TAU VALA TALA I MUA | KO E HA NE TUTUPU E TAU MENA KELEA KE HE TAU TAGATA MITAKI?
Tupu Lahi e Tau Mena Kelea!
Ko Smita, * ko e fifine ne 35 e tau he moui mai i Dhaka i Bangladesh, ne iloa lahi ko e fifine loto fakaalofa mo e aga leveki. Iloa he tau tagata a ia ko e fifine malolō he gahua mo e ko e hoana fuata kua fiafia ne manako ke lagomatai e falu ke iloa e tau mena haana ne fakaako hagaao ke he Atua. Ne ofo lahi e magafaoa mo e tau kapitiga ha Smita he mogo ne amanaki ni a ia ti moua he gagao ti mate he nakaila katoa e faahi tapu!
Ko James mo e hoana haana, ko e hoa fuata ne kavi 30 tumā e tau tau he moui, ne tatai e tuaga mo Smita. Taha vahā tau tupu, ne ō a laua ke ahiahi e tau kapitiga he Kautahi he Faahi Lalo he United States. Ne nakai liliu a laua ke he kaina ha laua i New York. He ō ai, ne putoia a laua he pākia e tau peleoafi ti mamate, ne galo lahi he tau fakahele mo e tau tagata gahua ha laua a laua.
Nakai onoono mamao a koe ke kitia kua tupu lahi e kelea muitui mo e matematekelea he vahā nei. He tau felakutaki ne mamate e tau tagata noa ti pihia foki mo e tau kautau. Ko e matahavala mo e favale ne fakamatematekelea e tau tagata noa. Ne tutupu e tau pākia kelea lahi mo e tau gagao pete e tau tau he moui po ke tuaga he tagata. Lauia fakahanoa e tau maaga ha ko e tau matematekelea tutupu pauaki. Kua holofa e onoono hifo mo e nakai fakafili tonu. Liga kua matematekelea noa a koe he tau mena ia.
Ko e aga pauaki ke hūhū e tau hūhū pehēnei:
-
Ko e ha ne tutupu e tau mena kelea ke he tau tagata mitaki?
-
Tuku aki kia e Atua e tau mena ia?
-
Tutupu fakaofo kia e tau matematekelea, po ke na fakatupu he tagata?
-
Ko e Karma * kia?
-
Ka fai Atua malolō mua ue atu, ko e ha ne nakai puipui e ia e tau tagata mitaki mai he matematekelea?
-
To atāina nakai e moui mai he kelea muitui mo e mamahi?
Ke tali e tau hūhū ia, lata ia tautolu ke maama e tali ke he tau matapatu hūhū ua nei: Ko e ha ne tutupu e tau mena kelea, mo e ko e heigoa he Atua ka taute?