UZOẸME UKE NA | FIKIEME EWARE IYOMA E BE RỌ VIA KẸ AHWO OWOMA?
Oware nọ Ọghẹnẹ O ti Ru Kpahe Eyoma
Ebaibol na ọ ta kpahe oware nọ Jihova avọ Jesu Kristi, Ọmọ riẹ a ti ru kpahe uye-oruẹ nọ Setan ọ wha ze. O ta nọ: “Oware nọ o lẹliẹ Ọmọ Ọghẹnẹ na nọ ọ jẹ via, re ọ ruẹse te raha iruo ukumuomu na.” (1 Jọn 3:8) Jesu ọ te raha akpọ nana nọ ọ vọ avọ oriobọ, eva egaga, gbe omukpahọ na no riẹriẹriẹ. Kọ eme ọ te via kẹ Setan nọ ọ rrọ osu akpọ na? Jesu ọ ta nọ, “a ti le” ei no. (Jọn 12:31) Nọ a tẹ raha akpọ Ẹdhọ no, akpọ na kpobi ọ vẹ te jọ ọkpokpọ nọ udhedhẹ o te dafia.—2 Pita 3:13.
Kọ eme ọ te via kẹ ahwo nọ a rọwo nọ a re siobọno uruemu uyoma rai hi? Ebaibol na ọ ta vevẹ nọ: “Okiẹrẹe ọ rẹ te ria otọ na, ahwo oruọzewọ a rẹ te ria ae eva; rekọ a re ti kpe ahwo omuomu no otọ na, gbe ahwo [ẹgwae] omuomu a re ti si ai no otọ na.” (Itẹ 2:21, 22) Ahwo oyoma a gbẹ te jariẹ hẹ. Evaọ oke yena, ahwo-akpọ a vẹ te rọ ẹmẹrera te ẹgbagba.—Ahwo Rom 6:17, 18; 8:21.
Ẹvẹ Ọghẹnẹ o ti ro si eyoma no akpọ ọkpokpọ na? Ọghẹnẹ ọ te gba ahwo họ ru oreva riẹ hẹ, hayo ru ai wọhọ robot nọ u re ru oware kpobi nọ a ta kẹe nọ o ru. Rekọ o ti wuhrẹ ahwo-akpọ fihọ idhere riẹ je fiobọhọ kẹ ae re a nwene ekpehre iruemu nọ a wo vẹre.
Ọghẹnẹ o ti si eware kpobi nọ e be wha uye-oruẹ ze no otọ
Kọ eme Ọghẹnẹ o ti ru kpahe eware idudhe nọ e be via na? Ọghẹnẹ ọ ya eyaa nọ kẹle na, Uvie riẹ u ti su akpọ na soso. Jesu Kristi họ Ovie Uvie yena, yọ o wo ogaga nọ o re ro siwi ẹyao kpobi. (Matiu 14:14) Jesu o te je wo ogaga nọ ọ rẹ rọ kpọ ofou gbe eware itieye na efa. (Mak 4:35-41) Fikiere, uye-oruẹ nọ ‘oke gbe eware idudhe’ o rẹ wha ze e te gbẹ jariẹ hẹ. (Ọtausiuwoma Na 9:11) Evaọ okenọ Jesu o ti su na, okpẹtu ọvuọvo o ti gbe te ahwo-akpọ oma ha.—Itẹ 1:33.
Kọ ẹvẹ kpahe ima ahwo buobu nọ a whu no na? Taure Jesu ọ tẹ te kpare Lazarọs no uwhu ze, Jesu ọ ta nọ: “Mẹ họ ẹkparomatha gbe uzuazọ.” (Jọn 11:25) Jesu o wo ogaga nọ ọ rẹ rọ kpare ahwo nọ a whu no zihe ziọ uzuazọ.
Kọ o te were owhẹ re whọ rria akpọ nọ eware iyoma e te gbẹ jọ via kẹ ahwo owoma ha? O tẹ rrọ ere, ma tuduhọ owhẹ awọ nọ gbe wuhrẹ kpahe Ọghẹnẹ gbe ẹjiroro riẹ evaọ Ebaibol na. O te were Isẹri Jihova re a fiobọhọ kẹ owhẹ wuhrẹ kpahe onana. Whọ sae ta kẹ Osẹri Jihova kpobi nọ whọ ruẹ, hayo kere se ai.
Enana E Sae jẹ Were Owhẹ
IWUHRẸ EBAIBOL NỌ I WUZOU
Fikieme Ọghẹnẹ Ọ jẹ Kuvẹ kẹ Uye-Oruẹ?
Ebaibol na ọ ta emamọ eme nọ e rẹ sasa ohwo oma.
ENỌ NỌ EBAIBOL Ọ KẸ IYO RAI
Eme Uvie Ọghẹnẹ U ti Ru?
Riẹ eware nọ ma bi rẹro rai evaọ oke nọ Uvie Ọghẹnẹ u ti su akpọ na.
UWOU-ERORO NA
Kọ Ahwo nọ A Whu no A Wo Ẹruore Jọ?
Kọ ahwo nọ a whu no a wo ẹruore jọ? Kọ a sae wariẹ ziọ uzuazọ?
