1. Emombeʼu mbaʼéichapa tuicha ojavy Coré ha umi 250 kuimbaʼe. (Ehecha pe taʼanga oĩva iñepyrũme.)

PETEĨ pyhareve pe saserdóte prinsipál, Aarón, oñemboʼy pe tavernákulo entrádape ha ohapy hína insiénso ivraseríllope oikuaveʼẽ hag̃ua Jehovápe. Ijypýpente oĩ Coré ha 250 kuimbaʼe, káda uno ivraseríllo reheve ohapy avei insiénso Jehovápe g̃uarã (Núm. 16:16-18). Haʼete voi entéronte haʼeha Ñandejára siérvo iñeʼẽrendúva. Péro ndahaʼeiete upéicha. Aarón añoite oĩ porã Jehová resa renondépe. Umi ótro katu irrevélde ha oñemombaʼeguasu, ha oipotaiterei pe saserdósio (Núm. 16:1-11). Koʼã kuimbaʼe opensa Ñandejára oguerohoryha upe ojapóva, péro tuicha ojavy hikuái. Jehová ohecha mbaʼépa oĩ ipyʼapypekuéra ha oikuaa hovamokõiha, upévare haʼete voi oñembohorýva hese hikuái (Jer. 17:10).

2. ¿Mbaʼépa Moisés heʼi vaʼekue Jehová ojapotaha, ha mbaʼéichapa oñekumpli?

² Un día upe mboyve, Moisés heʼi kuri: “Koʼẽrõ pyhareve [Jehová] ohechaukáta ñandéve mávapa imbaʼe” (Núm. 16:5). Ha upeichaite oiko. Upe díape Jehová ohechauka mávapa añetehápe oadora chupe ipyʼaite guive. Haʼe omondo “peteĩ tata ojukáva [Coré ha] umi 250 kuimbaʼépe  oikuaveʼẽva insiénso” (Núm. 16:35; 26:10). Péro Aarón nomanói, ha péicha ojekuaa oserviha Jehovápe ipyʼaite guive ha haʼe oaseptaha chupe isaserdóteramo (elee 1 Corintios 8:3).

3. a) ¿Mbaʼépa oiko vaʼekue apóstol Pablo tiémpope? b) ¿Mbaʼépa Jehová ojapo raʼe Coré ha umi ótro kuimbaʼe irrevéldevare?

³ Mil quinientos áñorupi upe rire, apóstol Pablo tiémpope, oĩ vaʼekue avei kuimbaʼe heʼíva ijehe kristianoha, péro ou oguerovia heta enseñánsa japu. Koʼã persóna oñembyaty umi kristiáno tee ndive ha oiko guaʼu haʼekuéraicha, péro añetehápe haʼete hikuái lóvo oñemondénteva ovecháicha, ha mbeguekatúpe omokangy umi iñeʼẽrendúva jerovia (2 Tim. 2:16-18). Péro koʼãichagua kuimbaʼe nombotavýi Jehovápe, ha Pablo ohechakuaa upéva oikuaa rupi mbaʼépa Ñandejára ojapo vaʼekue Coré ha umi ótro kuimbaʼe irrevéldevare. Ñahesaʼỹijomína avei ko téxto ha jahecha mbaʼépa ñaaprende chugui.

4. ¿Mbaʼépa Pablo oikuaa porã vaʼekue, ha mbaʼépa oskrivi Timotéope?

⁴ Pablo oskrivírõ guare Timotéope, omombeʼu pe kongregasiónpe oĩha apóstata ogueraha vaíva ermanokuérape. Ha upe rire heʼi: “Ñandejára omoĩ peteĩ simiénto opyta hatãva ha orekóva peteĩ séllo heʼíva: ‘Jehová oikuaa umi imbaʼévape’, ha: ‘Opavave ohenóiva Jehová réra oheja vaʼerã umi mbaʼe vai’” (2 Tim. 2:18, 19). Añetehápe, Pablo oikuaa vaʼekue Jehová ikatuha ohecha mávapa oadora chupe ipyʼaite guive ha mávapa hovamokõi hína.

5, 6. a) ¿Mbaʼérepa Pablo heʼi ‘Ñandejára omoĩha peteĩ simiénto opyta hatãva’? b) ¿Mbaʼéichapa oipytyvõ Timotéope Pablo heʼi vaʼekue?

⁵ Pablo heʼi vaʼekue: “Ñandejára omoĩ peteĩ simiénto opyta hatãva”. Ko fráse jatopa peteĩ hendápente la Bíbliape. Péro pe palávra “simiénto” térã váse, orrepresenta heta mbaʼe. Por ehémplo ojepuru jepi oñeñeʼẽ hag̃ua Jerusalén rehe (Sal. 87:1, 2). Avei pe palávra ojepuru oñekompara hag̃ua Jesucristo ojapóvare oñekumpli hag̃ua Ñandejára rembipota (1 Cor. 3:11; 1 Ped. 2:6). Upéicharõ, ¿mbaʼérehepa Pablo oñeʼẽ heʼírõ guare ‘Ñandejára omoĩha peteĩ simiénto opyta hatãva’?

⁶ Upérõ guare Pablo imanduʼa kuri Moisés heʼi vaʼekuére Coré ha umi irrevéldevape, jatopáva Números 16:5-pe. Haʼe oiméne oñeʼẽ koʼã mbaʼére omokyreʼỹ hag̃ua Timotéope, ha omomanduʼa hag̃ua chupe Jehová oikuaaha mávapa irrevélde ha ikatuha ojoko chupekuéra ani hag̃ua okonsegi pe oipotáva. Coré ningo ndaikatúi vaʼekue ojapo mbaʼeve ojoko hag̃ua Ñandejára rembipota, ha péicha avei umi apóstata ndaikatumoʼãi ohundi pe kongregasión. Pablo nomyesakãpáiramo jepe mbaʼépa heʼise ‘Ñandejára omoĩha peteĩ simiénto opyta hatãva’, umi mbaʼe heʼíva oime vaʼerã omombarete Timoteo jerovia ha oipytyvõ chupe akóinte osegi hag̃ua Jehová rapére.

7. ¿Mbaʼérepa jaikuaa porã Jehová siémpre hekojojaha ha okumplitaha iñeʼẽ?

⁷ Jehová ningo arakaʼeve nokambiái. La Biblia heʼi voi hese: “Jehová ñeʼẽ arakaʼeve ndopytareimoʼãi; ha umi mbaʼe ipyʼapýpe oĩva nokambiamoʼãi ha osegíta opa árare” (Sal. 33:11, NM). Oĩ avei heta téxto ohechaukáva Ñandejára siémpre ogovernataha, avei akóinte hekojoja, ipyʼaporã ha okumpliha iñeʼẽ (Éx. 15:18; Sal. 106:1; 111:3; 117:2). Malaquías 3:6 heʼi avei: “Che hína Jehová; arakaʼeve nakambiái” (NM). Ha Santiago 1:17 ohechauka ‘haʼe nokambiaiha kuarahyʼã okambiaháicha’.

8, 9. ¿Mbaʼépa ñaaprende pe mensáhe orekóvagui pe “séllo” Pablo oñeʼẽ hague?

⁸ Pe ehémplo Pablo oipuru vaʼekue 2 Timoteo 2:19-pe omombeʼu pe simiéntore oĩha peteĩ séllo orekóva peteĩ mensáhe. Yma ningo pyʼỹinte oñemoĩ umi óga simiéntore mávapa ijára, térã mávapa ojapo kuri upe óga. Pablo haʼe vaʼekue pe primér eskritór de la Biblia oipuru vaʼekue ko ehémplo. * Pe séllo oĩva pe ‘simiénto opyta hatãvare’ heʼi mokõi mbaʼe iñimportánteva. Primero: “Jehová oikuaa umi imbaʼévape”. Ha segundo: “Opavave ohenóiva Jehová réra oheja vaʼerã umi mbaʼe vai”. Koʼã mbaʼe ñanemomanduʼa avei heʼívare Números 16:5 (elee).

⁹ ¿Mbaʼépa ñaaprende pe mensáhe orekóvagui pe “séllo”? Mokõi mbaʼe: 1) Jehová ohayhu umi iñeʼẽrendúvape chupe, ha 2) ndaijaʼéi umi hembiapo vaívare. Péro, ¿mbaʼérepa Pablo oñeʼẽ koʼã mbaʼére imanduʼárõ guare pe apostasíare?

10. ¿Mbaʼéichapa oñeñandu heta kristiáno Pablo tiémpope guare ohechávo umi apóstata ojapóva?

¹⁰ Oime vaʼerã Timoteo ha umi ótro ermáno iñeʼẽrendúva ojepyʼapy ohechávo mbaʼéichapa oñekomporta umi apóstata. Ikatu voi oĩ umi nontendéiva mbaʼérepa oñepermiti chupekuéra osegi kongregasiónpe. Ha umi ermáno iñeʼẽrendúva katuete oñeporandúne oimépa Jehová ohecha haʼekuéra oserviha chupe ipyʼaite guive ha umi apóstata katu hovamokõiha (Hech. 20:29, 30).

11, 12. ¿Mbaʼérepa jaʼekuaa pe kárta Pablo ohai vaʼekue oipytyvõ hague Timotéope ojeroviave hag̃ua?

¹¹ Pe kárta Pablo ohai vaʼekue oipytyvõ Timotéope ojerovia mbareteve hag̃ua. Upépe haʼe omomanduʼa chupe Jehová oguerohory hague Aarónpe iñeʼẽrendu haguére, péro orrechasa ha ohundi hague Coré ha umi ótro kuimbaʼe irrevéldevape hovamokõi haguére. Pablo heʼi oĩramo jepe kristiáno guaʼu kongregasiónpe, Jehová katuete orrekonoseha mávapa añetehápe oservi chupe ipyʼaite guive, ojapo haguéicha Moisés tiémpope.

¹² Jehová nokambiái arakaʼeve ha ikatu jajerovia hese ñande pyʼaite guive. Haʼe ndaijaʼéi pe inhustísiare ha itiempoitépe okastigáta umi hembiapo vaíva ha noñarrepentírivape. Timoteo ningo ‘ohenói vaʼekue Jehová réra’, upéicha rupi Pablo omomanduʼa chupe tekotevẽha  oñehaʼãmbaite ani hag̃ua umi kristiáno guaʼu ogueraha vai umi ótro ermánope. *

13. ¿Mbaʼéguipa nañanderesaráiri vaʼerã?

¹³ Ñandéve avei ñanemombarete apóstol Pablo heʼi vaʼekue. Jehová ningo ñanemombaʼeterei ñaneñeʼẽrendu haguére chupe, ha upéva ñanembovyʼa. Péro haʼe ndahaʼéi oguerohorýnteva jajapóva, síno oñeinteresa káda únore. La Biblia heʼi: ‘[Jehová] ohecha opaite yvy ape ariguápe, oipytyvõ hag̃ua ipuʼaka rupive umi añetehápe ojeroviávape hese’ (2 Crón. 16:9, ÑÑB). Aníkena ñanderesarái Jehová ovaloraitereiha opa mbaʼe jajapóva hesehápe ‘korasõ potĩ’ reheve (1 Tim. 1:5; 1 Cor. 15:58).

14. ¿Mbaʼeichagua persónapepa Jehová ndoaseptái?

¹⁴ Jehová oipota jaadora chupe ñande pyʼaite guive. Haʼe nañandeaseptamoʼãi oiméramo ñanderovamokõi hína. Jehová “ohecha opaite yvy ape ariguápe” ha oikuaa mávapa omombaʼeguasu chupe ipyʼaite guive. La Biblia heʼi Jehová ndaijaʼeiha pe “iñensuguýva” rehe, térã iñeʼẽrendu guaʼúva, péro ñemiháme ojapóva mbaʼe vai (Prov. 3:32, NM). Umi ojapóva péicha ikatu omoʼã hembiapo vai yvypóragui peteĩ tiémpore, péro Jehovágui nokañýi mbaʼeve. Haʼe ipoderosoiterei ha hekojoja, upévare katuete oñekumplíta heʼíva Proverbios 28:13: “Pe omoʼãva hembiapo vai ndohoporãmoʼãi arakaʼeve” (NM) (elee 1 Timoteo 5:24 ha Hebreos 4:13).

15. ¿Mbaʼépa ndovaléi jajapo, ha mbaʼérepa?

¹⁵ Opavave lénto oservíva Jehovápe omombaʼeguasu chupe ipyʼaite guive. Ndaiporiguasúi ningo ermáno oadora guaʼúnteva Jehovápe, péro ikatu hína oĩ peichagua. Jaikuaaháicha, Moisés tiémpope ha avei pe kongregasión kristiána ypykuépe oiko vaʼekue upéva (2 Tim. 3:1, 5). Péro, ¿heʼisépa upéva ñadeskonfia vaʼerãha ñane ermanokuérare ha ñapensa naiñeʼẽrenduiha Jehovápe ipyʼaite guive? Nahániri. Ndovaléi reiete ñapensa vai ñane ermanokuérare (elee Romanos 14:10-12 ha 1 Corintios 13:7). Añetehápe ningo jaikóramo ñadeskonfia ñane ermanokuérare, ñande voi ikatu jajeperhudika ha ñañemoĩ vai Jehová renondépe.

16. a) ¿Mbaʼépa ikatu jajapo ani hag̃ua ñanerovamokõi jaservívo Jehovápe? b) ¿Mbaʼépa ikatu ñaaprende pe rrekuádro heʼívagui “ Pesegíkena pejesareko pendejehe”?

¹⁶ Káda kristiáno oñatende vaʼerã “umi mbaʼe ojapóvare” (Gál. 6:4). Ñande ningo ñaneimperfékto ha ñaimoʼãʼỹetére ikatu hína ndajaservivéi chupe ñande pyʼaite guive (Heb. 3:12, 13). Upévare tekotevẽ jajepyʼamongeta jepi jahecha hag̃ua mbaʼérepa añetehápe jaservi Jehovápe. Ikatu ñañeporandu: “¿Amombaʼeguasúpa Jehovápe ahayhúgui chupe ha añemoĩségui igoviérno poguýpe? ¿Térãpa iñimportanteve chéve g̃uarã umi mbaʼe porãita ikatútava ahupyty pe múndo pyahúpe?” (Apoc. 4:11). Koʼã pregúnta ñanepytyvõ jahechakuaa hag̃ua oimépa jaservi hína Jehovápe ñande pyʼaite guive.

17, 18. ¿Mbaʼérepa ñamombaʼeguasu vaʼerã Jehovápe ñande pyʼaite guive?

¹⁷ Ñamombaʼeguasúramo Jehovápe ñande pyʼaite guive jahupytýta hetaiterei mbaʼe porã. Pe salmísta heʼi vaʼekue: “Ovyʼa upe hovamokõiʼỹva, Ñandejára oheja reívape hembiapo vaikue” (Sal. 32:2). Upéicharõ, umi omopotĩva ikorasõ  ha oservíva Jehovápe ipyʼaite guive, ovyʼaiterei koʼág̃ama voi ha oreko oportunida ovyʼávo opa árare.

¹⁸ Koʼẽrõitéma Jehová ohechaukáta mávapa hembiapo vai, térã oñomi hína ipekádo. Upépe ojehecháta idiferenteha “hekopotĩva ha hekokyʼáva [...], omombaʼeguasúva ñande Ruetépe ha umi omombaʼeguasuʼỹva ichupe” (Mal. 3:18, ÑÑB). Ñahaʼarõ aja og̃uahẽ upe tiémpo, tuicha ñanemokyreʼỹ jaikuaávo ‘Jehová ojesarekoha umi hekojojávare ha ohenduha chupekuéra ojerure asy jave’ (1 Ped. 3:12).