Meri kädeka nämene Smita, * yebiti kä nämene 35 aune nämene nüne Daca (Bangladés), niara jäme ni jökrä ben nie nämenebätä. Käre kä nämene jutobätä aune nämene kukwe Ngöbökwe mike gare ni madai ye nämene gare nitre jökrä ie. Akwa, Smita nakani brein aune kä ñaka nükani bämän krati ie angwane krütani yekwe mräkätre mikani ulire krubäte.

James aune muko kwe, yebiti kä nämene 35 näre, niaratre nämene ja töi mike Smita erere nie nämene bätätre. Bitinkä nikanintre Estados Unidos kä nemenkä nedrinkri yekänti basare ja ketamuko kwetre ie, akwa ñaka nükaninta ja gwirete Nueva York. Karo matani ja te yekwe niaratre murie ketani yekwe mräkätre aune ja ketamuko kwetre mikani ulire krubäte.

Ni jökrä ie gare ja tare nikata aune kukwe käme ye tä kä jökräbiti tibien: rüta yete nitre rükä aune nitre mada murie ketata; nitre kwati ñaka ngite abokän murie ketata aune nuainta tare; ni bati, ni umbre, ni jondron bökäne o ni bobre ye tä juruainne tare aune tä nakain bren tare ie; kukwe tare keta kabre tä nakainkä ye tä juta ruäre juen ngwarbe, nitre ñaka ni jökrä kain ngäbiti aune kukwe käme nuainta ni madabätä ye tä nemen bare mantre jetebe. Kukwe ye erere ruäre namanina bare mäbätä raba ruin nunye.

Yebätä kukwe ngwantarita nete ne erere ni raba ngwentari jai:

• ¿Ñobätä kukwe tare tä nakainkä nitre töi kwin yebätä?

• ¿Ngöbö ngite?

• ¿Ja töbiti kukwe tare ye tä nakainkä, o nitre tä mike nakainkä?

• ¿Kukwe karma köböite? ¿Nikwe kukwe käme nuainbare yebätä ni mikata ja ngie nuin?

• Ngöbö bäri dite krubäte tärä, ¿se ñobätä ñaka nitre töi kwin ye kriemike?

• ¿Kukwe blo aune ja tare nikata ye ñaka rabaira?

Kukwe ye rabadre gare nie yekäre kukwe ngwantarita ketebu ne nikwe mikadre gare jai: ¿Ñobätä kukwe tare tä nakainkä? ¿Aune Ngöbökwe dre nuaindi diankakäre?