“Zeova i konn bann ki pour li”

“Me si en dimoun i kontan Bondye, Bondye i konn li.”​—1 KOR. 8:3.

KI OU POU REPONN?

Kwa ki donn nou lasirans ki plan Zeova pa pou zanmen ganny kase?

Ki sa de laverite enportan ki bann valer ek prensip Zeova i baze lo la?

Ki mannyer nou lafwa dan Zeova i ganny ranforsi atraver bann leson ki nou aprann dan 2 Timote 2:19?

1. Rakont en resi Labib ki eksplike ki mannyer serten parmi pep Bondye ti anbet zot lekor par zot rezonnman. (Vwar portre anler.)

EN ZOUR bomaten, Gran Pret Aaron ti debout devan larantre tabernak Zeova avek en resipyan dife ki bril lansan. Pa tro lwen, Kora avek 250 zonm ti osi pe ofer lansan Zeova, sakenn avek son prop resipyan dife. (Nom. 16:16-18) Si ou ti get an gran, tou sa bann zonm ti paret bann adorater fidel Zeova. Par kont, kontrerman avek Aaron, Kora avek son bann konpanyon ti bann rebel vantar ki ti oule vin pret dan plas Aaron. (Nom. 16:1-11) Zot ti’n anbet zot lekor an krwayan ki Bondye ti pou aksepte zot ladorasyon. Me pour zot ekspekte sa ti en lensilt pour Zeova akoz i kapab lir dan leker e i ti’n kapab vwar zot lipokrizi.​—Zer. 17:10.

2. Ki Moiz ti predir e eski sa ti vin vre?

² Son zour avan, Moiz ti annan rezon pour predir: “Demen bomaten Zeova pou fer konnen lekel ki pour li.” (Nom. 16:5) Zis parey i ti’n dir, Zeova ti montre diferans ant son bann vre adorater e bann ki fo ler “en dife ti sorti kot Zeova e bril [Kora e] sa 250 zonm ki ti pe ofer lansan.” (Nom. 16:35; 26:10) Me Zeova pa ti detri Aaron, sa ti en siny ki Aaron ti annan son laprouvasyon konman sa vre pret e vre adorater.​—Lir 1 Korentyen 8:3.

3. (a) Ki ti arive dan letan zapot Pol? (b) Ki legzanp Zeova ti’n kite plizyer syek avan lo ki mannyer pour reazir anver bann rebel?

 ³ Plis ki 1,500 lannen pli tar, dan letan zapot Pol, en sityasyon parey ti arive dan kongregasyon Kretyen. Serten ki ti dir zot Kretyen ti adopte bann fo lansennyman, me zot ti kontinyen asosye avek kongregasyon. Petet, i ti difisil pour rekonnet lekel ki ti bann aposta akoz zot ti paret parey lezot dan kongregasyon. Me an realite, zot lapostazi ti en danze pour bann Kretyen fidel. Sa bann lyon anba lapo mouton ti konmans “detourn lafwa serten dimoun.” (2 Tim. 2:16-18) Par kont, Zeova pa gete san fer nanryen e Pol ti konn sa tre byen, akoz i ti konnen ki mannyer Bondye ti’n reazir plizyer syek avan dan sa sityasyon avek bann rebel, setadir Kora ek bann ki ti siport li. Anliny avek sa, annou egzamin en pasaz Labib enteresan e vwar ki leson pratik nou kapab aprann.

“MWAN MON ZEOVA, MON PA SANZE”

4. Kwa ki Pol ti konvenki e ki mannyer i ti eksprim son konviksyon avek Timote?

⁴ Pol ti asire ki Zeova ti kapab rekonnet ladorasyon ipokrit e i ti osi konvenki ki Zeova ti kapab idantifye bann ki ti obei Li. Anba lenspirasyon, Pol ti montre son konviksyon atraver bann mo ki i ti swazir kan i ti pe ekrir Timote. Apre ki Pol ti koz lo move lefe ki bann aposta ti deza pe fer lo spirityalite serten dan kongregasyon, i ti ekrir: “Malgre sa, Bondye in poz en fondasyon solid ki reste ferm. Sa bann parol in ganny grave lo la, ‘Zeova i konn bann ki pour li’ e ‘Tou dimoun ki kriy non Zeova i devret aret fer sa ki mal.’”​—2 Tim. 2:18, 19, NW.

5, 6. Akoz Pol ti servi sa fraz “fondasyon solid ki Bondye in poze” e tre probab ki lefe sa lekspresyon ti annan lo Timote?

⁵ Ki nou aprann avek bann mo ki Pol ti swazir dan sa verse Labib? Sa lekspresyon, “sa fondasyon solid ki Bondye in poze” i ganny trouve zis en sel fwa dan Labib. Labib i servi sa mo “fondasyon,” pour dekrir plizyer keksoz, enkli Zerizalenm ki ti kapital Izrael dan letan lontan. (Ps. 87:1, 2) Sa rol ki Zezi i zwe dan plan Zeova i osi ganny konpare avek en fondasyon oubyen ros kwen. (1 Kor. 3:11; 1 Pyer 2:6) Me ki Pol ti pe refer avek ler i ti ekrir konsernan sa “fondasyon solid ki Bondye in poze”?

⁶ Pol i koz lo sa “fondasyon solid ki Bondye in poze” dan menm konteks ki i sit parol Moiz konsernan Kora ek son bann siporter, ki’n ganny rikorde dan Nonm 16:5. Alor i evidan ki Pol ti pe refer avek bann levennman dan letan Moiz pour esey ankouraz Timote e ed li rapel ki Zeova i annan sa abilite pour rekonnet e anpes bann rebel fer zot bann move aksyon. Zis parey plan Zeova pa ti ganny kase par Kora plizyer syek avan, i pa ti pou ganny kase par bann aposta dan kongregasyon. Pol pa ti donn bokou detay pour eksplike ki sa “fondasyon solid ki Bondye in poze” i reprezante. Par kont, lafason ki Pol ti’n ekrir Timote ti sirman ed li pour annan konfyans dan Zeova.

7. Akoz nou kapab asire ki Zeova pou azir avek ladrwatir ek fidelite?

⁷ Bann prensip Zeova pa zanmen sanze. Psonm 33:11 i dir: “Me desizyon Zeova i pour touzour, panse son leker i pour zenerasyon apre zenerasyon.” Bann lezot verse dan Labib i dir ki dominasyon Zeova, son lanmour fidel, son ladrwatir ek fidelite pour reste pour touzour. (Egz. 15:18; Ps. 106:1; 112:9; 117:2) Malaki 3:6 i dir: “Mwan mon Zeova, mon pa sanze.” Pareyman, Zak 1:17 i dir ki Zeova “pa zanmen sanze, e kot ki napa menm lonbraz en sanzman.

 EN LENSKRIPSYON KI BATIR LAFWA DAN ZEOVA

8, 9. Ki leson nou kapab aprann atraver sa lenskripsyon ki ti’n ganny “grave” lo sa “fondasyon solid ki Bondye in poze”?

⁸ Legzanp ki Pol ti donnen dan 2 Timote 2:19 i dekrir en fondasyon avek en mesaz ki konmsi i ti’n ganny grave lo la. Dan letan lontan, i ti normal pour en mesaz ganny grave lo fondasyon en batiman, petet pour montre lekel ki ti’n konstri li oubyen i ti pour lekel. Pol ti sa premye ekriven Labib pour servi sa legzanp. * Sa lenskripsyon ki ti’n ganny grave lo “fondasyon solid ki Bondye in poze” i annan de fraz lo la. Premyerman, “Zeova i konn bann ki pour li” e dezyenmman, “Tou dimoun ki kriy non Zeova i devret aret fer sa ki mal.” Sa i fer nou rapel sa ki nou lir dan Nonm 16:5. * ​—Lir.

⁹ Ki leson nou aprann atraver sa lenskripsyon ki ti’n ganny grave lo sa “fondasyon solid ki Bondye in poze”? Pour sa bann ki pour Bondye, valer ek prensip Zeova i baze lo de laverite enportan: (1) Zeova i kontan bann ki fidel avek li e (2) Zeova i ay sa ki mal. Ki mannyer sa leson i annan en lyen avek lapostazi dan kongregasyon?

10. Ki mannyer aksyon bann aposta ti afekte bann ki ti fidel dan letan Pol?

¹⁰ I tre probab ki Timote ek lezot ki ti fidel ti trakase akoz aksyon bann aposta parmi zot. Petet serten Kretyen ti’n demande akoz sa bann dimoun ti ganny permet pour reste dan kongregasyon. Bann ki ti fidel ti’n kapab mazinen si Zeova ti vreman kapab remark diferans ant zot determinasyon pour reste fidel anver li ek ladorasyon ipokrit bann aposta.​—Akt 20:29, 30.

11, 12. Ki mannyer let Pol ti ranforsi lafwa Timote?

¹¹ San dout, let Pol ti ranforsi lafwa Timote par fer li rapel sa ki ti’n arive ler Aaron ki ti fidel ti ganny laprouvasyon Bondye e Kora ek son bann konpanyon ki ti ipokrit ti ganny devwale, rezete e detrir. Alor, sa ki Pol ti pe esey dir, se ki menm si ti annan bann fo Kretyen parmi zot, Zeova ti pou kapab rekonnet lekel ki ti vreman pour li, zis parey i ti’n fer dan letan Moiz.

 ¹² Zeova pa zanmen sanze, nou kapab depan lo li. I ay sa ki mal e dan son letan apropriye i anmenn lazistis lo bann ki pa repantir. Konman enn “ki kriy non Zeova,” Pol ti rapel Timote lo son prop responsabilite pour rezet move lenfliyans bann fo Kretyen. *

VRE LADORASYON PA ZANMEN ANVEN

13. Ki konfyans nou kapab annan?

¹³ Nou osi nou kapab ganny lafors spirityel atraver sa parol enspire ki Pol ti ekrir. Avan tou, i rekonfortan pour konnen ki Zeova i konn byen ki nou fidel anver li. Me Zeova pa zis konn bann ki fidel anver li, i osi vreman enterese avek bann ki pour li. Labib i dir: “Lizye Zeova pe get partou lo later pour vwar bann ki zot leker i tou pour li.” (2 Kron. 16:9) Alor, nou kapab annan tou konfyans ki sa ki nou fer pour Zeova “sorti dan en leker pir,” pa zanmen anven.​—1 Tim. 1:5; 1 Kor. 15:58.

14. Ki kalite ladorasyon Zeova pa tolere?

¹⁴ Nou osi ganny averti ki Zeova pa toler ladorasyon en ipokrit. Lefet ki son lizye “pe get partou lo later,” i kapab vwar bann ki zot leker pa “tou pour li.” Proverb 3:32 i dir ki “Zeova i deteste en dimoun rize,” parey enn ki fer krwar i pe obei, kan saler i pe pratik pese an kasyet. Menm si en dimoun i kapab byen trik bann imen pour en pe letan, lefet ki Zeova i tou pwisan e i annan ladrwatir, sa i en garanti ki “sa enn ki pe kasyet son bann lofans pa pou reisi.”​—Prov. 28:13; Lir 1 Timote 5:24; Ebre 4:13.

15. Kwa ki nou devret evite e akoz?

¹⁵ Laplipar dimoun dan pep Zeova i kontan li avek tou zot leker. I vreman rar pour vwar en dimoun dan kongregasyon ki volonterman esey trik Zeova par en ladorasyon ipokrit. Kantmenm sa, si sa ti arive dan letan Moiz e dan letan kongregasyon Kretyen dan premye syek, i kapab arive ozordi tou. (2 Tim. 3:1, 5) Me, eski sa i vedir ki nou devret soupsonn nou bann frer ek ser Kretyen e kestyonn zot fidelite anver Zeova? Definitivman non! I ti pou mal pour annan doutans lo nou bann frer ek ser san okenn laprev. (Lir Romen 14:10-12; 1 Korentyen 13:7.) An plis ki sa, si nou annan tandans pour mefye lentegrite lezot dan kongregasyon, sa i kapab en danze pour nou prop spirityalite.

16. (a) Kwa ki sakenn de nou i kapab fer pour anpes lipokrizi pran rasin dan nou leker? (b) Ki leson nou kapab aprann atraver sa bwat “ Kontinyen teste . . . kontinyen prouve . . .”?

¹⁶ Sak Kretyen i devret “egzamin son prop aksyon.” (Gal. 6:4) Akoz nou lenperfeksyon, nou toultan kapab annan sa tandans pour annan en latitid ipokrit san ki nou realize. (Ebr. 3:12, 13) Alor de tanzantan, nou kapab egzamin nou motivasyon pour vwar akoz nou pe servi Zeova. Nou kapab demann nou lekor: ‘Eski mon ador Zeova akoz mon kontan li e akoz mon rekonnet son souvrennte? Oubyen eski mon met plis lanfaz lo bann benediksyon fizik ki mon anvi gannyen dan Paradi?’ (Rev. 4:11) Sirman nou tou nou kapab benefisye kan nou egzamin nou prop aksyon e tir okenn tras lipokrizi dan nou leker.

FIDELITE KI ANMENN BONER

17, 18. Akoz nou devret senser dan nou ladorasyon pour Zeova?

¹⁷ Anmezir ki nou fer nou mye pour senser dan nou ladorasyon, nou ganny  bokou byenfe. En Psalmis i dir: “Ere sa zonm ki Zeova pa pran an kont son fot e sa enn ki pa anbet lezot.” (Ps. 32:2) Wi, tou bann ki retir lipokrizi dan zot leker pou pli ere la konmela e dan lavenir zot pou ere dan en fason parfe.

¹⁸ Dan son letan apropriye, Zeova pou devwal tou bann ki pe fer sa ki mal oubyen ki pe viv de kalite lavi, sa pou montre “ladiferans ant en dimoun drwat ek en move dimoun, ant enn ki pe servi Bondye ek enn ki pa pe servi li.” (Mal. 3:18) Antretan, i rekonfortan pour konnen ki ‘lizye Zeova i fikse lo bann zis, e son zorey i ouver pour ekout zot lapriyer.’​—1 Pyer 3:12.

[Not anba lo paz]

[Kestyon]

 [Bwat lo paz 11]

“Kontinyen teste . . . kontinyen prouve . . . ”

KI MANNYER nou kapab egzamin motivasyon ek tandans nou leker? Labib i ankouraz nou: “Kontinyen teste pour vwar si zot dan lafwa, kontinyen prouve sa ki zot ete.” (2 Kor. 13:5, NW) I kapab annan serten laspe spesifik dan nou kondwit ki de tanzantan i merit ganny byen egzaminen pour fer sir ki nou ladorasyon i toultan san lipokrizi. Egzamin sa bann kestyon swivan ki nou kapab servi pour egzamin nou lekor:

▪ Ler mon felisit e eksprim mon lanmour pour lezot, eski mon onnet e senser?​—Ps. 12:2, 3; 1 Pyer 1:22.

▪ Eski mon montre lospitalite e donn bann kado san okenn leta lespri egois?​—Mat. 6:2-4.

▪ Eski mon tret mon fanmir avek lanmour ek konsiderasyon an prive kot nou lakour e an piblik?​—Kol. 3:18-21.

▪ Eski mon kondwit i toultan an armoni avek bann prensip Labib ki mon ansenny lezot avek devouman?​—Rom. 2:21-23.

Si nou dekouver ki nou annan bann move tandans, i ti a byen ki nou retir zot avan ki zot vin anrasinen dan nou personnalite. Alor, parey zapot Pol, nou pou kapab debout devan Bondye e dir “ki nou pa’n zanmen servi bann parol flater, nou pa’n esey anbet zot pour ganny larzan.”​—1 Tesa. 2:5.

[Portre lo paz 9]

Timote pa ti pou’n ganny enfliyanse par aksyon bann ki ti annan tandans aposta (Vwar paragraf 10-12)