1. Kihda ehu karasaras me kasalehda ia duwen ekei sapwellimen Koht aramas akan ar pein pitihiraildi. (Menlau kilang tepin kilel.)

 POKON en ohl kei kesikesihnen mwohn tehnpaso, kaukaunop pwe ren meirongkihong Siohwa warpwohmwahu. Samworo lapalap en Israel, Aaron, kesihnen apali, a Kora oh ohl 250 mi pali teio. (Nempe 16:16-18) Mwomwen me irail koaros kin lelepek ong Koht. Ahpw Kora oh me kin utung ih ko kin pohnmwahso, roporop, oh re kin uhwong oh men kihsang pwukoa en samworo lapalap Aaron. (Nempe 16:1-11) Re pein pitih irail ni arail medewe me Siohwa pahn ketin kupwurki arail kaudok. Ahpw met kahngiangihada Siohwa me kak ketin mwahngih mohngiongirail. E kak ketin mwahngih me re mwalaun oh re mwahuki ale kaping ong pein irail.​—Ser. 17:10.

2. Dahme Moses nda me pahn wiawi oh ia duwen met eh pweida?

² Moses nda: “KAUN-O pahn ketin kasalehiong kitail ihs me e ketin sapwellimanki.” (Nemp. 16:5) Ia duwen Siohwa eh ketin kasalehda me e mwahngih ihs sapwellime tohnkaudok mehlel kan oh ihs irail me mwalaun kan? Siohwa ketin kadaridi kisiniei sang nanleng oh kasohrehla Kora oh ohl 250. (Nemp. 16:35; 26:10) Aaron kelehpw me kesikesihnen. Siohwa ketin kasalehda ni sansal me  Aaron iei samworo mehlelo oh e wia sapwellimen Koht tohnkaudok mehlel men.​—Wadek 1 Korint 8:3.

3. (a) Dahme wiawi nan mwomwohdiso en Kristian ko ni mwehin Pohl? (b) Dahme kitail kak sukuhlki sang dahme Siohwa ketin wiahiong Kora oh ienge ko ni mwehin Moses?

³ Mwurin sounpar 1,500 samwa, mehkot duwehte met wiawi nan mwomwohdisohn Kristian ko ni mwein wahnpoaron Pohl. Pohl kawehwehda me ekei me dene irail Kristian kei, tapiada padahk likamw nan mwomwohdiso. Ahpw irail kin iang wia kisehn mwomwohdiso. Irail kesehla oh uhwongada kaudok mehlel ahpw re kin mwomwehda me irail sapwellimen Siohwa tohnkaudok mehlel kei. Ahpw ni mehlel irail duwehte kidi en wel keper kan, oh re tepida kauwehla “pwoson en ekei” Kristian kan. (2 Tim. 2:16-18) Ia duwe, Siohwa ketin mahmahsanih dahme wiewiawi? Ei. Pohl ese dahme Koht ketin wiahiong Kora oh ienge ko, eri e kamehlele me Siohwa uhdahn ketin mwahngih duwen irairo. Kitail pil kak koapworopworki Siohwa ni ahl wet. Kitail pahn sukuhlki ia duwen atail en wia met sang dahme Pohl ntingkihlahng Timoty.

4. Dahme Pohl kamehlele me Siohwa pahn ketin wia? Dahme Pohl ndaiong Timoty?

⁴ Pohl kamehlele me Siohwa pahn ketin mwahngih ahn aramas ar kaudok mwalaun. E pil kamehlele me Siohwa ketin mwahngih ihs sapwellime tohnkaudok mehlel kan. Met sansal sang lepin lokaia kan me e doadoahngki ni eh ntinglahng Timoty. Mwurin eh kawehwehda duwen irail kan me uhwongada kaudok mehlel ar kauwehla pwoson en ekei Kristian kan, Pohl nda: “Ahpw poahsoan tengeteng me Koht ketin poahsoanedier sohte kak mwekidida; oh mahsen pwukat pil ntingdier powe: ‘Kaun-o ketin mwahngih irail kan me sapwellime,’ oh ‘Mehmen me kin koasoakoasoia me ih sapwellimen Kaun-o uhdahn pahn sohpeisang wiewia suwed kan.’”​—2 Tim. 2:18, 19.

5, 6. Ia kesempwalpen lepin lokaia pwukat “poahsoan tengeteng me Koht ketin poahsoanedier” me Pohl doadoahngki? Ia duwen met eh sewese Timoty?

⁵ Paipel doadoahngki lepin lokaia wet “poahsoan” pwehn karasahiong soahng tohto. Karasepe, e kin karasahiong sapwellimen Koht koasoandi kan me sohte kin wekila ong mwekimwekid en sampah oh duwen eh koasoanehdi teng pohn poahsoane. (Mel. 104:5) Pwukoa me Sises ahneki nan sapwellimen Siohwa koasoandi kan pil kin karasahiong poahsoan ehu. (1 Kor. 3:11; 1 Pit. 2:6) Ahpw Paipel doadoahngki lepin lokaia pwukat “poahsoan tengeteng me Koht ketin poahsoanedier” pak ehute. Dahme Pohl koasokoasoia ni eh doadoahngki lepin lokaia pwukat?

⁶ Pohl doadoahngki lokaiakohte me Moses ndahki duwen Kora oh ienge ko oh pil kapatahiong lepin lokaia pwukat “poahsoan tengeteng me Koht ketin poahsoanedier.” (Menlau kilang Nempe 16:5.) Ni ahl wet, Pohl katamankihong Timoty me Siohwa ketin mwahngih dahme wiwiawi nan mwomwohdiso. Koht sohte pahn ketin mweidohng irail me uhwongada kaudok mehlel en kauwehla mwomwohdiso. Kora sohte wekidala sapwellimen Siohwa koasoandi kan. Duwehte met, irail me uhwongada kaudok mehlel pil sohte pahn kak wekidala sapwellimen Koht koasoandi kan. Pohl sohte uhdahn kawehwehda ia wehwehn “poahsoan tengeteng me Koht ketin poahsoanedier.” Ahpw dahme Pohl nda sewese Timoty en koapworopworki oh likih Siohwa.

7. Ia duwen atail kak kamehlele me Siohwa pahn ketin ahnsou koaros pwung oh loalopwoat?

⁷ Ire mehlel kan me Siohwa ketin koasoanehdi sohte kin wekila. Melkahka 33:11 mahsanih: “Sapwellime [Siohwa] koasoandi kan kin mihmi poatopoat, koasoandi kan en nan kupwure kin duweduwehte erein dih koaros kohkohlahte.” Siohwa iei Nanmwarki, e ketin kasalehda limpoak poatopoat, oh e ketin pwung oh loalopwoat.  Paipel kasalehda me ire mehlel pwukat sohte kin wekila. (Eks. 15:18; Mel. 106:1; 112:9; 117:2) Malakai 3:6 mahsanih: “Ngehi KAUN-O, oh I sohte pahn wekila.” Seims 1:17 pil mahsanih me Siohwa “sohte kin ketin wekila, oh sohte kisin mwomwen wekila kis kak mie reh.”

8, 9. Mehn kasukuhl dah me kitail kak sukuhlki sang nting kan pohn “poahsoan tengeteng me Koht ketin poahsoanedier”?

⁸ Mahsie, aramas akan kin kalapw ntingihedi lepin lokaia kan ni poahsoan en ihmw ehu. Met kin wiawi pwehn kasalehda ihs me kauwada de imwaneki ihmwo. Pohl iei tepin sounnting en Paipel me koasoia duwen tiahk wet nan karasaras. * Mie lepin nting riau me ntingdi pohn “poahsoan tengeteng me Koht ketin poahsoanedier” me Pohl kawehwehda nan 2 Timoty 2:19: (1) “Kaun-o ketin mwahngih irail kan me sapwellime” oh (2) “Mehmen me kin koasoakoasoia me ih sapwellimen Kaun-o uhdahn pahn sohpeisang wiewia suwed kan.” Met kin katamankihong kitail dahme kitail wadek nan Nempe 16:5.​—Wadek.

⁹ Dahme irail kan me Siohwa sapwellimanki kak sukuhlki sang lepin nting kan me kileldi pohn “poahsoan tengeteng me Koht ketin poahsoanedier”? Irail kak sukuhlki me sapwellimen Siohwa koasoandi oh kaweid kan kin poahsoankihda ire mehlel riau. Keieu, Siohwa ketin poakohng irail kan me loalopwoatohng ih, oh keriau, Siohwa ketin kalahdeki wiewia sapwung. Ia duwen mehn kasukuhl wet eh pidada mwekid kan me kin uhwongada kaudok mehlel nan mwomwohdiso?

10. Ia duwen wiewiahn me uhwongada kaudok mehlel kan ar kamwakid me lelepek kan ni mwehin Pohl?

¹⁰ Timoty oh me lelepek teikan uhdahn pwunodikihda wiewiahn irail me uhwongada kaudok mehlel. Ekei Kristian ko ele kin idek dahme kahrehda irail me uhwongada kaudok mehlel en mihmihte nan mwomwohdiso. Me lelepek ko ele pil medemedewe ma Siohwa kin ketin mwahngih wekpeseng en arail lelepek oh duwen mwalaun en me kin uhwongada kaudok mehlel.​—Wiewia 20:29, 30.

11, 12. Ia duwen nein Pohl kisinlikowo eh kakehlakahda ahn Timoty eh pwoson?

¹¹ Nein Pohl kisinlikowo ele kakehlakahda ahn Timoty pwoson. E katamankihong Timoty me mwoweo Siohwa ketin kasalehda ni sansal me Kora oh ienge ko aramas mwalaun kei. Siohwa ketin soikala arail kaudok oh kasohrehla irail ahpw e ketin kasalehda me e kupwurki Aaron. Met pil duwehte ni mwehin Pohl. Mehnda ma mie aramas akan me mwomwehda me dene  irail Kristian kei, Siohwa pahn ketin kasansalehda ihs me sapwellime.

¹² Siohwa sohte kin ketin wekila, eri ahnsou koaros kitail kak koapworopworki ih. E ketin kalahdeki me suwed oh pahn ketin kaloke irail me kin wia me suwed oh sohte koluhla. Met katamankihong Timoty me e anahne soikala wiewia suwed en irail ko me mwomwehda me irail Kristian, pwehki “mehmen me kin koasoakoasoia me ih sapwellimen Kaun-o” anahne soikala wiewia suwed kan. *

13. Dahme kitail kak kamehlele?

¹³ Dahme Pohl ndaiong Timoty pil kak kangoange kitail. Ia duwen? Siohwa uhdahn ketin mwahngih me kitail kin lelepekiong ih. Ahpw e kin ketin wia laudsang ihte mwahngih irail kan me kin lelepekiong ih. Siohwa ketin kasalehda me e uhdahn ketin nsenohki emenemen aramas. Paipel mahsanih: “KAUN-O kin ketin mwasamwasahn sampah pwon, pwehn ketin kakehlahda irail kan me arail mohngiong kin loalopwoatohng ih.” (2 Kron. 16:9) Kitail kak kamehlele me Siohwa sohte pahn ketin manokehla atail kin nantihong kaudokiong ih ni mehlel.​—1 Tim. 1:5; 1 Kor. 15:58.

14. Soangen kaudok dah me Siohwa kin ketin soikala?

¹⁴ Siohwa ketin kalahdeki oh ketin soikala kaudok me mwalaun. E kak ketin mwahngih mohngiong en aramas koaros oh kak ketin mwahngih mohngiong en ihs me sohte kin “loalopwoatohng ih.” Siohwa kin ketin kalahdeki emen me kin mwomwehda peik ahpw kin wiewia dihp ni rir. (Lep. Pad. 3:32) Soangen aramas menet kak pitihedi meteikan ahpw kaidehn Siohwa. Paipel mahsanih: “Omw mour sohte pahn pweida ma ke song en ekihla dipomw kan.” Met pwehki Siohwa sapwellimaniki manaman laud oh pwehki e ketin wia Koht emen me pwung.​—Lep. Pad. 28:13; wadek 1 Timoty 5:24; Ipru 4:13.

15. Dahme kitail en dehr wia, oh dahme kahrehda?

¹⁵ Pali laud en sapwellimen Siohwa aramas akan kin poakohng ih sang nan mohngiongirail unsek. E pahn kapwuriamwei ma emen kin song en pitiheki Siohwa eh kaudok mwalaun. Ahpw ma met wiawi ni mwehin Moses oh ni mwehin tepin Kristian kan, e pil kak wiawi nan atail ahnsou. (2 Tim. 3:1, 5) Ia duwe, met wehwehki me kitail en lemelemehk suwedki riatail kan oh peikasalki arail loalopwoatohng Siohwa? Soh. E pahn sapwung en lemelemehk suwedki riatail Kristian kan ma sohte atail mehn kadehde. (Wadek Rom 14:10-12; 1 Korint 13:7.) Atail peikasalki riatail kan pahn kauwehla atail nanpwungmwahu rehn Siohwa.

16. (a) Ia duwen omw kak tehk mwahu me sohte mwalaun kis en mi nan omw mohngiong? (b) Dahme kitail kak sukuhlki sang koakon me oaralap koasoia “ Kumwail Kalelapak oh Wia Keseupen Pein Kumwail”?

¹⁶ Emenemen Kristian anahne “kasakasawih pein eh wiewia kan.” (Kal. 6:4) Pwehki kitail soh unsek, ele kitail kak tepida kaudokiong Siohwa pwehki kahrepe sapwung kan ni atail sohte ese. (Ipru 3:12, 13) Ekisekis kitail kasalehda mwalaun ni atail papah ih. Eri kitail anahne pein idek rehtail: ‘Dahme kahrehda I kin kaudokiong Siohwa? I kin kaudokiong ih pwehki I poakohng ih oh pwehki I men en wia ei Kaun? De I kin medemedewehte duwen mour mwahu me I kasikasik en ahneki nan Paradais?’ (Kaud. 4:11) Ni atail idek soangen peidek pwukat, kitail kak tehk mwahu me sohte mwalaun kis en mi nan mohngiongitail.

17, 18. Dahme kahrehda kitail anahne mehleliong atail kaudokiong Siohwa?

¹⁷ Kitail pahn ale ketingpatail ma kitail kin nantihong kihsang mwalaun koaros nan mohngiongitail. Sounmelkahkao koasoia: “Meid pai aramas me KAUN-O solahr ketin kapwukoahki dipe kan; oh me saledek sang soangen widing  koaros.” (Mel. 32:2) Ma kitail kin mehleliong atail kaudok, kitail pahn peren ahnsou wet oh pil ahneki nsenamwahu mehlel ni ahnsou kohkohdo.

¹⁸ Ahnsou keren, Siohwa pahn ketin kasansalehda aramas suwed me sohte kin koluhla de wiewia dihp ni rir. E pahn ketin kasalehda wekpeseng en “aramas pwung kan oh aramas suwed kan.” (Mal. 3:18) Lao lel ahnsowo, e kaperen en ese me “silangin Kaun-o kin mahmahsanih me pwung kan, oh e kin karonge ar pekipek kan ahnsou koaros.”​—1 Pit. 3:12.