‘Wangate Hmekunë Hë Iehova La Nöjei Ate i Nyidë’
“Maine kete ate a aja Akötesie, hawe trotrohni angeice kö hnei nyidë.” —1 KOR. 8:3.
1. Hamëne jë la ketre ceitune ka amamane ka hape, hnene la xa itre hlue i Akötresie hna sipu amenu angatre kö. (Wange ju la pane iatr.)
KOLA icilenyi la ketre lapa ne la itre trahmanyi qëmekene la uma ne heta, me treqene troa dreu ka pui loi koi Iehova. Ame ngöne la ketre götran, Aarona atre huuje ka sisitria ne Isaraela, nge ngöne la ketre götran, Kora me ala 250 lao trahmany. (Num. 16:16-18) E tro sa goeën, itre ka nyipi nyihlue i Akötresie asë la itre hlue cili. Ngazo pe, ame Kora me itre sine xöle i angeic, tre, itre ka pi mama, me pi icilekeu, me ka tha imeku, nge angatr a thele troa thapa la hnëqa qaathei Arona, atre huuje ka sisitria. (Num. 16:1-11) Hnei angatre hna sipu amenu angatre kö, me mekune ka hape, Iehova fe a hane kepe angatr. Ngo, angatre pe a nyi tru koi Iehova, Atre goeëne la itre hni angatr. Öhne hi Nyidrë laka, itre ka thoi, nge ka ajane troa sipu atrunyi angatre kö.—Iere. 17:10.
2. Nemene la hna qaja hnei Mose göne la ewekë ka troa traqa, nge nemene la aqane eatre la itre ithanata i angeic?
2 Öni Mose: “Tro Iehova a amamane la it’ ate i nyidë.” (Num. 16:5) Tro Iehova a amamane tune kaa la ka nyipi nyihlue i Nyidrë memine la itretre nyihluene thoi Nyidrë? Hnei Iehova hna axulune la eë qaa hnengödrai, me dreuthe triji Kora me ala 250 lao sine xöle i angeic. (Num. 16:35; 26:10) Nge cile hmekuje pe hi Arona. Iehova hi lai a amamane hnyawa e cili ka hape, Arona la nyipi atre huuj, nge atre nyipi nyihlue i Akötresie.—E jë la 1 Korinito 8:3.
3. (a) Nemene la ewekë ka traqa hnine la ekalesia ngöne la hneijine i Paulo? (b) Nemene la ini nyine tro sa xome qangöne la hna kuca hnei Iehova kowe la itretre icilekeu ngöne la hneijine i Mose?
3 Ame ngöne la hneijine i Paulo, 1 500 lao macatre thupen, hetre ewekë ka tune ka traqa ngöne la ekalesia. Öni Paulo, hnene la itre xa Keresiano hna catre fë la itre ini ka thoi. Ngo, angatre pala hi e hnine la ekalesia. E tro sa goeën, tre, itre ka nyipi nyihlue Iehova la itre ka iamenumenu celë. Ngo ame pe, kösë itre luko ka pi öni angatr, nge angatr a nyiqaane thë “la lapaune i ite xan.” (2 Tim. 2:16-18) Hapeu, öhne kö Iehova la ewekë cili? Eje hi. Atre hnyawa hi Paulo la hna kuca hnei Akötresie kowe la itretre icilekeu, ene Kora me itre sine xöle i angeic, haawe, xecie hnyawa koi Paulo ka hape, tha sihngödri kö koi Iehova la ewekë ka traqa e hnine la ekalesia. Loi e tro fe a tune la mejiune së lai koi Iehova. Tro sa ce wange la ini nyine tro sa xome qa ngöne la itre ithanata i Paulo koi Timoteo.
“IEHOVA NI, THA KA UJË KÖ NI”
4. Nemene la ewekë ka xecie hnyawa koi Paulo? Nemene la hnei Paulo hna qaja koi Timoteo?
4 Eje hnyawa hi koi Paulo laka, tha sihngödri kö koi Iehova la itre ka nyihlue thoi koi Nyidrë. Ketre, eje hnyawa hi koi Paulo, ka hape, ketre atre hnyawa kö Iehova la itre ka nyihlue nyipici koi Nyidrë. Kola mama la mejiune i Paulo ngöne la itre ithanata i angeic koi Timoteo. Thupene la hnei angeice hna qaja la ethanyine qa ngöne la hna kuca hnene la itre ka iamenumenu kowe la lapaune i itre xan, öni Paulo: “Loi pe ke cile huti la tepene ka cate Akötesie, ka hetenyi la hna pele hatene celë, ka hape, Wangate hmekunë hë Joxu la nöjei ate i nyidë ; nge, Qâ i angat’ asë angete qaja la atesiwa i Joxu troa iananyi memine la thina ka ngazo.”—2 Tim. 2:19.
5, 6. Nemene la mekune ka nyipi ewekë qa ngöne la hnaewekë hna xome hnei Paulo hna hape, “tepene ka cate Akötesie”? Nemene la thangane la hnaewekë cili koi Timoteo?
5 Tusi Hmitrötr a qaja la hnëewekë hna hape, “trepene” nyine troa qeje pengöne la itre ewekë ka nyimutre. Kolo fe a qaja la traone ka tru ne Isaraela, ene Ierusalema, memine la hnëqa i Iesu ngöne la itre mekune hnei Akotresie hna troa eatrën. (Sal. 87:1, 2; 1 Kor. 3:11; 1 Pet. 2:6) Ngo, ame la hnaewekë hna hape, “cile huti la tepene ka cate Akötesie,” tre, hna aca qaja hi e hnine la Tusi Hmitrötr. Nemene la ewekë ka traqa hnei Paulo hna qaja ngöne la kola xome la hnaewekë celë?
6 Hnei Paulo hna amexeje la itre ithanata i Mose göi Kora me itre sine xöle i angeic, nge angeice a qaja fe la hnaewekë hna hape, “tepene ka cate Akötesie.” (Wange ju Numera 16:5.) Ame e cili, Paulo a amekunë Timoteo ka hape, atre hnyawa kö Iehova la ewekë ka traqa e hnine la ekalesia. Tro kö Iehova a hmekëne matre tha tro kö la itre ka iamenumenu a angazone la itre trejin. Tha hna saze kö la aja i Iehova hnei Kora, nge tha tro jë kö a saze la aja i Nyidrë hnene la itre ka iamenumenu e hnine la ekalesia. Tha hna qeje pengöne hnyawa kö hnei Paulo la aliene la hna hape, “cile huti la tepene ka cate Akötesie.” Ngo, ame la hnei Paulo hna qaja koi Timoteo, tre, celë hi ka acatrene la mejiune i angeice koi Iehova.
7. Nemene la ka aijijë së troa qaja ka hape, ka meköti me ka nyipici pala hi Iehova?
7 Tha saze pi kö la itre trepene meköti Iehova. Öni Salamo 33:11: “Troa cile huti epine palua la aja i Iehova, ite mekuna ne la hni nyidë kowe la nöjei xöt.” Iehova la Joxu, nge Nyidrëti a amamane la ihnimi nyipici Nyidrë, nge ka meköt me nyipici Nyidrë. Tusi Hmitrötr a amamane ka hape, ka cile huti la itre thiina i Nyidrë celë. (Eso. 15:18; Sal. 106:1; 112:9; 117:2) Malaki 3:6 a qaja ka hape, “Ke Iehova ni, tha ka ujë kö ni.” Ketre tune mina fe, Iakobo 1:17 a qaja göi Iehova ka hape, “ka tha uke kö nge ka pë hatene la hna ujë thei nyidë.”
HNA CINYIHANE KA ACATRENE LA LAPAUNE KOI IEHOVA
8, 9. Nemene la ini nyine troa xome hnene la itre atre i Iehova qa ngöne la hna cinyihane ngöne la “tepene ka cate Akötesie”?
8 Ame ngöne la itre drai hnapan, ketre hna majemine kuca la troa siji ithuemacany ngöne la trepene la ketre ewekë maine uma hna xup. Ketre ewekë lai hna majemine kuca matre troa amamane la atre xupe ej, maine la atrekë ewekën. Paulo la atre cinyihane la Tusi Hmitrötr ka pane ithanatane lai hna majemine kuca cili ngöne la ketre ceitu. * Hetrenyi la lue mekune hna cinyihan ngöne la “tepene ka cate Akötesie” hnei Paulo hna qeje pengöne ngöne 2 Timoteo 2:19: (1) “Wangate hmekunë hë Joxu [Iehova] la nöjei ate i nyidë” nge, (2) “Qâ i angat’asë angete qaja la atesiwa i Joxu troa iananyi memine la thina ka ngazo.” Kolo lai a amekunë së la hne së hna e ngöne Numera 16:5.—E jë.
9 Nemene la ini nyine troa xome hnene la itre atre i Iehova qa ngöne la hna cinyihane ngöne la “tepene ka cate Akötesie”? Ame la ini, tre, hna nyitrepene la itre trepene meköti Iehova hune la lue nyipici ka tru celë. Kola hape, (1) Iehova a hnime la itre ka nyipici koi Nyidrë, nge (2) Iehova a sisine la aqane ujë ka ngazo. Nemene la aqane tro sa waipengöne la lue mekune celë la easa troa ithanatane la itre ka iamenumenu e hnine la ekalesia?
10. Nemene la thangane la aqane ujë ne la itre ka iamenumenu kowe la itre ka nyipici koi Akötresie ngöne la hneijine i Paulo?
10 Kola angazone la hni Timoteo me itre xa trejine ka mele nyipici hnene la aqane ujë ne la itre ka iamenumenu. Ma hna hnyingëne thele jë hnene la itre xa Keresiano la kepine matre tha upe kö la itre ka iamenumenu cili qa hnine la ekalesia. Ma öni angatre jë ka hape, öhne jë fe kö Iehova la atre nyipici koi Nyidrë, me atre hmi thoi, ene la itre ka iamenumenu.—Ite hu. 20:29, 30.
Tha hna löthi Timoteo kö hnene la aqane ujë ne la itre ka iamenumenu (Wange ju la paragarafe 10-12)
11, 12. Nemene la aqane acatrene la lapaune i Timoteo hnene la tusi Paulo?
11 Eje hi laka hna acatrene la lapaune i Timoteo hnene la tusi Paulo. Hnei angeice hna amekunë Timoteo ka hape, hnei Iehova ekö hna amamane hnyawa ka hape, ame Kora me itre sine xöle i angeic, tre, itre ka nyihlue thoi. Hnei Iehova hna nuetriji me lepe apatreny angatr, ngo hnei Nyidrëti hna amamane hnyawa ka hape, Nyidrë a kepe Arona. Ketre tune mina fe, ngacama hetre itre atr ngöne la hneijine i Paulo ka ujë tune la Keresiano, ngo tro kö Iehova a amamane hnyawa la itre atre i Nyidrë.
12 Tha ka saze kö Iehova, haawe, loi e tro sa mejiune pala hi koi Nyidrë. Methi Nyidrë la iangazo, nge tro kö Nyidrëti a nyithupene kowe la itre ka kuca la ngazo, nge ka tha ietra kö. Hna amekunë Timoteo tro angeic a ananyine la Keresiano ka mele thoi, ke, nyipi ewekë tro “angat’ asë angete qaja la atesiwa i [Iehova]” a thipetrije la iangazo. *
MANATHITHI LA ATRE NYIHLUE NYIPICI KOI IEHOVA
13. Nemene ewekë ka xecie hnyawa koi së?
13 Nyine ithuecatre fe koi së la itre ithanata i Paulo koi Timoteo. Hna tune kaa? Atre hnyawa hi Iehova ka hape, ka mele nyipici së koi Nyidrë. Ngo tha Nyidrëti kö a atre angatre hmekuj, ngo Nyidrëti fe a nyipi ewekë angatr. Öni Tusi Hmitrötr. “Kola nyenyape agöne la ite nöj’ asë hnene la lue xajawa i Iehova troa xomexatuane la ite ka meköti hni koi nyidë.” (2 A. l. ite jo. 16:9) Tha luelue kö së laka, tha tro pi kö Iehova a thëthëhmine la trenge catre hne së hna kuca matre troa atrunyi Nyidrë.—1 Kor. 15:58; 1 Tim. 1:5.
14. Nemene pengöne aqane hmi la hna nuetriji hnei Iehova?
14 Methi Iehova, nge Nyidrëti a nuetrije la ka nyihlue thoi koi Nyidrë. Öhne hi Nyidrëti la hni ne la nöjei atr asë, nge tha sihngödri kö koi Nyidrë la atr ka tha “meköti hni koi Nyidë.” Ka sis koi Iehova la atr ka ujë tui Keresiano, ngo ka kuca juetrëne pe la ngazo. (Ite edomë 3:32) Atreine hi së troa amenune la atr, ngo tha Iehova kö. Öni Tusi Hmitrötr: “Ame la ate juetëne la ite hnei nyëne hna shashaith, te, tha tro kö a manathith.” Tro lai a eje la hna qaja e celë, pine laka atraqatre la mene i Iehova, nge Akötresie ne meköti Nyidrë.—Ite edomë 28:13; e jë la 1 Timoteo 5:24; Heberu 4:13.
15. Nemene la nyine tro sa neën, nge pine nemen?
15 Hnimi Iehova asë hi hnene la itre hlue i Nyidrë hnene la hni angatre ka pexej. Xalaithe hi la itre ka thele troa iaö Iehova hnene la hna nyihlue thoi koi Nyidrë. Ngo, eje hi laka e hna traqa tune ekö ngöne la hneijine i Mose me itre pane Keresiano, tro fe a hane traqa tune enehila. (2 Tim. 3:1, 5) Hapeu, kolo kö lai a hape, tro sa mekuhnine la aqane nyipici ne la itre trejine koi Iehova? Ohea, tha loi kö la tro sa mekuhnine menune la itre trejine me easë. (E jë la Roma 14:10-12; 1 Korinito 13:7.) Ketre, e tro sa mekuhnine la itre trejine me easë, tro lai a hetre ethanyine kowe la aqane imelekeu së me Iehova.
16. (a) Tro sa atre tune kaa ka hape, ka pexeje la hni së koi Iehova, nge ka pë thoi ngön? (b) Nemene la ini nyine tro sa xome qa ngöne la itre mekune hna eköhagen, hna hape “ Thelejë . . . Tupathi Nyipunieti Ju Kö”?
16 Loi e tro la itre Keresiano a “isa tupa huliwan.” (Gal. 6:4) Pine laka, itre ka tha pexeje së, maine jë tha öhne kö së laka easa nyihlue i Iehova cememine la itre aja ka tha meköti kö. (Heb. 3:12, 13) Haawe, ame ngöne la itre xa götrane la huliwa së koi Nyidrë, tha tro hë lai a pexej. Celë hi matre, nyipi ewekë troa isa waipengö së hnyawa me hape: ‘Pine nemene matre eni a nyihlue i Iehova? Eni kö a nyihlue i Nyidrë pine laka eni a hnimi Nyidrë, nge eni a ajane tro Nyidrëti a musi koi ni? Maine pena, eni kö a nyihlue i Nyidrë, ke eni a ajane catrëne troa mele elanyi ngöne la Paradraiso?’ (Hna ama. 4:11) E tro sa isa waipengö së pala hi tune lai, tro ha xecie koi së ka hape, easa nyihlue i Iehova cememine la hni ka pexej, nge ka pë thoi ngön.
MANATHITH LA ATRE MELE NYIPICI
17, 18. Pine nemene matre tro sa nyihlue i Iehova cememine la hni ka pexej?
17 Tro sa manathithi e catre së lepe trije la hni ka iaö. Önine la atre cinyihane la salamo: “Manathithi la ate tha hna qaja hnei Iehova la ngazo i angeic, nge pëkö iaö ngöne la u i angeic.” (Sal. 32:2) Maine tro sa nyihlue i Iehova cememine la hni ka pexej, tro hë së lai a mele madrine enehila, me epine palua.
18 Easenyi catre hë matre mama hnyawa pi la itre atr ka ngazo, nge ka xele ma ietra, nge ka kuca juetrëne la ngazo. Tro Iehova a amamane elanyi la eisapengönene “la ate ka meköti me ate ka ngazo, nge ate nyi hlue i Akötesie me ate tha nyi hlue i [N]yidë.” (Mal. 3:18) Ngo, qëmekene la ijine cili, keukawa la hni së troa atre laka, “ka meköti la lue xajawa i [Iehova], nge ame la lue hnashama i nyidë, te, kola shamatine la ite thithi [së].”—1 Pet. 3:12.
^ par. 8 Kolo fe a mama la hna majemine cili ngöne Hna Amamane 21:14. Ame ngöne la xötre cili, kola qaja ka hape, hna siji ëjene la ala 12 lao aposetolo ngöne la “[truelofe] la o tepen’ ej (hna xupi hage ne la lapa).”
^ par. 12 Tro la tane mekune ka troa xulu a ithanatane la aqane tro sa nyitipu Iehova, me thipetrije la iangazo.
