Gipakita sa Bibliya kon unsay buhaton ni Jehova ug sa iyang Anak, si Jesu-Kristo, sa pag-antos nga gipahinabo ni Satanas nga Yawa. “Tungod niini nga katuyoan nga gipadayag ang Anak sa Diyos [Jesus],” matod sa Bibliya, “aron sa pagbungkag sa mga buhat sa Yawa.” (1 Juan 3:8) Hapit nang taposon kining presenteng kahimtang nga puno sa kahakog, pagdumot, ug pagkadaotan. Si Jesus misaad nga “palagpoton” ang “magmamando niining kalibotana,” si Satanas nga Yawa. (Juan 12:31) Kay wala nay impluwensiya ni Satanas, mabag-o ang yuta sa diwa nga puy-an kinig matarong nga mga tawo, ug magmalinawon na kini nga dapit.—2 Pedro 3:13.

Komosta kadtong dili gyod magbag-o ug magpadayon sa pagbuhat ug daotan? Hunahunaa kini nga saad: “Ang mga matul-id mao ang magapuyo sa yuta, ug ang walay-ikasaway mao ang magpabilin diha niana. Kon mahitungod sa mga daotan, sila pagaputlon gikan sa yuta; ug kon bahin sa mga maluibon, sila pagalukahon gikan niini.” (Proverbio 2:21, 22) Mawala na ang impluwensiya sa mga daotan. Nianang malinawong kahimtang, ang masinugtanong katawhan anam-anam nga mahingpit.—Roma 6:17, 18; 8:21.

Sa bag-ong kalibotan, unsaon pagwagtang sa Diyos ang pagkadaotan? Dili pinaagi sa pagkuha sa kagawasan sa tawo sa pagpili ug himoon silang samag robot. Kondili, tudloan niya sa iyang mga dalan ang mga masinugtanon aron tabangan sila nga dili na balikan ang daotang panghunahuna ug binuhatan.

Unsay buhaton sa Diyos sa wala damhang mga kalamidad? Siya misaad nga kontrolahon dayon sa iyang Gingharian ang yuta. Ang Hari nga gitudlo sa Diyos mao si Jesu-Kristo, kinsa dunay gahom sa pag-ayo sa mga sakit. (Mateo 14:14) May gahom sab si Jesus sa pagkontrolar sa mga puwersa sa kinaiyahan. (Marcos 4:35-41) Busa mahanaw na unya ang pag-antos nga resulta sa ‘panahon ug wala damhang panghitabo.’ (Ecclesiastes 9:11) Inigmando ni Kristo, wala na gyoy kalamidad nga mohampak sa katawhan.—Proverbio 1:33.

Komosta ang minilyong inosente nga biktima sa kalit nga kamatayon? Una pa banhawa si Lazaro, si Jesus miingon: “Ako ang pagkabanhaw ug ang kinabuhi.” (Juan 11:25) Oo, may gahom si Jesus sa pagbanhaw sa mga patay!

Gusto ka bang mopuyo sa usa ka kalibotan nga dili na mag-antos ang maayong mga tawo? Gidasig ka namo nga mokat-og dugang bahin sa matuod nga Diyos ug sa iyang katuyoan. Ang mga Saksi ni Jehova sa inyong lugar malipayng motabang nimo sa pagtuon sa Bibliya. Gidapit ka namo nga makig-estorya nila o mosulat sa mga magpapatik niining magasina.