1. Duna un resúmen di un relato bíbliko ku ta mustra kon algun sirbidó di Dios a gaña nan mes. (Wak e promé plachi.)

RIBA un mainta, Sumo Saserdote Aron tabata pará na entrada di e tabernakel kla pa ofresé sensia na Yehova. Banda di dje pará tabatin Koré i 250 hòmber, kendenan tambe a bini ku nan wea-pa-kandela pa ofresé sensia na Yehova. (Num. 16:16-18) Na promé bista, a parse ku tur e hòmbernan akí tabata leal na Yehova. Sinembargo, distinto for di Aron, tur e otronan tabata hòmbernan arogante i rebelde ku kier a kita e saserdosio for di Aron. (Num. 16:1-11) Nan a gaña nan mes pensando ku Dios lo a aseptá nan adorashon. Pero en realidat nan a ofendé Yehova, kende por wak den kurason di hende. Pues, e por a mira ku nan tabata hipókrita.—Yer. 17:10.

2. Kiko Moises a profetisá, i kon su palabranan a kumpli?

² Un dia promé, Moises a profetisá: “Mañan mainta SEÑOR lo mustra ta ken ta di dje.” (Num. 16:5) I Yehova en bèrdat a demostrá ku e tabata sa ken tabata su berdadero adoradónan i ken nò. Kon asina? Wèl, el a manda kandela for di shelu i a kaba ku Koré i e 250 hòmbernan ku tabata ofresé sensia. (Num. 16:35; 26:10, NW) E echo ku Aron sí a keda na bida a mustra bon kla ku e tabata un berdadero adoradó di  Yehova i é saserdote ku tabatin Yehova su aprobashon.—Lesa 1 Korintionan 8:3.

3. (a) Ki situashon a surgi den tempu di Pablo? (b) Kiko nos por siña for di e manera ku Yehova a trata ku e rebeldenan den tempu di Moises?

³ Un situashon similar a surgi un 1.500 aña despues, den tempu di apòstel Pablo. Tabatin algun hende ku tabata yama nan mes kristian ku a kuminsá promové siñansa falsu. Komo ku e personanan akí tabata den e kongregashon kristian, na promé bista, por a parse ku nan tabata berdadero adoradó di Yehova. Pero en realidat, nan tabata apóstata, lobo bistí na karné ku a forma un peliger pa kristiannan fiel. Nan a asta kuminsá “ruiná e fe di algun” kristian. (2 Tim. 2:16-18) Yehova tabata konsiente di loke tabata pasando e tempu ei? Klaru ku sí. I Pablo tabata konvensí di esei ya ku e tabata sa kon Yehova a resolvé e problema ku Koré i su kompinchinan a kousa siglonan anterior. Nos tambe por tin e mesun konvikshon ku Pablo. Pa nos por logra esei, laga nos analisá loke Pablo a bisa Timoteo.

4. Di kiko Pablo tabata konvensí, i kon el a ekspresá esaki na Timoteo?

⁴ Pablo tabata sigur ku Yehova sa ken ta su berdadero adoradónan i ken nò. Pablo a demostrá e konvikshon fuerte akí den un karta ku el a skirbi bou di inspirashon na Timoteo. Despues ku Pablo a deskribí e daño spiritual ku e apóstatanan a hasi na algun hende den e kongregashon, el a skirbi: “Apesar di esei, Dios a pone un fundeshi sólido ku ta para firme i ku ta seyá ku e inskripshon akí: ‘Yehova konosé esnan ku ta pertenesé na dje,’ i: ‘Laga tur ku ta menshoná e nòmber di Yehova distansiá nan mes for di inhustisia.’”—2 Tim. 2:18, 19.

5, 6. Dikon e echo ku Pablo a papia di ‘un fundeshi ku Dios a pone’ ta remarkabel? (b) Ki efekto e ekspreshon akí tabatin riba Timoteo?

⁵ Beibel ta usa e palabra “fundeshi” pa ilustrá vários kos. Por ehèmpel, e ta kompará Herúsalèm, e kapital di Israel di antigwedat, i e papel ku Hesus ta hunga den e propósito di Dios ku fundeshi. (Sal. 87:1, 2; 1 Kor. 3:11; 1 Ped. 2:6) Pero ta ún kaminda so Beibel ta papia di ‘un fundeshi sólido ku Dios a pone.’ Na kiko Pablo tabata referí ora el a usa e ekspreshon akí?

⁶ Ora Pablo a papia di ‘e fundeshi sólido ku Dios a pone,’ el a referí tambe na loke Moises a bisa enkuanto Koré i su kompinchinan. (Wak Numbernan 16:5.) Evidentemente, e motibu pakiko Pablo a referí na e susesonan den tempu di Moises tabata pa animá Timoteo. Ademas, e kier a rekordá Timoteo ku Yehova ta mira kiko ta pasa den kongregashon i ku meskos ku Yehova no a permití Koré stroba Su boluntat di kumpli den pasado, lo e no permití e apóstatanan den nan tempu tampoko hasi esei. Pablo no a splika detayadamente kiko e ‘fundeshi sólido ku Dios a pone’ ta representá. Pero loke el a bisa sin duda a yuda Timoteo haña mas konfiansa den Yehova.

7. Dikon nos por ta sigur ku Yehova lo ta hustu i fiel pa semper?

⁷ Yehova su prinsipionan no ta kambia. Salmo 33:11 ta bisa: “E konseho di SEÑOR ta permanesé pa semper; e plannan di su kurason ta di generashon pa generashon.” Otro tekstonan di Beibel ta bisa ku Yehova su reino, su miserikòrdia, su hustisia i su fieldat ta dura pa semper. (Éks. 15:18; Sal. 106:1; 112:9; 117:2) Malakías 3:6 ta bisa ku Yehova no ta kambia. I Santiago 1:17 ta bisa ku Yehova “no ta varia ni kambia manera sombra ku ta move.”

8, 9. Ki lès nos por siña for di e inskripshon den Pablo su ilustrashon?

⁸ Den antigwedat, hende tabatin e kustumber di skirbi òf graba un mensahe riba fundeshi di un edifisio; e inskripshon akí hopi bes tabata bisa ta ken a konstruí e edifisio òf di ken e tabata. Pablo tabata e promé eskritor di Beibel ku a referí na e kustumber akí. * E ‘fundeshi sólido ku Dios a pone’ i ku Pablo a papia di dje na 2 Timoteo 2:19 tabatin dos mensahe grabá riba dje: (1) “Yehova konosé esnan ku ta pertenesé na dje” i (2) “Laga tur ku ta menshoná e nòmber di Yehova distansiá nan mes for di inhustisia.” E mensahenan akí ta laga nos kòrda e palabranan di Numbernan 16:5.—Les’é.

⁹ Ki lès e personanan ku ta pertenesé na Yehova por siña for di e “inskripshon” den Pablo su ilustrashon? Nan por siña ku Yehova su norma- i prinsipionan ta basá riba dos bèrdat fundamental: (1) Yehova ta stima esnan ku ta leal na dje i (2) Yehova ta odia inhustisia. Kon e lès akí mester yuda nos ora tin apostasia den kongregashon?

10. Ki efekto e komportashon di e apóstatanan tabatin riba kristiannan fiel den tempu di Pablo?

¹⁰ Probablemente e komportashon di e apóstatanan den e kongregashon kristian a molestiá Timoteo i otro kristiannan fiel. Kisas algun kristian tabata puntra dikon tabata permití e personanan ei keda den kongregashon. Algun kristian fiel por a asta puntra nan mes si Yehova lo a mira e diferensia entre nan lealtat i e hipokresia di e apóstatanan.—Echo. 20:29, 30.

11, 12. Kon e karta di Pablo a fortalesé Timoteo su fe?

¹¹ Sin duda, e karta di Pablo a fortalesé Timoteo su fe. Mediante e karta akí, Pablo a kòrda Timoteo loke a pasa den tempu di Moises: Yehova a demostrá ku ta Aron tabatin su aprobashon i a eksponé e hipokresia di Koré i su kompinchinan; el a rechasá nan i destruí nan. Ku otro palabra, Pablo a bisa ku aunke tabatin kristiannan falsu den e kongregashon kristian, Yehova tabata sa ken realmente tabata pertenesé na dje, meskos ku tabata e kaso den tempu di Moises.

¹² Yehova no ta kambia nunka, p’esei semper nos por dependé riba dje. E ta  odia inhustisia, i na su debido tempu lo e kastigá e malbadonan ku no ke arepentí. Ademas, Pablo a kòrda Timoteo ku e mester a resistí mal influensia di e supuesto kristiannan, pasobra tur hende ku ta menshoná, òf invoká, e nòmber di Yehova mester rechasá maldat. *

13. Ki konfiansa nos por tin?

¹³ E karta ku Pablo a skirbi Timoteo por animá nos tambe. Kon asina? Pa kuminsá, ta un konsuelo pa sa ku Yehova ta bon konsiente di nos lealtat na dje. Pero Yehova no solamente ta konsiente di esei ma ta mustra berdadero interes tambe den esnan ku ta pertenesé na dje. Beibel ta bisa: “Wowo di SEÑOR ta move bai bini dor di henter tera, pa e por sostené fuertemente esnan ku nan kurason ta kompletamente di dje.” (2 Kró. 16:9) P’esei, nos por tin pleno konfiansa ku loke nos hasi pa Yehova ku “un kurason limpi” nunka ta enbano; Yehova semper ta rekompensá nos.—1 Tim. 1:5; 1 Kor. 15:58.

14. Ken su adorashon Yehova no ta aseptá?

¹⁴ Yehova no ta tolerá hipokresia. Segun ku su wowo “ta move bai bini dor di henter tera,” e por detektá ken su kurason no “ta kompletamente di dje.” Proverbionan 3:32 ta bisa ku “hende pèrvèrso,” esta hende ku ta fingi di ta obediente miéntras ku den sekreto nan ta kometé piká, ta un abominashon pa Yehova. Un hende asina por gaña otronan, pero e no por gaña Yehova, e Dios hustu i todopoderoso. P’esei, Beibel ta bisa ku “esun ku skonde su pikánan lo no prosperá.”—Pro. 28:13; lesa 1 Timoteo 5:24; Hebreonan 4:13.

15. Kiko nos mester evitá, i dikon?

¹⁵ Mayoria di Testigu di Yehova ta adorá Yehova ku un kurason sinsero. Den kasonan masha eksepshonal bo por haña ku un persona den kongregashon intenshonalmente ta adorá Yehova na un manera hipókrita. Pero si esaki a tuma lugá den tempu di Moises i den e kongregashon kristian di promé siglo, e por sosodé awe tambe. (2 Tim. 3:1, 5) Awor, esaki ta nifiká ku nos mester duda den nos rumannan i kuestioná nan lealtat na Yehova? Nò! Ta robes pa duda den nos rumannan sin ningun motibu. (Lesa Romanonan 14:10-12; 1 Korintionan 13:7.) Es mas, si nos tin e tendensia di husga nos rumannan, nos por daña nos relashon ku Yehova.

16. (a) Kiko nos mester hasi pa eliminá kualke rastro di hipokresia for di nos kurason? (b) Kiko nos por siña for di e kuadro  “Sigui Saminá Boso Mes”?

¹⁶ Tur kristian mester ‘analisá nan mes akshonnan.’ (Gal. 6:4) Debí ku nos ta imperfekto, nos por kuminsá adorá Yehova ku e motibunan inkorekto sin ku nos ta realisá esei. (Heb. 3:12, 13) P’esei, de bes en kuando nos tin ku analisá nos motibunan pa sirbi Yehova. Nos mester puntra nos mes: ‘Mi ta adorá Yehova pasobra mi ta stim’é i ta rekonos’é komo mi Gobernante? Òf mi ta mas interesá den e bendishonnan ku mi ta spera di disfrutá di dje den Paradeis?’ (Rev. 4:11) Ora nos ta analisá nos mes di e manera ei, nos por eliminá tur rastro di hipokresia ku por tin den nos kurason.

17, 18. Dikon nos mester adorá Yehova di kurason?

¹⁷ Si nos ta hasi esfuerso pa kita tur rasgo di hipokresia for di nos kurason,  nos ta saka hopi benefisio. Un salmista a bisa: “Bendishoná ta e hende, kende su inikidat SEÑOR no ta tuma na kuenta, i den kende su spiritu no tin engaño.” (Sal. 32:2) Sí, si nos ta adorá Yehova di kurason, nos lo ta mas felis i lo tin e speransa di disfrutá di felisidat perfekto den futuro.

¹⁸ Na su debido tempu, Yehova lo saka na kla ken ta esnan ku ta hasi malu òf ku ta hiba un bida dòbel; asina, lo e mustra e diferensia “entre e hustu i e malbado, entre un ku ta sirbi Dios i un ku no ta sirbié.” (Mal. 3:18) Mientrastantu, ta un konsuelo pa sa ku ‘Yehova su wowo ta riba e hustunan i ku su orea ta habrí pa nan súplika.’—1 Ped. 3:12.