Baibul tittiwa ka maleng gin ma Jehovah gin ki Wode Yecu Kricito gubitimo ma lubbe ki deno can ma Catan Larac-ci okelo. Baibul waco ni: “Gin mumiyo Wod pa Lubanga yam onen, en aye pi turo tic pa Catan woko.” (1 Jon 3:8) Lobo man ma opong ki woro me jami, adage, ki dong tim maraco-ni kibijwerone woko. Ento, Yecu ocikke ni “lalo lobo man,” Catan Larac-ci “gibibole woko.” (Jon 12:31) Pien Catan nongo dong pe, Jehovah bikelo lobo manyen ka ma kit ma atir kacel ki kuc bedo iye.​—2 Petero 3:13.

Ento ngo ma Lubanga bitimone i kom jo ma gideg loko yo me kwogi dok gibimedde ki timo jami maraco akaka? Tam kong i kom cikke man me Baibul-li: “Jo ma cwinygi atir gibibedo i lobo, ki jo ma gin lugen ma pe gitye ki bal mo gibibedo iye matwal; ento jo maraco gibityekogi woko ki i lobo meno, ki jo ma gungayo wang Rwot [Jehovah] pi bal me nek bene gibiputogi macalo guputo doo.” (Carolok 2:21, 22) Jo maraco dong gibibedo pe matwal. Ka kuc dong tye i lobo, ci jo ma luwiny kibigonyogi woko ki i opii me roc.​—Jo Roma 6:17, 18; 8:21.

Lubanga bijwayo jami maraco ki i lobo manyen-ni nining? En pe bikwanyo mic me moko tam piwa kenwa kun weko wabedo calo robot. Ma ka meno, en bipwonyo jo ma luwiny ki cikke, kun konyogi me weko tam kacel ki timo jami maraco.

Ngo ma Lubanga bitimone ma lubbe ki pekki ma ngole atura? En ocikke ni Kerre cokcok-ki biloyo lobo. Lubanga ocimo Yecu Kricito me bedo Kabaka me Ker meno, dok en tye ki teko me cango jo ma komgi lit. (Matayo 14:14) Yecu bene tye ki teko me juko jami calo yamogi-ni. (Marako 4:35-41) Pi meno, deno can ma bino pi ‘kare kacel ki jami ma timme atura’ dong bibedo pe matwal. (Latitlok 9:11) I te loc pa Kricito, dano pe dong gibideno can.​—Carolok 1:33.

Ngo ma kibitimone i kom dano milion mapol ma guto labongo bal-li? Ma peya ocero lareme Lajaro, Yecu owaco ni: “An nicer ki kwo.” (Jon 11:25) Ada, Yecu tye ki teko me cero jo muto!

Pingo pe iket obed i yubbi me pwonyo lok kom Lubanga me ada kacel ki yubbe kun ikwano Baibul ka ce pwony man ni jami maraco pe dong bitimme i kom jo kitgi ber-ni ogudo cwinyi? Lucaden pa Jehovah ma gibedo ka ma i kwo iye gibikonyi me nongo ngec man. Wacuko cwinyi me rwatte kwedgi nyo coyo waraga bot jo ma gucoyo magajin man.