Smita, aem wanpela meri i gat 35 krismas na em i stap long Dhaka, Bangladesh. Em meri bilong mekim pasin laikim na tingim ol narapela man. Ol manmeri i save olsem em meri bilong wok hat tru na lukautim gut famili bilong em na em i save amamas long helpim ol narapela long kisim save long God. Olsem na famili na ol pren bilong Smita i kirap nogut olsem em i sik na insait long wanpela wik tasol em i dai!

James na meri bilong em i gat 30 krismas samting na ol tu i gat pasin bilong mekim gut long ol narapela manmeri. Wanpela taim ol i visitim ol pren bilong ol long wes kos bilong Amerika. Tasol taim ol i stap yet long malolo bilong ol, ol i insait long kar eksiden na tupela i dai. Famili na ol wanwok bilong ol i bel hevi tru taim ol i harim dispela nius.

Long nau pasin nogut na pen na hevi i go bikpela long olgeta hap. Ol woa i save kilim i dai ol soldia na ol man i no insait long woa. Ol man i save karim hevi bilong pasin raskol na pasin bilong pait na bagarapim man. Ol eksiden na ol kain kain sik i save painim olgeta man, maski ol i gat wanem krismas o sindaun. Ol disasta i save bagarapim planti hap. Na tu, pasin bilong bel nogut long narapela na wansait pasin i stap long olgeta hap. Ating kain hevi olsem i bin painim yu.

Olsem na yumi save givim ol dispela askim:

• Wai na hevi i save painim ol gutpela man?

• Yu ting God i as bilong ol hevi?

• Ol hevi i kamap nating, o ol samting ol man i mekim i kamapim ol hevi?

• O ating pasin man i mekim long bipo i as na ol hevi i painim em?

• Sapos God i gat olgeta strong i stap, wai na em i larim ol hevi i painim ol gutpela man?

• Ol pasin nogut na pen na hevi bai pinis bihain?

Bilong bekim ol dispela askim, yumi mas kliagut long bekim bilong 2-pela bikpela askim. Wai na ol hevi i save painim yumi? Na God bai mekim wanem bilong helpim yumi?