 5:11) Tanba Jeová sente hanesan neʼe ba ita, ida-neʼe sei book ita atu hadomi fali nia. Se ita halo tuir Jeová, nia sei hatudu ninia domin mai ita. (Lee Deuteronômio [Ulangan] 7:12, 13. a) Maibé oinsá  mak ita bele hadomi Maromak neʼebé ita-nia matan la bele haree? Hadomi Jeová, neʼe katak sá? Tanbasá mak ita tenke hadomi nia? Iha dalan saida deʼit mak ita bele hatudu ita-nia domin ba nia?

3, 4. Tanbasá mak ita bele iha domin ba Maromak?

³ Ita la bele haree Maromak tanba “Maromak mak espíritu”. (João 4:24) Maski nuneʼe, ita bele hadomi Jeová. Tuir loloos, Bíblia haruka ita atu halo nuneʼe. Porezemplu, Moisés hatete ba povu Izraél: “Ó tenke hadomi Jeová ó-nia Maromak ho ó-nia laran tomak, ho ó-nia moris tomak, no ho ó-nia kbiit tomak.”—Deuteronômio (Ulangan) 6:5.

⁴ Tanbasá mak ita bele iha domin ba Maromak? Tanba nia kria ita ho hakarak no kbiit atu adora nia no hatudu domin. Nuʼudar ita koñese didiʼak Jeová, ita-nia domin ba nia sei sai buras liután, no ida-neʼe sei lori haksolok mai ita. Jesus hatete: “Kontente ba sira neʼebé hatene katak sira presiza Maromak nia matadalan, tanba Ukun lalehan nian mak sira-nian.” (Mateus 5:3) Livru ida hatete katak husi tempu uluk toʼo agora, ema sempre iha hakarak atu hakbesik ba Maromak no adora nia. Sin, ita hotu moris mai nuʼudar ema neʼebé presiza buka Maromak.—Livru Man Does Not Stand Alone, husi A. C. Morrison.

5. Oinsá mak ita bele hatene katak ita bele hakbesik ba Maromak?

⁵ Maibé hodi buka Maromak, neʼe saugati deʼit ba ita ka lae? Lae, tanba Maromak hakarak ita atu hakbesik ba nia. Apóstolu Paulo esplika kona-ba neʼe iha fatin ida naran Areópago iha sidade Atenas, besik templu neʼebé ema barak bá adora maromak-feto naran Atena. Paulo hatete ba ema-lubun neʼebé halibur iha fatin neʼe, katak Maromak loos “neʼebé halo mundu no buat hotu iha nia . . . la hela iha templu neʼebé ema nia liman mak halo”. Ema neʼebé buka Maromak bele “hetan Nia” maski sira hela iha fatin neʼebé deʼit. Paulo hatete: “Tuir loloos nia la dook husi ita ida-idak.” (Apóstolu 17:24-27) Sin, ema bele hakbesik ba Maromak. No Testemuña hamutuk naʼin-7.500.000 liu mak ‘hetan ona’ Jeová no hadomi loos nia.

6. Saida mak “mandamentu neʼebé boot liu no uluk liu”?

⁶ Ita-nia domin ba Maromak Jeová tenkesér mai husi laran. Bainhira ema farizeu ida husu ba Jesus: “Mestre, iha Moisés nia Ukun-Fuan, mandamentu ida-neʼebé mak boot liu?”, Jesus hatán: “‘Ó tenke hadomi Jeová ó-nia Maromak ho ó-nia laran tomak, ho ó-nia moris tomak, no ho ó-nia neon tomak.’ Neʼe mak mandamentu neʼebé boot liu no uluk liu.”—Mateus 22:34-38.

7. Liafuan tuirmai neʼe katak sá? Hadomi Maromak ho ita-nia (a) “laran tomak”, (b) “moris tomak”, no (c) “neon tomak”.

⁷ Kuandu hatete katak ita tenke hadomi Maromak ho ita-nia laran, moris, no neon tomak, Jesus hakarak dehan saida? Ho “laran tomak”, katak ita hadomi Jeová ho ita-nia hakarak no sentimentu. Ita mós tenke hadomi nia ho ita-nia “moris tomak”, ida-neʼe kona ba buat hotu neʼebé ita halo iha ita-nia moris. No ho “neon tomak”, katak ita tenke uza matenek tomak neʼebé ita iha hodi hadomi nia. Loos duni, ita tenke fó ita-nia domin hotu ba Jeová.

8. Domin ba Maromak sei book ita atu halo saida deʼit?

⁸ Se ita hadomi duni Maromak ho ita-nia laran, moris, no neon tomak, ita sei badinas estuda ninia Liafuan, halo tuir buat hotu neʼebé nia hakarak, no haklaken ho laran-manas kona-ba ninia Ukun. (Mateus 24:14; Roma 12:1, 2) Nuʼudar ita halo buat hirak-neʼe, ita-nia relasaun ho Jeová mós sai metin liután. (Tiago 4:8) Sin, ita iha razaun  barak tebes atu hadomi Maromak. Maibé mai ita koʼalia kona-ba razaun balu.

9. Tanbasá mak ita tenke hadomi Jeová?

⁹ Jeová mak ita-nia Kriadór no fó mai ita buat hotu neʼebé ita presiza. Paulo hatete: “Liuhusi nia mak ita hetan moris.” (Apóstolu 17:28) Jeová fó ba ita mundu kapás nuʼudar ita-nia hela-fatin. (Salmo [Mazmur] 115:16) Nia mós fó ai-han no buat oioin neʼebé ita presiza atu moris. Tan neʼe mak Paulo hatete ba ema iha Listra atu lalika adora estátua, maibé tenke adora Jeová, “Maromak neʼebé moris”. Paulo hatete: “Nia fó sasin kona-ba nia an liuhusi buat diʼak neʼebé nia halo, nia fó udan husi lalehan no fó ai-fuan iha nia tempu, hodi fó imi ai-han barak no halo nakonu imi-nia laran ho ksolok.” (Apóstolu 14:15-17) Tan domin, Jeová fó mai ita buat hotu neʼebé ita presiza. Ho razaun ida-neʼe mak ita hadomi Jeová ita-nia Kriadór, loos ka lae?—Eclesiastes (Pengkhotbah) 12:1.

10. Ita sente oinsá kona-ba Jesus nia sakrifísiu?

¹⁰ Maromak loke dalan ba ita atu sai livre husi sala no mate neʼebé daʼet husi Adão. (Roma 5:12) Bíblia hatete: “Maromak hatudu nia domin ba ita nuneʼe: Kristu mate ba ita kuandu ita sei sala-naʼin hela.” (Roma 5:8) Ita agradese tebes ba Jeová tanba se ita arrepende an ho laran no tau fiar ba Jesus nia sakrifísiu, Nia sei fó perdua ba ita-nia sala.—João 3:16.

11, 12. Jeová fó esperansa saida deʼit mai ita?

¹¹ Jeová fó mai ita esperansa atu moris ba nafatin. (Roma 15:13) Ida-neʼe ajuda ita atu tahan hasoru susar oioin neʼebé koko ita-nia fiar. Ema kristaun kose-mina sira iha esperansa atu hetan moris rohan-laek iha lalehan. (Apokalipse 2:10) Maromak nia atan sira seluk neʼebé laran-metin mós iha esperansa atu moris ba nafatin iha Paraízu iha mundu. (Lucas 23:43) Ita-nia esperansa halo ita sente oinsá? Ida-neʼe halo ita sente haksolok, dame, no domin ba Maromak neʼebé fó “prezente hotu neʼebé kompletu”.—Tiago 1:17.

¹² Jeová mós fó esperansa kona-ba moris-hiʼas. (Apóstolu 24:15) Kuandu ita-nia belun ka família mate, ita sente triste tebes. Maibé ita la sai “triste hanesan ema seluk neʼebé la iha esperansa” tanba Jeová promete atu halo ema mate moris hiʼas fali. (1 Tesalónika 4:13) Maromak Jeová hein namanas ba tempu neʼebé nia sei fó moris-hiʼas ba ema rihun ba rihun neʼebé mate ona, liuliu ninia atan sira. (Jó [Ayub] 14:15) Hanoin toʼok, ita sei sente oinsá bainhira ita hasoru malu fali ho ita-nia família no belun sira neʼebé moris hiʼas? Jeová mak promete moris-hiʼas no nia sei kumpre ida-neʼe. Ita hadomi tebes ita-nia Aman Jeová neʼebé fó esperansa furak neʼe mai ita.

13. Saida deʼit mak hatudu katak Maromak hanoin duni ita?

¹³ Jeová hanoin tebes ita. (Lee Salmo [Mazmur] 34:6, 18, 19; b 1 Pedro 5:6, 7.) Tanba ita hatene katak Jeová sempre prontu atu ajuda ninia atan neʼebé laran-metin, ida-neʼe halo ita sente seguru. (Salmo [Mazmur] 79:13) Hanoin toʼok kona-ba buat neʼebé Maromak sei halo mai ita iha aban-bainrua. Jesus nuʼudar Liurai ba Maromak nia Ukun sei halakon ema nia terus, violénsia, no buat aat hotu husi mundu neʼe. Tuirmai, nia sei haraik dame no buat hotu neʼebé ita sei presiza atu moris haksolok. (Salmo [Mazmur] 72:7, 12-14, 16) Hodi hanoin didiʼak kona-ba promesa sira-neʼe sei book ita atu hadomi ita-nia Maromak ho ita-nia laran, moris, kbiit no neon tomak.—Lucas 10:27.

14. Jeová fó serbisu espesiál saida mai ita?

¹⁴ Jeová fó mai ita serbisu espesiál atu sai  ninia Testemuña. (Isaías [Yesaya] 43:10-12) Ita hadomi Maromak tanba nia fó oportunidade mai ita atu apoia ninia Ukun no fahe ita-nia esperansa ba ema neʼebé iha susar laran. Ita bele haklaken liafuan diʼak ho fiar metin tanba ida-neʼe mai husi Maromak nia Liafuan Bíblia, no buat hotu neʼebé nia promete sempre sai loos. (Lee Josué [Yosua] 21:45; 23:14. c) Ita iha razaun barak atu hadomi Jeová. Maibé hodi halo saida deʼit mak ita bele hatudu domin neʼe?

15. Estuda Maromak nia Liafuan no moris tuir ajuda ita oinsá?

¹⁵ Estuda beibeik Maromak nia Liafuan no moris tuir buat neʼebé ita lee. Hodi halo ida-neʼe, ita hatudu katak ita hadomi Jeová no hakarak tebes ninia Liafuan atu hatudu dalan ba ita. (Salmo [Mazmur] 119:105) Bainhira ita hasoru susar, ita bele hetan kmaan husi eskritura sira hanesan: “Ema nia laran-tun no laran-kraik, oh, Maromak, Ita sei la hakribi.” “Bainhira haʼu-nia laran susar tebes, Ita fó kmaan no hamaus haʼu.” (Salmo [Mazmur] 51:17; 94:18, 19) Jeová no Jesus hatudu laran-sadiʼa ba ema neʼebé iha terus laran. (Isaías [Yesaya] 49:13; Mateus 15:32) Hodi estuda Bíblia, ita bele aprende Jeová nia domin ba ita, no ida-neʼe book ita atu haburas liután ita-nia domin ba nia.

16. Oinsá mak halo orasaun beibeik bele ajuda ita haburas domin ba Maromak?

¹⁶ Halo orasaun beibeik. Kuandu ita halo orasaun ba Maromak no haree oinsá nia hatán, ida-neʼe sei book ita atu hakbesik liután ba nia. (Salmo [Mazmur] 65:2) Porezemplu, karik ita haree katak Jeová la husik ita atu hasoru tentasaun toʼo ita la bele tahan. (1 Korinto 10:13) Kuandu ita laran-susar no husu ajuda ba Jeová, ita hetan “Maromak nia dame”. (Filipe 4:6, 7) Ita mós halo orasaun iha laran hanesan Neemias, no ikusmai ita haree katak Jeová hatán. (Neemias 2:1-6) Nuʼudar ita “la kole atu halo orasaun”  no haree oinsá Jeová ajuda ita, ita-nia domin ba nia sei sai buras liután, no ita-nia laran sai metin liután katak Jeová sei ajuda ita atu tahan hasoru situasaun saida deʼit neʼebé koko ita-nia fiar.—Roma 12:12.

17. Se ita hadomi Jeová, ita sente oinsá kona-ba tuir reuniaun sira?

¹⁷ Sai toman hodi tuir reuniaun kristaun no reuniaun boot sira beibeik. (Ebreu 10:24, 25) Povu Izraél iha toman atu halibur hamutuk hodi rona no aprende kona-ba Jeová atu adora nia no halo tuir ninia Ukun-Fuan. (Deuteronômio [Ulangan] 31:12) Se ita hadomi Maromak ho laran, ita sei la sente susar atu halo tuir ninia hakarak. (Lee 1 João 5:3.) Mai ita nunka husik buat ida hanetik ita atu tuir reuniaun sira. Selae, ita-nia domin uluk nian neʼebé ita iha ba Jeová sai menus.—Apokalipse 2:4.

18. Domin ba Maromak book ita atu halo saida?

¹⁸ Haklaken lia-loos ba ema seluk ho badinas. (Galásia 2:5) Ita-nia domin ba Maromak mós book ita atu koʼalia kona-ba ninia Ukun no Liurai Jesus neʼebé sei “defende lia-loos” iha funu Armajedón. (Salmo [Mazmur] 45:4; Apokalipse 16:14, 16) Ita haksolok tebes loos ka lae, hodi bele ajuda ema aprende kona-ba Maromak nia domin no kona-ba mundu foun!—Mateus 28:19, 20.

19. Tanbasá mak ita presiza hafolin katuas sira iha kongregasaun?

¹⁹ Hafolin katuas sira iha kongregasaun. (Apóstolu 20:28) Jeová hanoin ita-nia diʼak no fó mai ita katuas kristaun sira. Katuas sira-neʼe mak hanesan “subar-fatin husi anin no fatin seguru husi udan boot, hanesan bee neʼebé suli iha rai-maran, hanesan fatuk boot nia mahon iha rai neʼebé maran.” (Isaías [Yesaya] 32:1, 2) Kuandu udan boot tau no anin fuik mai no ita subar iha uma laran, ita sei sente seguru. Ka, iha loro-manas, bainhira ita halai ba mahon, ita sei sente kmaan no fresku. Nuneʼe mós ho katuas kristaun sira ohin loron, sira ajuda no fó laran-manas mai ita atu kontinua serbí Jeová maski ita hasoru susar oioin. Entaun, tanbasá mak ita halo tuir katuas sira? Tanba ita hadomi Jeová no Jesus nuʼudar kongregasaun nia Ulun, no ita mós hafolin katuas sira nuʼudar “prezente” neʼebé Jeová fó mai ita.—Éfeso 4:8; 5:23; Ebreu 13:17.

20. Tanba ita hadomi Maromak, ita hakaʼas an atu halo saida deʼit?

²⁰ Jeová fó ita “ukun-fuan neʼebé kompletu”, neʼebé fó sai buat hotu neʼebé nia hakarak ita atu halo. (Lee Tiago 1:22-25.) Se ita hakarak iha relasaun neʼebé metin ho Jeová, ita tenke ‘halo tuir liafuan, laʼós rona deʼit’. Porezemplu, tanba ita hadomi Maromak, ita sei hakaʼas an atu haklaken kona-ba nia no fó komentáriu iha reuniaun sira.—Salmo [Mazmur] 19:7-11.

21. Ita-nia orasaun bele kompara ho saida?

²¹ Domin ba Maromak Jeová book ita atu halo orasaun beibeik. Iha tempu uluk, amlulik sira sunu insensu ba Jeová loroloron. Liurai David kompara ninia orasaun hanesan ho insensu hodi kanta: “Simu haʼu-nia orasaun hanesan insensu neʼebé prepara tiha iha Ita [Jeová] nia oin, no haʼu-nia liman rua neʼebé see ba leten hanesan sakrifísiu fini nian neʼebé hasaʼe iha kalan.” (Salmo [Mazmur] 141:2; Êxodo [Keluaran] 30:7, 8) Kuandu ita halo orasaun husi laran ho haraik-an hodi fó hahiʼi no agradese ba Jeová, ita-nia orasaun sai hanesan insensu morin neʼebé halo nia kontente.—Apokalipse 5:8.

22. Iha lisaun tuirmai, ita sei aprende kona-ba saida?

²² Jesus hatete katak ita tenke hadomi Jeová no mós ita-nia maluk. (Mateus 22:37-39) Iha lisaun tuirmai, ita sei aprende kona-ba oinsá ita-nia domin ba Jeová no ninia matadalan sira sei ajuda ita atu hadomi ema seluk.