Ang Biblia maathag nga nagasugid sa aton kon ano ang himuon ni Jehova kag sang iya Anak nga si Jesucristo sa pag-antos nga gintuga ni Satanas nga Yawa. “Ginpadayag ang Anak sang Dios [si Jesus] sa sini nga katuyuan,” siling sang Biblia, sa “paglaglag sa mga binuhatan sang Yawa.” (1 Juan 3:8) Dulaon ang presente nga sistema nga puno sang kakagod, dumot, kag kalautan. Nagpromisa man si Jesus nga “tabugon” ang “manuggahom sini nga kalibutan” nga si Satanas nga Yawa. (Juan 12:31) Kon wala na ang impluwensia ni Satanas, magaluntad ang matarong nga bag-ong kalibutan, kag may paghidait na diri sa duta.—2 Pedro 3:13.

Ano naman ang matabo sa mga batinggilan nga nagahimo sing malain? Binagbinaga ining prangka nga saad: “Ang matadlong magapuyo sa duta, kag ang himpit magapabilin sa sini; apang ang malauton utdon gikan sa duta, kag ang maluib gabuton sa sini.” (Hulubaton 2:21, 22) Madula na ang impluwensia sang mga malauton. Sa sinang mahidaiton nga kahimtangan, ang mga matinumanon amat-amat na nga mangin himpit.—Roma 6:17, 18; 8:21.

Sa sinang bag-o nga kalibutan, paano dulaon sang Dios ang kalainan? Indi niya pagkuhaon ang dulot nga kahilwayan sa pagpili kag himuon nga robot ang mga tawo. Kundi, tudluan niya ang mga matinumanon sang iya mga dalanon, kag buligan sila nga magbag-o.

Ano ang himuon sang Dios sa mga kalamidad? Nagsaad sia nga sa indi madugay, magagahom na sa duta ang iya Ginharian. Ang gintangdo sang Dios nga Hari amo si Jesucristo. May gahom sia pag-ayo sa mga balatian. (Mateo 14:14) May gahom man sia nga kontrolon ang kinaugali. (Marcos 4:35-41) Gani, wala na sing pag-antos bangod sang ‘tion kag kahigayonan nga nagakahanabu.’ (Manugwali 9:11) Kon maggahom ang Cristo, wala na sing kalamidad.—Hulubaton 1:33.

Ano ang matabo sa minilyon ka inosente nga napatay? Wala madugay antes ginbanhaw ni Jesus ang iya abyan nga si Lazaro, nagsiling sia: “Ako ang pagkabanhaw kag ang kabuhi.” (Juan 11:25) May gahom si Jesus nga banhawon ang mga patay!

Gusto mo bala mabuhi sa kalibutan nga wala na sing malain nga matabo sa maayo nga mga tawo? Palihug magtuon sa Biblia parte sa matuod nga Dios kag sa iya katuyuan. Malipay gid ang mga Saksi ni Jehova sa inyo lugar nga buligan ka nga makatuon sini. Ginaagda ka gid namon nga kontakon sila ukon magsulat sa naghimo sini nga magasin.