Lionel Casson, sásaamu lidan tuáguti binadu waporu, ariñagati lárigiñe lan laputihóun láfadaragun fulansu le tuágubei waporu, ha lan adaagubaña waporu lidan hadaani rómana “aba lan háhurudaguni láfadaragun fulansu íbini bóugudigiñe lun lau barama o lau barama luma cera; ani lárigiñe, aba háhurudagunu lau barama turageirugugiñe”. Saragu dan habaragiñe rómana, yusu hamaali meha babilóniana hama acadios barama lun haputihanu hagune waporu.

Gayarati ladarirún barama gubuñu luma deregu. Ha binadu adaagutiña waporu, yusu hamuti meha katei ligía gubuñu lun híchuguni tuagu hagune. Lárigiñe híchuguni tuagu aba lederaagun ani aba lerederun kei aban kapa le siñati laburuchaguni duna.

Lidan meha tidaani Bíbülia, anihein meha saragu fulasu ñein lubéi meha ladarirúa barama. Kéiburi lidan fulasu le gíribei Sidimü, lubadu barana Hilaali, anihein meha saragu fusu le ñein lubéi ladarirúa barama (Agumesehani 14:10).

Súdinigubeiñein úduraü lidan heigin gürigia lúmagiñe binadu dan. Lubaragiñe meha hagumeserun fiú hádangiñe lani Hesusu apostolugu éibuga luma, óuchahani meha hafisiutebei lidan barana le Galiléabei (Matéu 4:18-22). Íbini fiú hádangiñe úduraü ha hadigibaña aranserúatiña meha tidan burí “kónpeni” to yarafaboun.

Ítara kei meha haransehóun úduraü Galiléa ítaramemegili ladügǘn lidan saragu fulasu. Furumiñe aba lasagarún lisasa úduraü ani aba lachibún lau duna. Afuranguagüdatu Studies in Ancient Technology “aba lan láhurudawagun sun liyumulugu luma lura úduraü lau salu le wéinamuti lagu. Lárigiñe aba hapakürǘn úduraü ábati lachagarún salu hagibuagun, ábanya hichugún úduraü ábanya lichugún salu, lárigiñe aba ladourawagun hau tau aban gamisa mábeitu. Aba higirún ñein luagu ǘrüwa o seingü weyu, lárigiñe aba hagarabawagun, ábaya higirún ñein luagu ǘrüwa o seingü weyu. Lidan sun dan ligía aba láwiyurun sun hadunari úduraü ani aba lebelurun salu lidoun hágürügü. Lárigiñe hamabeidun, aba hedererun”.

Ibidiñewati átiriñein lan dan hadurarun úduraü areidúañu lárigiñe hasaluhóun ítara. Gama lumoun, alugurahatiña meha ehiptuna úduraü aranserúaaña houn síriana, arufudati le buidu lan meha ligaburi haransehóun úduraü ligía.