1. Duna un resumen di un relato biblico cu ta mustra con algun sirbidor di Dios a gaña nan mes. (Wak e prome plachi.)

RIBA un mainta, Sumo Sacerdote Aaron tabata para na entrada di e tabernakel cla pa ofrece sencia na Jehova. Core y 250 homber tabata para ey banda, kendenan a bin cu nan wea pa candela pa ofrece sencia na Jehova. (Num. 16:16-18) Na prome bista, a parce cu tur e hombernan aki tabata leal na Jehova. Sinembargo, distinto for di Aaron, tur e otronan tabata hombernan arogante y rebelde cu kier a kita e sacerdocio for di Aaron. (Num. 16:1-11) Nan a gaña nan mes pensando cu Dios lo acepta nan adoracion. Pero en realidad nan a ofende Jehova, kende por wak den curason di hende. Pues, e por a mira cu nan tabata hipocrita.—Jer. 17:10.

2. Kico Moises a profetisa, y con su palabranan a cumpli?

² Un dia prome, Moises a profetisa: “Mañan mainta SEÑOR lo mustra ta ken ta di dje.” (Num. 16:5) Y Jehova en berdad a demostra cu e tabata sa ken tabata su berdadero adoradornan y ken no. Con asina? Wel, el a manda candela for di cielo y a caba cu Core y e 250 hombernan cu tabata ofrece sencia. (Num. 16:35; 26:10, NW) E echo cu Aaron si a keda na bida a mustra bon cla cu e tabata un berdadero adorador di  Jehova y e sacerdote cu tabatin Jehova su aprobacion.—Lesa 1 Corintionan 8:3.

3. (a) Ki situacion a surgi den tempo di Pablo? (b) Kico nos por siña for di e manera cu Jehova a trata cu e rebeldenan den tempo di Moises?

³ Un situacion similar a surgi un 1.500 aña despues, den tempo di apostel Pablo. Tabatin algun hende cu tabata yama nan mes cristian cu a cuminsa promove siñansa falso. Como cu e personanan aki tabata den e congregacion cristian, na prome bista, por a parce cu nan tabata berdadero adorador di Jehova. Pero en realidad, nan tabata apostata, lobo bisti na carne cu a forma un peliger pa cristiannan fiel. Nan a hasta cuminsa “ruina e fe di algun” cristian. (2 Tim. 2:16-18) Jehova tabata consciente di loke tabata pasando e tempo ey? Claro cu si. Y Pablo tabata convenci di esey ya cu e tabata sa con Jehova a resolve e problema cu Core y su compinchinan a causa siglonan anterior. Nos tambe por tin e mesun conviccion cu Pablo. Pa nos por logra esey, laga nos analisa loke Pablo a bisa Timoteo.

4. Di kico Pablo tabata convenci, y con el a expresa esaki na Timoteo?

⁴ Pablo tabata sigur cu Jehova sa ken ta su berdadero adoradornan y ken no. Pablo a demostra e conviccion fuerte aki den un carta cu el a skirbi bou di inspiracion na Timoteo. Despues cu Pablo a describi e daño spiritual cu e apostatanan a haci na algun hende den e congregacion, el a skirbi: “A pesar di esey, Dios a pone un fundeshi solido cu ta para firme y cu ta seya cu e inscripcion aki: ‘Jehova conoce esnan cu ta pertenece na dje’, y: ‘Laga tur cu ta menciona e nomber di Jehova distancia nan mes for di inhusticia.’”—2 Tim. 2:18, 19.

5, 6. Dicon e echo cu Pablo a papia di ‘un fundeshi cu Dios a pone’ ta remarcabel? (b) Ki efecto e expresion aki tabatin riba Timoteo?

⁵ Bijbel ta uza e palabra “fundeshi” pa ilustra varios cos. Por ehempel, e ta compara Jerusalem, e capital di Israel di antiguedad, y e papel cu Hesus ta hunga den e proposito di Dios cu fundeshi. (Sal. 87:1, 2; 1 Cor. 3:11; 1 Ped. 2:6) Pero ta un caminda so Bijbel ta papia di ‘un fundeshi solido cu Dios a pone.’ Na kico Pablo tabata referi ora el a uza e expresion aki?

⁶ Ora Pablo a papia di ‘e fundeshi solido cu Dios a pone’, el a referi tambe na loke Moises a bisa encuanto Core y su compinchinan. (Wak Numbernan 16:5.) Evidentemente, e motibo pakico Pablo a referi na e sucesonan den tempo di Moises tabata pa anima Timoteo. Ademas, e kier a recorda Timoteo cu Jehova ta mira kico ta pasa den congregacion y cu mescos cu Jehova no a permiti Core stroba Su boluntad di cumpli den pasado, e lo no permiti e apostatanan den nan tempo tampoco haci esey. Pablo no a splica detayadamente kico e ‘fundeshi solido cu Dios a pone’ ta representa. Pero loke el a bisa sin duda a yuda Timoteo haya mas confianza den Jehova.

7. Dicon nos por ta sigur cu Jehova lo ta husto y fiel pa semper?

⁷ Jehova su principionan no ta cambia. Salmo 33:11 ta bisa: “E conseho di SEÑOR ta permanece pa semper; e plannan di su curason ta di generacion pa generacion.” Otro textonan di Bijbel ta bisa cu Jehova su reino, su misericordia, su husticia y su fieldad ta dura pa semper. (Exo. 15:18; Sal. 106:1; 112:9; 117:2) Malakias 3:6 ta bisa cu Jehova no ta cambia. Y Santiago 1:17 ta bisa cu Jehova “no ta varia ni cambia manera sombra cu ta move.”

8, 9. Ki les nos por siña for di e inscripcion den Pablo su ilustracion?

⁸ Den antiguedad, hende tabatin e custumber di skirbi of graba un mensahe riba fundeshi di un edificio; e inscripcion aki hopi bes tabata bisa ta ken a construi e edificio of di ken e tabata. Pablo tabata e prome escritor di Bijbel cu a referi na e custumber aki. * E ‘fundeshi solido cu Dios a pone’ y cu Pablo a papia di dje na 2 Timoteo 2:19 tabatin dos mensahe graba riba dje: (1) “Jehova conoce esnan cu ta pertenece na dje” y (2) “Laga tur cu ta menciona e nomber di Jehova distancia nan mes for di inhusticia.” E mensahenan aki ta laga nos corda e palabranan di Numbernan 16:5.—Les’e.

⁹ Ki les e personanan cu ta pertenece na Jehova por siña for di e “inscripcion” den Pablo su ilustracion? Nan por siña cu Jehova su norma- y principionan ta basa riba dos berdad fundamental: (1) Jehova ta stima esnan cu ta leal na dje y (2) Jehova ta odia inhusticia. Con e les aki mester yuda nos ora tin apostasia den congregacion?

10. Ki efecto e comportacion di e apostatanan tabatin riba cristiannan fiel den tempo di Pablo?

¹⁰ Probablemente e comportacion di e apostatanan den e congregacion cristian a molestia Timoteo y otro cristiannan fiel. Kisas algun cristian tabata puntra dicon tabata permiti e personanan ey keda den congregacion. Algun cristian fiel por a hasta puntra nan mes si Jehova a mira e diferencia entre nan lealtad y e hipocresia di e apostatanan.—Echo. 20:29, 30.

11, 12. Con e carta di Pablo a fortalece Timoteo su fe?

¹¹ Sin duda, e carta di Pablo a fortalece Timoteo su fe. Mediante e carta aki, Pablo a corda Timoteo loke a pasa den tempo di Moises: Jehova a demostra cu ta Aaron tabatin su aprobacion y a expone e hipocresia di Core y su compinchinan; el a rechasa nan y destrui nan. Cu otro palabra, Pablo a bisa cu aunke tabatin cristiannan falso den e congregacion cristian, Jehova tabata sa ken realmente tabata pertenece na dje, mescos cu tabata e caso den tempo di Moises.

¹² Jehova no ta cambia nunca, pesey semper nos por depende riba dje. E ta  odia inhusticia, y na su debido tempo e lo castiga e malbadonan cu no kier arepenti. Ademas, Pablo a corda Timoteo cu e mester a resisti mal influencia di e supuesto cristiannan, pasobra tur hende cu ta menciona, of invoca, e nomber di Jehova mester rechasa maldad. *

13. Ki confianza nos por tin?

¹³ E carta cu Pablo a skirbi Timoteo por anima nos tambe. Con asina? Pa cuminsa, ta un consuelo pa sa cu Jehova ta completamente consciente di nos lealtad na dje. Jehova no solamente ta consciente di esey pero tambe e ta mustra berdadero interes tambe den esnan cu ta pertenece na dje. Bijbel ta bisa: “Wowo di SEÑOR ta move bay bin door di henter Tera, pa e por sostene fuertemente esnan cu nan curason ta completamente di dje.” (2 Cro. 16:9) Pesey, nos por tin pleno confianza cu loke nos haci pa Jehova cu “un curason limpi” nunca ta envano; Jehova semper ta recompensa nos.—1 Tim. 1:5; 1 Cor. 15:58.

14. Ken su adoracion Jehova no ta acepta?

¹⁴ Jehova no ta tolera hipocresia. Segun cu su wowo “ta move bay bin door di henter Tera”, e por detecta ken su curason no “ta completamente di dje.” Proverbionan 3:32 ta bisa cu “hende perverso”, esta hende cu ta haci manera nan ta obediente mientras cu den secreto nan ta comete pica, ta un abominacion pa Jehova. Un hende asina por gaña otronan, pero e no por gaña Jehova, e Dios husto y todopoderoso. Pesey, Bijbel ta bisa cu “esun cu sconde su picanan lo no prospera.”—Prov. 28:13; lesa 1 Timoteo 5:24; Hebreonan 4:13.

15. Kico nos mester evita, y dicon?

¹⁵ Mayoria di testigo di Jehova ta adora Jehova cu un curason sincero. Den casonan sumamente excepcional bo por haya cu un persona den congregacion intencionalmente ta adora Jehova na un manera hipocrita. Pero si esaki a tuma luga den tempo di Moises y den e congregacion cristian di prome siglo, e por sosode awe tambe. (2 Tim. 3:1, 5) Awor, esaki ta nifica cu nos mester duda den nos rumannan y cuestiona nan lealtad na Jehova? No! Ta robes pa duda den nos rumannan sin ningun motibo. (Lesa Romanonan 14:10-12; 1 Corintionan 13:7.) Ademas, si nos tin e tendencia di husga nos rumannan, nos por daña nos relacion cu Jehova.

16. (a) Kico nos mester haci pa elimina cualkier lastro di hipocresia for di nos curason? (b) Kico nos por siña for di e cuadro “ Sigui Samina Boso Mes”?

¹⁶ Tur cristian mester ‘analisa nan mes accionnan.’ (Gal. 6:4) Debi cu nos ta imperfecto, nos por cuminsa adora Jehova cu e motibonan incorecto sin cu nos ta realisa esey. (Heb. 3:12, 13) Pesey, de bes en cuando nos tin cu analisa nos motibonan pa sirbi Jehova. Nos mester puntra nos mes: ‘Mi ta adora Jehova pasobra mi ta stim’e y ta reconoc’e como mi Gobernante? Of mi ta mas interesa den e bendicionnan cu mi ta spera di disfruta di dje den Paradijs?’ (Rev. 4:11) Ora nos ta analisa nos mes di e manera ey, nos por elimina tur lastro di hipocresia cu por tin den nos curason.

17, 18. Dicon nos mester adora Jehova di curason?

¹⁷ Si nos ta haci esfuerso pa kita tur rasgo di hipocresia for di nos curason,  nos ta saca hopi beneficio. Un salmista a bisa: “Bendiciona ta e hende, kende su inikidad SEÑOR no ta tuma na cuenta, y den kende su spirito no tin engaño.” (Sal. 32:2) Si, si nos ta adora Jehova di curason, nos lo ta mas feliz y lo tin e speransa di disfruta di felicidad perfecto den futuro.

¹⁸ Na su debido tempo, Jehova lo saca na cla ken ta esnan cu ta haci malo of cu ta hiba un bida dobel; asina, e lo mustra e diferencia “entre e husto y e malbado, entre un cu ta sirbi Dios y un cu no ta sirbie.” (Mal. 3:18) Mientrastanto, ta un consuelo pa sa cu ‘Jehova su wowo ta riba e hustonan y cu su horea ta habri pa nan suplica.’—1 Ped. 3:12.