Talahau fakamaaliali mai he Tohi Tapu ki a tautolu e mena ka taute e Iehova mo e haana Tama, ko Iesu Keriso, hagaao ke he matematekelea ne fakatupu e Satani ko e Tiapolo. “Ko e mena ia ne fakakite mai ai e Tama he Atua [ko Iesu],” he talahau he Tohi Tapu, “kia moumou e ia e tau gahua he tiapolo.” (1 Ioane 3:8) Ko e fakatokaaga nei ne fakavē ke he lotokai, vihiatia, mo e tau gahua kelea to moumou ai. Ma e “iki he lalolagi nai”​—ko Satani ko e Tiapolo​—ne mavehe mai e Iesu “to vega ainei” a ia. (Ioane 12:31) Ha kua nakai fai fakaohoohoaga a Satani, to fakatū e lalolagi foou tututonu, mo e to eke e lalolagi nei mo matakavi mafola.​—2 Peteru 3:13.

Ka e kua a lautolu ne ai mahalo ke hiki e tau puhala ha lautolu mo e fakatumau ni ke taute e tau mena kelea? Manamanatu la ke he maveheaga maaliali nei: “Ko lautolu ne mahani hakohako to nonofo a lautolu ke he motu; mo lautolu ne katoatoa e mitaki ha lautolu a mahani to toe ai a lautolu; Ka to vevehe kehe mai he motu a lautolu ne mahani kelea, to taaki ai foki a lautolu ne mahani fakavai.” (Tau Fakatai 2:21, 22) To galo fakaoti e fakaohoohoaga kelea he tau tagata. I lalo hifo he tau tuaga mafola ia, to tokanoa fakahaga e tau tagata omaoma mai he nakai mitaki katoatoa.​—Roma 6:17, 18; 8:21.

He lalolagi foou ia, to utakehe fēfē he Atua e mahani kelea? He nakai utakehe e mena fakaalofa he atāina ke fifili mo e taute e tau tagata ke tuga e tau ropoto. Ka e to fakaako e ia e tau tagata omaoma ke he tau puhala haana, he lagomatai a lautolu ke mafoki mai he tau manatu mo e tau gahua kelea.

Ko e heigoa he Atua ka taute hagaao ke he tau lekua nakai kitia tuai? Ne mavehe mai e ia to nakai leva ti pule e Kautu haana ke he lalolagi. Ko e Patuiki ne kotofa he Atua he Kautu ia ko Iesu Keriso, kua ha ha e malolō ke fakamaulu a lautolu ne gagao. (Mataio 14:14) Ha ha foki ia Iesu e malolō ke fakamilino e tau mena tuga e matagi. (Mareko 4:35-41) To galo mogoia e matematekelea ne fakatupu he “vaha mo e tau mena ke tutupu ai.” (Fakamatalaaga 9:11) I lalo hifo he pule he Keriso, to nakai fai mena kelea ka hoko ke he tau tagata.​—Tau Fakatai 1:33.

Ka e kua e tau miliona tagata noa ne mamate ha ko e tau matematekelea tutupu fakaofo? Ato liu a Iesu ke fakamoui e kapitiga haana ko Lasalo, ne pehē a ia: “Ko au nai ko e liu tu mai, mo e moui.” (Ioane 11:25) Ē, ha ha ia Iesu e malolō ke fakaliu tu mai, po ke liu fakamoui a lautolu ne kua mamate!

Ka fiafia a koe ke he manatu ke nofo he lalolagi ka nakai tutupu e tau mena kelea ke he tau tagata mitaki, he ha he foli ke iloa atu foki hagaao ke he Atua mooli mo e haana finagalo he fakaako e Tohi Tapu? Fiafia e Tau Fakamoli a Iehova he matakavi haau ke lagomatai a koe ke iloa e mena ia. Kua uiina mafanatia atu a mautolu ki a koe ke matutaki ki a lautolu he matakavi haau po ke tohi atu ki a lautolu ne lolomi e mekasini nei.