1. Abahüdagua humá aban sügǘ tídangiñeti Bíbülia le arufudubalin ida liña lan heyeedagun fiú lubúeingu Bungiu houngua (ariha huméi dibuhu le lídanbei lagumeseha arütíkulu).

 RARA liña meha Aarón, fádiri le íñutimabei, luagu tubenari kianpu lánina óundaruni to lani Heowá lau aban lagei kupali lúhaburugu. Binaafinméme ligía, ñeinñein Koré hama 250 wügüriña hágudahaña giñe kupali lun Heowá, kada gürigia lau lagei lani kupali (1 Lur. 16:16-18). Genegeti yebe lubúeingu lan Heowá ha úaraguatiña súngubei hagía. Gama lumoun, Koré hau sun lánigu barüguatiña meha houngua, maganbaditiña ani hawouguounrügüñein hasaminara ani busentiña meha lun hagidaruni afadirihani luéi Aarón (1 Lur. 16:1-11). Eyeedaguatiña meha houngua lau hasaminarun lánharuba lan Heowá lun háhuduragun. Gama lumoun, igaburi le harufudubei aban meha anabawaguni lun Heowá, le arihubarun hanigi ani ruti fe luagu biangua lan hagibu (Her. 17:10).

2. a) Ka meha lariñagubei Moisesi lidan aban profesía? b) Ida liña meha lagunfulirun lererun Moisesi?

² Aban weyu lubaragiñe, ariñagati Moisesi: “Haruga binaafin lasubudirágüdübei Wabureme ka lan lánigubei” (1 Lur. 16:5). Kei larufuduni dimurei le, arihúati furangu kátaña lan eseriwidubaña lun Bungiu lau hanarün lumoun kátaña lan biánguabaña igibu. Ida liña lasuseredun? Óunahati Bungiu “watu gemeti le áfaragubaliña [Koré hau sun] bián-san-dimí ha águdahabaña kupali” (1 Lur. 16:35; 26:10). Gama lumoun, magidarun lumuti Heowá  libagari Aarón, ítara liña larufuduni ligía lan fádiri le aubei lagundaara ani ligía lan le áhuduragubei lun lau sun linarün (aliiha huméi 1 Korintuna 8:3).

3. a) Ka meha sügǘ asuseredubei lidan lidaani apostolu Pábulu? b) Katei le asuseredubei lun Koré luma houn híbiri maganbaditiña, ka larufudahabei woun luagu Heowá?

³ Kéiburi 1,500 irumu lárigiñe, lidan lidaani apostolu Pábulu, susereti aban katei libe lira. Fiú wügüriña ha ariñagubaña kristiánugu hamá aba háyeihan arufudahani le mama inarüniti; gama lumoun, añahagua adamuridagua lidan damuriguaü. Íbini aban lan meha ligaburi harihín hama ha híbiri kristiánugu, kei le díreihaña lan luéi inarüni, aban meha peliguru hagía houn kristiánugu ha úaraguabaña. Ítara haña meha kei ounli áraabuna darugu lau hara mudún ani hadebilidagüdüñein meha hafiñen fiú (2 Tim. 2:16-18). Gama lumoun, kei le subudi lani meha Pábulu le asuseredubei lun Koré luma houn ha híbiri maganbaditiña, subudi lumuti meha luagu meyeedagunti lan Heowá lungua lau ligaburi harihín gürigia. Akutiha waméi dimurei burí le lariñagubei lun Timotéu ani ariha waméi kaba lan wafurendeira lídangiñe.

4. a) Ka meha ichouruni luágubei Pábulu? b) Ida liña larufuduni ichouruni ligía tidan ligaradan lun Timotéu?

⁴ Chouru lumuti meha Pábulu luagu subudi lani Heowá kátaña lan áhuduragubaña lun lau hanarün luma kátaña lan biánguabaña igibu. Ligía lanúadirunbalin dimurei le labürühabei lun Timotéu lau lídehan Bungiu. Lárigiñebei layanuhan luagu dañu le meha hadügübei ha díreihañabaña luéi arufudahani inarüniti houn fiú lílana damuriguaü, ariñagati: “Gama lumoun rúhali Bungiu aban ebu derebuguti; le siñati lánhingichuniwa. Bürüwati dimurei burí le luagu ebu ligía: ‘Subudi lumutiña Wabureme Bungiu lánigu’; ani: ‘sun ha agúarubalin liri Bungiu, lunti hadisedun luéi wuribani’” (2 Tim. 2:18, 19).

5, 6. a) Ka uagu súdini lubéi layusuruni Pábulu dimurei “ebu derebuguti”? b) Ka lánibei dimurei le layusurubei Pábulu efekütu luagu Timotéu?

⁵ Ka katei arihíbei luagu dimurei le layusurubei Pábulu dan le labürühanbalin sügǘ le? Anihán lan ábanrügü wéiyaasu layanuhóun tidan Bíbülia luagu líchugun “Bungiu aban ebu derebuguti”. Yusu tumuti Bíbülia dimurei “ebu” lun tayanuhan luagu saragu katei, kéiburi luagu uburugu Herusalén keisi fulasu le súdinitimabei lidan binadu Ísüraeli o tuagu ligaradan Hesusu lidan lisuuni Bungiu (Sal. 87:1, 2; 1 Ko. 3:11; 1 Fe. 2:6). Kati mini lubéi “ebu derebuguti” le uágubei layanuha Pábulu?

⁶ Layanuhaña Pábulu luagu dimurei le lariñagubei Moisesi luagu Koré hama lánigu lidan 1 Lúrudu 16:5, ábati layusuruni dimurei “ebu derebuguti”. Ayanuhati luagu sügǘ burí le asuseredubei lidan lidaani Moisesi lun líchugun dǘgüdaguaü lun Timotéu luma lun laritaguagüdüni luagu gayara lan lasubudiruniña Heowá ha maganbadibaña ani adüga ligía lun hafayeirun luagu hadurun. Ítara kei siñá lan meha ladüraaguni Koré lagunfulirun lisuuni Bungiu, siñati meha giñe hadüraaguni ha díreihañabaña luéi arufudahani inarüniti lidan damuriguaü. Mafuranguagüdün lumuti Pábulu buidu ka lan mini lubéi “ebu derebuguti” le lani Bungiu. Gama lumoun, dimurei le meha layusurubei chóuruti ru lan afiñeni luma emenigini lun Timotéu luagu súnwandan lan lóuserun Heowá lau irichaü.

7. Ka uagu gayara lubéi wachoururuni luagu lóuseruba lan Heowá lau irichaü luma úaraguni súnwandan?

⁷ Lilurudun Heowá, le íñutimabei luéi sun lúrudu, masansirunti. Ariñagati Sálumu 33:11: “Ánheinti laransehan Aburemei derebuguti súnwandan”. Amu burí bérusu tídangiñeti Bíbülia ariñagati luagu magumuchagunbei lan larúeihan, línsiñehabu, liricha luma úaraguni le luágubei Heowá, laduraruba lun súnwandan (Afu. 15:18; Sal. 106:1; 112:9; 117:2). Ariñagati Malakíasi 3:6: Au [Heowábei]. Masansiragungidina”. Ani ariñagati Santiagu 1:17 luagu “úati [lan] sánsiguaü lidan, mamuñoungadun ligía”.

8, 9. Ka wafurendeirubei lídangiñe dimurei le layusurubei Pábulu lidan lani hénpulu?

⁸ Lidan dimurei le labürühabei Pábulu lidan 2 Timotéu 2:19 ayanuhati luagu aban ebu ani bürüwañu liña fiú dimurei luagu, kamá hamuga fidiwarügüti luagu lau aban seyu. Lidan meha binadu dan maweirintu meha hanigi gürigia luagu harihin abürühani luagu tuágaburi muna, háfuga lun lasubudirúniwa ka lan ábunagubarun o ka lan taburemebei. Pábulu meha furumiñeti abürühati le ayusurubalin hénpulu le. a Dimurei le bürüwañubei luagu “ebu derebuguti” le lani Bungiu ariñagati bián katei: Furumiñe: “Subudi lumutiña Wabureme Bungiu lánigu”, ani le libiaman: “Sun ha agúarubalin liri Bungiu, lunti hadisedun luéi wuribani”. Haritaguagüda lumutiwa katei le luagun le waliihabei lidan 1 Lúrudu 16:5 (aliiha huméi).

⁹ Ka wafurendeirubei lídangiñe dimurei le layusurubei Pábulu lidan lani hénpulu? Furendeitiwa luagu biama lan inarüni súdiniti lébunabei lilurudun Bungiu houn lánigu: 1) hínsiñetiña ha úaraguabaña lun Heowá lun ani 2) iyereeguti marichaü lun Heowá. Ka uagu súdini lubéi arufudahani le lidan luáguti agarabaaguni lun Bungiu lidan damuriguaü?

10. Ka meha efekütu lánibei hagaburi ha díreihañabaña luéi arufudahani le inarüniti hawagu fiú kristiánugu úaraguatiña lidan lidaani Pábulu?

¹⁰ Chóuruti nidiheri lan meha Timotéu hama amu kristiánugu úaraguatiña luagu ligaburi hóuserun ha díreihañabaña luéi arufudahani inarüniti. Gayarati añahein lan álügüdagutiña houngua ka lan uagu ligirúa lun hasigirun gürigia hagía lidan damuriguaü. Íbini gayarati álügüdagua hamá houngua anhein ariha lubalin Heowá úaraguni le harufudubei híbiri luma biangua lan hagibu ebedaagutiña hagía (Adü. 20:29, 30).

11, 12. Ka uagu chouru lubéi luagu héregüda tani ligaradan Pábulu lafiñen Timotéu?

¹¹ Chóuruti adüga tan ligaradan Pábulu lun léredun lafiñen Timotéu, lugundun haritaguagüda tumuti luagu gumuguagüda lani Heowá Koré hau sun lánigu ladüga biangua lan hagibu. Ítara liña lafuranguagüdüni luagu magundan lan hau. Ani arufuda lumuti giñe luagu gunda lan lau Aarón. Le linarün katei, lariñaguña meha apostolu Pábulu luagu íbini lan añahein lan meha kristiánugu mama inarünitiña lidan damuriguaü, lasubudirubaña lan Heowá ha lánigubaña, ítara kei ladüga lidan lidaani Moisesi.

¹² Maweiyasunbei Heowá asansira, gayarati wafiñerun luagu. Iyereeguti marichaü lun, ani lachülürüba oura lun lasiadiruniña  ha afigouhatiña ani masakürihantiña. Ani kei le ‘wa lubalin Timotéu liri Heowá’, haritaguagüda lumuti Pábulu lun mosu lan “[l]adisedun luéi wuribani”, mosu lageindagun kóntüra luriban hagaburi kristiánugu mama inarünitiña. b

13. Ka gayarabei wachoururuni?

¹³ Dimurei le labürühabei Pábulu lau lídehan Bungiu gayarati giñe líchugun erei woun. Luagu aban oubaü, ruti erei woun wasubudiruni mabulieidun lani Heowá úaraguni le warufudubei. Mama gúndaarügüti wau, bereseti wau, wagía ha lánigu. Ariñagatu Bíbülia: “Aríagu liña Wabungiute lun sun le asuseredubei lidan sun ubóu, lun líchugun erei houn ha hemenigibaña luagu le tímatimaati” (2 Kro. 16:9). Ligíati, gayarati wachoururuni le lan wadügübei luagu Heowá ‘lau taruman wanigi’ mama luagu ni kata wadügei, súnwandan líchugun wafayeiruaha (1 Tim. 1:5; 1 Ko. 15:58).

14. Ka luwuyeri áhuduraguni unbei lamahada Heowá?

¹⁴ Luagu le aban oubaü, haritaguagüda lumutiwa lererun Pábulu luagu iyereegu lan háhuduragun ha biánguabaña igibu lun Heowá. Kei le “aríagu liña [lubéi] Wabungiute lun sun le asuseredubei lidan sun ubóu” ariha lumutiña kátaña lan máhuduragunbaña lun tau sun hanigi. Ariñagati Ariñawagúni 3:32 luagu iyereegu hamá “ha wuribabaña igaburi” lun Heowá, kéiburi ha afamurubaña kamá gaganbaditiña, ani añaha afigouha aramudaguarügü. Íbini gayara lan heyeeduniña gürigia háledigu luagu fiú dan, chóurugüda lumuti óunwenbu lubafu luma liricha Heowá woun luagu “ha [lan] adouragutiña lau hafigoun, mídinbei houn buidu” (Ari. 28:13; aliiha huméi 1 Timotéu 5:24 luma Ebüréu 4:13).

15. Ka lunbei madügün wamani, ani ka uagu?

¹⁵ Hibe-agei lubúeingu Bungiu huduguatiña lun tau sun hanigi. Hénrenguti ladarirún somu gürigia lidan damuriguaü le áhuduraguti lun Heowá lau igibu biánguati. Gama lumoun, susereeli ligía meha katei le lidan lidaani Moisesi luma lidan lidaani furumiñeti damuriguaü kristiánu, gayarati giñe lasuseredun guentó (2 Tim. 3:1, 5). Mini lan san le lunti lan wasaminarun wuriba hawagun wíbirigu, o wasaminarun mama lan lau úaraguni heseriwida lun Heowá? Uá, mabuidunti wasaminarun wuriba hawagun wíbirigu mébunouga (aliiha huméi Rómana 14:10-12 luma 1 Korintuna 13:7). Le linarün katei, ánhawa eredera asaminara wuriba hawagun wíbirigu, gayarati lagadeiruni wamadagua luma Heowá.

16. a) Ka gayarabei wadügüni lun wagidarun furumiñeguarügü katei tídangiñe wanigi le gayarati ladügün lun wóuserun kei biangua tigibu? b) Ka larufudahabei rekuáduru “ Hóuchagua humá hungua” woun?

¹⁶ Kada kristiánu lunti laríaagun lungua “ida liña lan ligaburi lóuserun” (Gal. 6:4). Sun wagía gafigountiwa. Ligíati, furumiñeguarügü wádangiñe gayarati lagumeserun óusera lau igibu biánguati lidan leseriwidun lun Heowá sin líchugun fe (Ebü. 3:12, 13). Ligía lunti lubéi wakutihani lébuna wadügüni katei. Gayarati wálügüdagun woungua: “Huduguatina san lun Heowá ladüga hínsiñe lan nun ani subudi numuti ligía lan garichabei lun larúeihan? O súdinitimati abinirúni le lunbei nibihini lidan Paraísu nun?” (Aruf. 4:11). Ánhawa asaminara luagun álügüdahani burí le, gayarabei wagidarun furumiñeguarügü katei tídangiñe wanigi le gayarati ladügün lun wóuserun kei biangua tigibu.

17, 18. Ka uagu lunti lubéi wáhuduragun lun Heowá lau taruman wanigi?

¹⁷ Wáhuduragun lun Bungiu lau úaraguni barüti saragu buiti. Aliihatiwa lidan Sálumu 32:2: “Fuleseiwatiña gürigia ha buídubaña  isaminan, ha giñe madurunhañabaña ligibugiñe Aburemei luagu ni kata”. Anha, ha arumadahabarun hanigi lun móuserun hamá kei biangua tigibu gúndaatiña ani gachansintiña lun hadariruni ugundani le wéiritimati ámuñegü.

¹⁸ Lachülürüba dan lun larufuduniña Heowá ha óuserubaña wuriba hama sun ha anügübaña aban ibagari le biánguati, ábameti larihín furangu “le buídubei lumoun le wuribabei, le áhuduragubei lun Bungiu lumoun le máhuduragunbei lun” (Mal. 3:18). Lubaragiñe lasuseredun, ruti gurasu woun wasubudiruni luagu “góunigi lumutiña [lan] Wabureme Bungiu ha richaguabaña, aganbaléi hafurieidun lun” (1 Fe. 3:12).