“Yehova Atachikiza Vaze Vanapu Venyi”
“Nge mutu azanga Kalunga, mutu kana vamutachikiza kuli Kalunga.”—KOLI. 1, 8:3.
1. Hanenu chakutalilaho chize chasolola omu vangamba jaKalunga vamwe valyongele vavene. (Talenu muvwimbimbi wakulivanga.)
LIZAVU lyavatu linemana kulutwe lyatavanaku mangana valumbe vyalivumba lyamwaza kuli Yehova. Kusali yimwe kuli Alone Kapilishitu Wakulitulaho wavaIsalele kaha kusali yikwavo kuli Kola navatu jenyi 250. (Kula. 16:16-18) Chasolola nge ava vatu vosena vapwile vakulyononona kuli Yehova. Oloze Kola navatu jenyi vapwile vakulivwimba, vakulikanga, kaha nawa vafwililile kutambula chihela chaupilishitu apwile nacho Alone. (Kula. 16:1-11) Valyongele vavene hakushinganyeka ngwavo Yehova mwetavila kulemesa chavo. Oloze kumana vapwile nakusaula Yehova uze apwile nakukekesa michima yavo. Yehova avamwene kupwa vaka-kulyonga mwomwo vasakile kaha kulitohwesa vavene. —Yele. 17:10.
2. Vyuma muka ahanjikile Mose, kaha mazu enyi ateselemo ngachilihi?
2 Mose ambile ngwenyi: “Hachimene numba Yehova alweze ava vanapu venyi.” (Kula. 16:5) Chuma muka chasolwele nge Yehova atachikijile vangamba jenyi vamuchano navaze vakulyonga? Yehova atumine kakahya kufuma mwilu nakunongesa Kola navatu jenyi 250. (Kula. 16:35; 26:10) Oloze Alone kavamunongeseleko, ngachize Yehova asolwele hatoma nge Alone apwile kapilishitu wamuchano.—Tangenu Wavaka-Kolinde 1, 8:3.
3. (a) Ukalu muka wasolokele mumakumbi aPaulu? (b) Vyuma muka natulinangula kuvyuma vize Yehova alingile kuli vaka-kulikanga vamumakumbi aMose?
3 Omu mwahichile myaka kafwe 1,500 kufuma hakulikanga chaKola, ukalu woumwe wasolokele namuchikungulwilo chavaka-Kulishitu mumakumbi akaposetolo Paulu. Paulu alumbunwine ngwenyi, vatu vamwe vaze valivulukile ngwavo vaka-Kulishitu vaputukile kukundwiza kunangula chamakuli oloze vapwilenga lika muchikungulwilo. Ava vaka-kusosoloka kulufwelelo vapwile nakusoloka nge vapwile vaka-kulemesa Yehova vamuchano. Oloze kumana vapwile nge tungunge kaha nawa vaputukile “kwenyeka lufwelelo lwavatu vamwe.” (Chimo. 2, 2:16-18) Uno kutala Yehova apwile nakuvamona tahi? Eyo. Paulu atachikijile ngwenyi Kalunga anongesele Kola navatu jenyi vakulikanga. Ngocho, afwelelele ngwenyi Yehova atachikiza ukalu wosena wapwile muchikungulwilo. Nayetu nawa twatela kufwelela muli Kalunga. Tutalenu jino havyuma natulinangula kumazu aze Paulu asonekelele Chimoteu.
“AMI YEHOVA KANGWESHI KWALUMUKA MWEKAKO”
4. Paulu afwelelele ngwenyi Yehova mwalinga ika? Kaha vyuma muka Paulu alwezele Chimoteu?
4 Paulu afwelelele ngwenyi Yehova mwatachikiza vaka-kumulemesa vakulyonga, nakutachikiza vaka-kumulemesa vamuchano. Ahanjikile ngocho mwomwo yamazu aze Kalunga amuhwiminyinyine asonekele Chimoteu. Hanyima yakulumbununa omu vaka-kusosoloka kulufwelelo vapwile nakwenyeka lufwelelo lwavakwavo muchikungulwilo, Paulu asonekele ngwenyi: “Oloze chipwe ngocho, chihela chakukola chaKalunga hanga chemanyina mbe, kaha chili nakatachikijilo aka ngwavo: ‘Yehova atachikiza vaze vanapu venyi,’ kaha ngwavo: ‘Mutu himutu uze ali nakuvuluka lijina lyaYehova aseze vilinga vyakuhenga.’”—Chimo. 2, 2:18, 19.
5, 6. Vyuma muka alumbunwine Paulu hakuzachisa mazu akwamba ngwenyi “chihela chakukola chaKalunga,” kaha mazu kana akafwile ngachilihi Chimoteu?
5 Mbimbiliya yazachisa lizu “chihela” hakulumbununa vyuma vyakulisezaseza. Vyuma vyakufwana nge Yelusalema nganda yavaIsalele, namulimo eji kuzatanga Yesu wakutesamo kujina chaYehova. (Samu 87:1, 2; Koli. 1, 3:11; Petu. 1, 2:6) Oloze awa mazu akwamba ngwavo “chihela chakukola chaKalunga” vawavuluka kaha kamwe muMbimbiliya. Vyuma muka apwile nakushinganyeka Paulu omu ahanjikile “chihela chakukola chaKalunga”?
6 Paulu avulukile mazu aMose aze alwezele Kola navatu jenyi vakulikanga nakuhakilako mazu akwamba ngwenyi “chihela chakukola chaKalunga.” (Talenu Kulava 16:5.) Ngachize, Paulu apwile nakwanukisa Chimoteu ngwenyi Yehova atachikijile vyuma vyapwile nakusoloka muchikungulwilo, nakuhonesa vaka-kusosoloka kulufwelelo kuchina navahungumwisa vangamba jenyi. Kujina chaKalunga kavachihonesele kuli Kolako, kaha nawa kujina chenyi kaveshi kuhasa kuchihonesa kuli vaka-kusosoloka kulufwelelo vamuchikungulwiloko. Paulu kalumbunwine vyuma vyosena vyakutalisa ‘kuchihela chakukola chaKalungako.’ Chipwe ngocho, vyuma alumbunwine Paulu vyakafwile Chimoteu afwelelele chikuma muli Yehova.
7. Mwomwo ika twatela kufwelela ngwetu Yehova mwapwanga lika wakwoloka nakushishika?
7 Jishimbi jaYehova kajalumukako. Mukanda waSamu 33:11 wamba ngwawo: “Punga yaYehova nayimananga haya myaka yosena, navishinganyeka vyamumuchima wenyi nawa kuchisemunwino nakuchisemunwino.” Yehova apwa Mwangana, eji kusololanga likoji, kaha nawa apwa wakwoloka nakashishi. Mbimbiliya yavuluka hatoma vyuma kanevi ngwayo vyapwa vyakwilila, kavyalumukako. (Kulo. 15:18; Samu 106:1; 112:9; 117:2) Mukanda waMalaki 3:6 wamba ngwawo: “Ami yami Yehova, kaha kangwalumukako.” Namukanda WaYakova 1:17 wamba ngwawo Yehova, “keshi kununguluka chipwe kwalumuka ngana mwamivwimbimbi yakunungwojokako.”
“KATACHIKIJILO” KAZE KEJI KUZAMISANGA LUFWELELO LWETU
8, 9. Vyuma muka natulinangula kukatachikijilo kaze vasoneka ‘hachihela chakukola chaKalunga’?
8 Kushikulu, vatu vasonekelenga chipwe kuhaka katachikijilo hachihela chakutungila zuvo. Valingilenga ngocho mangana vasolole mutu uze atungile yize zuvo chipwe mwenya zuvo. Paulu ikiye apwile watete kuzachisa echi chakutalilaho. * Katachikijilo kaze katwama ‘hachihela chakukola chaKalunga,’ kaze Paulu avulukile hamukanda WaChimoteu 2, 2:19, vasonekaho mijimbu yivali. Wakulivanga shina, “Yehova atachikiza vaze vanapu venyi,” kaha wamuchivali shina “mutu himutu uze ali nakuvuluka lijina lyaYehova aseze vilinga vyakuhenga.” Echi chatwanukisa vyuma vyatwama hali Kulava 16:5.—Tangenu.
9 Vyuma muka natulinangula kukatachikijilo kaze vasoneka ‘hachihela chakukola chaKalunga’? Twalinangula nge, jishimbi jaYehova jazama havishina vino vivali: Chakulivanga Yehova azanga vatu vaze veji kumwononokanga, kaha chamuchivali, Yehova ahunga vilinga vyavipi. Vishina kanevi vyasolola nge Yehova ahunga vaka-kusosoloka kulufwelelo vaze vali muchikungulwilo.
10. Uno vilinga vyavaka-kusosoloka kulufwelelo vyapwile nakwivwisa ngachilihi kupihya vangamba jaKalunga vakushishika?
10 Chimoteu navaka-Kulishitu vakwavo vakushishika, vapwile nakwivwa kupihya kumuchima havilinga vyavipi vapwile navyo vaka-kusosoloka kulufwelelo. Vaka-Kulishitu vamwe pamo valihulishile vawane ovyo vetavishilile vaka-kusosoloka kulufwelelo vatwaleho lika kutwama muchikungulwilo. Vaka-Kulishitu vakushishika atela vapwile nakuhuhwasana numba nge Yehova apwile nakumona chihandwa chapwile mukachi kavakiko vapwile nakumulemesa mukashishi, navaka-kusosoloka kulufwelelo vaze vapwile nakumuzachila mukulyonga.—Vili. 20:29, 30.
Chimoteu kavamuhungumwishile navilinga vyavipi vyaka-kusosoloka kulufweleloko (Talenu palangalafu 10-12)
11, 12. Uno mukanda waPaulu wazamishile ngachilihi lufwelelo lwaChimoteu?
11 Mukanda asonekele Paulu wazamishile lufwelelo lwaChimoteu. Amwanukishile ngwenyi kunyima Yehova asolwele hatoma nge Kola navatu jenyi vapwile vaka-kulyonga. Ngocho, avahungile nakuvanongesa nakwivwila Alone uselewa. Chochimwe nawa, Paulu apwile nakuvuluka nge numba tuhu muchikungulwilo mwapwilenga vaka-Kulishitu vakulyonga, oloze Yehova atachikijile vosena vaze vapwile venyi ngana muze chapwile mumakumbi aMose.
12 Yehova keshi kwalumukako, ngocho tunahase kumufwelela lwola lwosena. Yehova ahunga vilinga vyakuhenga kaha nawa mwakazangamisa vosena vaze navalinga vilinga vyavipi, vaze kaveshi kupihilila nakwalumukako. Chimoteu vamulwezele nge atelele kukana vilinga vyavipi vyavatu vaze valyongele kupwa vaka-Kulishitu, mwomwo “mutu himutu uze ali nakuvuluka lijina lyaYehova” atela kukana vilinga vyakuhenga. *
VAKA-KULEMESA KALUNGA VAMUCHANO VEJI KUVAKISULANGA LWOLA LWOSENA
13. Vyuma muka twafwelela?
13 Mazu aze Paulu asonekelele Chimoteu anahase kutujikijisa nayetu makumbi ano. Mujila muka? Lwola lwosena Yehova ejiva kanawa vangamba jenyi vaze veji kumwononokanga. Eji kulinganga vyuma vikwavo keshi kuvejiva kahako, oloze eji kuvazakamanga nawa. Mbimbiliya yamba ngwayo: “Mwomwo meso aYehova eji kuhitangananga kumavu kwosena, mangana alisolole nangolo hali vakwechi michima yakukupuka mwosena kuli Ikiye.” (Miji. 2, 16:9) Ngachize, twafwelela chikupu ngwetu Yehova keshi kukavulyama milimo tweji kumuzachilangako.—WaChimoteu 1, 1:5.
14. Yehova ahunga kulemesa muka?
14 Yehova ahunga kulemesa chakwonga. Mwomwo Meso enyi “eji kuhitangananga kumavu kwosena” mangana amone vatu vaze kaveshi namichima ‘yakukupuka mwosena kuli Ikiyeko.’ Chapwa chaunyengwe kumeso aYehova kumona vatu vaze vali nakulyonga kwononoka jishimbi jenyi oloze vali nakulinganga shili kupenge. (Vishi. 3:32) Vatu vanahase kwonga vakwavo vatu oloze katweshi kuhasa kwonga Yehovako. Mbimbiliya yamba ngwayo: “Ou mwafwika milonga yenyi keshi kukafukilako.” Mwomwo Yehova atwama nangolo jajivulu kaha nawa apwa Kalunga wakwoloka.—Vishi. 28:13; tangenu WaChimoteu 1, 5:24; WavaHepeleu 4:13.
15. Vyuma muka twatela kulihendako, kaha mwomwo ika?
15 Vangamba jaYehova vavavulu veji kumuzachilanga namuchima wavo wosena. Makumbi ano vangamba jaKalunga vavavulu kaveshi kulemesa Yehova oku vanakulyongako. Oloze nge vangamba jenyi valyongele mumakumbi aMose, namulwola lwavaka-Kulishitu vakulivanga, kaha namakumbi ano chinahase kusoloka. (Chimo. 2, 3:1, 5) Uno echi chili nakulumbununa nge twatela kushinganyekela vandumbwetu nakuvakakasana nge kaveshi nakuzachila Yehova namuchima wavo wosenako tahi? Nduma, nachipwa chakuhenga kushinganyekela vandumbwetu chakuzeneka unjiho. (Tangenu Wavaka-Loma 14:10-12; Wavaka-Kolinde 1, 13:7.) Nge natushinganyekelanga vandumbwetu, kaha usoko wetu naYehova nauzeya.
16. (a) Vyuma muka twatela kulinga mangana tufumise vishinganyeka vyakulyonga mumichima yetu? (b) Vyuma muka natulinangula halipwata lyakwamba ngwavo, “ Lyesekenunga Enu Vavene . . . Lishishikenunga . . .”?
16 Muka-Kulishitu wosena atela kukekesa “vilinga vyenyi.” (Ngale. 6:4) Hakuwana nge katwakupuka mwosenako, tunahasa kuputuka kulemesa Yehova mujila yakuhenga chakuzeneka etu vavene kutachikiza. (Hepe. 3:12, 13) Shikaho, lwola lwosena twatela kulikekesa etu vavene tumone nge tuli nakuzachila Yehova mujila yakwoloka. Ngachize twatela kulihulisa ngwetu: ‘Mwomwo ika ngweji kulemeselanga Yehova? Uno ngweji kumulemesanga mwomwo ngwamuzanga kaha nawa ngwasaka apwenga muka-kunguyula tahi? Nyi kutala ngweji kushinganyekanga kaha hachiyoyelo chamwaza chize nangukalivwisa kuwaha muPalachise tahi?’ (Kuso. 4:11) Nge natulihulisa vihula kana, kaha natufumisa vishinganyeka vyavipi vili mumichima yetu.
KULYONONONA CHEJI KUNEHANGA KUWAHILILA
17, 18. Mwomwo ika twatela kulemesa Yehova namuchima wetu wosena chakuzeneka kulyonga?
17 Yehova mwatukisula nge natuzata nangolo mangana tufumise vilinga vyakulyonga vili mumichima yetu. Muka-kwimba jisamu asonekele ngwenyi: “Natokwa mutu ou mwakana Yehova kuvulukila kuhenga, Ou azeneka kutangisa mushipilitu yenyi.” (Samu 32:2) Nge natuzachila Yehova namuchima wetu wosena, kaha natupwa vakuwahilila oholyapwa nakulutwe.
18 Linwomu Yehova asopolole vaka-kulinga vyuma vyavipi vaze veji kuhonanga kupihilila nakwalumuka chipwe vaze veji kulinganga shili mukusweka. Mwakasolola chihandwa chatwama hali “muka-kwoloka namuka-kuhuka, nou eji kumuzachilanga Kalunga nou eji kukananga kumuzachila.” (Mala. 3:18.) Shimbu kanda lwola kana lwizenga, twatela kutachikiza ngwetu, “meso aYehova anatale hali vaka-kwoloka, matwitwi enyi nawatengeleka kukulomba chavo chakulembelela.”—Petu. 1, 3:12.
^ par. 8 Mazu wowamwe akiko vavuluka hali Kusoloka 21:14, haze hatwama mazu akwamba ngwavo, majina 12 avaposetolo vawasonekele ‘hamalolwa achihela chazuvo 12.’
^ par. 12 Chihande chinakavangizaho nachishimutwila omu tunahase kulondezeza Yehova nakukana vilinga vyakuhenga.
