Lionel Casson, un eksperto riba barkunan antiguo, a splika kiko trahadónan di barku den tempu romano tabata hasi despues di seal e nachinan meimei di e plankinan di nan barku. Nan tabatin kustumber di “yena e nachinan i asta henter e struktura parti pafó di e barku ku breu òf un meskla di breu ku was; parti paden tambe nan tabata hunta ku un kapa di breu.” Hopi tempu promé ku e romanonan, e antiguo akadio- i babilonionan tambe tabata usa breu pa hasi nan barkunan waterpruf.

E Skritura Hebreo ta referí na un téknika similar den Génesis 6:14.

Den naturalesa, hende por haña breu den dos forma, esta, den forma líkido i sólido. Trahadónan di barku di pasado tabata hunta e breu den forma líkido direktamente riba nan barkunan. Unabes ku nan a hunt’é, e breu líkido akí tabata seka i bira duru i forma un kapa waterpruf.

Teranan bíbliko tabata riku na breu. E Vaye di Sidim, serka di Laman Morto, “tabata yen di pos di breu.”—Génesis 14:10.

Pa hopi tempu kaba piská ta un kuminda importante. Promé ku e apòstelnan di Hesus a kuminsá biaha kuné, algun di nan tabata piskadó riba Laman di Galilea. (Mateo 4:18-22) Por lo ménos un parti di e piskánan ku nan tabata kue einan tabata ser prosesá den “fábrikanan” den bisindario.

E téknika di konserbá piská ku probablemente nan tabata usa na Galilea ainda ta ser usá na sierto lugánan. Promé nan tabata limpiá e piska i lab’é ku awa. E buki Studies in Ancient Technology ta deskribí e siguiente pasonan: “Nan tabata frega salu gròf den e kaikai, boka i skamanan. Meimei di kada kapa di piská salgá nan tabata pone salu i te ariba nan tabata pone un tela seku. Despues ku e piskánan akí a para tres pa sinku dia, nan tabata bòltu henter e bulto i lag’é para pa e mesun kantidat di dia atrobe. Durante e dianan ei, e piskánan tabata seka i e salu tabata penetrá den nan. Despues di esaki nan tabata bira duru i steif.”

No ta konosí pa kuantu tempu e piskánan tabata keda bon konserbá den e manera akí. Pero, e echo ku e egipsionan di pasado tabata eksportá piská konserbá pa Siria ta mustra ku e método akí tabata duna bon resultado.