Bible afa na e polele ye so Jéhovah na Molenge ti lo, Jésus Christ, ayeke sara ande na asioni ye so Satan Zabolo ayeke na peko ni so. Bible ni atene: “Nda ni so [Jésus] Molenge ti Nzapa afa tere ti lo na gigi ayeke ti futi akusala ti Zabolo.” (1 Jean 3:8). Na yâ ti dunia ti laso bê ti warango ye, kengo tere nga na asioni sarango ye la amû ndo dä. Me, aye ni so kue ayeke hunzi ande. Ti Satan Zabolo, “mokonzi ti dunia” ni so, Jésus atene so ‘a yeke bi lo na gigi’ ande (Jean 12:31). So Satan ayeke handa azo encore ape so, a yeke sara si mbeni fini dunia ayeke bâ gigi so na yâ ni siriri ayeke duti dä.—2 Pierre 3:13.

Ka ti azo so, na mbana, ala ke ti changé asarango ye ti ala nga ala ngbâ gi ti sara aye ti sioni, ti ala ayeke duti ande tongana nyen? Bâ kpengba tënë so: “Azo ti mbilimbili, fade ala duti na sese so, na azo so alingbi kue, fade ala ngbâ dä. Me azo ti sioni, fade a lungula ala na sese so, na fade a gboto azo ti handa na yâ sese ni.” (aProverbe 2:21, 22). A yeke futi ande azo ti sioni na sioni ti ala na azo kue ayeke duti na yâ ti siriri. Na ngoi ni so ande, a yeke zi siokpari yeke yeke na tere ti azo so amä yanga.—aRomain 6:17, 18; 8:21.

Na yâ ti fini dunia ni so, Nzapa ayeke zi ande asioni ye ni so tongana nyen? Lo yeke sara ni pëpe na zingo liberté so azo ayeke na ni ti mû desizion ti bê ti ala si ala sara ye gi tongana arobot. Nde na so, lo yeke fa lege ti lo na azo so amä yanga, lo yeke mû maboko na ala ti zia lege ti asioni pensé nga na asioni sarango ye.

Ti asioni ye so ayeke si ka gi gbagburu tongaso, Nzapa ayeke sara nyen na ni? Lo tene so Royaume ti lo, so ti tene gouvernement ti lo, aga nduru ti komande na ndo ti dunia kue awe. Zo so Nzapa azia lo Gbia ti Royaume ni ayeke Jésus Christ, so ayeke na ngangu ti zi kobela (Matthieu 14:14). Jésus ayeke nga na ngangu na ndo ti aye tongana ngu, pupu, wâ (Marc 4:35-41). Ni la, apasi so azo ayeke bâ ndali ti aye so ayeke si gbagburu ayeke hunzi ande (Zo-ti-fa-tene 9:11). Na gbe ti komandema ti Christ ande, sioni ye oko ayeke si na azo ape.—Proverbe 1:33.

Ti azo kutu na kutu so akui kuâ ti ngangu senge senge ayeke duti ande tongana nyen? Lani tâ gi kozo si Jésus azingo kamarade ti lo Lazare na kuâ, lo tene: “Mbi yeke zingongo ti akuâ nga na fini.” (Jean 11:25). Biani, Jésus ayeke na ngangu ti zingo azo na kuâ!

Tongana tënë ti fini dunia so asioni ye ayeke si ande na anzoni zo na yâ ni ape anzere na mo, e wa mo ti gi ti manda Bible ti hinga ye mingi na ndo ti tâ Nzapa nga na aye so lo leke ti sara. A-Témoin ti Jéhovah ti ndo so mo yeke dä ayeke duti ande na ngia ti mû maboko na mo ti hinga aye ni so. E wa mo ti gi ti wara tere na ala na ndo so mo yeke dä wala ti sû mbeti na ala.