E vakamatatataka vei keda na iVolatabu na ka erau na cakava o Jiova kei na Luvena o Jisu Karisito, me baleta na veika ca e vakavuna o Setani na Tevoro. E tukuna: “Qo na vuna e vakaraitaki mai kina na Luve ni Kalou [Jisu], me mai vaqeavutaka na cakacaka ni Tevoro.” (1 Joni 3:8) Ena vakarusai na itovo e takalevu ena gauna qo me vaka na kocokoco, veicati, kei na ivalavala torosobu. E yalataka tale ga o Jisu ni na “vakamalumalumutaki” na “turaga ni vuravura” qo o Setani na Tevoro. (Joni 12:31) Ni sa sega na veivakamuai i Setani, ena qai tauyavutaki na vuravura vou ena vakilai kina na vakacegu.—2 Pita 3:13.

Ia vakacava o ira na bese ni veisautaka nodra ivalavala kei ira na vinakata mera vakayacora tiko ga na veika ca? Vakasamataka mada na yalayala qo: “Ni ra na tiko ga e na vanua na yalododonu, ka ra na tiko dei kina na yalodina. Ia ko ira na tamata ca era na muduki tani e vuravura, kei ira na dautalaidredre era na cavu laivi maikina.” (Vosa Vakaibalebale 2:21, 22) Sa na sega ni veivakamuai na tamata ca. Ni yaco qori, era na galala na tamata talairawarawa mai na ivau ni valavala ca.—Roma 6:17, 18; 8:21.

Ena vakaotia vakacava na Kalou na veika ca ena vuravura vou? Ena sega ni kauta laivi o koya na galala ni vakatulewa e solia vei keda, meda vaka na misini e porokaramutaki. Ia ena vakavulici keda na talairawarawa ena nona sala, ena vukei keda tale ga meda cavuraka laivi na vakanananu kei na itovo e veivakaleqai.

Na cava ena cakava na Kalou me baleta na veika ca ena rawa ni yaco? E yalataka o koya ni sa voleka me liutaki vuravura na nona Matanitu. Na Kalou e lesi Jisu Karisito me liutaka na Matanitu qori, ni tiko vua na kaukaua me vakabulai ira na tauvimate. (Maciu 14:14) E tu tale ga vei Jisu na kaukaua me lewa na veika kaukaua e vuravura. (Marika 4:35-41) Koya gona, sa na sega na rarawa e vu mai na ‘gauna kei na ka e sega ni namaki.’ (Dauvunau 9:11) Ni sa veiliutaki o Karisito, era na galala na kawatamata kece mai na veika rarawa.—Vosa Vakaibalebale 1:33.

Vakacava o ira na milioni e sega nodra cala era sa mate? E tukuna o Jisu ni bera ni vakaturi Lasarusa: “O yau na tucake tale kei na vu ni bula.” (Joni 11:25) E tiko dina vei Jisu na kaukaua me veivakaturi, se me vakabulai ira na sa mate!

Ke o via bula ena vuravura e sega ni yaco kina vei ira na tamata vinaka na veika ca, vakacava mo vulica ena iVolatabu e levu tale na ka me baleta na Kalou dina kei na nona inaki? Era na marautaka na iVakadinadina i Jiova ena nomu yasayasa mera vukei iko mo rawata na kilaka qori. Oni sureti moni veitaratara se volavola vei ira.