Beibele e re botša gabotse ka seo Jehofa le Morwa wa gagwe, Jesu Kriste, ba tlago go se dira ka tlaišego yeo e bakilwego ke Sathane Diabolo. Beibele e re: “Lebaka leo Morwa [Jesu] wa Modimo a bonagaditšwego ka lona še le: Ke go fediša mediro ya Diabolo.” (1 Johane 3:8) Tshepedišo ye ya dilo yeo e nago le megabaru, lehloyo le ditiro tše kgopo e tla fedišwa. Jesu o holofetša gore “mmuši wa lefase le,” e lego Sathane Diabolo, “o tla lahlelwa ntle.” (Johane 12:31) Ntle le tutuetšo ya Sathane, lefase le lefsa la go loka le tla tla gomme lefase le le tla fetošwa lefelo la khutšo.—2 Petro 3:13.

Go thwe’ng ka bao ka manganga ba ganago go fetoša ditsela tša bona e bile ba gapeletša go dira dilo tše mpe? Naganišiša ka kholofetšo ye e kwagalago e rego: “Baloki ke bona ba tla dulago mo lefaseng gomme bao ba se nago bosodi ba šala go lona. Ge e le ba kgopo ba tla fedišwa lefaseng; baradia bona ba tla tlošwa go lona.” (Diema 2:21, 22) Tutuetšo ya batho ba kgopo e tla fedišwa. Ka tlase ga maemo a bjalo a khutšo, batho bao ba kwago ba tla lokollwa ganyenyane-ganyenyane go se phethagaleng ga leabela.—Baroma 6:17, 18; 8:21.

Modimo o tla fediša bjang bobe lefaseng leo le lefsa? E sego ka go tima batho mpho ya go ikgethela le ka go ba dira diroboto. Go e na le moo, o tla ruta batho bao ba kwago ditsela tša gagwe, a ba thuša go fetoša menagano le ditiro tša bona tše mpe.

Modimo o tla dira eng ka dikotsi tšeo di sa letelwago? O holofeditše gore go se go ye kae Mmušo wa gagwe o tla buša lefase. Kgoši yeo e kgethilwego ke Modimo ya Mmušo woo ke Jesu Kriste, yoo a nago le matla a go fodiša balwetši. (Mateo 14:14) Le gona Jesu o kgona go laola matla a tlhago. (Mareka 4:35-41) Ka gona, tlaišego yeo e bakilwego ke “nako le ditiragalo tšeo di sa letelwago” e tla fedišwa. (Mmoledi 9:11) Ka tlase ga pušo ya Kriste, ga go na masetlapelo ao a tlago go wela batho.—Diema 1:33.

Go thwe’ng ka batho ba dimilione ba se nago molato bao ba hwilego mahu a sehlogo? Gateetee ka morago ga go tsoša mogwera wa gagwe Latsaro, Jesu o itše: “Ke nna tsogo le bophelo.” (Johane 11:25) Ee, Jesu o na le matla a go tsoša bahu le go bušetša batho bao ba hwilego bophelong!

Ge e ba kgopolo ya go phela lefaseng leo dilo tše mpe di ka se sa hlwago di diragalela batho ba go loka e go kgahla, o re’ng o sa ipeele pakane ya go ithuta ka mo go oketšegilego ka Modimo wa therešo le morero wa gagwe ka go ithuta Beibele? Dihlatse tša Jehofa tša tikologong ya geno di tla thabela go go thuša go hwetša tsebo yeo. Re go laletša ka borutho gore o ikgokaganye le tšona moo o dulago gona goba o ngwalele bagatiši ba makasine wo.