Bible udi utuleja patoke tshikala Yehowa ne Muanende Yezu Kristo mua kuenza bua makenga adi Satana Diabolo mukebeshe. Bible udi wamba ne: “Ke bualu kayi Muana wa Nzambi wakamueneshibua: bua kubutula midimu ya Diabolo.” (1 Yone 3:8) Ndongoluelu wa malu wa lukuka, lukinu ne malu mabi eu neabutuke. Kadi bua Satana Diabolo “mukokeshi wa buloba ebu,” Yezu mmulaye ne: ‘neamuipate.’ (Yone 12:31) Pikala Satana katshiyi ukokesha, nebajadike buloba bupibupia bua buakane ne buloba ebu nebulue muaba wa ditalala.​—2 Petelo 3:13.

Kadi netuambe tshinyi bua bantu badi babenga ne muoyo mujima bua kushintulula bienzedi biabu ne aba badi batungunuka ne kuenza malu mabi? Elangana meji ku mulayi muimpe eu: ‘Badi ne mitshima miakane nebashikame mu buloba, badi ne mutshima umue mutoke nebajalame. Kadi nebajimije bantu babi pa buloba, nebumushepu bena tshitungu.’ (Nsumuinu 2:21, 22) Buenzeji bua bantu babi nebujike. Pikala bantu mu nsombelu wa ditalala eu, badi batumikila Nzambi nebumbuke ku dipanga bupuangane ku kakese ku kakese.​—Lomo 6:17, 18; 8:21.

Mmunyi muikale Nzambi mua kujikija malu mabi mu bulongolodi bupiabupia ebu? Kakumbusha dipa didi nadi bantu dia kudisunguila malu anyi kubavuija biamu bua yeye kuenza bualu ebu to. Kadi, nealongeshe bantu badi batumikila njila yende, ubambuluisha bua kulekela meji ne bienzedi bibi.

Ntshinyi tshienza Nzambi bua njiwu mibi idi ukuata bantu mu tshimpitshimpi? Mmulaye ne: Bukalenge buende nebutuadije kukokesha buloba bujima mu katupa kîpi emu. Muntu udi Nzambi muteke mukalenge wa Bukalenge buende nʼYezu Kristo, udi ne bukole bua kujikija masama. (Matayi 14:14) Yezu udi kabidi ne bukole bua kukanda bifukibua bidi ne bukole bitu bikebesha njiwu. (Mâko 4:35-41) Nunku, makenga adibu bakebesha kudi ‘bikondo ne malu adi bantu kabayi batekemene’ neajike. (Muambi 9:11) Mu bukokeshi bua Yezu, kakuakuikala lutatu nansha lumue luakuata muntu to.​—Nsumuinu 1:33.

Kadi netuambe bishi bua miliyo ya bantu badi bapete njiwu ya lufu kabayi benze bualu? Mutantshi mukese kumpala kua Yezu kujula mulunda wende Lazalo, wakamba ne: “Meme ndi dibika ne muoyo.” (Yone 11:25) Bushuwa, Yezu udi ne bukole bua kubisha bantu badi bafue ne kubapingaja ku muoyo.

Bikala lungenyi lua ne: bantu nebikale ne muoyo mu buloba muikala malu mabi kaayi mua kufikila bantu bimpe lukusankisha, kuenaku mua ku difundila tshipatshila tshia kulonga Bible bua kumanya Nzambi mulelela ne tshidiye mulongolole anyi? Bantemu ba Yehowa ba muaba uudi nebikale ne disanka bua kukuambuluisha bua kupeta dimanya dia malu aa. Tudi tukulomba bua umonangane nabu anyi ufundile bapatudi ba tshibejibeji etshi.