1. Isaysay an sarong pangyayari sa Bibliya na nagpapahiling kun paano nadaya nin salang klase nin kaisipan an nagkapirang lingkod nin Diyos. (Hilingon an ritrato sa itaas.)

SARONG aga, nakatindog an Halangkaw na Saserdoteng si Aaron sa laugan kan tabernakulo ni Jehova, kapot an insensaryo, o bugtakan nin kalayo sa pagtutong nin insenso. Yaon sa harani si Kora kaiba an 250 lalaki na nagdudulot man nin insenso ki Jehova, na an lambang saro may kapot na bugtakan nin kalayo. (Bil. 16:16-18) Sa inot na hiling, garo baga an gabos na lalaking idto maimbod na parasamba ki Jehova. Pero, bakong arog ni Aaron, sinda mapalangkaw na mga rebelde na nagpupurbar na agawon an pagkasaserdote. (Bil. 16:1-11) Dinadaya ninda an saindang sadiri sa pag-isip na aakuon nin Diyos an pagsamba ninda. Pero an inaasahan nindang iyan nakakainsulto ki Jehova, na nakakabasa nin puso asin nakakahiling kan saindang pagsagin-sagin.—Jer. 17:10.

2. Ano an ihinula ni Moises, asin nagkatotoo daw an sinabi niya?

² Tamang-tama, sarong aldaw bago iyan mangyari, ihinula ni Moises na sa kinaagahan ‘ipapahiling ni Jehova kun siisay an mga saiya’ o an mga sadiri niya. (Bil. 16:5) Talagang ipinahiling ni Jehova an pagkakalain kan tunay asin kan palsong mga parasamba kan ‘luminuwas an kalayo ni Jehova asin tinunaw [si Kora asin] an duwang gatos may  limang polong lalaki na nagdudurulot nin [insenso].’ (Bil. 16:35; 26:10) Pero, dai ginadan ni Jehova si Aaron, na ipinapahiling an pag-uyon sa tunay na saserdote asin tunay na nagsasamba sa Diyos.—Basahon an 1 Corinto 8:3.

3. (a) Anong sitwasyon an naglataw kan panahon ni apostol Pablo? (b) Anong halimbawa nin pag-aksiyon sa mga rebelde an ginibo ni Jehova dakul na siglo bago kaini?

³ Pakalihis nin mga 1,500 na taon, nagkaigwa man nin arog kaiyan na pangyayari kan panahon ni apostol Pablo. May naghihingakong mga Kristiyano na inako an palsong mga katukduan; pero, padagos pa man giraray sindang nakikiasosyar sa kongregasyon. Para sa mga nagmamasid sana, an mga apostatang ini garo baga dai man napapalain sa ibang yaon sa kongregasyon. Pero, an saindang apostasya peligroso sa maimbod na mga Kristiyano. An mga lobong ini na nakagubing nin karnero nagpuon na ‘laglagon an pagtubod nin nagkapira.’ (2 Tim. 2:16-18) Minsan siring, si Jehova dai sana basta nagmamasid, asin aram ini ni Pablo huling pamilyar siya sa kun paano inaksiyunan nin Diyos an sitwasyon dapit sa mga rebelde—si Kora asin an mga parasuportar niya—dakul na siglo bago kaini. Mapadapit digdi, pag-ulayan ta an sarong interesanteng teksto sa Kasuratan asin hilingon kun anong praktikal na mga leksiyon an manunudan ta diyan.

4. Sa ano kumbinsido si Pablo, asin paano niya ipinahayag ki Timoteo an saiyang kumbiksiyon?

⁴ Sigurado si Pablo na aram ni Jehova an mapagsagin-sagin na pagsamba, asin kumbinsido man siyang aram ni Jehova kun sairisay an makinuyog sa Saiya. An makusog na kumbiksiyon ni Pablo risang-risa sa pinili niyang mga tataramon sa ipinasabong nin Diyos na surat niya ki Timoteo. Pagkasambit niya kan espirituwal na danyos na ginigibo kan mga apostata sa nagkapira sa laog kan kongregasyon, si Pablo nagsurat: “Sa ibong kaiyan, an masarig na pundasyon nin Diyos nagdadanay na nakatindog, na igwa kan tatak na ini, ‘Midbid ni Jehova an mga sadiri niya,’ asin, ‘Isikwal kan lambang nag-aapod sa pangaran ni Jehova an karatan.’”—2 Tim. 2:18, 19, NW.

5, 6. Ano an maririsa ta sa paggamit ni Pablo kan mga tataramon na “masarig na pundasyon nin Diyos,” asin ano an tibaad nagin epekto kan mga tataramon na ini ki Timoteo?

⁵ Ano an maririsa ta sa mga tataramon na ginamit ni Pablo sa tekstong ini? Ini an solamenteng pagsambit sa Bibliya kan mga tataramon na “masarig na pundasyon nin Diyos.” Ginagamit kan Bibliya an terminong “pundasyon” sa pagkumparar sa manlain-lain na bagay, kaiba an literal na Jerusalem bilang an kabisera kan suanoy na Israel. (Sal. 87:1, 2) Ikinumparar man sa sarong pundasyon an papel ni Jesus sa katuyuhan ni Jehova. (1 Cor. 3:11; 1 Ped. 2:6) Ano an nasa isip ni Pablo kan isurat niya an dapit sa “masarig na pundasyon nin Diyos”?

⁶ Kan sambiton ni Pablo an mga tataramon na “masarig na pundasyon nin Diyos,” kinotar man niya an mga tataramon ni Moises manungod ki Kora asin sa mga parasuportar kaini na nakarekord sa Bilang 16:5. Malinaw na an sinasabi ni Pablo iyo an mga pangyayari kan panahon ni Moises sa paghihinguwang parigunon an buot ni Timoteo asin ipagirumdom sa saiya an kakayahan ni Jehova na mahiling asin kontrahon an rebelyosong mga gibo. An katuyuhan ni Jehova dai mauulang kan mga apostata sa kongregasyon kun paanong dai iyan naulang ni Kora dakul na siglo na an nakaagi. Dai detalyadong ipinaliwanag ni Pablo kun ano an irinerepresentar kan “masarig na pundasyon nin Diyos.” Pero, siyertong nakatabang an mga tataramon na ini ki Timoteo na magkaigwa nin tiwala asin kumpiyansa sa pamamaagi ni Jehova.

7. Taano ta makakasiyerto kita na si Jehova mahiro na may katanusan asin kaimbudan?

⁷ An halangkawon na mga prinsipyo ni Jehova dai mababago. ‘An kahatulan ni Jehova magdadanay sagkod lamang; an mga paghuna-huna nin saiyang puso sa gabos na mga kapag-arakian,’ an sabi kan Salmo 33:11. Sinasabi sa ibang mga teksto na magdadanay sagkod lamang an pamamahala, maimbod na pagkamuot, kaimbudan, asin katanusan  ni Jehova. (Ex. 15:18; Sal. 100:5, NW; 112:9) An Malaquias 3:6 nagsasabi: ‘Ako si Jehova; dai ako nagliliwat.’ Siring man, sinasabi kan Santiago 1:17 na si Jehova dai ‘nagliliwat-liwat’ o nagbabago arog kan paghiro kan anino.

8, 9. Anong leksiyon an manunudan ta sa “tatak” sa ilustrasyon ni Pablo?

⁸ An ilustrasyon ni Pablo sa 2 Timoteo 2:19 naglaladawan sa sarong pundasyon na may mensaheng nakaukit diyan, na garo baga igwa iyan nin tatak. Kan suanoy na mga panahon, napagkatudan nang maglaag nin inskripsiyon sa pundasyon nin sarong edipisyo, na tibaad ipinapahiling kun siisay an kagtugdok o kagsadiri kaiyan. Si Pablo an inot na kagsurat sa Bibliya na naggamit kan partikular na ilustrasyon na ini. * An tatak sa “masarig na pundasyon nin Diyos” may duwang deklarasyon. Inot, “Midbid ni Jehova an mga sadiri niya” asin ikaduwa, “Isikwal kan lambang nag-aapod sa pangaran ni Jehova an karatan.” Ipinapagirumdom kaini sa sato an mababasa ta sa Bilang 16:5.—Basahon.

⁹ Anong leksiyon an manunudan ta sa “tatak” sa ilustrasyon ni Pablo? Para sa mga sadiri nin Diyos, an mga pamantayan asin prinsipyo ni Jehova masusumaryo sa duwang importanteng marhay na katotoohan: (1) Namumutan ni Jehova an mga maimbod sa saiya, asin (2) ikinakaungis ni Jehova an karatan. Paano konektado an leksiyon na ini sa isyu nin apostasya sa laog kan kongregasyon?

10. Paano nakaapektar sa mga maimbod kan panahon ni Pablo an mga ginigibo kan mga apostata?

¹⁰ Posibleng marhay na napurisaw si Timoteo asin an iba pang maimbod sa ginigibo kan mga apostata. Tibaad kinuwestiyon kan nagkapirang Kristiyano kun taano ta tinutugutan pang magdanay sa kongregasyon an siring na mga indibidwal. Tibaad naiisip-isip kan mga maimbod kun baga talagang nahihiling ni Jehova an pagkakalain kan marigon na kaimbudan ninda sa saiya asin kan mapagsagin-sagin na pagsamba kan mga apostata.—Gui. 20:29, 30.

11, 12. Paano siyertong napakusog kan surat ni Pablo an pagtubod ni Timoteo?

¹¹ Siyertong napakusog kan surat ni Pablo an pagtubod ni Timoteo kan ipagirumdom niya sa saiya an nangyaring pagbindikar sa maimbod na si Aaron asin an pagbuyagyag, pagsikwal, saka paggadan sa mapagsagin-sagin na si Kora asin sa mga kairiba kaini. Garo man sana sinasabi ni Pablo na dawa may palsong mga Kristiyano sa tahaw ninda, siguradong mamimidbid ni Jehova kun siisay an mga sadiri niya, arog kan panahon ni Moises.

 ¹² Si Jehova nungkang nagbabago; masasarigan siya. Ikinakaungis niya an karatan, asin sa itinalaan na panahon, huhusgaran niya an mga nagkasala na habong magsulsol. Bilang saro sa “nag-aapod sa pangaran ni Jehova,” ipinagirumdom man ki Timoteo an saiya mismong paninimbagan na isikwal an maraot na impluwensiya kan palsong mga Kristiyano. *

13. Sa ano kita makakapagtiwala?

¹³ Mapapakusog man kita sa espirituwal kan mga tataramon ni Pablo na ipinasabong sa saiya. Inot sa gabos, nakakaparigon na maaraman na aram na marhay ni Jehova an kaimbudan ta sa saiya. Bako ining pakaaram sana na mayong ginigibo. Imbes, interesadong marhay si Jehova sa mga sadiri niya. Sinasabi kan Bibliya na ‘an mga mata ni Jehova naghihiling sa bilog na daga’ tanganing ipahiling an kusog niya para sa mga ‘igwa nin sangkap na puso sa saiya.’ (2 Cron. 16:9) Kaya, lubos kitang makakapagtiwala na dai mawawaran nin saysay an mga ginigibo ta para ki Jehova na ‘gikan sa malinig na puso.’—1 Tim. 1:5; 1 Cor. 15:58.

14. Anong klaseng pagsamba an dai kinokonsinte ni Jehova?

¹⁴ Dai kinokonsinte ni Jehova an mapagsagin-sagin na pagsamba. An saiyang mga mata ‘naghihiling sa bilog na daga,’ asin nahihiling niya an mga may bakong ‘sangkap na puso sa saiya.’ Sinasabi kan Talinhaga 3:32 na ‘ikinakaungis ni Jehova an makasalan,’ arog nin sarong tawo na nagsasagin-sagin na makinuyog pero pasekretong naggigibo nin kasalan. Minsan ngani, tibaad sa halipot na panahon an sarong tuso ekspertong nakakapandaya nin ibang tawo, ginagarantiyahan kita kan pagigin makapangyarihan sa gabos ni Jehova asin kan saiyang katanusan na an saro na ‘nagtatago kan saiyang mga kasalan’ dai magigin mapanggana.—Tal. 28:13; basahon an 1 Timoteo 5:24; Hebreo 4:13.

15. Ano an maninigo niyatong likayan, asin taano?

¹⁵ Haros gabos na lingkod ni Jehova sinsero sa saindang debosyon. Bihira nanggad na may saro sa kongregasyon na tuyong gugustuhon na magkaigwa nin mapandayang porma nin pagsamba. Pero, kun nangyari iyan kan panahon ni Moises asin sa panahon kan inot na Kristiyanong kongregasyon, puwedeng mangyari man iyan ngunyan. (2 Tim. 3:1, 5) Minsan siring, pagdududahan ta na daw an satong mga kapwa Kristiyano, na kinukuwestiyon kun baga tunay an kaimbudan ninda ki Jehova? Dai nanggad! Sala na pagsuspetsaran an satong mga tugang na mayong basehan. (Basahon an Roma 14:10-12; 1 Corinto 13:7.) Dugang pa, makakadanyar sa sato mismong espirituwalidad an pagkaigwa nin tendensiya na pagdudahan an integridad kan iba sa kongregasyon.

16. (a) Ano an puwedeng gibuhon kan lambang saro sa sato tanganing malikayan na tumubo sa satong puso an pagsagin-sagin? (b) Anong mga leksiyon an makukua ta sa kahon na “ Padagos na Baluon . . . Padagos na Patunayan . . .”?

¹⁶ An lambang Kristiyano maninigong ‘magsiyasat kan sadiri niyang gawi.’ (Gal. 6:4, An Marahay na Bareta Biblia) Huli sa satong makasalan na mga tendensiya, pirming may posibilidad na dai kita magin sinsero sa satong pagsamba dawa dai ta iyan tinutuyo. (Heb. 3:12, 13) Kaya sa pana-panahon, puwede tang siyasaton an satong motibo sa paglilingkod ki Jehova. Puwedeng ihapot sa sadiri: ‘Sinasamba ko daw si Jehova huli sa pagkamuot ko sa saiya asin sa pagmidbid sa saiyang soberaniya? O mas mahalaga daw sa sako an pisikal na mga bendisyon na linalauman kong makamtan sa Paraiso?’ (Kap. 4:11) Siguradong makikinabang kita gabos sa pagsiyasat kan sato mismong paggawi asin paghali kan ano man na natatadang pagsagin-sagin sa satong puso.

17, 18. Taano ta dapat na magin tunay asin sinsero an satong pagsamba ki Jehova?

¹⁷ Mantang pinagmamaigutan niyato na magin tunay asin sinsero sa satong pagsamba, dakul an makukua tang pakinabang. “Maugma an tawo na  dai inaakusaran ni Jehova nin pagkakasala, na sa saiyang espiritu mayo nin pandadaya,” an sabi kan salmista. (Sal. 32:2, NW) Iyo, kun hinahali nin saro sa saiyang puso an ano man na pagsagin-sagin, nagigin mas maugma siya asin lubos na magigin maugma sa maabot na panahon.

¹⁸ Sa itinalaan na panahon, ibubuyagyag ni Jehova an gabos na naggigibo nin karatan o may dobleng pamumuhay, na malinaw na ipapahiling an ‘kalainan kan [matanos] asin kan maraot, kan naglilingkod sa Diyos asin kan dai sa saiya naglilingkod.’ (Mal. 3:18) Miyentras tanto, nakakapakusog sa buot na maaraman na ‘an mga mata ni Jehova nasa mga matanos, asin an saiyang mga talinga nasa saindang pagngayo-ngayo.’—1 Ped. 3:12.