Jehova “ga diva ava vendi mo”
“Ogu ga hara Karunga, yige ga divikwa po kwendi.”—1 KOL. 8:3.
1. Simwitira sihorokwa somoBibeli esi sa likida uyilipaki wovantu vamwe vaKarunga. (Tara efano.)
NGURANGURA zimwe, mupristeli gomunene Arona kwa sikeme komeho zoNkongoronzugo zaJehova, age ana kwaterere sipana somundiro esi sa kere nomanganganga gokututumikidisa. Pepi nage, Kora novakwami vendi 250 nawo kwa kwaterere yipana yomundiro nokuyireta komeho zaJehova. (Num. 16:16-18) Pomuhowo, navenye kwa monekere ngwendi vakareli vaJehova wovalimburukwi. Kugusa ko Arona, Kora novakwami vendi kwa linenepekere pokuhara kulitura vene moupristeli. (Num. 16:1-11) Awo kwa lipukisire vene pokugazara asi Karunga kuvhura a tambure ukareli wawo. Nye egano lyangoso kwa handukisire Jehova, ogu ga konakonene nomutjima nokumona uyilipaki wawo.—Jer. 17:10.
2. Yisinke ga uyungire Mosesa, ntani ngapi omu da sikire mo nonkango dendi?
2 Mosesa kwa uyungire asi: “Mungura ngurangura HOMPA nga tu likida ava va mu hamena.” (Num. 16:5) Yosili, Jehova ga divire vakareli wousili nava wovayilipaki apa ‘ga tumine mundiro, gu ya veveke po Kora novagara 250, ava va retere manganganga gokututumikidisa.’ (Num. 16:35; 26:10) Jehova kwa parwire Arona mokulikida asi yige ga mu horowora a kare mupristeli nomukareli gwendi gousili.—Resa 1 Vakolinte 8:3.
3. (a) Ukaro musinke wa horokere momazuva gomupositoli Paurusa? (b) Ukaro musinke wa vaterere Paurusa a dive mutaro gwaJehova kuhamena urwanesi?
3 Ukaro wokulifana kwa horokere hena momazuva gomupositoli Paurusa konyara nomvhura 1 500 da ka pita. Vakriste vamwe kwa tambwire marongo goyimpempa, nye awo simpe kwa twikilire kulikwatakana nombungakrise. Komutaro gosintu, varwanesi usili owo kwa monekere ngwendi kapi va lisigire nava womombungakriste. Nye urwanesi wawo kwa reterere siponga Vakriste wovalimburukwi. Mambungu ogo gokumoneka ngwendi nonzwi kwa tamekere kupukisa ‘vamwe va zumbanese epuro lyawo.’ (2 Tim. 2:16-18) Jehova kapi ga kara nomutaro gosintu, ano Paurusa ga yi divire eyi kupitira monkedi omu Karunga ga kohwenene po ukaro waKora gomurwanesi novakwami vendi. Kuhamena eyi, tu konakoneni Matjangwa neyi natu lirongera ko.
“AME HOMPA KAPI ANI RUNDURUKA”
4. Yisinke ga divire Paurusa, ntani ngapi omu ga yi likidire apa ga tjangerere Timoteusa?
4 Paurusa ga yi divire asi Jehova kudimburura ukareli wouyilipaki, ntani ga diva ava ava mu limburukwa. Age kwa yi likidire mononkango dendi edi ga tjangerere Timoteusa megendeso lyompepo zokupongoka. Konyima zokutumbura siponga esi va retesere po varwanesi usili kombungakriste, Paurusa kwa tjenge asi: “Nye etateko lyaKarunga lya kora. Amo kwa tjangera mo nonkango edi asi, ‘Hompa ga diva ava vendi mo,’ hena asi, ‘Nkenye ogu a tumbura edina lyaHompa, a sige kurugana yoyidona.’”—2 Tim. 2:18, 19.
5, 6. Yisinke natu lirongera ko kononkango edi “etateko lyaKarunga lya kora” ga ruganesere Paurusa, ntani ngapi omu da kundamene Timoteusa?
5 Bibeli kuruganesa nkango “etateko” pokusingonona yininke yokulisiga-siga, kukwatera mo nkurusitata zaIsraeli zanare, Jerusarema, ntani situmbukira esi ga kara naso Jesus mositambo saJehova. (Epis. 87:1, 2; 1 Kol. 3:11; 1 Pet. 2:6) Nye ntanto “etateko lyaKarunga lya kora” kwa zi ruganesa rumwe tupu moBibeli. Kosihorokwa musinke ga tembe apa Paurusa ga tjenge kuhamena “etateko lyaKarunga lya kora”?
6 Paurusa kwa temwinine nonkango daMosesa kuhamena Kora novakwami vendi edi va tjanga mwaNumeri 16:5, ntani nye ga gwedere ko ntanto “etateko lyaKarunga lya kora.” Eyi kulikida asi Paurusa kwa tembe koyihorokwa yomomazuva gaMosesa mokukorangeda Timoteusa nokumudiworokesa nonkondo daJehova dokudiva nokufutisa ava ava mu rwanesa. Sitambo saJehova kapi tupu sa hamenene kokugusa mo varwanesi mombungakriste ngamoomu ya horokere moukaro waKora. Paurusa kapi ga fatwilire momunene eyi lya fanekesa “etateko lyaKarunga lya kora.” Nye nonkango edi ga ruganesere kwa nkondopekere Timoteusa a huguvara mwaJehova.
7. Morwasinke natu karera nehuguvaro asi Jehova nga pangura pauhunga nopausili?
7 Nompango daJehova dokuzeruka kapi adi runduruka. Episarome 33:11 kwa tanta asi: “Yigazo yaHOMPA yanarunye, sitambo sendi ngasi kererera po.” Matjangwa gamwe kwa uyunga kuhamena upangeli waJehova, neharo lyendi nouwa wendi ntani ulimburukwi wendi asi yanarunye. (Ex. 15:18; Epis. 106:1; 112:9; 117:2) Marakiya 3:6 kwa tanta asi: “Ame HOMPA kapi ani runduruka.” Mokulifana, Jakopo 1:17 kwa tanta hena asi Jehova kwato “marunduruko ndi malisinto gouzera nomundema.”
ETJANGO ELI ALI TUNGU EPURO MWAJEHOVA
8, 9. Yisinke natu lirongera ko kosifanekeso saPaurusa setateko?
8 Mosiruwo sanare, vantu ngava tjanga madina gawo petateko lyetungo, pokulikida asi yiwo va litunga ndi kwawo lya hamena. Paurusa yige mutjangi gokuhova ga ruganesere sifanekeso esi setateko. * “Etateko lyaKarunga lya kora” eli ga fatwilire Paurusa mwa-2 Timoteusa 2:19 kutamba koyininke yivali. Sokuhova, Jehova “ga diva ava vendi mo,” ano sauvali, “Nkenye ogu a tumbura edina lyaHompa, a sige kurugana yoyidona.” Eyi kutudiworokesa eyi va tjanga mwaNumeri 16:5.—Resa.
9 Yisinke natu lirongera ko kosifanekeso saPaurusa? Kwava va hamena kwaJehova Karunga, nompango dendi kuturonga yininke yivali yomulyo: (1) Jehova kwa hara ava ava mu limburukwa, ntani (2) Jehova kwa nyenga ava ava rugana udona. Ngapi sirongwa esi sa likwatakana noukaro wovarwanesi usili mombungakriste?
10. Ngapi nkareso zovarwanesi usili za kundamene valimburukwi womomazuva gaPaurusa?
10 Timoteusa novakareli vamwe wovalimbukwi kwa va kundamene nkareso zovarwanesi usili ava va kere mokatji kawo. Nampo Vakriste vamwe va lipulire eyi varwanesi ava vana kuvapulisilira mombungakriste. Valimburukwi nampo va lipulire nsene asi Jehova sili ga diva elisigo pokatji kovakareli vendi wokulimburukwa novarwanesi usili.—Yirug. 20:29, 30.
Timoteusa kwa nyokerere po mapukiso govarwanesi usili (Tara paragarafu 10-12)
11, 12. Ngapi mbilive zaPaurusa za nkondopekere epuro lyaTimoteusa?
11 Mbilive zaPaurusa kwa nkondopekere epuro lyaTimoteusa apa ga mu diworokesere kuhamena omu Jehova ga hungamekere Arona ntani nokuzonagura po Kora kumwe novakwami vendi. Paurusa kwa tente asi nampili mokatji kawo mu kare varwanesi usili, Jehova ga divire ava va hamena kwendi ngwendi momazuva gaMosesa.
12 Jehova kapi a runduruka, kuvhura kumuhuguvara. Age kwa nyenga udona, ntani posiruwo souhunga age nga pangura ava ava dili kulitezurura. Ngagumwe ‘ogu nga tumbura edina lyaKarunga,’ Timoteusa nage kwa mu diworokesere a nyokere po mapukiso govarwanesi usili. *
UKARELI WOUSILI KAPISI WOMAWOKO-WOKO
13. Ehuguvaro musinke twa kara nalyo mwaJehova?
13 Nonkango daPaurusa kuvhura kunkondopeka epuro lyetu. Pomuhowo, ado kutupa ehuguvaro asi Jehova ga diva ava ava mu limburukwa. Eli kapisi ehuguvaro lyomawoko-woko. Morwa Jehova kwa litura mo unene mwava va hama kwendi. Bibeli kutanta asi: “HOMPA yige a takamesa uzuni mudima, age kugava nonkondo kwa navenye ava ava hama kwendi nomutjima nagunye.” (2 Hist. 16:9) Yipo nye natu karera nehuguvaro lyenene asi nkenye eyi atu ruganene Jehova ‘nomutjima gomuwa’ kapisi yomawoko-woko.—1 Tim. 1:5; 1 Kol. 15:58.
14. Ukareli musinke a dili kusigilira Jehova?
14 Ayo hena kutunkondopeka pokudiva asi Jehova kapi a sigilire ukareli wouyilipaki. Ngomu Jehova “a takamesa uzuni mudima,” age kumona ava ava dili ‘kuhama kwendi nomutjima nagunye.’ Yisewe 3:32 kutanta asi: “HOMPA kwa tonda ava ava rugana udona,” ngwendi vantu ava ava lininkisa asi valimburukwi nye kurugana nonzo mokahorehore. Nampili ngomu vantu nava vhura kukumbagera vakwawo pokuhoreka nonzo dawo, nye kapi tava vhuru kukumbagera Jehova munanonkondo nomuhungami ogu ga tumbwidira asi: “Ove kapi ngo ragopa nsene o kambadara kuhoreka nonzo doge.”—Yis. 28:13; resa 1 Timoteusa 5:24; Vahebeli 4:13.
15. Yisinke twa hepa kunyokera po, ntani morwasinke?
15 Sinzi sovantu vaJehova kukwaterera koulimburukwi wawo. Ayo kapi ayi horauka nkenye apa asi gumwe gomombungakriste a tambure tupu ukareli woyimpempa mowina. Ngwendi moomu ya horokere momazuva gaMosesa nomomazuva gomupositoli Paurusa, nomomazuva getu kuvhura kuhoroka. (2 Tim. 3:1, 5) Kuvhura nye tu gazarere vapuli vakwetetu asi kapi vana kulimburukwa kwaJehova ndi? Hawe! Ayo epuko kugazarera vanavazinyetu pwa hana maumbangi gongandi. (Resa Varoma 14:10-12; 1 Vakolinte 13:7.) Ayo kuvhura kuzonagura po epuro lyetu nsene tu dira kuhuguvara ulimburukwi wovapuli vakwetetu womombungakriste.
16. (a) Yisinke twa hepa kurugana yipo tu guse mo uyilipaki monomutjima detu? (b) Yisinke natu lirongera ko kokakende “ Likonakoneni . . . lihetekeni . . . ”?
16 Nkenye Mukriste ga hepa ‘kukonakona yirugana yamwene.’ (Gar. 6:4) Morwa ose vananzo, ayo ureru kwetu mokuhonena yikara yoyidona twa hana kuyidivira. (Heb. 3:12, 13) Yipo nye asi ayo ya wapa pokukonakona nkenye apa konda zeyi atu karerere Jehova. Kuvhura tu lipure asi: ‘Ame kukarera Jehova morwa kwa mu hara nokukwatesa ko upangeli wendi ndi? Ndi ame kudemenena tupu komatungiko aga ngani ka hafera moParadisa?’ (Ehor. 4:11) Yosili, natuvenye kuvhura kugwanena mo uwa pokukonakona yirugana yanyamwetu nokugusa mo uyilipaki monomutjima detu.
ULIMBURUKWI OU AU RETA RUHAFO
17, 18. Morwasinke twa hepera kukondja kukara noulimburukwi moukareli wetu kwaJehova?
17 Ngomu tuna kukondja kukara noulimburukwi koukareli wetu, ose ngatu gwanena mo mauwa gomanzi. Episarome kwa tanta asi: “Gerago googu a dili kuvarwira HOMPA nonzo, ogu ga ha tanta yimpempa.” (Epis. 32:2) Yimo, ava ava gusa mo uyilipaki monomutjima dawo kuhafa ntani kugwana mpito zokukakara noruhafo rwene-rwene komeho.
18 Posiruwo souhunga, Jehova nga tura poruzera ava ava rugana udona ndi vayilipaki, pokulikida ‘malisigo pokatji kovahungami novadinikarunga, nopokatji kava a karere Karunga nava a dili kumukarera.’ (Mara. 3:18) Ayo kutupa ehuguvaro pokudiva asi meho gaJehova “kwa tara kovahungami, age kupurakena nkenye apa makanderero gawo.”—1 Pet. 3:12.
^ para. 8 Ehororo 21:14, nazo kwa tumbura ‘etateko lyomamanya’ 12 aga va tjangera madina govapositoli 12.
^ para. 12 Sirongwa sokukwama ko ngasi ka zogera omu natu honena Jehova pokunyenga udona.
