1. Mangdakamat iti salaysay iti Biblia a mangipakita no kasano nga inallilaw ti dadduma nga Israelita ti bagbagida. (Kitaen ti ladawan iti rugi ti artikulo.)

MAYSA nga agsapa, nakatakder ti nangato a padi a ni Aaron iti pagserkan ti tabernakulo ni Jehova ken nakaiggem iti umas-asuk a paginsiensuan. Iti asideg, agpapaasuk met iti insienso ni Kore ken ti 250 a lallaki babaen kadagiti bukodda a paginsiensuan. (Num. 16:16-18) No kitkitaentayo, kasla matalek amin dagitoy nga agdaydayaw ken Jehova. Ngem saan a kas ken Aaron, napannakkel ken rebelioso dagitoy a lallaki nga agganggandat a mangagaw iti kinapadi. (Num. 16:1-11) Al-allilawenda ti bagbagida, a pagarupda nga awaten ti Dios ti panagdayawda. Ngem makapainsulto dayta ken Jehova, ta mabasana ti pusoda ken makitana nga aginsisingpetda.—Jer. 17:10.

2. Ania ti imbaga ni Moises a mapasamak? Pimmayso kadi dayta?

² Sakbay dayta nga aldaw, imbaga ni Moises: “Inton bigat ipakaammonto ni Jehova no asino ti kukuana.” (Num. 16:5) Impakita ni Jehova nga am-ammona dagidiay pudno nga agdaydayaw kenkuana ken dagidiay managinsisingpet idi a “rimmuar ti apuy manipud ken Jehova ket inibusna [ni Kore ken] ti dua gasut ket limapulo a lallaki a mangidatdaton iti insienso.” (Num. 16:35;  26:10) Ngem inispalna ni Aaron. Impakita ni Jehova a ni Aaron ti pudno a padi ken pudno nga agdaydayaw iti Dios.—Basaen ti 1 Corinto 8:3.

3. (a) Ania ti napasamak idi kaaldawan ni Pablo? (b) Ania ti maadaltayo iti inaramid ni Jehova kadagiti rebelde idi tiempo ni Moises?

³ Agarup 1,500 a tawen kalpasanna, adda met kasta nga umasping a kasasaad idi kaaldawan ni apostol Pablo. Adda dagiti agkunkuna a Kristiano a nangawat kadagiti palso a sursuro ken agtultuloy a nakitimpuyog iti kongregasion. No kitkitaem, kasla awan nakaidumaan dagitoy nga apostata iti dadduma a kameng ti kongregasion. Ngem agpegpeggad dagiti matalek a Kristiano gapu kadakuada. Kinaagpaysuanna, kaslada kadagiti narungsot a lobo a nakakawes iti langa ti karnero, ket daddadaelenda ti “pammati ti sumagmamano.” (2 Tim. 2:16-18) Makitkita kadi ida ni Jehova? Ammo ni Pablo ti inaramid ti Dios kadagiti rebelde—ni Kore ken dagiti kakaduana—ginasut a tawenen ti napalabas. Usigentayo ti maysa a makapainteres a teksto iti Biblia ket kitaentayo no ania dagiti praktikal a punto a maadaltayo iti dayta.

4. Iti ania a banag a kombinsido ni Pablo? Ania ti imbagana ken Timoteo?

⁴ Sigurado ni Pablo a mailasin ni Jehova ti pammarang a panagdayaw, ket kombinsido met nga ammo ni Jehova dagidiay agtultulnog kenkuana. Makita ti nabileg a kombiksion ni Pablo iti sasao nga inaramatna iti naipaltiing a suratna ken Timoteo. Kalpasan nga inladawanna ti panangdangran dagiti apostata iti pammati ti dadduma a kakabsat, insurat ni Pablo: “Nupay kasta, ti natibker a pamuon ti Dios agtalinaed a sitatakder, nga addaan itoy a selio: ‘Ammo ni Jehova dagidiay kukuana,’ ken: ‘Tunggal maysa nga umaw-awag iti nagan ni Jehova pagpanawanna koma ti kinakillo.’”—2 Tim. 2:18, 19.

5, 6. Ania ti maadaltayo iti panangaramat ni Pablo iti sasao a “ti natibker a pamuon ti Dios”? Kasano a nakatulong daytoy a sasao ken Timoteo?

⁵ Ania ti maadaltayo iti sasao nga inaramat ni Pablo iti daytoy a teksto? Iti Biblia, daytoy laeng ti nakadakamatan ti sasao a “natibker a pamuon ti Dios.” Inaramat ti Biblia ti sao a “pamuon” kas mangiladawan iti nadumaduma a banag, kas iti literal a Jerusalem a kabesera ti nagkauna nga Israel. (Sal. 87:1, 2) Ti akem ni Jesus iti panggep ni Jehova ket nayarig met iti maysa a pamuon. (1 Cor. 3:11; 1 Ped. 2:6) Ania ti pampanunoten ni Pablo idi dinakamatna ti sasao a “natibker a pamuon ti Dios”?

⁶ Inusar ni Pablo dayta a sasao idi inadawna ti kinuna ni Moises maipapan ken Kore ken dagiti kakaduana, a nairekord iti Numeros 16:5. Agparang a tuktukoyen ni Pablo ti napasamak idi kaaldawan ni Moises tapno paregtaenna ni Timoteo ken ipalagipna a mailasin ni Jehova dagiti rebelioso a tignay ken kabaelanna a lapdan dagita. Saan a nalapdan ni Kore ti panggep ni Jehova, ket sigurado a saan met a malapdan dayta dagiti apostata iti kongregasion. Saan a detalyado nga inlawlawag ni Pablo no ania ti irepresentar ti “natibker a pamuon ti Dios.” Ngem nakatulong la ketdi ken Timoteo ti kinuna ni Pablo tapno agtalek ken Jehova.

7. Apay a masiguradotayo nga agtignay ni Jehova buyogen ti kinalinteg ken kinamatalek?

⁷ Saan nga agbalbaliw dagiti nalinteg a prinsipio ni Jehova. “Agingga iti tiempo a di nakedngan agtalinaedto ti mismo a pammatigmaan [wenno, pangngeddeng] ni Jehova; ti pampanunot ti pusona ket agingga iti maysa a kaputotan kalpasan ti sabali pay a kaputotan,” kuna ti Salmo 33:11. Kuna ti dadduma a teksto nga agtalinaed iti agnanayon ti panangituray, naayat a kinamanangngaasi, kinalinteg, ken kinamatalek ni Jehova. (Ex. 15:18; Sal. 106:1; 112:9; 117:2) Kuna ti Malakias 3:6: “Siak ni Jehova; saanak a nagbaliw.” Kunaen met ti Santiago 1:17 a ken  Jehova, “awan ti panagbaliw ti pagturongan ti anniniwan.”

8, 9. Ania ti maadaltayo maipapan iti “selio” iti ilustrasion ni Pablo?

⁸ Ti ilustrasion ni Pablo iti 2 Timoteo 2:19 iladawanna ti maysa a pamuon a nakitikitan iti mensahe, a kasla natatakan iti maysa a selio. Idi un-unana, gagangay nga adda naikitikit a sasao kadagiti pamuon wenno pundasion dagiti patakder, nalabit tapno mayam-ammo ti nangbangon wenno makinkukua iti dayta. Ni Pablo ti immuna a mannurat ti Biblia a nangusar iti daytoy nga ilustrasion. * Ti selio iti “natibker a pamuon ti Dios” ket addaan iti dua a pakaammo. Umuna, “Ammo ni Jehova dagidiay kukuana,” ken maikadua, “Tunggal maysa nga umaw-awag iti nagan ni Jehova pagpanawanna koma ti kinakillo.” Ipalagip daytoy ti mabasatayo iti Numeros 16:5.—Basaen.

⁹ Ania ti maadaltayo maipapan iti “selio” iti ilustrasion ni Pablo? Dagiti pagalagadan ken prinsipio ni Jehova ket magupgop kadagitoy dua a napateg a kinapudno: (1) Ay-ayaten ni Jehova dagiti nasungdo kenkuana, ken (2) Kagura ni Jehova ti kinakillo. Kasano a nainaig daytoy a punto iti panagapostasia iti uneg ti kongregasion?

10. Kasano a naapektaran dagiti matalek a Kristiano idi kaaldawan ni Pablo iti ar-aramiden dagiti apostata?

¹⁰ Mariribukan idi ni Timoteo ken ti dadduma pay a matalek a Kristiano iti ar-aramiden dagiti apostata. Mabalin a kinuestionaran ti sumagmamano a Kristiano ti panagtalinaed dagita nga indibidual iti kongregasion. Nalabit adda dagiti matalek nga agduadua no makitkita met laeng ni Jehova ti nagdumaan ti kinasungdoda ken ti kinamanaginsisingpet dagiti apostata.—Ara. 20:29, 30.

11, 12. Kasano a napabileg ti pammati ni Timoteo iti surat ni Pablo?

¹¹ Sigurado a ti surat ni Pablo napabilegna ti pammati ni Timoteo. Impalagipna ken Timoteo nga imbutaktak idi ni Jehova ti kinamanaginsisingpet ni Kore ken dagiti kakaduana. Inlaksid ken dinadael ida ni Jehova ngem inanamonganna ni Aaron. Iti umasping a pamay-an, uray no adda dagiti sinsinan a Kristiano idi kaaldawan ni Pablo, silalawag nga impalgak ni Jehova no siasino dagidiay kukuana.

¹² Saan a pulos agbaliw ni Jehova, isu a  kanayon a makapagtalektayo kenkuana. Kagurana ti kinakillo ken dusaenna dagidiay agar-aramid iti dakes ken saan nga agbabawi. Naipalagip ken Timoteo a nasken a labananna ti dakes nga impluensia dagidiay a sinsinan Kristiano, gapu ta ti “tunggal maysa nga umaw-awag iti nagan ni Jehova” masapul a panawan wenno laksidenna ti kinadakes. *

13. Makapagtalektayo iti ania?

¹³ Makapabileg met kadatayo ti kinuna ni Pablo ken ni Timoteo. Umuna iti amin, makaparegta ta saan laeng nga am-ammo ni Jehova dagidiay nasungdo kenkuana no di ket talaga a maseknan kadakuada. Kuna ti Biblia maipapan ken Jehova: “Mapan nga agsublisubli dagiti matana iti intero a daga tapno ipakitana ti pigsana maigapu kadagidiay a ti pusoda naan-anay kenkuana.” (2 Cron. 16:9) No kasta, naan-anay a makapagtalektayo a saanto a pulos lipaten ni Jehova ti ar-aramidentayo agpaay kenkuana “manipud iti nadalus a puso[tayo].”—1 Tim. 1:5; 1 Cor. 15:58.

14. Ania a kita ti panagdayaw ti saan a panuynoyan ni Jehova?

¹⁴ Agserbi met a pakdaar kadatayo ti pannakaammotayo a saan a panuynoyan ni Jehova ti pammarang a panagdayaw. Gapu ta “mapan nga agsublisubli dagiti matana iti intero a daga,” makitana dagidiay a ti pusoda “naan-anay kenkuana.” Kuna ti Proverbio 3:32 a ‘nakarimrimon ken Jehova ti nasikap a tao,’ kas iti agpampammarang a natulnog ngem sililimed met nga agar-aramid iti basol. Ti kasta a tao mabalin a maallilawna ti sabsabali, ngem saan ni Jehova. Gapu ta mannakabalin-amin ken nalinteg ni Jehova, sigurado a “daydiay mangabbong kadagiti salungasingna saanto nga agballigi.”—Prov. 28:13; basaen ti 1 Timoteo 5:24; Hebreo 4:13.

15. Ania koma ti liklikantayo, ken apay?

¹⁵ Kaaduan nga adipen ni Jehova ket napasnek nga agserserbi kenkuana. Manmano laeng dagidiay agpampammarang. Ngem no napasamak dayta idi kaaldawan ni Moises ken iti nagkauna a kongregasion Kristiano, mabalin met a mapasamak dayta ita. (2 Tim. 3:1, 5) Ngem kayatna kadi a sawen a pagsuspetsaantayo dagiti padatayo a Kristiano ken pagduaduaantayo ti kinasungdoda ken Jehova? Siempre saan! Di umiso a pagsuspetsaantayo dagiti kakabsattayo nga awan met ti pammaneknektayo. (Basaen ti Roma 14:10-12; 1 Corinto 13:7.) Ken ti panagduadua kadakuada pagpeggadenna ti relasiontayo ken Jehova.

16. (a) Ania ti mabalin nga aramidentayo tapno saan a tumaud ti kinamanaginsisingpet iti pusotayo? (b) Ania dagiti maadaltayo iti kahon nga “ Itultuloyyo a Suboken . . . Itultuloyyo a Paneknekan . . .”?

¹⁶ Tunggal Kristiano masapul a tingitingen wenno ‘paneknekanna ti bukodna nga aramid.’ (Gal. 6:4) Gapu ta imperpektotayo, mabalin a ditay mapupuotan a di umiso gayamen ti motibotayo nga agdaydayaw ken Jehova. (Heb. 3:12, 13) Isu a nasayaat a sagpaminsan nga usigentayo ti motibotayo nga agserserbi ken Jehova. Mabalintay nga isaludsod iti bagitayo: ‘Agdaydayawak kadi ken Jehova gapu ta ay-ayatek ken bigbigek ti kinasoberanona? Wenno napateg laeng kaniak dagiti bendision a namnamaek a sagrapek idiay Paraiso?’ (Apoc. 4:11) Sigurado a magunggonaantayo no usigentayo ti tigtignaytayo ken ikkatentayo iti pusotayo ti aniaman a kinamanaginsisingpet.

17, 18. Apay a masapul a napudno ken napasnek ti panagdayawtayo ken Jehova?

¹⁷ Magunggonaantayo bayat nga ikagkagumaantayo ti agbalin a napudno ken napasnek  iti panagdayawtayo. “Naragsak ti tao nga iti kuentaanna saan a mangikabil ni Jehova iti biddut, ket iti espirituna awan ti allilaw,” kuna ti salmista. (Sal. 32:2) Wen, naragsak dagidiay mangikkat iti kinamanaginsisingpet iti pusoda, ken manamnamada ti naan-anay a kinaragsak iti masanguanan.

¹⁸ Din agbayag, ibutaktaken ni Jehova dagidiay agar-aramid iti kinadakes wenno addaan iti doble a panagbiag, ket ibatadna ti “pagdumaan iti nagbaetan daydiay nalinteg ken daydiay nadangkes, iti nagbaetan daydiay agserserbi iti Dios ken daydiay saan a nagserbi kenkuana.” (Mal. 3:18) Kabayatanna, makapabileg a maammuan a “dagiti mata ni Jehova addada kadagidiay nalinteg, ket dagiti lapayagna situturong iti ararawda.”—1 Ped. 3:12.