1. Bhana kifika kilondekesa kiebhi o mundu ua Nzambi m’ukulu kia di nganalele. (Tala o foto ia dianga.)

SAÍ kizuua mu kamene, o mukunji ua dikota Ala, uemana bhu muelu ua tembulu, phala ku bhana sata ia kuoha o uasu ua dizumba kua Jihova. Ku mbandu iéngi ia tembulu, Kola ni 250 a maiala emanene ué, phala ku bhana sata ia kuoha o uasu ua dizumba kua Jihova. (Dia. 16:16-18) Ene oso akexile mu di londekesa kala abhezi a kidi a Jihova. Maji Kola ni maiala a mukuá, a mesenene ngó ku tambula o ukunji ua Ala. (Dia. 16:1-11) Ene a di nganele mu ku banza kuila, Jihova ueji xikina o ubhezelu uâ. Mu ku bhanga kiki, ene akexile mu xinga Jihova, mukonda muéne uejidile kuila o ubhezelu uâ, uexile ua mangonha.—Jel. 17:10.

2. Ihi ia kanene Mozé, ni kiebhi o izuelu iê ia di kumbidile?

² Mozé uambe: “O mungu, mu kimenemene, o Jihova muene ua-nda kuijidisa uoso o uê ua mu tokala.” (Dia. 16:5) Jihova ua londekesa se a nanhi exile o abhezi a kidi, kioso ‘kia tundu túbhia kua muéne, anga tu jikinisa Kola ni hama jiiadi ni makuinhi a tanu a athu, akexile mu kuoha o uasu ua dizumba.’ (Dia. 16:35; 26:10) Jihova ua lange o muenhu ua Ala ni ku londekesa kuila, muéne uexile o mukunji ni mubhezi  ua kidi ua Nzambi.—Tanga 1 Kolindu 8:3.

3. (a) Ihi ia bhitile mu izuua ia Poxolo Phaulu? (b) O ukexilu ua Jihova ku fundisa o athu a bhukumukine, u tu longa ihi?

³ Kiene ué kia bhiti mu izuua ia Phaulu, kioso kia bhitile 1.500 ia mivu. Saí Jikidistá a kexile mu longa milongi ia makutu. Maji né kiki, ene akexile hanji mu bhanga mbandu ia kilunga. O akua ku lungulula o kidi, nange akexile mu di londekesa kala abhezi a kidi a Jihova. Maji mu kidi, ene exile kala imbungu ia iibha, ia mesenene ku “diangula o kuxikana kuala na-ku akuâ.” (2 Tim. 2:16-18) Jihova u mona o ima ioso i bhita, o poxolo Phaulu uejidile o kima ki bhanga Nzambi kua ió a bhukumuka, mukonda dia ima ia bhitile ni Kola ni maiala a mukuá m’ukulu. Etu ué tu tena ku dielela kua Jihova. O izuelu ia Phaulu ia-nda tu longa se kiebhi ki tu tena o ku bhanga kiki.

4. Kidielelu kiahi kiexile na-kiu Phaulu, ni kiebhi muéne kia londekesa o kidielelu kiê kua Timote?

⁴ Phaulu ua kijidile kuila, Jihova ueji mona o ubhezelu ua makutu. Muéne ua kijidile ué kuila, Jihova uejiia o jiselevende Jê ja kidi. O kidielelu kia Phaulu a ki londekesa mu izuelu ia sonekena kua Timote. Kia zubha ku soneka o ima ia iibha ia kexile mu bhanga o akua ku lungulula o kidi, Phaulu uambe: ‘Maji o madisésa a Nzambi-phe hanji a kolo, ka tunguta. O ku madisésa enhá a te Nzambi, a soneka-ku exi: Ngana uejiia oso a mu tokala. Exi dingi: Muthu uoso u amba kuila ua tokala Ngana, ki bhinga ituxi u i ambula.’—2 Tim. 2:18, 19.

5, 6. Ihi i tu tena kuijiia ia lungu ni kizuelu ‘o madisésa a Nzambi’ ia tumbula Phaulu ni kiebhi kia divu Timote?

⁵ Mu Bibidia o kizuelu ‘madisésa,’ a tena ku lombolola ima iavulu ki i difu. Ki tena kulombolola o mbanza ia Jeluzaleme mu ixi ia Izalaiele. (Jisá. 87:1, 2) Ki lombolola ué o kutena kuala na-ku Jezú mu ku kumbidila o vondadi ia Nzambi. (1 Kol. 3:11; 1 Phe. 2:6) Maji o kizuelu ‘madisésa’ a Nzambi’, a a tumbula ngó veji imoxi mu Bibidia. Ihi ia mesenene ku zuela Phaulu kioso kia tumbula o kizuelu kiki?

⁶ Phaulu ua tumbula o izuelu ia Mozé ia lungu ni Kola ni maiala a mukuá, i tu sanga mu divulu dia Dialuilu 16:5, mu ku suluka ua tumbula o kizuelu ‘o madisésa a Nzambi.’ Mu ku zuela kiki, Phaulu ua kexile mu lembalesa Timote kuila Jihova uejidile ia kexile mu bhita mu kilunga. O vondadi ia Jihova ka ki lunguluile kua Kola, mu kiki o akua ku lungulula o kidi keji tena ku lungulula o vondadi ia Nzambi. Phaulu ka jimbulula o ima ioso, se ihi ia mesenene ku zuela mu ku tumbula o kizuelu ‘o madisésa a Nzambi.’ Maji né kiki, o ia zuela Phaulu ia kuatekesa Timote ku dielela kua Jihova.

7. Mukonda diahi tu tena ku dielela kuila Jihova nuka ua-nda kamba ku kala muthu ua iuka ni ku kala fiiele?

⁷ O itumu ia Jihova ki i lunguluka. O divulu dia Jisálamu 33:11 di zuela kuila, o “phangu ia Jihova kene ku i lungulula, kuma ia kalé; kikutu kia ta muéne ki xalela ku miji ni miji.” Jihova muéne Sobha, ulondekesa o henda ia kidi, ua iuka, muéne ué fiiele. O Bibidia ilondekesa kuila o ídifua íii ki i lunguluka. (Mak. 15:18; Jisá. 106:1; 112:9; 117:2) O divulu dia Malakiia 3:6 diamba: ‘Eme Jihova, eme ki ngi lunguluka.’ O divulu dia Tiiaku 1:17 di zuela ué kuila Jihova “kene ni kualuluka, kuma mua muéne ki muene mu kala né ngó kizenji kia kualuluka.”

8, 9. Ihi i tu tena o ku di longa ia lungu ni “kidimbu” kia kifika kia te Phaulu?

⁸ O milongi ia Phaulu i tu sanga mu divulu dia 2 Timote 2:19, i zuela ia lungu ni madisésa muala o kidimbu. M’ukulu o athu akexile ni kifua kia ku ta kidimbu mu madisésa a mabhata mâ, phala kulondekesa o dijina dia muthu ua di tungu, mba ku londekesa se o dibhata dia tokala kua nanhi. Phaulu muéne o musoneki ua Bibidia ua dianga o ku tumbula o kifika kiki. * ‘O madisésa a Nzambi’ a tumbula Phaulu a kexile ni idimbu iiadi. Kia dianga, ‘Jihova uejiia oso a mu tokala,’ kia kaiadi, ‘muthu uoso uamba kuila ua tokala kua Jihova, ki bhinga ituxi u i ambula.’ Kiki, ki tu lembalesa i tu sanga mu divulu dia Dialuilu 16:5. (Tanga.)

⁹ Disa diahi di tu tena o ku di longa dia lungu ni “kidimbu” kia zuela Phaulu? Phala ió a tokala kua Nzambi, o itumu ni milongi ia Jihova i tunda mu ima iiadi ia beta-o-kota: (1) Jihova u zola oso a mu sidivila ni ufiiele uoso, (2) Jihova ua zembe o ima ia iibha. Kiebhi o milongi íii, ia difu ni maka a ku lungulula o kidi mu kilunga?

10. Kiebhi o jifiiele kia divu mukonda dia ukexilu ua akua ku lungulula o kidi mu izuua ia Phaulu?

¹⁰ Timote ni Jiphange ja mukuá ja fiiele, a thandanganhele ué ni ibhangelu ia iibha ia akua ku lungulula o kidi. Saí Jikidistá nange a di bhuidisa, se mukonda diahi akexile mu kuehela o akua ku lungulula o kidi ku bhanga mbandu ia kilunga. O Jikidistá ja fiiele, nange akexile mu dibhuidisa, se Jihova ua kexile mu mona muene o ubhezelu uâ ua fiiele ni ubhezelu ua mangonha ua akua ku lungulula o kidi.—Ika. 20:29, 30.

11, 12. Kiebhi o mukanda ua Phaulu ua kolokotesa o kixikanu kia Timote?

¹¹ Sé phata, o mukanda ua Phaulu ua kolesa o kixikanu kia Timote mu ku mu lembalesa ia bhiti, kioso Jihova kia xikina o ubhezelu ua Ala ni kioso kia buika Kola ni maiala a mukuá akexile mu lungulula o ubhezelu ua kidi. Mu kidi, Phaulu ua kexile mu zuela kuila, né muene mua kexile abhezi a makutu bhu kaxi kâ, Jihova ueji londekesa se a nanhi a mu tokala, kala kia bhangele mu izuua ia Mozé.

¹²  Jihova ka lunguluka, mu kiki, tu tena ku mu dielela mu ithangana ioso. Muéne ua zembe o kuiibha, mu kiki, mu kithangana kia tokala muéne ua-nda fundisa oso a bhanga o ima ia iibha, sé ku diela. Timote a mu tendelesa phala ku dituna o ukexilu ua iibha mukonda, ‘muthu uoso uamba kuila ua tokala kua Jihova, ki bhinga ituxi u i ambula. *

13. Kidielelu kiahi ki tu tena ku kala na-kiu?

¹³ O milongi ia sonekena Phaulu kua Timote i tena ku tu suínisa ué mu nzumbi. Kia dianga, Jihova uejiia kuila etu tuene mu mu bheza ni ufiiele uoso. Kiki ki kiene ngó, mukonda Jihova u bhana valolo kua oso a mu tokala. O Bibidia iamba: “Mukonda-phe o Jihova mesu mê ma bhita mu ngongo ioso, phala ku di londekesa o ku suína kuê mu ku kudila oso ala ni muxima ua tenena kua muéne.” (2 Mal. 16:9) Mu kiki, tu tena ku dielela ni kidi kioso kuila, ioso i tu bhanga phala Jihova, “i tunda mu muxima ua zele” muéne u i bhana valolo.—1 Tim. 1:5; 1 Kol. 15:58.

14. Ukexilu uahi ua Ubhezelu ua zembe Jihova?

¹⁴ Jihova ua zembe o ubhezelu ua makutu. Mu kuijiia kuila o mesu mê “ma bhita mu ngongo ioso,” muéne u tena ku mona oso ala ni muxima ua “tenena kua muéne.” O divulu dia Jisabhu 3:32 di zuela: ‘Jihova ua di zemba ni athu a bhukumuka,’ kala ió a di londekesa kala a mu belesela, maji mu kasuekele a ta ituxi. Sumbala o mukuá mangonha u tena ku nganala o athu ni akuâ, maji o kutena ni kuiuka kua Jihova, ku tu londekesa kuila ‘muthu oso u sueka o ituxi iê ka tena ku bhanduluka.’—Jisa. 28:13; Tanga 1 Timote 5:24; Jihebeleu 4:13.

15. Ihi ki tu tokala o kubhanga ni mukonda diahi?

¹⁵ O mundu ua Nzambi, a zolo Jihova ni muxima uoso. Sé-ku muthu mu kilunga u tena ku nganala Jihova, mu ku mu bheza ni mangonha. Maji se kiki kia bhitile mu izuua ia Mozé ni ia Jipoxolo, ki londekesa kuila, ki tena ué ku bhita mu izuua ietu. (2 Tim. 3:1, 5) O kuila kiki, kilondekesa kuila tua tokala ku kala ni phata ia ufiiele ua phange jetu? Kana! Kima kia iibha ku kala ni phata ia lungu ni ufiiele ua phange jetu ja mala ni ja ahatu, sé kuijiia o kidi kioso. (Tanga Loma 14:10-12; 1 Kolindu 13:7.) O ku kala ni phata ia jiphange jetu, ku tena ku zanga o ukamba uetu ni Jihova.

16. (a) Ihi i tu tena o ku bhanga phala ku fidisa o mangonha ku kula ku muxima uetu? (b) Ihi i tu tena o ku di longa ku kaxa ‘Di Lolienu’?

¹⁶ Kala Kidistá ua tokala ku ‘tonginina o uendelu uê.’ (Nga. 6:4) Mukonda tu akua ituxi, nange tu mateka ku bheza Jihova mu ukexilu ua iibha sé ku kijiia. (Jihe. 3:12, 13) Mu ku bhita kithangana, kima kiambote ku tonginina kiambote, se mukonda diahi tua mu bheza Jihova. Tu tena ku di ebhuidisa: ‘Mukonda diahi ngene mu sidivila Jihova? O kuila ngi mu bheza mukonda nga mu zolo ni kuila nga mesena kuila muéne u kala Sobha iami? Inga nga mu banza ngó o muenhu uambote u nga mesena ku kala na-u mu Palaízu?’ (Dij. 4:11) Mu ku di bhanga o ibhuidisu íii, tu tena ku tonginina o ibhangelu ietu, ni ku katula kama koso-koso ka lungu ni mangonha a tu kala ku mixima ietu.

17, 18. Mukonda diahi tua tokala ku bheza Jihova sé mangonha?

¹⁷ Kioso ki tu di suínisa phala tu kale  tu athu a kidi ni a lenduka mu ubhezelu uetu, tu tambula mabesá avulu. O mukua jisalamu uambe: “Ua zediua uoso kala dingi ni mulonga kua Ngana, ku muxima ki ku mu xala makutu.” (Jisá. 32:2) Sé phata, oso a katula o mangonha ku muxima a zediua, a-nda kala ni ku sanguluka kua kidi ku hádia.

¹⁸ Kua kambe ngó bhofele, Jihova uanda fundisa oso a kamba o ku diela mba a ta ituxi mu kasuekele. Muéne ua-nda londekesa o katungu “ka muthu ua iuka, ni mukuá ituxi ua bhukumuka; ni bhu kaxi ka ió u bheza Nzambi ni iú ua ditunu o ku mu bheza.” (Mal. 3:18) Katé kiza o kithangana kiki, kima kiambote o kuijiia kuila ‘mesu ma Jihova ma lungu kua iá a iuka, kia dikola, u ta-ku mátui ku misambu iâ.’—1 Phe. 3:12.