1. Ginihe naasonosi gu nyemuse du dagba Mbori na Wiriko?

WIRI Yekova nga Yesu Kristo aya: “Mi nakpi nyemu Buba.” (Yo. 14:31) Ko aya berewe wẽ: “Ba nakpi nyemu Wiriko akpi.” (Yo. 5:20) Iiriwopai ngaha ka gia gipai re te. Nirengo, Yesu aima du niga Mbori “bangbasia boro sunge” tipa dungu agarã mbata fu ko ye ku auru kpotosende ane. (Snz. 8:30) Ho aYesu na Yekova aamangasunge ni sa, ko awiriki dungu apai tipa asino Bako na kidu na dungu nduapai beko tipa ka kpinyemuko. Nirengo, padu yo dedede kina sa naasa gi gayo nyemuse re si sono.

2. (a) Nyemuse nakoda gine? (b) Gini asanahe ani nika sakapai tipaha?

² Nyemuse nga du na bakere nyemu boro kpotoroyo. Gu bake papara Atambuahe nangia Davide aya: “Ako Yekova, gi ome, mi nakpi nyemu ro.” (Tam. 18:1) Gere nga gu bipai si aida ani du na ni tipa Mbori mbiko ko nakpinyemu rani. Ka ani agiasangba Yekova, ko nika yugo gako nyemuse furani. (Oni gedi Pa Fu Rugute ni Ue he 7:12, 13.) Ya mo ani rengbe ka kpinyemu Mbori nzunzu wa ani abingo ko ya? Kpinyemu Yekova nga gine? Tipagine si aida ani kpinyemuko ti ni? Na wai rengbe ani ka yugo gaani nyemuse tipa Mbori?

3, 4. Tipagine duhe ti ni furani taata ani irisi Yekova?

³ “Mbori nga Toro”; ka ani bingo ko te. (Yo. 4:24) Ono wa vura duhe wo, si kindi taata ani kpinyemu Yekova, na Ziazia Kekeapai nazinahe furani nga ani akpinyemuko. Ni kpiapai, Moize aya fu aYisaraere wẽ: “Oni kpí nyemu Yekova nga gaoni Mbori na kpotoroni yo dũ, na mbisimoroni dũ, na omeroni dũ.”—Pa Rug. 6:5.

⁴ Tipagine si aida ani du ti ni na bakere nyemu Mbori tirani? Bambiko ko akusi rani na nyemu agu apai nga ga toro na ki fu momu furani ani yugu gu nyemuse re. Ho ani ambisa gu gaani azingo ni nga ga toro, gaani nyemuse tipa Yekova nasona na ani kidu na bakere ngbarago. Yesu aya: “Aboro ngbarago nga agu aboro inipa gu gayo azingo nga ga toro bambiko gu kindo nga ga ngbangbaturũ nga gayo.” (Mt. 5:3, NW) Nibi gupai kura aboro aya tipaha wẽ i abatika boro na nyemu irisombori, kura buku sa naya: “Kina iriworago nazio rani ka bi gupai nga, aboro aima digo nigbata ka iriso gu boro nga bakerepa boro kisusi.”—Man Does Not Stand Alone, by A. C. Morrison.

5. Wai ini ani he nga si agberãnga ka gbata Mbori te?

⁵ Ya mo si ni gbegberẽpai ka gbata Mbori? Oó, mbiko ko naida ani iniko. Gu mokedi nangia Pauro ape gipai re gbaiga ti gu regbo ko aatungusapai fu agu aboro naadungura tiyo ku Areopaga yo. Gipai re amangi barabangiri gu yekaru nangia Paratenono i aduaha fu Atena nangia gu dee-mbori naadu rogo gu Atenai naadu mbata. Mo berẽnga kina gupai nga mo gu du yo wa Pauro afura tipa “gu Mbori namangi zegino na ahe dunduko rogo yo,” fuani ko sakipai nga Mbori arakanga “rogo agu abambuirisa i nadua ha ni be te.” Gu mokedi re gbia kurapai kutini nga, Mbori ‘amangi arika aboro dunduko wa sa i ima auru kpotosende dunduko, ko aringbisi agu arago i afu fuyo, na ngbanda gayo banye. Mbori amangihe wo aboro gbata ko, wa i akpinyemu ka rugatiyo na pako, singia ka i da ti inida ko. Ono ko aturãnga na ani wa sa te.’ (Amo. 17:24-27) Nirengo, aboro rengbe arengba ka ino Mbori. ADezire Yekova bangeyo naima susa amirioni saba na beberehe ima ‘rugatiyo na pako nirengo’ na i nakpinyemuko akpi.

6. Gini rugute Yesu aya si nga “bakumba ha susi” dagba arugute yo dunduko?

⁶ Si naida gaani nyemuse tipa Yekova ye kina boro ngbaduraniyo. Si nga gupai Yesu apehe ti gu regbo Farusi asanako nga: “Bayugupai, dagba arugute dunduko gini gu susi?” Yesu akaragaha fuko ki ya: “Mo kpí nyemu Gbia nga ga Mbori kpotoro yo dunduko, na mbisimoro dũ, na ga berã dũ. Gu rugute nga bakumba ha susi si nga gere.”—Mt. 22:34-38.

7. Ginihe nga kpinyemu Mbori na (a) ‘kpotorani yo dunduko’? (b) ‘mbisimorani dũ’? (d) gaani ‘aberã dũ’?

⁷ Ginipai Yesu aaida ka pehe ho ko aya ni wẽ si naida ani kpinyemu Mbori na ‘kpotorani yo dunduko’? Ko aaida ka ya ani kpinyemu Yekova na gaani nyemuapai dunduko, nunga gbiati bipai. Si naida ani kpinyemuko a na ‘mbisimorani dũ’ watadu ungarani na gaani raka. Kurigure, si naida ani kpinyemuko na gaani ‘aberã dũ’ watadu gaani inohe dunduko. Gu memepai duho nga ani kpinyemu Yekova nyanyaki zanga kapa.

8. Kpinyemu Mbori rengbe ka sarani ani mangi ginihe?

⁸ Ka ani kpinyemu Mbori na kpotorani yo, mbisimorani, na gaani aberã dũ, ani nika du ni wene abawiriki Fugoko, na kini mangipai ringbisihe kuti gako ringbisapai, na kini tungusi gu wene pangbanga nga ga Kindo zaaza. (Mt. 24:14; Rom. 12:1, 2) Ka ani du na ndikidi nyemuse tipa Yekova, si nika mbedisa rani koyo du ko ni. (Yak. 4:8) Nirengo, ani arengbanga ka tangara agu nduapai  dunduko si aida ani kpinyemu Mbori ti ni te. Ono tie, ani wisigingo pai tipa betehe.

9. Tipagine ani akpinyemu Yekova ti ni nga Bakusirani na ni Bagamu ahe furani?

⁹ Yekova nga Bakusirani na ni Bagamu ahe furani. Pauro aya: “Ani ni ungarani, ki nita ata, ki du kina ho rogo ko yo.” (Amo. 17:28) Yekova ima fu bawene kporo furani nga kpotosende. (Tam. 115:16) Ko nafu riahe furani na gu kura ahe ani aidaha tipa raka. Si du Pauro aya ti ni fu agu airisikpiahe naadu Rusetura yo wẽ: “Gu Mbori du ni ungako, . . . ko ahe rika aboro ahe dunduko i peke kina gayo agene mbata ni agu arikayo nasusi. Wo si adu ono ko ahe nga dezireko te, wa ko animangi wene pai, ki fu mai fu roni ngbangbaturũ yo, na rago ida riahe gbe, ki hihisi kpotoroni yo ni riahe na ngbarago.” (Amo. 14:15-17) Anga gere nga gu ndupai si aida ani kpinyemu Bakere Bakusirani na ni Bagamu ahe furani te?—Batu. 12:1.

10. Ginipai si aida ani mangihe tipa wai Mbori asa apai taata i di ingapai tirani na kpio?

¹⁰ Mbori nasa gupai nga i di gu ingapai ani adihe ti Adamu kusayo tirani. (Rom. 5:12) Nirengo, “Mbori amoi dezire gako nyemuse fu rani nikpi Kristo tipa rani wa ani adu ni aboro ingapai.” (Rom. 5:8) Zanga kapa, ngbaduraniyo na bakere nyemuse tipa Yekova mbiko ko nasaha taata furani i mbupai furani ti gaani ingapai ka ani saberã ki idi na ga Yesu motumo.—Yo. 3:16.

11, 12. Rogo gini gene Yekova nafu maabangirise furani?

¹¹ Yekova nafu ‘maabangirise si hiisi rani na ngbarago na zereda.’ (Rom. 15:13) Gu maabangirise Mbori afuhe furani naundo rani ahi agu apai naasada gaani idapase. Gu mbedimbedi aKristano nika ‘ngarã angarã da ti kpio, i nika fu kpakpari unga fuyo ngbangbaturũ yo.’ (Yugo. 2:10) Agu aboro du na maabangirise ka raka auru kpotosende, ka i kakuti ruru mangapai, i nika raka rogo Paradizo. (Rk. 23:43) Gaani karagapai nga gine kuti agi amaabangirise re? Ya mo ani na ngbarago, na zereda kodihe na nyemuse fu gu Boro ‘nagamahe dunduko, na ziazia ũgamahe dunduko’?—Yak. 1:17.

¹² Mbori fu gu maabangirise nga ga zinga be kpio furani. (Amo. 24:15) Nirengo, ani nidu na bakere gberarago ho gaani boro akpi ni, ono mbiko gu maabangirise nga ga zinga be kpio, ani ‘arungonga wa kura aboro adunga na maabangirise tiyo ya te.’ (1 Tesa. 4:13) Mbiko gu nyemuse du Yekova Mbori na ni, ko na nyemu ka zingisa gu ruru aboro du wa Eyobo. (Eyo. 14:15) Ani berẽnga pa gu ngbarago ani ka gbiatirani ni na ho i nika zingisayo aboro ni be kpio auru kpotosende ane. Nairiwo wai gipai re asa rani ani kpinyemu gu Barani du ngbangbaturũ yo nga gu boro fu gu bawene maabangirise nga ga zinga be kpio re furani!

13. Gini agopai nayugo na ni nzunzu nga Mbori nangera angerafuo rani?

¹³ Yekova nangera angera nzunzu fuo rani. (Oni gedi Atambuahe 34:6, 18, 19; 1 Petero 5:6, 7.) Wa duhe nga ani ima ino gupai nga Mbori nidu dedede na nyemu ka undo agu aboro du ni ruruyo fuko, ani nabi tirani nga ngba barani angba mbiko ani nga papara agu ‘akandoro nga ga banambu’ ra. (Tam. 79:13) Kurigure, gako nyemuse nika du ni yuguyuguhe vurube gupai ko nika mangaha tipa rani rogo gu Kindo Nga ga Masiya. Fuo gu Bakindo ko nasia ko nga Yesu Kristo nyasiriipa zuu, rungosi, na gbegberẽ mangaapai, aboro giasangba nika gbia maku na ki du na zereda kpaima. (Tam. 72:7, 12-14, 16) Ya mo mo aidanga kuti gupai nga ngbatunga gu maabangirise re nafu ndupai furani ani kpinyemu Mbori na kpotorani yo, mbisimorani, omerani, na gaani aberã dũ te?—Rk. 10:27.

14. Gini bawene momu Mbori nafuhe furani?

¹⁴ Mbori ima ngba na ani ki fu gu momu furani nga ani mangisunge ni gako aDezire. (Yes. 43:10-12) Ani nakpinyemu Mbori wa ko  nafu gi momu re furani ani songodi gako bakere pagbia na ani fu ndikidi maabangirise fu aboro rogo gi kere zegino re. Kurigure, ani nafura fu aboro rogo rengo na idapase mbiko ani natakapande gu wene pangbanga du mburuhe rii Fugo ndikidi Mbori nafu gu maabangirise nika manga amanga. (Oni gedi Yosua 21:45; 23:14.) Nirengo, dungu nduapai du ho rengbe ani ka kpinyemu Yekova ti ni gbiati agu amaku ko afuhe furani. Ono wai rengbe ani ka yugo gaani nyemuse fuko?

15. Wai rengbe wisigo Fugo Mbori na kini mangihe ka undo rani?

¹⁵ Oni wisigi Fugoko kakaka na kini mangihe. Manga ani he wo nayugo gupai nga ani ima kpinyemu Yekova na ani naida fugoko du furani wa ‘imarago ngbagene’. (Tam. 119:105) Kangia ani naagbiatirani na fudifudiapai, ani rengbe ka gbia wasa be ngbatunga agi akidohe re naya: “Gu kpoto yo naima be rungo ingapai, Ako Mbori, mo apáyasi nga ha te.” “Ako Yekova, ga weneringise azi re. Wa du sakapai ku kpotore yo ni badungu he, gamo wasawasa apai nangarãsa mbisimore.” (Tam. 51:17; 94:18, 19) Yekova nainopai fu agu aboro narungo, na kina gu bangisa nunga re du ti Yesu koyo du aboro ni. (Yes. 49:13; Mt. 15:32) Wisigo Ziazia Kekeapai rengbe ka sarani ani inipa gu nyemuse du Yekova na ni tipa rani nga gu si aida ani yugu kinaha a fuko.

16. Wai rengbe kparakpee dedede ka undo rani gaani nyemuse tipa Mbori sono?

¹⁶ Oni kpari fu Mbori dedede. Gaani kparakpee nambedisa rani koyo du “gu ko ninagia kpetambuahe” ni. (Tam. 65:2) Ho ani aino gupai ni nga Mbori nakaragapai akaraga kuti gaani akpee, gaani nyemuse tipa ko nakio. Ni kpiapai, si rengbe kadu nga ani aima bi gupai nga ko ambunga rani asada dibe rani te. (1 Kor. 10:13) Kangia ani na bakabangirise na ani ki sana Yekova rogo kpee yo, ani rengbe ka gbia “gu zereda nga ga Mbori” adunga gu kuraha wa ha ya. (Frp. 4:6, 7) Ti kura aregbo, ani ima rengba ka kpara kukiri wa gu Nemaya amangihe na ki bi gupai nga Mbori ima karagapai kutini. (Nem. 2:1-6) Ho ani “akpatagara kuti kpe” ni na ki ini gupai nga Yekova nakaragapai akaraga kuti gaani zungoditise, gaani nyemuse tipa ko nasona na gu kido du ani na ni nga ko  nika undo rani aundo ani sovura kuti kura apai naasada gaani idapase.—Rom. 12:12.

17. Kangia ani nakpinyemu Yekova, wai rengbe ani ka bi nduge tipa adunguratise?

¹⁷ Oni saha ni sinoroni kaa ndu kuba agu adunguratise nga ga dungurati gbiati akikindigihe. (Eb. 10:24, 25) AYisaraere anaadungura tiyo tipa ka degatuyo fu Yekova na kini wirikipai beko wa ka i ruho ka gunde ti gako aNdiko na kini mangihe. (Pa Rug. 31:12) Ka nyemu Mbori du tirani, si adunga furani ni tindiro ka manga gupai ko akpinyemuhe te. (Oni gedi 1 Yoane 5:3.) Sidu, ka ani mbunga kura apai si sarani ani bi adunguratise na paha kusende ya. Si aidanga ani mbu pai si gbarasipa gu gaani bambata nyemuse ani adu na ni tipa Yekova te.—Yugo. 2:4.

18. Gu nyemuse du ani na ni naundo rani ani mangi ginipai tipa wene pangbanga?

¹⁸ Oni yugu gu ‘rengo nga ga wene pangbanga’ kakaka. (Gara. 2:5) Gu nyemuse du ani na ni tipa Mbori nafõngbaduraniyo ani fura tipa gu Kindo Nga ga Masiya nga Wiri Mbori nga ko nika ora rogo “pa rengo” ti regbo Aramegido. (Tam. 45:4; Yugo. 16:14, 16) Nairiwo gu ngbarago du ani na ni ka du dagba agu aboro nasa aboro ni abawiriki na kini undo yo i wirikipai tipa ga Mbori nyemuse gbiati gako ­kidohe tipa vovo zegino!—Mt. 28:19, 20.

19. Tipagine si aida ani bi gu ga Yekova mbakadapai ti ni du tipa ngerafuo akandoro na nyanyakipa ha?

¹⁹ Oni du na tambuahe tipa gu mbakadapai Mbori namangihe ka ngerafuo gako akandoro. (Amo. 20:28) Agu abaakumba nga aKristano nga gamahe be Yekova, i namangapai dedede tipa gaani wenepai. Abaakumba wakina “bagbuko be yuge, ni okooko ba be gugugu yuge, wa ime rogo gene ime rogo ugurago, wa nzereme bambia rogo gu ringara mbu ambu.” (Yes. 32:1, 2) Ani nidu na ngbarago ka si du nga ani gbia gu ba rengbe ani ka gbu rogoho ti regbo mai watadu ti regbo bavugumo. Ho uru naafa ni ni bakerehe, ani nidu na ngbarago ka ga kutii nzereme. Agi amasaku re naundo rani ani bi wai abaakumba afu undo furani rogo toro yo. Ka ani agiasangba agu aboro nangbembatayo rogo apai yo dagbarani, gure nga ani nayugo wai ani abi “agamahe rogo aboro yo” na kikiipaha na kini yugu gaani nyemuse tipa Mbori na tipa Kristo nga Barii dungurati.—Ef. 4:8, NW; 5:23; Eb. 13:17.

20. Kangia nyemu Mbori kina tironi, wai rengbe oni ka karagapai kuti Yakoba 1:22-25?

²⁰ Kangia oni na wene pagume na Yekova, oni nika ngia ‘amangipai angianga agipai gbua ya.’ (Oni gedi Yakoba 1:22-25.) Gu boro ‘namangapai’ ni na gu idapase du surungbaha ni yuguyuguhe rogo kakaka tungusapai, na nduge tipa adunguratise. Ka oni kpinyemu Mbori nzunzu, oni gisangba gako ‘ziazia rugute,’ agianga kina gu nabipa agu apai dunduko ko akpinyemuhe beroni sa ya.—Tam. 19:7-11.

21. Ginihe rengbe yo ka ringbisa gaoni kparakpee kutini?

²¹ Ka nyemu Yekova Mbori du tironi, si nika sa gupai nga oni naakpara fuko dedede. Davide aringbisi kparakpee kuti gu motumo nangia ga guzuguzu fuõngua naadu rogo gu mozunga nga ga aNdiko ki ya: “Mo ídi he gi kpetambuahe dú wa wene fuõngua bara bangiro, tumba abere ku ari ki du wa gu motumo nga ga nyemu!” (Tam. 141:2; Gate 30:7, 8) Gaoni zungaditise, sarawatise, gbiati agu apai oni atambua Mbori na ni dunga adu wakina wene guzuguzu fuõngua nga gu narukuba kparakpee.—Yugo. 5:8.

22. Gini ngbatunga nyemuse ani nika fura tipaha rogo gu kekeapai naye fuo gere?

²² Yesu aya ani kpinyemu Mbori na gaani amurakporo. (Mt. 22:37-39) A wa ani ka bihe rogo gu sakapai du tipa gi sino re, gu nyemuse du ani na ni tipa Yekova na gako bangua arugute nga ga Ziazia Kekeapai nika undo rani ani nifura wenengai na akuarani gbiati gaani amurakporo.