“Lalpa Chuan Ama Tate Chu A Hria”
“Tupawhin Pathian a hmangaih chuan chu mi ngei chu ama hriat a ni.”—1 KOR. 8:3.
1. Pathian mi ṭhenkhatte rilrua awm thei ngaih dân dik lo chu Bible aṭangin han sawi teh. (A thupui chunga milem en rawh.)
TUK khat chu rimtui hâlna tûr mei lâkna kengin Puithiam Lal Arona chu Jehova biak bûk luhna kawngkaah a ding a. A bulah chuan Kora leh a mi 250 pawhin Jehova hnênah rimtui an hlân ve mêk a, mei lâkna an keng ṭheuh bawk. (Num. 16:16-18) Han en thuak chuan, Jehova betu rinawm vek an nih hmêl hle a. Mahse, Arona ang lo takin mi dangte chu puithiam nihna chhuhsak tum, phatsantu invaivung tak an ni. (Num. 16:1-11) Pathianin an biakna a pawm tûr anga ngaiin mahni an inbum a. Mahse, chutiang beiseina chu an ngaihtuahna hre thei leh an vervêkna hmu theitu, Jehova hmuhsitna a ni.—Jer. 17:10.
2. Mosia’n eng thu nge a sawi lâwk a, chu chu a thleng dik em?
2 Chu thilthleng nêna inâwm takin, a hma nîah Mosia chuan: ‘Naktuk zîngah LALPAN a tate chu a tilang ang,’ tiin a lo sawi lâwk tawh a. (Num. 16:5) A sawi ang ngeiin, ‘LALPA aṭangin mei a lo chhuah a, [Kora leh] rimtui hlântu mi zahnih leh sawmnga te a rawn kanghlum’ khân Jehova chuan betu dikte leh derte chu a rawn thliar hrang a ni. (Num. 16:35; 26:10) Chutih rualin, Jehova chuan Arona nunna erawh zuahin, ani chu puithiam tak tak leh Pathian betu dik tak anga a pawmzia a târ lang thung.—1 Korinth 8:3 chhiar rawh.
3. (a) Tirhkoh Paula hun lai khân eng thil nge thleng? (b) A hma kum zabi engemaw zât kaltaah khân Jehova chuan engtin nge hel hmangte a chinfel?
3 A hnu kum 1,500 vêlah, tirhkoh Paula hun lai khân chutiang ang thil chu a thleng leh a ni. Kristiana inchhâl ṭhenkhat chuan kohhran chhûngah awm reng siin zirtîrna dik lo an pawm a. Chîk vak lova lo thlîrtute tân chuan, chung kalpêngte chu kohhrana midang te lakah an danglam kher lo vang. Mahse, an kalpênna chu Kristian rinawmte tân a hlauhawm a ni. Chûng berâm vun sin chinghniate chuan “mi ṭhenkhatte rinna an tibo” ṭan ta a. (2 Tim. 2:16-18) Jehova erawh chu chîk taka thil thlîrtu a ni a, chu chu a hma kum zabi engemaw zât kaltaa hel hmang Kora leh a ṭhiante chungchâng a chinfel dân aṭangin Paula chuan a lo hre tawh ngei ang. He mi chungchângah hian Bible thu ngaihvenawm tak chu ngaihtuahin, chuta ṭanga kan zir theih thu ṭangkai takte chu i en ho vang u.
“KEI LALPA HI KA DANGLAM SI LO”
4. Paula’n eng nge a hriat chian a, chu chu engtin nge Timothea hnênah a sawi?
4 Jehova’n vervêk taka amah betute a hre thei ang bawkin, A thu âwihtute pawh a hre thei tih Paula chuan a hre chiang hle a. Chu chu Pathian thâwk khuma a ziah Timothea hnêna a lehkha thawna a ṭawngkam hmanah a lang a ni. Kalpêngte’n kohhran chhûnga mi ṭhenkhatte chunga thlarau lama chhiatna an thlentîr chungchâng a sawi hnuah Paula chuan heti hian a ziak a ni: “Nimahsela Pathian lungphûm nghet chu a la ding reng a, he chhinchhiahna hi a nei a: ‘Lalpa chuan ama tate chu a hria,’ tih leh, ‘Lalpa hming lam apiang chuan sual kalsan rawh se,’ tih hi,” tiin.—2 Tim. 2:18, 19.
5, 6. Paula’n “Pathian lungphûm nghet” tih ṭawngkam a hman pawimawhna chu eng nge ni a, chu chuan engtin nge Timothea a ṭanpui?
5 He Bible chânga Paula ṭawngkam hman bîk hian eng pawimawhna nge a neih? Hei hi Bible-a “Pathian lungphûm nghet” tih sawina awmchhun a ni a. Bible chuan “lungphûm” tih thu mal hi thil dang sawi nân pawh a hmang bawk a, chutah chuan hmân lai Israel khawpui anga Jerusalem a sawina pawh a tel a ni. (Sâm 87:1, 2) Jehova thiltumte tih hlawhtlin nâna Isua chanvo chu lungphûm nêna khaikhin a ni bawk. (1 Kor. 3:11; 1 Pet. 2:6) Paula’n “Pathian lungphûm nghet” chungchâng a ziah lai khân eng nge a rilruah awm ang?
6 Paula chuan Number 16:5-a chhinchhiah Kora leh amah thlâwptute chungchânga Mosia thusawi a sawi chhâwn hnuah “Pathian lungphûm nghet” tih thu chu a sawi belh a. Paula chuan Timothea tih chak nân leh Jehova’n helna thiltih chu a hriain, a do tih hriattîr nân Mosia hun laia thilthleng chu a sawi chhuak a ni. Kora’n kum zabi engemaw zât kal taa Jehova thiltum chu a dang thei lo ang bawk khân, kohhrana kalpêngte pawhin an dang thei lo vang. Paula chuan ‘Pathian lungphûm nghetin’ a entîr chu kimchang takin a hrilhfiah lo va. Mahse, a thusawi chuan Timothea chu Jehova ring tlat tûrin a ṭanpui ngei ang.
7. Jehova chuan dikna leh rinawmna nên thil a ti dâwn tih engvângin nge kan chian theih?
7 Jehova thu bul sâng takte chu a danglam thei lo. Sâm 33:11 chuan: “LALPA remruat erawh chu kumkhuain a awm nghet ang a, A thinlunga a ngaihtuahte chu chhuan zawng zawng thlengin a awm nghet ang,” tiin a sawi. Bible châng dang pawhin Jehova rorêlna, hmangaihna rinawm, dikna, leh rinawmna chu chatuan daih angin a sawi a. (Ex. 15:18; Sâm 106:1; 112:9; 117:2) Malakia 3:6 chuan: “Kei Lalpa hi ka danglam si lo,” tiin a sawi. Jakoba 1:17 pawhin Jehovaah chuan “danglamna leh herna hlim rêng rêng a awm thei lo,” tih a sawi bawk a ni.
JEHOVA CHUNGA RINNA NEIHTIRTU “CHHINCHHIAHNA”
8, 9. Paula tehkhin thua “chhinchhiahna” aṭangin eng nge kan zir theih?
8 Paula chuan 2 Timothea 2:19-a chhinchhiah tehkhin thu chu, thuziak chuanna lungphûm angin a sawi a. Hmân lai chuan, in sak lungphûmah a satu emaw, a neitu emaw ziah lan chu thil pângngai tak a ni ṭhîn. Paula chu Bible-a chutiang tehkhin thu hmang hmasa bertu a ni. * Chu ‘Pathian lungphûm ngheta’ chhinchhiahna chuan thil pahnih puan chhuah a nei a. Pakhatna chu, “Lalpa chuan ama tate chu a hria,” tih leh a pahnihna chu, “Lalpa hming lam apiang chuan sual kalsan rawh se,” tih a ni. Hei hian Number 16:5-a kan chhiar chu min hriat nawntîr a ni.—Chhiar rawh.
9 Paula tehkhin thua “chhinchhiahna” aṭangin eng nge kan zir theih? Pathian mite tân chuan Jehova thil ngaih hlutte leh thu bulte chu thu dik bulpui pahnih: (1) Jehova chuan a laka rinawmte a hmangaih, tih leh (2) Jehova chuan dik lohna a hua, tihahte hian khaikhâwm theih a ni. Engtin nge heta zir tûr awm hi kohhran chhûnga kalpênna thubuai nên a inkûngkaih?
10. Engtin nge kalpêngte thiltih chuan Paula hun laia mi rinawmte chu a tihbuai?
10 Timothea leh mi rinawm dangte chu an zînga kalpêngte thiltih chuan a tibuai a nih hmêl hle. Kristian ṭhenkhatte chuan kohhran chhûnga chûng kalpêngte an awm phalsak a nih chhan chu an zâwt mai thei a. Mi rinawmte chuan Jehova’n a laka an rinawm nghehna leh kalpêngte’n vervêk taka amah an biakna a danglamna chu a hmuh tak zet leh zet loh an ngaihtuah mai thei bawk a ni.—Tirh. 20:29, 30.
Timothea chu kalpên duhna neite thiltih chuan a tinghîng lo (Paragraph 10-12-na en rawh)
11, 12. Engtin nge Paula lehkha thawn chuan rinhlelh rual lohvin Timothea rinna chu a tihchak ang?
11 Paula chuan Timothea hnêna a lehkha thawnah mi rinawm Arona thiam chantîr a nih thu leh mi vervêk Kora leh a ṭhiante dik lohna chu hai lan, hnâwl, leh tihboral an nih thu a hriattîr a, chu chuan rinhlelh rual lohvin Timothea rinna chu a tichak ngei ang. Paula chuan an zîngah Kristian derte awm mah se, Mosia hun lai ang bawk khân Jehova chuan a mi dik takte chu a hria tih a sawina ang a ni.
12 Jehova chu a danglam ngai lova, innghahna tlâk tak a ni. Dik lohna a hua a, sim duh lo thil sual titute chu a hun takah a hrem ang. ‘LALPA hming lamtu’ a nih angin, Timothea pawh chu Kristian derte’n dik lo taka thunun an tumna hnâwl tûra hriattîr a ni. *
BIAKNA DIK CHU A THLAWN NGAI LO
13. Eng rin tlatna nge kan neih theih?
13 Chutiang chuan Pathian thâwk khum Paula thusawi aṭangin thlarau lama chakna kan nei thei a ni. A hmasa berin, Jehova’n a laka kan rinawmna a hre chiang tih hriat chu a thlamuan thlâk hle a. Chu chu hriatna satliah mai a ni lo. A mite chu a ngaihsak tak zet a ni. Bible chuan: “A lama rilru dik tak putute chunga a chakzia tilang tûrin khawvêl zawng zawngah LALPA mit chu a lêng ruai ruai ṭhîn,” tiin a sawi a. (2 Chro. 16:9) Chuvângin, “thinlung thianghlim” taka Jehova tâna thil kan tih chu a thlâwn ngai lo tih kan ring tlat thei a ni.—1 Tim. 1:5; 1 Kor. 15:58.
14. Eng ang biakna nge Jehova’n a ngaihzam loh?
14 Jehova’n vervêk taka biakna a ngaizam lo tih hriat chu a pawimawh hle a. “Khawvêl zawng zawngah LALPA mit chu a lêng ruai ruai ṭhîn a,” “a lama rilru dik tak” pu lote chu a hre thei. Thufingte 3:32 chuan ‘Jehova’n mi kawhmawh a ten,’ thu a sawi a, chûng mite chu a rûka thil sual ti reng sia thuâwih âwm taka lang derte an ni. Mi kawhmawh chuan a mihring puite chu engemaw chen bum thei mah se, Jehova engkim tihtheihna leh dikna chuan “bawhchhiatna zêptute chu an hmuingîl lo vang,” tih a tiam a ni.—Thuf. 28:13; 1 Timothea 5:24; Hebrai 4:13 chhiar rawh.
15. Eng nge kan pumpelh ang a, engvângin nge?
15 Jehova mite zînga a tam zâwkte chu tihtak zetin an inpe a. Kohhran chhûnga mi tuemawin tum rêng vânga a der maia Pathian a bia a nih chuan thil pangngai lo tak a ni ngei ang. Chuti chung pawhin, Mosia hun lai leh Kristian hmasate hun laia kohhran chhûnga chutiang thil a thlen theih chuan tûn laiah pawh a thleng thei a ni. (2 Tim. 3:1, 5) Mahse, Kristian unaute chu ringhlelin, Jehova laka an rinawmna chu kan ring lo ṭan mai dâwn tihna em ni? Ni lo ve! Finfiahna awm lova kan unaute rinhlelh ngawt chu a dik lo a ni. (Rom 14:10-12; 1 Korinth 13:7 chhiar rawh.) Chu bâkah, kohhran chhûnga mi dangte rinawmna rinhlelh duhna neih chu kan thlarau lam atân ngei pawh a pawi dâwn si a.
16. (a) Vervêknain kan thinlunga zung a kaih tûr vên nân eng nge kan tih ṭheuh theih? (b) “Inchhin Ṭhîn Ula, . . . In Fiah Ṭhîn Rawh U” tih bâwm aṭangin eng nge kan zir theih?
16 Kristian tinte chuan ‘mahni thiltih an fiah ṭheuh’ tûr a ni. (Gal. 6:4) Thil sual tih duhna kan neih avângin, dik lo deuh hleka Jehova biak duhna kan nei chho thei a. (Heb. 3:12, 13) Chuvângin, a rawng bâwl tûra min chêttîrtu chu kan ngaihtuah nawn fo a ngai a ni. Heti hian kan inzâwt thei ang: ‘Jehova chu ka hmangaih avâng leh a lal chungnunna ka pawm avânga bia ka ni em? Nge, Paradise-a malsâwmna dawn beiseina lam ringawt ka ngaihtuah zâwk? tiin. (Thup. 4:10, 11) Mahni thiltih ṭheuh chhût ngunna leh kan thinlunga vervêkna thil tih awm apiang paih bo chu kan hlâwkpui ṭheuh thei a ni.
HLIMNA THLENTU RINAWMNA
17, 18. Engvângin nge Pathian kan biaknaah takna leh dikna kan lantîr ang?
17 Pathian kan biaknaah takna leh dikna kan lantîr tlat hian hlâwkna tam tak kan seng a. Fakna hla phuahtu chuan: “Mi, LALPAN khawlohna neia a ruat lohva, a thlarauva tihderna rêng rêng awm lova chu, a eng a thâwl e,” tiin a sawi a ni. (Sâm 32:2) Tih tak zetna nêna Pathian kan biak chuan, tûnah hian kan hlim ang a, hun lo la awm tûrah pawh hlimna tluantling kan nei bawk ang.
18 A hun takah Jehova chuan thil sual titute emaw, chi hniha nungte emaw chu a hai lang vek ang a, chiang takin: ‘Mi fel leh mi suaksual, Pathian rawngbâwltu leh bâwl lotu chu a thliar’ hrang ang. (Mal. 3:18) Chu mi a lo thlen hma chuan, “Lalpa mit chu mi felte chungah a fu a, a beng pawh an ṭawngṭaina lamah a chhi si ṭhîn” tih hriat chu a thlamuanthlâk hle a ni.—1 Pet. 3:12. (w14-E 07/15)
