Baiblo ɔ ha nɛ wa le heii kaa Yehowa kɛ e Bi Yesu Kristo maa pee haomihi nɛ Satan Abosiami kɛ ba wa nɔ ɔ he nɔ́ ko. Baiblo ɔ de ke: “Enɛ ɔ he tutuutu nɛ Mawu Bi ɔ ba a nɛ, konɛ níhi nɛ Abosiami tsu ɔ, e ba kpata lɛ tsuo hɛ mi.” (1 Yohane 3:8) Je ɔ hyi tɔ kɛ hɛkɔ, ninyɛ, kɛ yi wu tso ní peepeehi. A ma kpata je ɔ hɛ mi. Yesu tsɔɔ kaa Satan Abosiami, nɛ ji “nɔ nɛ ngɛ je ɔ nɔ matsɛ yee ɔ, a ma kpa lɛ.” (Yohane 12:31) Je ehe nɛ a yeɔ dami sane ngɛ mi maa ba. Jamɛ a be ɔ mi ɔ, a ma je Satan kɛ je je ɔ mi, nɛ tue mi jɔmi maa hyi je ɔ tɔ.—2 Petro 3:13.

Nɛ nihi nɛ a sume kaa a ma tsake, nɛ́ nɔ́ yaya pɛ a peeɔ ɔ hu nɛɛ? Mo susu si womi nɛ ɔ he nɛ o hyɛ: “Dali, kɛ nimli kpakpahi ji ni nɛmɛ nɛ maa hi zugba nɛ ɔ nɔ. Se yiwutsotsɛmɛ, kɛ yayami peeli lɛɛ Mawu ma kpata a hɛ mi kaa bɔ nɛ a hiaa tso ngɛ zu mi kɛ fɔɔ si ɔ.” (Abɛ 2:21, 22) Nimli yayamihi be si hie hu. Ngɛ je ehe ɔ mi ɔ, bɔɔbɔɔbɔɔ ɔ, adesahi nɛ a peeɔ tue bumi ɔ maa ye mluku ekohu.—Roma Bi 6:17, 18; 8:21.

Mɛni blɔ nɔ Mawu maa gu kɛ po yayami peemi se ngɛ je ehe ɔ mi? Mawu be he blɔ nɛ e kɛ ha wɔ kaa waa pee nɔ́ nɛ wa suɔ ɔ ngɔe ngɛ wa dɛ. Mohu ɔ, e maa ye bua nihi nɛ peeɔ tue bumi ɔ, konɛ a yu a he ngɛ susumi yayahi kɛ yayami peemi he.

Mɛni Mawu maa pee ngɛ oslaahi a he? Mawu wo si kaa e be kɛe nɛ e Matsɛ Yemi ɔ ma ba ye je ɔ tsuo nɔ. Mawu wo Yesu Kristo Matsɛ ngɛ e Matsɛ Yemi ɔ nya. Yesu ngɛ he wami nɛ e kɛ maa po hiɔ se. (Mateo 14:14) Yesu ngɛ he wami ngɛ adebɔ níhi kaa kɔɔhiɔ, zugba mimiɛmi kɛ ní kpahi a nɔ he wami. (Marko 4:35-41) Enɛ ɔ he ɔ, ‘haomihi nɛ baa tlukaa’ a tsuo se maa po. (Fiɛlɔ 9:11) Ngɛ Kristo nɔ yemi ɔ sisi ɔ, haomi be nɔ ko nɔ ko nɔ bae.—Abɛ 1:33.

Nɛ nihi nɛ a pee we nɔ́ yayami ko nɛ́ a gbo ngɛ oslaa mi ɔ hu nɛɛ? Loko Yesu ma tle e huɛ Lazaro si ɔ, e de ke: “Imi ji si temi ɔ, kɛ wami ɔ nɛ.” (Yohane 11:25) Niinɛ, Yesu ngɛ he wami nɛ e kɛ ma tle nihi nɛ a gbo ɔ si!

Anɛ o maa suɔ nɛ o hi je ko nɛ haomi be nimli kpakpahi a nɔ bae ngɛ mi ɔ mi lo? Ke jã a, lɛɛ mɛni he je nɛ o kase we anɔkuale Mawu ɔ kɛ e yi mi tomihi a he ní ngɛ Baiblo ɔ mi ɔ? Yehowa Odasefohi nɛ a ngɛ o kpɔ ɔ mi ɔ, bua maa jɔ he kaa a maa ye bua mo. A ngɛ mo nine fɔe kaa o hla a se blɔ nɛ́ o kɛ mɛ nɛ kase ní. O ma nyɛ maa ngma ya ha nimli nɛ a pee womi nɛ ɔ hulɔ.