“Iehova be Ena Taunimanima Ia Diba”
“Bema ta ese Dirava ia lalokau henia, Dirava be unai tauna ia diba.”—1 KOR. 8:3.
1. Edena Baibel sivarai ese ia hahedinaraia, Dirava ena taunimanima haida be lalohadai kererena amo sibona idia koia? (Laulau ginigunana itaia.)
DABA ta ai, Hahelaga Tauna Badana Arona be Iehova ena palai dubu ena iduara dekenai ia gini, muramura mai bonana namona ena lahi huaia auri kapusi ia dogoatao. Kahana dekenai danu be Kora bona ena orea taudia 250, idia ta ta be mai edia lahi huaia auri kapusi, bona muramura mai bonana namona idia gabua noho. (Num. 16:16-18) Toana be idia ibounai be mai momokani ida Iehova idia tomadiho henia taudia. To, Kora bona ena orea taudia be Arona bamona lasi, badina idia hekokoroku bona idia ura Arona ena dagi idia abia. (Num. 16:1-11) Idia laloa Dirava ese edia tomadiho karana do ia abia dae, to idia be sibona idia koia. Badina edia kara ese Iehova ia habadua, ia be taunimanima edia kudouna ia tahua noho bona edia koikoi karadia ia itaia diba.—Ier. 17:10.
2. Mose ia gwau dahaka do ia vara, bona iena hereva ia momokani, a?
2 Mose ia gwau: “Kerukeru dabai Lohiabada ese do ia hedinaraia, daika be iena.” (Num. 16:5) Iehova be mai momokani ida ia idia tomadiho henia taudia bona mai koikoi ida ia idia tomadiho henia taudia edia toana ia diba. Baibel ia gwau: “Vadaeni lahi be Lohiabada dekena amo ia diho, inai lahi ese [Kora bona] unai tatau 250, muramura mai bonana namona idia gabua taudia ia gabua ore.” (Num. 16:35; 26:10) To, Iehova ese Arona ia alaia lasi, unai amo ia hamomokania Arona be hahelaga tauna korikorina bona mai momokani ida Iehova ia tomadiho henia.—1 Korinto 8:3 duahia.
3. (a) Aposetolo Paulo ena negai, kongrigeisen lalonai dahaka ia vara? (b) Mose ena negai, Iehova ese gwau-edeede taudia dekenai ia karaia karana amo dahaka ita diba?
3 Lagani 1,500 bamona murinai, aposetolo Paulo ena negai unai bamona hekwakwanai ta ia vara. Sibona idia gwauraia Keristani taudia haida be hadibaia hereva koikoidia idia badinaia, to kongrigeisen idia do bamoa noho. Reana taunimanima haida be unai aposteit taudia idia itaia neganai, idia laloa idia be Iehova idia tomadiho henia momokani taudia. To, unai aposteit taudia be uda sisia bamona, bona idia ese Keristani taudia “haida edia abidadama idia hadikaia” matamaia. (2 Tim. 2:16-18) Iehova be unai ia itaia, a? Oibe. Paulo be Dirava ese gwau-edeede tauna Kora bona ena orea taudia dekenai ia karaia karana ena sivarai ia diba. Unai dainai ia abia dae momokani Iehova be kongrigeisen ai idia vara gaudia ia itaia. Ita danu be Iehova ita abidadama henia diba. Namona be hari ita itaia, edena dala ai Paulo ena hereva Timoteo dekenai ese ita do idia durua.
“LAU BE LOHIABADA, BONA LAUEGU KARA LAU HAIDAUA LASI”
4. Paulo be dahaka ia abia dae, bona Timoteo dekenai ia torea revareva ese edena dala ai unai ia hamomokania?
4 Paulo ia abia dae Iehova ia diba daidia be mai koikoi ida Ia idia tomadiho henia, bona daidia be mai momokani ida Ia idia tomadiho henia. Paulo ese Timoteo dekenai ia torea revareva lalonai ia gwauraia herevadia ese unai idia hamomokania. Paulo be kongrigeisen lalonai aposteit taudia ese ma haida edia abidadama idia hadikaia noho karana ia herevalaia murinai, ia gwau: “To Dirava ese ia haginia badina aukana be ia gini noho, bona ia latanai inai toretore ia noho: ‘Iehova be ena taunimanima ia diba,’ bona ‘Iehova ena ladanai idia boiboi taudia ibounai ese kara dika idia dadaraia be namo.’”—2 Tim. 2:18, 19.
5, 6. Paulo ena hereva, “Dirava ese ia haginia badina aukana” ena anina be dahaka, bona edena dala ai Timoteo ia hagoadaia?
5 Unai be nega ginigunana Baibel lalonai inai hereva, “Dirava ese ia haginia badina aukana” ia hedinarai. Unai hereva ena anina be dahaka? Baibel ese inai hereva “badina” be laulau dalanai ia gaukaralaia gau haida hegeregere, Israela ena siti badana Ierusalema ia herevalaia totona. (Sal. 87:1, 2, NW) Danu, Baibel ese inai hereva “badina” ia gaukaralaia, Iesu ese Dirava ena ura lalonai ia karaia gaukarana ia herevalaia totona. (1 Kor. 3:11; 1 Pet. 2:6) Paulo be “Dirava ese ia haginia badina aukana” ia herevalaia neganai, edena sivarai ia laloa?
6 Paulo be Numera 16:5 ai Mose ese Kora bona iena orea taudia dekenai ia gwauraia herevana ia herevalaia neganai, inai hereva “Dirava ese ia haginia badina aukana” ia gwauraia. Paulo ese Mose ena negai idia vara gaudia be Timoteo dekenai ia herevalaia badina ia ura Timoteo ia hagoadaia. Unai amo Timoteo do ia laloaboio lasi Iehova be gwau-edeede karadia ia itaia bona do ia kokia. Kora ese Iehova ena ura ia haidaua diba lasi hegeregerena, kongrigeisen ai aposteit taudia ese Iehova ena ura do idia haidaua diba lasi. Paulo be inai hereva, “Dirava ese ia haginia badina aukana” ena anina ibounai ia herevalaia lasi. To, iena hereva ese Timoteo ia hagoadaia Iehova ena dala do ia badinaia bona abidadama henia totona.
7. Dahaka dainai ita abia dae Iehova be kara maoromaoro bona badinaia karana do ia hahedinaraia?
7 Iehova ena hakaua herevadia be idia idau diba lasi. Salamo 33:11, [NW] ia gwau: “Iehova ena abia hidi be do idia noho ela bona hanaihanai; iena kudouna amo idia mai lalohadai be do idia noho uru ta amo ela bona uru ma ta.” Siri ma haida ese idia hahedinaraia Iehova ena lohia dalana, lalokau, kara maoromaoro bona badinaia karana be do idia noho ela bona hanaihanai. (Eso. 15:18; Sal. 106:1; 112:9; 117:2) Malaki 3:6 ia gwau: “Lau be Lohiabada, bona lauegu kara lau haidaua lasi.” Unai hegeregerena, Iamesi 1:17 ia gwau, “dina ena laulauna be ia senisi diba, to Tamana [Iehova] be ia senisi diba lasi.”
IEHOVA ABIDADAMA HENIA KARANA IA HAGOADAIA “TORETORE”
8, 9. Paulo ese laulau dalanai ia herevalaia “toretore” amo dahaka ita diba?
8 Paulo ena laulau herevana 2 Timoteo 2:19 ai ese idia haginia ruma ta ena badina nadi latanai ia noho toretorena ia hahedinaraia. Idaunegai, idia haginia ruma momo edia badina nadidia latanai taunimanima ese hereva haida idia torea, hegeregere daika ese unai ruma ia haginia o ia be daika ena ruma. Paulo be unai bamona haheitalai ia gaukaralaia Baibel torea tauna ginigunana. a “Dirava ese ia haginia badina aukana” latanai toretore rua idia hahedinaraia: (1) “Iehova be ena taunimanima ia diba” bona, (2) “Iehova ena ladanai idia boiboi taudia ibounai ese kara dika idia dadaraia be namo.” Unai be Numera 16:5 (Duahia) ai Mose ese ia gwauraia herevadia bamona.
9 Paulo ese laulau dalanai ia herevalaia “toretore” amo dahaka ita diba? Dirava ena taunimanima dekenai, Iena taravatu bona hakaua herevadia be inai mai anina bada herevadia rua ese idia hahedinaraia: (1) Iehova ese ia idia badinaia taudia ia lalokau henia, bona (2) Iehova ese kara dika ia inai henia. Edena dala ai kongrigeisen lalonai ia vara aposteit karana dekenai, unai hereva rua be mai anina bada?
10. Paulo ena negai, edena dala ai aposteit taudia edia kara dainai abidadama taudia idia lalohisihisi?
10 Timoteo bona abidadama taudia ma haida be reana edia huanai idia noho aposteit taudia edia kara dainai idia lalohisihisi. Reana Keristani taudia haida idia laloa, dahaka dainai unai aposteit taudia be kongrigeisen amo idia kokia lasi. Abidadama taudia be reana idia laloa, Iehova ese edia badinaia karana bona unai aposteit taudia edia koikoi karadia ia itaia lasi.—Kara 20:29, 30.
Timoteo be kongrigeisen ai idia noho aposteit taudia edia kara ese idia hamorua lasi (Paragraf 10-12 itaia)
11, 12. Edena dala ai Paulo ena revareva ese Timoteo ena abidadama ia hagoadaia?
11 Paulo ena revareva ese Timoteo ena abidadama ia hagoadaia. Badina Timoteo ia hadibaia guna Iehova ese abidadama tauna Arona ia hamauria, bona koikoi tauna Kora bona ena orea taudia ia dadaraia bona hamasedia. Paulo ena hereva anina be, ena be kongrigeisen ai Keristani koikoidia idia noho, to Iehova ese do ia hahedinaraia iena taunimanima be daidia, Mose ena negai ia karaia bamona.
12 Iehova be ena kara ia haidaua diba lasi, unai dainai ia dekenai ita tabekau diba. Ia ese kara dika ia inai henia, bona nega korikori ai idia helalo-kerehai lasi taudia do ia panisia. Timoteo be ‘Iehova ena ladanai ia boiboi tauna’ ta, unai dainai Paulo ese ena revareva amo ia hagoadaia do ia gaukara goada Keristani koikoidia ia dadaraia totona. b
MAI MOMOKANI IDA DIRAVA TOMADIHO HENIA KARANA ENA NAMO
13. Dahaka ita abia dae momokani diba?
13 Paulo ena hereva ese eda abidadama ia hagoadaia diba danu. Namona be ita laloatao, Iehova be ia ita badinaia karana ia itaia noho. To unai sibona lasi, Iehova ese ia hahedinaraia ena taunimanima ia laloa bada danu. Baibel ia gwau: “Lohiabada ena matana ese tanobada ena kahana ibounai idia itaia noho, ia ese ia dekenai idia badinaia momokani taudia do ia hagoadaia totona.” (2 Siv. 16:9) Unai dainai, ita abia dae momokani diba mai “kudou goevana” ida Iehova totona ita karaia gaudia be Ia ese ia itaia.—1 Tim. 1:5; 1 Kor. 15:58.
14. Edena bamona tomadiho dalana be Iehova ese ia dadaraia?
14 Danu, inai do ita laloaboio lasi: Iehova be ia idia tomadiho henia koikoi taudia ia inai henia bona ia dadaraia. Iehova ena matana be “tanobada ena kahana ibounai idia itaia noho” dainai, ‘ia idia badinaia momokani lasi taudia’ ia itaia diba. Aonega Herevadia 3:32 ia gwau, “Lohiabada ese kara gagevagageva taudia, ia ura henia lasi momokani,” badina unai bamona taudia be mai edia ura ida Iehova idia tomadiho henia koikoi, bona hunia dekenai kara dika idia karaia. Ena be idia ese taunimanima idia koia diba, to Iehova be siahu ibounai bona kara maoromaoro Diravana dainai, edia ‘kara dika idia hunia noho neganai, namo ta do idia davaria lasi.’—Aon. 28:13; 1 Timoteo 5:24; Heberu 4:13 duahia.
15. Edena kara ita dadaraia be namo, bona dahaka dainai?
15 Ita diba kongrigeisen lalonai momo be mai edia kudouna ibounai ida Iehova idia tomadiho henia. To, Mose ena negai bona Keristani ginigunadia edia negai, haida be koikoi dalanai Iehova idia tomadiho henia dainai, unai kara be hari ia vara diba. (2 Tim. 3:1, 5) To, namo lasi do ita laloa eda Keristani tadikaka taihu ese koikoi dalanai Iehova idia badinaia. Bema hamomokania gauna ta be lasi, unai bamona lalohadai ita abia be kerere. (Roma 14:10-12; 1 Korinto 13:7 duahia.) Danu, unai bamona lalohadai kererena ese iseda hetura karana Iehova ida ia hadikaia diba.
16. (a) Eda kudouna amo lalohadai kereredia ita kokia totona, ita ta ta ese dahaka ita karaia be namo? (b) Maua ladana “ Tahua Noho . . . Hamomokania Noho . . .” amo dahaka ita diba?
16 Keristani taudia ta ta ese “sibona ena kara do ia tahua namonamo” be namo. (Gal. 6:4) Ita be goevadae lasi taudia dainai, nega haida reana badina kereredia dainai Iehova ita tomadiho henia diba. (Heb. 3:12, 13) Unai dainai, nega ta ta ai namona be Iehova ita hesiai henia ena badina ita tahua namonamo. Sibona do ita nanadaia: ‘Iehova lau hesiai henia badina ia lau lalokau henia bona ena lohia siahuna lau abia dae, a? Eiava, Paradaiso ai do lau moalelaia hahenamo sibona lau laloa dainai Iehova lau hesiai henia?’ (Apok. 4:11) Oibe, bema iseda kara ita tahua namonamo bona eda kudouna amo lalohadai kereredia ita kokia, namo do ita davaria.
IEHOVA BADINAIA KARANA ENA NAMO
17, 18. Dahaka dainai mai momokani ida Iehova ita tomadiho henia be gau badana?
17 Bema ita gaukara goada mai momokani ida Iehova ita tomadiho henia totona, ia ese ita do ia hanamoa. Salamo torea tauna ia gwau: “Bema Lohiabada ese tau ta kerere totona ia samania lasi, bona unai tau ena lauma lalonai koikoi sisina ia noho lasi, unai tau be mai moale danu.” (Sal. 32:2) Oibe, edia kudouna amo lalohadai kereredia idia kokia taudia be idia moale, bona idia hegeregere vaira negana ai hahenamo namodia idia abia totona.
18 Nega korikori ai, Iehova ese idia helalo-kerehai lasi kara dika taudia, o hunia dekenai idia kara dika noho taudia do ia hahedinaraia. Unai amo ia ese “kara maoromaoro taudia bona kara dika taudia edia idau, bona Dirava ena hesiai gaukara idia karaia taudia, bona iena hesiai gaukara idia karaia lasi taudia edia idau do ia hahedinaraia.” (Mal. 3:18, NW) Unai nega ita naria noho lalonai, ita moale badina “Iehova ena matana be kara maoromaoro taudia ia itaia, bona ena taiana amo edia guriguri ia kamonai.”—1 Pet. 3:12.
a Paulo ese Timoteo dekenai revareva ia siaia bena lagani momo murinai, Apokalupo 21:14 ese “badina nadidia” 12 ia herevalaia, edia latanai be aposetolo taudia 12 edia ladadia idia torea.
b Wiki vaira ena stadi ese Iehova ita tohotohoa bona kara dika ita dadaraia dalana do ia herevalaia.
