Lionel Casson, wan sabiman fu owruten sipi, e taki san den Romesma di ben e bow sipi ben e du baka te den ben tapu den olo na mindri den planga fu den sipi. Den ben gwenti fu „lobi tara pe den olo ben de, sosrefi gi a heri skin fu a boto, èn gi na inisei fu a boto”. Langa ten na fesi den owruten Akadiasma nanga den Babilonsma ben e gebroiki tara tu fu sorgu taki watra no kon na ini den boto fu den.

Den Hebrew Buku fu Bijbel e taki fu wan srefi sortu sani na Genesis 6:14. Soleki fa a sori, dan a Hebrew wortu di vertaal nanga „tara” abi fu du nanga wan sortu blaka oli di e komoto na ini a gron.

Tu sortu tara de, wan watrawatra wan nanga wan tranga wan. Sma na ini owruten di ben e bow sipi ben e gebroiki a watrawatra wan. Den ben e lobi en gi den boto fu den. Te den ben poti en gi den boto, dan a tara disi ben e kon drei èn a ben e tranga so taki watra no ben man kon na ini a boto.

Furu tara ben de fu feni na ini den kondre fu Bijbel ten. Sidim-lagipresi, na ini a kontren fu a Dede Se, „ben lai tarapeti”.—Genesis 14:10.

Fisi na wan prenspari sani di sma gwenti nyan langa ten kaba. Fosi sonwan fu den apostel ben bigin waka nanga Yesus, den ben de fisiman di ben e fanga fisi na ini a Se fu Galilea (Mateyus 4:18-22). A kan taki fisi bedrijf krosibei fu drape ben e sreka pikinso fu den fisi dati so taki den ben e tan bun.

Te na a dei fu tide, sma na son presi e sreka fisi ete na a fasi fa sma ben e du dati na ini owruten Galilea. Den ben e puru den inibere fu den fisi èn den ben e wasi den nanga watra. Wan buku e sori fa sma ben e du dati: „Sma ben e lobi grofu sowtu na ini a fisi ede, èn gi a heri fisi. Te den ben sowtu wan ipi fisi, dan den ben e poti pina-wiwiri na tapu, èn na so den ben e poti difrenti ipi tapu makandra. Den ben e libi na ipi sowan 3-5 dei, dan den ben e drai en meki a tan ete 3-5 dei. Na so a watra ben e hari gowe èn a sowtu ben e go na ini a fisi, dan den fisi ben e kon drei èn den ben e kon steifi” (Studies in Ancient Technology).

Wi no sabi o langa fisi ben e tan bun te sma ben sowtu en na a fasi disi. Ma te wi e luku taki den Egeptesma fu owruten ben e seni den fisi disi go na Siria, dan dati e sori taki den ben e tan bun wan heri pisi ten.