‘Yehova Fa Mba Nav’
“Aluer Aôndo Una doo or ishima yô, nan kpaa Aôndo fa nan.”—1 KOR. 8:3.
1. Pase kwagh u ken Bibilo u a tese mhen u kpeegh u mbacivir Aôndo mbagenev lu a mi yô. (Nenge foto u a lu sha mhii u ngeren ne la.)
PRISTI u Tamen Aron yange tile hen hunda u tabernakel u Yehova sha iyange igen pepe, kôr gbande na u nanden kwaghhumandoon shimi. Koraki vea ior nav 250 kpa tile a na ikyua, ve lu nanden Yehova kwaghhumandoon, hanmô ve kôr gbande u nan u nanden kwaghhumandoon. (Num. 16:16-18) Aluer u kenger hiihii yô, a lu u er ior mban cii lu civir Yehova sha mimi nahan. Nahan kpa, dugh Aron sha yô, mbagenev mbara cii lu mbahembanato, mba wan igbongor mba ve lu keren ér vea ngohol tom u pristi u hingir u ve yô. (Num. 16:1-11) Ve lu tsughun ayol a ve, henen ér Aôndo una lumun a mcivir ve la. Kpa lu Yehova, u fa asema a ve la jighilii ve laha ye. Yange nenge ér ve wa atseregh shi mba keren icivir ve.—Yer. 17:10.
2. Lu nyi Mose tsengaôrono, man kwaghôron na la va kure sha mi vough kpa?
2 Cii man iyange la yô, Mose tsengakaan ér: “Kper pepe TER Una tese mba ve lu mba Nav” la. (Num. 16:5) Nahan Yehova tese mkposo u mbacivir un sha mimi a mbacivir un sha mimi ga mbara, vough er Mose kaa nahan, shighe u “usu due hen TER, hia [Koraki man] ior deri uhar man akunduahargber mba ve va nande nagh ku kwaghhumandoon la.” (Num. 16:35; 26:10) Kpa Aron yô, Yehova kura un, sha u tesen ér ka un a lu Pristi kpôô kpôô, shi a civir Aôndo sha mimi ye.—Ôr 1 Mbakorinte 8:3.
3. (a) Ka nyi yange i za hemen sha ayange a apostoli Paulu laa? (b) Gbenda u Yehova tsaha mbahembanato sha ayange a Mose la tese se nyi?
3 Anyom nga kar er 1,500 nahan yô, imbakwagh ne shi va er sha ayange a apostoli Paulu la. Mbagenev mba yange ve senge ér mba Mbakristu yô lumun a atesen a aiegh; kpa ve za hemen u lun ken nongo u Kristu her. Mba ve fa kuma ve ga yô, alaghga yange vea hen ér mbavendan mimi mban lu kposo a mbagenev ken tiônnongo ga. Kpa ieren ve i vendan mimi ne gema lu kwagh u una fatyô u vihin mlu u Mbakristu mba mimi yô. Nahan mba ve lu ugbaseela mba huan akôv a iyôngo mban gba “nzughul a jighjigh u nan u mbagenev.” (2 Tim. 2:16-18) Kpa Yehova fa kwagh ne doo doo, shi Paulu kpa lan kwagh u Aôndo vande eren anyom uderi imôngo ken ijime sha kwagh u Koraki man mbahembanato mbagenev mba ve lu suen un la ga. Nahan yô, de se time sha kwaghôron u doon ugen u Paulu ôr a Timoteu yô, nahan se hen akaa a injaa ken kwagh ne.
‘MO YEHOVA M GEM KPOSO GA’
4. Lu vangertiôr u nyi Paulu lu a mini, man a pase vangertiôr ne hen Timoteu nena?
4 Paulu yange na jighjigh ér Yehova una fa ior mba ve civir un sha atseregh la, shi lu a vangertiôr ér Yehova una fa mba ve ongo imo Na la kpaa. Paulu tese vangertiôr na ne ken mkaanem ma ôr ken washika u jijingi mgbegha un nger hen Timoteu la. Paulu pasen kwagh u mbavendan mimi mban lu eren sha u vihin mbagenev ken tiônnongo la been yô, a nger wener: “Kpa imagh ki Aôndo ki ki tenger ga la yô, ki tile her, ki a ikyav ne: [Yehova] fa mba Nav, man shi, hanma or u nan teren iti i [Yehova] yô, nana̱ pav a ifer.”—2 Tim. 2:18, 19.
5, 6. Mkaanem ma Paulu ma a kaa ér “imagh ki Aôndo ki ki tenger ga” la ma a inja nena, man kwagh ne yange una bende a Timoteu nena?
5 Inja i kwagh u Paulu kaa ér “imagh ki Aôndo ki ki tenger ga” la ka nyi? Ka cii ijiir i i er kwagh nahan ken Bibilo je la. I er tom a ishember i “imagh” la ken Bibilo sha u pasen akaa kpishi, er kwagh u Yerusalem, u lu gartamen u Iserael u tsuaa la nahan. (Ps. 87:1, 2) Kwagh u Yesu er sha u kuren awashima u Yehova la kpa i tôô un i kar sha imagh. (1 Kor. 3:11; 1 Pet. 2:6) Lu nyi Paulu lu a mi ken ishima zum u a nger kwagh u “Imagh ki Aôndo ki ki tenger ga” laa?
6 Paulu yange ter kwagh u “imagh ki Aôndo ki ki tenger ga” ne zum u lu ôron kwagh u mkaanem ma Mose ôr a Koraki man mbasuen un, ma i nger ken Numeri 16:5 la. Ikyav tese ér Paulu lu ôron kwagh u yange za hemen sha ayange a Mose la, sha u taver Timoteu ishima shi umbur un er Yehova a lu a tahav mbu fan kwagh u a lu ihyembeato shi yangen i kpaa yô. Lu u mbavendan mimi mba ve lu ken tiônnongo la vea fatyô u geman awashima u Yehova ga, vough er Koraki kpa yange fatyô u geman ga nahan. Paulu kera pase kwagh u a lu “imagh ki Aôndo ki ki tenger ga” la vighe vighe ga. Nahan cii kpa, mkaanem man taver Timoteu ishima u nan Yehova jighjigh shi lun a vangertiôr ken a na kpaa.
7. Se fatyô u nan jighjigh ser Yehova una er kwagh sha perapera man sha mimi sha ci u nyi?
7 Atindi a Yehova nga gem ga. Pasalmi 33:11 kaa ér: “Mhen u TER ngu dông gbem sha won, mbamhen mba ken ishima Na kpaa mba sha ikyov ikyov.” Avur a ruamabera agen kpa ôr kwagh u mtemtor u Yehova man erdoo na man perapera na kua mimi na ér ka u tsôron gbem sha won. (Eks. 15:18; Ps. 106:1; 112:9; 117:2) Malaki 3:6 kaa ér: “Mo TER M gem kposo ga.” Shi Yakobu 1:17 kpa kaa ér, “ma mgem ngu ken a Na ga, shin mure u mgem tsô kpaa ga.”
“IKYAV” I WASEN SE U NAN YEHOVA JIGHJIGH
8, 9. Se fatyô u henen nyi ken “ikyav” i Paulu ter ken injakwagh na laa?
8 Kwaghôron u Paulu u i nger ken 2 Timoteu 2:19 la ôr kwagh u imagh ki ki lu a kwaghngeren sha mi, inja er ka i ver ikyav sha kwagh nahan la. Sha ayange a ngise la, ashighe kpishi or a tim imagh yô, nan ver ikyav sha mi; alaghga ikyav la i lu sha u tesen or u i lu imagh ki nan la. Paulu lu orngeren Bibilo u hiihii u yange tese ikyav sha imbakwagh ne yô. * Akaayôôn nga ahar a i nger sha “imagh ki Aôndo ki ki tenger ga” la yô. Kwaghyôôn u hiihii la kaa ér “[Yehova] fa mba Nav,” u sha uhar la di kaa ér “hanma or u nan teren iti i [Yehova] yô, nana̱ pav a ifer.” Kwagh ne umbur se kwagh u i er ken Numeri 16:5 la.—Ôr.
9 Ka nyi se fatyô u henen ken kwagh u “ikyav” i Paulu yange kaa ér i ver sha “imagh ki Aôndo ki ki tenger ga” laa? Aeren a Yehova a soo, kua atindi na cii har sha atôakyaa ahar a vesen a mimi ne: (1) Mba ve til sha mimi hen Yehova la ve doo un ishima, shi (2) Yehova kôr iferkwagh ihyom. Kwagh ne zua sha kwagh u mbavendan mimi mba ken tiônnongo la nena?
10. Aeren a mbavendan mimi yange za mbajighjigh mba sha ayange a Paulu la iyol nena?
10 Ikyav tese ér yange ishima za Timoteu man mbajighjigh mbagenev iyol sha aeren a mbavendan mimi mba ve lu hen atô ve la. Alaghga yange a taver Mbakristu mbagenev er i hii ve ambaaior la nahan i de, a lu ken tiônnongo her yô. Shi alaghga mbagenev lu henen ér, Yehova pav mbacivir un sha mimi ver kposo a mbavendan mimi, mba ve civir un sha atseregh la je kpaa-o?—Aer. 20:29, 30.
Ieren i mbavendan mimi la yange i̱ bende a Timoteu ga (Nenge ikyumhiange i sha 10-12 la)
11, 12. Washika u Paulu la yange taver jighjigh u nan u Timoteu nena?
11 Washika u Paulu la yange taver jighjigh u Timoteu keng je, gadia a umbur un kwagh u za hemen shighe u Yehova na orjighjigh Aron ishô, kpa gema pon atseregh a Koraki vea ior nav ken igbar, shi venda ve, shi tim ve kera la. Inja na yô, Paulu lu kaan ér shin er Mbakristu mba mimi ga ve lu hen atô ve nahan kpa, Yehova una fa mba ve lu mba nav jim jim la, vough er yange er sha ayange a Mose la nahan.
12 Yehova gem kposo ga; a kuma u se suur sha a na hanma shighe cii. A kôr iferkwagh ihyom, shi shighe ka una kuma yô, a ôr mba ve lu eren asorabo sha apera la ijir. Er Timoteu lu or u “teren iti i [Yehova] yô,” un kpa kwagh ne umbur un tom u gba u un iyol na una er sha u palegh aeren a dang a Mbakristu mba mimi ga lu tesen la. *
KA SEA CIVIR AÔNDO SHA MIMI YÔ, SE ZUA A INJAR
13. Ka vangertiôr u nyi se fatyô u lun a mi?
13 Se kpa mkaanem ma jijingi mgbegha Paulu nger man ma a fatyô u taver se ishima. Hiihii yô, er se kav ser Yehova fa dedoo ér se mba civir un sha mimi yô, kwagh ne ngu a taver se ishima. Kwagh u mba ve lu mba nav la gba un ishima tsung je. Bibilo kaa ér: “Ashe a TER nga jingen sha akaa a sha won cii, sha u Una pase agee Na hen mba asema a ve a lu jighelaa her a Na yô.” (2 Kron. 16:9) Sha nahan yô, se fatyô u lun a vangertiôr ser kwagh u se er sha ci u Yehova, “u a dugh ken ishima i wang” cii yô, mayange una hungur a mi ga.—1 Tim. 1:5; 1 Kor. 15:58.
14. Ka mcivir u nyi Yehova a lumun a mi ga?
14 Shi doo u se fa kpaa ser Yehova kôr mcivir u sha atseregh ihyom. Er ashe a na a lu “jingen sha akaa a sha won cii yô,” una fatyô u nengen a mba asema a ve a lu “jighilaa her a Na” ga la. Anzaakaa 3:32 kaa ér “iferor ka kwagh u ndôhôr TER ishima je,” inja na yô, ka or u nan lu tesen sha ashe a ior ér nan ongo imo i Aôndo, kpa nan gem nan lu eren asorabo ken myer la je la. Er Yehova a lu Aôndo u perapera man uhembanagee yô, iferor nana bume mbagenev shighe a war karen, kpa un yô nana fatyô u bumen un ga, sha ci u Bibilo kaa ér, “or u nan cir akaabo a nan yô, nana zua a iveren ga.”—Anz. 28:13; ôr 1 Timoteu 5:24; Mbaheberu 4:13.
15. Ka nyi i doo u se palegha, man ka sha ci u nyi?
15 Ior mba Yehova mba hemban ngeen iyenge mba civir un sha mimi. A kpiligh iyol kpen kpen aluer or u ken tiônnongo nahan nan gema civir Yehova sha mimi ga, sha apera yô. Nahan kpa, aluer kwagh ne yange er sha ayange a Mose, kua ken nongo u Kristu u tsuaa la yô, una fatyô u eren nyian kpaa. (2 Tim. 3:1, 5) Kpa, kwagh ne tese ér doo u kwagh u anmgbianev asev una gema shin se, shi se hunan mtil sha mimi ve hen Yehovaa? Mayange ga! Aluer kwagh u anmgbianev asev mba nomso man mba kasev ngu shin se a ityôkyaa shio yô, a lu sha mi ga cii. (Ôr Mbaromanu 14:10-12; 1 Mbakorinte 13:7.) Shi aluer ka taver se u nan jighjigh ser mbagenev ken tiônnongo tile sha mimi yô, kwagh ne una fatyô u vihin se a Yehova.
16. (a) Ka nyi i doo u se asange asange se er sha u dughun nyityô atseregh cii ken ishima yase kera? (b) Ka nyi se fatyô u henen ken ngeren u kiriki u a lu a itinekwagh ér “ Kar Nen . . . Time Nen . . . ” laa?
16 Hanma Orkristu “nana̱ kar tom u nan iyol i nan.” (Gal. 6:4) Er se yen yô, alaghga se hingir u civir Yehova sha atôakyaa a ikyoo ga, kpa se fa ga. (Heb. 3:12, 13) Sha nahan yô, doo u hanma shighe yô, se tôvon ayol a ase sha er se fa atôakyaa a a ne ve se lu civir Yehova la yô. Se fatyô u pine ayol a ase ser: ‘M ngu civir Yehova ka sha ci u a doom ishima shi m nenge mer a kuma u hemen mo kpa? Shin m hemba veren ishima sha averen a m lu veren ashe u va zuan a mi ken Paradiso laa?’ (Mpa. 4:11) Sha kpôô yô, aluer se cii se mba tôvon ayol a ase shi dughun nyityô atseregh cii ken ishima yase kera yô, a wase se kpen kpen je.
MTIL SHA MIMI U A VE A MSAANYOL LA
17, 18. Doo u se civir Yehova sha mimi man a ishima i môm sha ci u nyi?
17 Ka sea nôngo tsung sea civir Aôndo sha mimi man a ishima i môm yô, se zua a mbamtsera kpishi. Orpasalmi yange kaa ér: “Saan or u TER A ne nan ibo sha ifer i nan ga la, iyol; shi nan lu a icugh ken ishima i nan kpaa ga yô.” (Ps. 32:2) Mba ve dugh atseregh ken ishima ve kera yô, ka hembe saan ve iyol, shi mba sha ian i va zuan a msaanyol u tsôron ken hemen.
18 Ica a gba ga tsô, Yehova una pon mba ve eren akaabo shin ve eren mire mi mire la cii, nahan una tese “mkposo u orperapera a iferor, man or u civir Aôndo a or u civir Un ga la” wang. (Mal. 3:18) Kpa hegen yô, doo se kpishi er se fe ser “ashe a Ter yô, nga sha mbaperapera shi veren ato sha zamber ve kpaa” nahan.—1 Pet. 3:12.
^ par. 8 Mpase 21:14 kpa ôr kwagh u “amagh” 12 a i nger ati a mbaapostoli 12 sha mi yô. Kpa Paulu yange nger uwashika mban hen Timoteu anyom kar imôngo cii ve i va mase ngeren mpase ne ye.
^ par. 12 Ngeren u dondon ne pase er se fatyô u dondon ikyav i Yehova sha u kôron iferkwagh ihyom yô.
