1. Londa mwisambo wa mu Bible aulesha binangu bibubi bibaadi bifwile bangi bafubi b’Efile Mukulu. (Tala kifwatulo ki ku mbangilo kwa mwisambo.)

DINGI efuku ku namashika, Tshite mwakwidi mukata Aarone baadi mwimane pa kitwelelo kya tabernakele a Yehowa, mukwate keeso ka kufuutwila malashi. Ku lupese lwaye kubaadi Koree na bantu 250 abaadi abashiiki kabanda kwi Yehowa, muntu ooso na kaye keeso. (Mb. 16:16-18) Obe atala mususa umune, we kumona shi, bantu booso abaadi bafubi ba Yehowa basha bulamate. Kadi bilekeene na Aarone, bano bangi abaadi bafubi basha kwitatula na abaadi abakyebe kunyenga bwakwidi. (Mb. 16:1-11) Abaadi abedimbi banabeene pa’bo kunangusheena shi Yehowa akyebe kukumiina lulangwilo lwabo. Anka luno lukulupilo lubaadi nka bu kusabuula Yehowa, aye mukumbeene kumona bi mwishimba na mulombeene kumona bulamalama bwabo.​—Yel. 17:10.

2. Nkinyi kibaadi Moyiise mutemukye, na mayi aye abaadi akumbane su?

² Efuku dimune kumpala, Moyiise baadi mutemukye shi: “Malooba nakashika Yehowa awukisha aye nabene winyi adi mukumiine.” (Mb. 16:5) Oolo Yehowa baadi muleshe kwilekena pankatshi pa balangwidi ba binyibinyi na ba madimi nsaa ibaadi ‘kaalo katukye kwi Yehowa na kashika Koree na bantu 250 abalambulanga musengo wa  kabanda.” (Mb. 16:35; 26:10) Mu yaya nsaa imune, Yehowa baadi mukalwile muwa wa Aarone, bwa kulesha mwakwidi aadi mukumiine na mulangwidi a binyibinyi a Efile Mukulu.​—Badika 1 Beena-Kodinto 8:3.

3. (a) Mwanda kinyi ubaadi utuukye mu mafuku a Mpoolo mutumibwa? (b) Mushindo kinyi ubaadi Yehowa mukitshine bantomboshi myanda kala?

³ Mwanda wi mumune ubaadi utuukye bipwa 1 500 kunyima mu mafuku a Mpoolo mutumibwa. Bangi bantu abaadi abeamba bu beena Kidishitu abaadi babangye kukumiina malongyesha a madimi; kadi abaadi batungunukye na kwikala mu kakongye. Bwa muntu atala bisumanga, bano bantu basumbule lukumiino tababaadi belekene na bangi bantu ba mu kakongye. Kadi bano bantu basumbule lukumiino abaadi bu masaku kwi beena Kidishitu basha lukumiino. Ino miseu ifwale bu mikoko ibabangile “kulwisha lukumiino lwa bebungi.” (2 Tim. 2:16-18) Sunga mbyabya, Yehowa tatalaa bisumanga nya, na Mpoolo baadi auku byabya kukiila ku mushindo ubaadi Efile Mukulu mukitshine bantomboshi, Koree na bantu abaadi bamukwatshishene myanda, bipwa nkama bipwe kukila. Pabitale uno mwanda, tubande kutaluula verse e na muulo ukata na kumona dilongyesha dyatudi bakumbeene kwikupetela.

4. Mpoolo baadi mushinkamishe kinyi, na mushindo kinyi ubaadi muleshe lushinkamisho lwaye kwi Timotee?

⁴ Mpoolo baadi auku shi Yehowa mulombene kushinguula lulangwilo lwa bantu basumbule lukumiino, na baadi mushinkamishe shi Yehowa baadi mukumbene kumona bano abamukokyela. Mpoolo baadi muleshe lushinkamisho lwaye mu mayi abaadi mufundile Timotee ku bukwashi bwa kikudi. Kunyima kw’aye kwakula bwa mushindo ubaadi bantu basumbule lukumiino abalwisha nshalelo a mu kikudi a beena kakongye, Mpoolo bafundjile shi: “Sunga mbyabya kitako kinyingye kiibakwe kwi Efile Mukulu ki’nka panka. Nkyelwe kitampi mu bino bishima: Yehowa awuku bantu baye; na dingi shi: Yawa ooso atemuna eshina dya Yehowa afutaale bubi.”​—2 Tim. 2:18, 19.

5, 6. Mwanda kinyi wa muulo wi mu mayi a Mpoolo pabitale “kitako kinyingye kibakwe kwi Efile Mukulu,” na mbukitshishi kinyi bubaadi na kino kishima kwi Timotee?

⁵ Mwanda kinyi wa muulo wi mu mayi a Mpoolo watupete mu uno verse? Uno nyi mususa penda umune wi Bible atemuna kishima “kitako kinyingye kibakwe kwi Efile Mukulu.” Bible atemuna kishima “kitako” bu kintu kya kupwandikisha nakyo bintu bilekenelekene, kusangisha na Yeelusaleme baadi bu kibalo kikata kya Isaleele a kala. (Mis. 87:1, 2) Mufubo winao Yesu mu mpàngo ya Yehowa ngupwandikishibwe dingi na kitako. (1 Kod. 3:11; 1 Mp. 2:6) Nkinyi kibaadi mu binangu bya Mpoolo pabaadi mufunde pabitale “kitako kinyingye kibakwe kwi Efile Mukulu”?

⁶ Mpoolo kwete kutemuna “kitako kinyingye kibakwe kwi Efile Mukulu” mu yaya nshalelo imune yatemuna mayi a Moyiise pabitale Koree na bantu abaadi bamukwatshishene, afundibwe mu Mbadiko 16:5. Eyendo Mpoolo baadi atentekyesha myanda ya mu mafuku a Moyiise bwa kukankamika Timotee na kumudimusha pabitale bukome bwi nabo Yehowa bwa kumona na kulekyesha bikitshino bya buntomboshi. Mpàngo ya Yehowa tayibaadi ilombeene kukutshishibwa mwanda wa bantu basumbule lukumiino nka bu bibaabidi bwa Koree bipwa nkama kumpala. Mpoolo tabaadi muleshe mu katoba na katoba akipatuula “kitako kinyingye kibakwe kwi Efile Mukulu” nya. Anka ngakwilo aadi mufube naye mu Timotee aalesha binangu bya kukulupila mu mushindo aukitaa Yehowa myanda.

7. Bwakinyi twibalombeene kukumina shi Yehowa akakitshi myanda na bulamate na kululama?

⁷ Miiya ya Yehowa tayishintulukaa nya. Misambo 33:11 amba shi: “Kinangu kya Yehowa akishalaa  kwanka bwa looso, mpwandikisho y’eshimba dyaye, ngyaa bipungo na bipungo.” Angi ma verse aakula bwa kumunana kwa Yehowa, kifulo kyaye kya kalolo, bululame, na bulamate shi bi kwanka bwa looso. (Efi. 15:18; Mis. 106:1; 112:9; 117:2) Malakii 3:6 amba shi: “Ami ne Yehowa; ntshimwalulukye’mi.” Na Jaake 1:17 akula shi Yehowa “taaluluka sunga kwikala bu mwesheshi awushintuluka.”

8, 9. Ndilongyesha kinyi dyatupete ku mayi a Mpoolo a mu kinfwanyi pabitale “kitampi”?

⁸ Mayi a mpoolo a mu kinfwanyi abaadi mufunde mu 2 Timotee 2:19 aalesha kitako ki na bishima bifunde panka, nka bu byabadi batape na kyamo. Mu mafuku a kala, babaadi na kyubishi kya kufunda ku kitako kya nshibo, pangi bwa kulesha eshina dya muntu mwiyibakye sunga sha nayo. Mpoolo baadi muntu a kumpala ku bafundji ba Bible baadi mufube na kino kileshesho. * Kino kitampi ki pa “kitako kinyingye kibakibwe kwi Efile Mukulu” kii na bishima bibidi. Kishima kya kumpala, “Yehowa awuku bantu baye” na kyakabidi, “yawa ooso atemuna eshina dya Yehowa afutaale bubi.” Bino abitutentekyesha yaya myanda ifundibwe mu Mbadiko 16:5.​—Badika.

⁹ Ndilongyesha kinyi dyatupete ku mayi a Mpoolo a mu kinfwanyi pabitale “kitampi”? Bwa bafubi b’Efile Mukulu, miiya na mayi a kulonda bya Yehowa mbebibungye mu ino myanda ibidi ikata: (1) Yehowa mmufule baaba bamulamate, na (2) Yehowa mmushikwe bubi. Mbukwashi kinyibwinabo dino dilongyesha kwi bantu basumbule lukumiino be mu kakongye?

10. Mushindo kinyi ubaadi bikitshino bya bantu bakutwe lukumiino binyongoshe bantu basha lukumiino mu mafuku a Mpoolo?

¹⁰ Kushi mpaka Timotee na bangi basha bulamate abaadi bakalakashibwe na bikitshino bya bantu basumbule lukumiino abaadi munkatshi mwabo. Bangi beena Kidishitu abaadi pangi abepusha bwakinyi bano bantu abaadi bebatadiile mu kakongye. Bantu basha lukumiino abaadi bakumbeene kwiyipusha su binyibinyi Yehowa mmuleshe kwilekena kwi pankatshi pa lulangwilo lwa bafubi bamulamate na bantu basumbule lukumiino.​—Bik. 20:29, 30.

11, 12. Mushindo kinyi ubaadi mukanda wa Mpoolo unyingishe lukumiino lwa Timotee?

¹¹ Kushi mpaka mukanda wa Mpoolo ubaadi unyingishe lukumiino lwa Timotee pa kumutentekyesha kibaadi kikitshikye nsaa ibaabadi babingishe Aarone muntu sha lukumiino na kutusha Koree muntu mushimishe lukumiino na  ba kuuku baye patoka na kwibabutula. Eyendo Mpoolo baadi akula shi sunga beena Kidishitu bebubi bekala munkatshi mwabo, Yehowa mukumbene kuuka baba balamate kwadi mwiyendo, anka bu bibaadi mukite mu mafuku a Moyiise.

¹² Yehowa ta mwalulukye nya; nga kukulupila. Mmushikwe bantu bebubi, na mu kipungo kilombane akyebe kufwisha basha milwisho bashy’abelanga mu kululama. Bu bibaadi “atemuna eshina dya Yehowa,” abaadi badimushe Timotee pabitale bushito bwadi nabo bwa kwilamuuna kwi beena Kidishitu ba madimi. *

13. Nkinyi kyatudi balombeene kukulupila?

¹³ Natwe namu twibakumbeene kupeta bukwashi bwa mu kikudi kukiila ku mayi a Mpoolo. Kyakumpala, abitukankamika bwa kuuka shi Yehowa awuku baaba bamulamate. Na kuno kuuka ta nkwabisumanga nya. Kadi, Yehowa kwete kwitatshisha ngofu bwa bantu baye. Bible amba shi: “Yehowa amonaa abikitshika mbalo yooso pa nsenga ishima, bwa kunyingisha bano batuule lukulupilo mwadi.” (2 Mya. 16:9) Byabya, twibakumbeene kukulupila n’eshimba dimune shi byabya byooso byatukitshi bwa Yehowa “n’eshimba diselele” tabyende bisumanga nya.​—1 Tim. 1:5; 1 Kod. 15:58.

14. Ndulangwilo kinyi lushy’alusankisha Yehowa?

¹⁴ Bina muulo ukata bwa kuuka shi Yehowa tasankilaa lulangwilo lwa bulamalama. Bu bi “Yehowa amonaa abikitshika mbalo yooso pa nsenga,” mmukubeene kumona baaba booso bashi batuule “lukulupilo mwadi.” Myeele 3:32 ambashi: “Yehowa akumbaa meso aye kwi mubi,” kwi muntu ekamisha, adimbi kukokyela aku namu kwete kukita milwisho mbufyebufye. Byabya muntu ebubi mmukumbene kudimba bangi bantu na budimu munda mwa mafuku, kwikala kwa Yehowa bu sha bukome booso na sha kululama akwitushinkamiisha shi: “muntu adidi kufwamisha bito byaye tobesha nya.”​—Mye. 28:13; badika 1 Timotee 5:24; Beena-Ebreeyi 4:13.

15. Nkinyi akitungu shi twikumbe, na mbwakinyi?

¹⁵ Kibumbu kikata kya bafubi ba Yehowa mbashale bamulamate. Mbilombene kwikala mwanda upya su mu kakongye muntu babanga kulangwila mu mu mushindo wibubi. Kadi, su bibaadi bikitshikye mu mafuku a Moyiise na mu kakongye ka beena Kidishito ba kumpala, mbilombene kukitshika dingi lelo uno. (2 Tim. 3:1, 5) Sunga mbyabya, twibakumbene kwelela bakwetu beena Kidishitu binangu bibubi, na kubanga kwialashena pabitale bulamate bwabo kwi Yehowa? Nya! Kwelela bakwetu beena Kidishitu binangu bibubi pa myanda ishi kapu nkulombene kwikala mwanda wibubi. (Badika Beena-Looma 14:10-12; 1 Beena-Kodinto 13:7.) Na dingi, kwikala na binangu bya kumona bangi mu kakongye bu bashi balulame nkulombene kulwisha nshalelo etu a mu kikudi.

16. (a) Nkinyi kikumbeene ooso a kwatudi kukita bwa kupela kutwesha tu myanda twa bulamalama mwishimba dyaye? (b) Ndilongyesha kinyi dyatupete mu kashibo akamba shi “ Etaluuleyi anwe banabene . . . Nwipime’nwe banabene . . .”?

¹⁶ Abitungu mwina Kidishitu ooso “ataluule bwikashi bwaye nabeene.” (Gal. 6:4) Pamwanda wa kukutwa kwa kupwidika, twibalombene kukita tungi tu myanda twa kukutwa kwa kululama kushi’twe kuuka. (Eb. 3:12, 13) Byabya, abitungu twikale atutaluula binangu byetu nsaa na nsaa patukewete kufubila Yehowa. Twibalombene kwiyipusha shi: ‘Nkwete kulangwila Yehowa bwa kifulo na bwa kulesha lutumbu bwa Bufumu bwaye? Sunga shi nkwete kwata myabi ya ku mbidi yankyebe nkapeta mu Mpaladiiso na muulo ukata?’ (Bif. 4:11) Eyendo atwe booso twibalombene kupeta bukwashi patutaluula bikitshino byetu na kukasha tu myanda tooso twa bulamalama mwishimba dyetu.

17, 18. Bwakinyi abitungu twikale balulame mu lulangwilo lwetu lwa Yehowa?

¹⁷ Bu byatwitatshisha bwa kwikala balulame mu lulangwilo lwetu, atupete myabi ibungi. Kayimba ka misambo amba shi: “Sha mwabi nguno sha kito kishy’akibadikibwa kwi Yehowa, shi na muwa wa bu nsesa.” (Mis. 32:2) Oolo, bano abakasha bu nsesa mu mashimba abo mba sha mwabi, naabetwele mwishinda aditwala ku miloo ya mu mafuku aafiki.

¹⁸ Mu kipungo kilombane, Yehowa akyebe kutuusha baaba booso abakitshi myanda ibubi, sunga be na nshalelo a bukitekite patooka, bwa kulesha “kwilekeena kwi pankatshi pa mululame na mubi, afubila Efile Mukulu na shyaamufubila.” (Mal. 3:18) Byabya bi na muulo bwa kuuka shi: “Meso a Yehowa e pe balulame, dingi matwi aaye aatemesha nteko yabo.”​—1 Mp. 3:12.