“Jehowa mbeyaka anto ande”
“Naka onto mbokaka Nzambi ngandji, kete nde mbeyamaka le nde.”—1 KƆR. 8:3.
1. Kɔndɔla ɔkɔndɔ ɔmɔtshi wa lo Bible wɛnya ekanelo ka kɔlɔ kakayonga l’ekambi waki Nzambi ɛmɔtshi. (Enda osato wele lo mbɔtwɛlɔ.)
LUSHI lɔmɔtshi la pindju, ɔlɔmbɛdi a laadiko Arɔna akemala lo mbɔtwɛlɔ ka tabɛrnakɛlɛ, okime lohoso la dja ya tshɔ alambola Jehowa. Kɔra nde l’anto 250 vɔ la wɔ, wakemala suke l’Arɔna wasala woho akɔ waamɛ, onto l’onto la lohoso lande la dja. (Wal. 16:16-18) Akɛnamaka diele oko apami asɔ waki atɛmɔdi wa kɔlamelo waki Jehowa. Otshikitanyi l’Arɔna, Kɔra l’anto ande waki etako ndo wakalange nkamba olimu w’ɔlɔmbɛdi la wolo. (Wal. 16:1-11) Koko vɔ wakayakese lo mfɔnya ɔnɛ Nzambi ayetawɔ ɔtɛmwɛlɔ awɔ. Elongamelo ka ngasɔ aki tshondo ya lɔtɛngɔ le Jehowa ɔnɛ lakakoke nsɛdingola etema awɔ ko mɛna dia wekɔ la dungi pende.—Jer. 17:10.
2. Kakɔna kakate Mɔsɛ lushi ɔtɔi la ntondo ka vɔ ndjotshumba tshɔ, ndo ngande wakayokotshamaka ɛtɛkɛta ande?
2 Lushi ɔtɔi la ntondo, Mɔsɛ akatatshi ate: “Lui la pindju, [Jehowa] ayutulimbitshiya akona leli landi.” (Wal. 16:5) Dia mɛnya wanɛ wele atɛmɔdi ande wa mɛtɛ la wanɛ wele atɛmɔdi wa kashi, ‘Jehowa akatome dja, ko ntshumba Kɔra l’anto 250 wanɛ wakalambolaka olambo wa tshɔ.’ (Wal. 16:35; 26:10) L’etena kakɔ kaamɛ, Jehowa akashimbɛ Arɔna dia mɛnya ɔnɛ nde mbele ɔlɔmbɛdi ndo ɔtɛmɔdi ande wa mɛtɛ.—Adia 1 Kɔrɛtɔ 8:3.
3. a) Kakɔna kakatombe lo nshi y’ɔpɔstɔlɔ Pɔɔlɔ? b) Ɛnyɛlɔ kakɔna kakasha Jehowa ɛnɔnyi nkama la ntondo lo kɛnɛ kendana l’anto watɔmbɔkɔ?
3 Ɛnɔnyi oko 1500 l’ɔkɔngɔ, dui dia ngasɔ diakayosalemaka lo nshi y’ɔpɔstɔlɔ Pɔɔlɔ. Anto amɔtshi wakayataka di’Akristo mbewɔ wakayotatɛ nsukɛ wetshelo wa kashi, koko wakatetemala nsangana kaamɛ l’ase etshumanelo akina. Anto waki komonga la shɛnɔdi, wakakoke mfɔnya ɔnɛ ndooko otshikitanu wele lam’asa waa apɔsta asɔ l’Akristo akina. Kɛnɛ kele mɛtɛ ele, wetshelo awɔ waki waale efula le Akristo waki la kɔlamelo. Ndjaondo shɔ yakalɔtɛ nkoho y’ɛkɔkɔ, yakatatɛ “nkonya anto amɔtshi dia vɔ nshisha mbetawɔ.” (2 Tim. 2:16-18) Jehowa ekɔ Nzambi kasɛdingola akambo dimɛna ndo Pɔɔlɔ akeyaka dui sɔ lo nkana yimba la kɛnɛ kakasalɛ Nzambi Kɔra mbidja ndo atɔmbɔki akina ɛnɔnyi nkama la ntondo. Lo kɛnɛ kendana la dui sɔ, nyɛsɔ tɔsɛdingole divɛsa dimɔtshi di’ohomba efula kele tende wetshelo wakokaso nkondja oma lɔkɔ.
“DIMI, [JEHOWA], HATUKADIMOKA”
4. Eshikikelo kakɔna kaki la Pɔɔlɔ, ndo ngande wɛnamatɔ oma lo ɛtɛkɛta wakandafundɛ Timɔte?
4 Pɔɔlɔ aki l’eshikikelo ɔnɛ Jehowa akeyaka wanɛ waki atɛmɔdi wa kashi la wanɛ waki atɛmɔdi wa mɛtɛ. Eshikikelo kaki la Pɔɔlɔ kɛsɔ mɛnamaka oma l’ɛtɛkɛta wakandafundɛ Timɔte l’ekimanyielo ka nyuma k’ekila. L’ɔkɔngɔ wa nde ntɛkɛta lo kɛnɛ kendana la shɛngiya ya kɔlɔ yakoonge la wetshelo wa waa apɔsta le ase etshumanelo amɔtshi, Pɔɔlɔ akayofundaka ate: “Kaanga mbediɔ ngasɔ, ehikamelo ka wolo kaki Nzambi kekɔ lo ntshikala nge, ndo kekɔ la efundelo ɛnɛ: ‘Jehowa mbeyaka anto ande’ ndo ɔnɛ: ‘Onto tshɛ latɛndɛ lokombo la Jehowa atshike akambo wa kɔlɔ.’”—2 Tim. 2:18, 19.
5, 6. Kakɔna kalembetshiya etelo kakakambe la Pɔɔlɔ k’ɔnɛ “ehikamelo ka wolo kaki Nzambi,” ndo shɛngiya yakɔna yakonge l’ɛtɛkɛta akɔ le Timɔte?
5 Kakɔna kalembetshiya etelo kaki Pɔɔlɔ k’ɔnɛ “ehikamelo ka wolo kaki Nzambi”? Etelo kɛnɛ tanemaka paka mbala ɔtɔi lo Bible. Bible kambaka la tshɛkɛta “ehikamelo” dia mbɛdika diangɔ diotshikitanyi, mbidja ndo Jɛrusalɛma kapitalɛ k’Isariyɛlɛ w’edjedja. (Osam. 87:1, 2) Bible mbɛdikaka nto ɔkɛndɛ wele la Yeso l’okotshamelo wa sangwelo diaki Jehowa la ehikamelo. (1 Kɔr. 3:11; 1 Pet. 2:6) Kakɔna kakalange Pɔɔlɔ mbuta etena kakandakambe la etelo k’ɔnɛ “ehikamelo ka wolo kaki Nzambi”?
6 Pɔɔlɔ akakambe la etelo kɛsɔ etena kakɔ kaamɛ kakandavusola ɛtɛkɛta waki Mɔsɛ otsha le Kɔra la wanɛ wakosukɛ watanema lo Walelu 16:5. Pɔɔlɔ mɛtɛ akakambe la kɛnɛ kakete lo nshi ya Mɔsɛ dia nkeketsha ndo mbohola Timɔte dikoka diele la Jehowa dia mbishola ndo ndɔsha yimba y’ɔtɔmbɔkwɛlɔ. Jehowa kombetawɔ dia sangwelo diande mfukutana oma le waa apɔsta waki l’etshumanelo oko wakinde kombetawɔ dia diɔ mfukutana lo nshi ya Kɔra. Pɔɔlɔ konembetshiya vuiwui tshɛ yendana la etelo k’ɔnɛ “ehikamelo ka wolo kaki Nzambi.” Koko ɛtɛkɛta akɔ wakakoke nkeketsha Timɔte dia nde ndjaɛkɛ le Jehowa.
7. Lande na kakokaso ndjashikikɛ dia Jehowa ayosala akambo la losembwe ndo la kɔlamelo?
7 Atɔndɔ wa laadiko waki Jehowa hawotshikitana. Osambu 33:11 mbutaka ɔnɛ: ‘Sangwelo diaki Jehowa diayotshikalaka pondjo, ndo tokanyi t’otema ande lo lɔlɔnga la lɔlɔnga.’ Ekɔ avɛsa akina wɛnya dia lowandji laki Jehowa, ngandji ka kɔlamelo, losembwe ndo kɔlamelo yande tshikalaka pondjo pondjo. (Etum. 15:18; Esam. 106:1; 112:9; 117:2) Malaki 3:6 mbutaka ɔnɛ: “Dimi, [Jehowa], hatukadimoka.” Ndo Jakɔba 1:17 mbutaka dia Jehowa ekɔ onto “[la]hakadimɔ ndo lahatshikitana.”
“EFUNDELO” WAKEKETSHA MBETAWƆ KASO LE JEHOWA
8, 9. Wetshelo akɔna wakokaso nkondja oma lo “efundelo” wakakambe la Pɔɔlɔ lo ɛnyɛlɔ kande?
8 Ɛtɛkɛta waki Pɔɔlɔ wa didjidji wele lo 2 Timɔte 2:19 wekɔ ehikamelo kele la losango lakafundama oko la ematelo. Lo nshi y’edjedja, anto waki la mbekelo ka mfundaka efundelo l’ɛse ka luudu ondo dia mɛnya ombiki kana kanga lɔ. Pɔɔlɔ mbaki ofundji wa ntondo wa Bible wakakambe la ɛnyɛlɔ kɛsɔ. * Efundelo wa lo “ehikamelo ka wolo kaki Nzambi” wekɔ la tokitshimudi tohende. Kitshimudi ya ntondo ele, yɔ mɛnyaka dia “Jehowa mbeyaka anto ande” ndo kitshimudi ya hende mɛnyaka dia “onto tshɛ latɛndɛ lokombo la Jehowa atshike akambo wa kɔlɔ.” Kɛsɔ toholaka kɛnɛ katanema lo Walelu 16:5.—Adia.
9 Wetshelo akɔna wakokaso nkondja oma lo “efundelo” wele lo ɛtɛkɛta waki Pɔɔlɔ wa didjidji? Le wanɛ weyama le Nzambi, ɛlɛmbɛ ndo atɔndɔ waki Jehowa koka nembetshiya akambo ahende w’ohomba anɛ: 1) Jehowa mbokaka wanɛ wele la kɔlamelo ngandji ndo 2) Jehowa petshaka atshi wa kɔlɔ. Ko wetshelo akɔna watosha dui sɔ lo kɛnɛ kendana l’apɔstazi wakoka ndjɔtɔ l’etshumanelo?
10. Shɛngiya yakɔna yaki la etsha wa waa apɔsta le Akristo waki la kɔlamelo lo nshi ya Pɔɔlɔ?
10 Timɔte ndo Akristo akina waki la kɔlamelo, wakayakiyanyaka l’ɔtɛ wa kɛnɛ kakasalaka waa apɔsta waki l’etshumanelo. Diakɔ diele, Akristo amɔtshi wakakoke ndjambola ɔnɛ lande na katshikala anto anɛ l’etshumanelo? Ondo Akristo amɔtshi waki la kɔlamelo wakakoke ndjambola dia kana Jehowa mɛtɛ ekɔ lo mɛna wanɛ wele atɛmɔdi ande wa mɛtɛ ndo wanɛ wele la dungi pende.—Ets. 20:29, 30.
Timɔte kɔsɛngiyama la mbekelo ya waa apɔsta wa lo nshi yande (Enda odingɔ 10-12)
11, 12. Lo woho akɔna wele aha la taamu mukanda wa Pɔɔlɔ wakakeketsha Timɔte?
11 Aha la taamu, mukanda wakafundɛ Pɔɔlɔ Timɔte wakakeketsha mbetawɔ kande lo mboohola woho wakafutama Arɔna l’ɔtɛ wa kɔlamelo yande ndo woho wakadiakema Kɔra nde l’anto wakooyele. Pɔɔlɔ akalangaka mbuta ɔnɛ kaanga mbaki waa apɔsta l’etshumanelo, Jehowa akeyaka wanɛ waketawɔmaka le nde oko wakidiɔ lo nshi ya Mɔsɛ.
12 Jehowa hatshikitana pondjo ndo sho pombaka mendɛka nshi tshɛ le nde. Nde petshaka awui wa kɔlɔ ndo l’etena kahombama, nde ayolanya wanɛ wahayatshumoya. Oko wakinde onto “[lakatɛndɛka] lokombo la Jehowa,” Timɔte akohɔma dia nsala kɛnɛ tshɛ kahombama diaha nde nsɛngiyama oma le waa apɔsta. *
ƆTƐMWƐLƆ WA MƐTƐ KEEMA ANYANYA
13. Eshikikelo kakɔna kakokaso monga la tɔ?
13 Sho lawɔ koka keketshama lo nyuma oma lo ɛtɛkɛta waki Pɔɔlɔ wakafundama l’ɛlɔmbwɛlɔ ka nyuma k’ekila. Ntondotondo, sho keketshamaka lo mbeya ɔnɛ Jehowa mɛnaka kɔlamelo yaso otsha le nde lo yoho ya laande. Laadiko dia laasɔ, nde ndjakiyanyaka lo dikambo di’anto weyama le nde. Bible mbutaka ɔnɛ: “[Jehowa] atukaka ashu andi lu kete tshe, dia nsukela waku weli la etema tshe le ndi.” (2 Ek. 16:9) Diakɔ diele, sho koka monga l’eshikikelo ɔnɛ kɛnɛ tshɛ kasalaso lo wahɔ wa Jehowa la “nkum’otema ka pudipudi” keema anyanya.—1 Tim. 1:5; 1 Kɔr. 15:58.
14. Naa yoho y’ɔtɛmwɛlɔ yahetawɔ Jehowa?
14 Ekɔ nto ohomba mbeya ɔnɛ Jehowa hetawɔ ɔtɛmwɛlɔ wa dungi pende. Lam’ele “[Jehowa] atukaka ashu andi lu kete tshe,” nde koka mbishola wanɛ wele etema awɔ bu “tshe le ndi.” Tukedi 3:32 mbutaka ɔnɛ: “[Jehowa] atukaka antu wa kolo wononyi,” mbuta ate wanɛ washɛ weho w’anto wewɔ mɛtɛ lo mɛnya dia vɔ wekɔ anto w’ɛlɔlɔ, koko salaka pɛkato lo woshɛshɛ. Kaanga mbele onto lasala pɛkato lo woshɛshɛ koka nkesa anto akina lo tshanda mɔtshi, sho mbeyaka dia Jehowa kanga wolo ndo losembwe toshikikɛka dia “one latusheka kolo yandi, hatongonaka.”—Tuk. 28:13; adia 1 Timɔte 5:24; Hɛbɛru 4:13.
15. Kakɔna kahombaso mbewɔ ndo lande na?
15 Efula k’ekambi waki Jehowa ndjakimɔka l’otema ɔtɔi le nde. Paka lo payi mbakoka ose etshumanelo ɔmɔtshi ndjokoma lo ntɛmɔla Jehowa lo yoho yahandetawɔ. Koko, lam’ele dui sɔ diakasalema lo nshi ya Mɔsɛ ndo lo ntambe ka ntondo, diɔ koka salema kaanga nshi nyɛ. (2 Tim. 3:1, 5) Ko onde laasɔ, sho pombaka minya wɛkamu aso oma le asekaso Akristo ndo ndjambola dia mbeya kana wekɔ la kɔlamelo le Jehowa? Ndooko. Ayonga dui dia kɔlɔ naka sho ntatɛ kanɛ anangɛso l’akadiyɛso kɔlɔ. (Adia Rɔmɔ 14:10-12; 1 Kɔrɛtɔ 13:7.) Kɛnɛ koleki ele, naka sho monga la mbekelo ka mbidjaka taamu lo kɔlamelo y’ase etshumanelo, kete dui sɔ koka monga waale lo lonyuma laso shoamɛ.
16. a) Kakɔna kakoka ɔmɔmɔ la l’atei aso nsala diaha nde monga la dungi pende? b) Wetshelo akɔna wakokaso nkondja oma lo kiombo yele l’ɔtɛ a dui ɔnɛ: “ Nyotetemale ndjasɛdingola . . . nyotetemale mɛnya . . .”?
16 Okristo tshɛ pombaka “[nsɛdingola] etsha ande hita.” (Ngal. 6:4) L’ɔtɛ wa eongelo kaso k’anto wele keema kokele, ndjotokomɛka dia monga la mbekelo mɔtshi y’anto wele bu la kɔlamelo. (Hɛb. 3:12, 13) Diakɔ diele, mbala la mbala, sho pombaka sɛdingolaka ɛkɔkɔ watotshutshuya dia kambɛ Jehowa. Sho koka ndjambola ɔnɛ: ‘Onde lekɔ lo ntɛmɔla Jehowa la ngandji tshɛ ndo dimi mbetawɔka lowandji lande? Onde dimi mbikaka washo lo ɛtshɔkɔ wakombolami ndjɔngɛnangɛna la wɔ lo Paradiso?’ (Ɛny. 4:11) Sho tshɛ koka nkondja wahɔ lo sɛdingolaka etsha aso ndo lo minya oseka vuiwui tshɛ yakoka ndjotokonya lo monga la dungi pende.
KƆLAMELO MBELAKA ƆNGƐNƆNGƐNƆ
17, 18. Lande na kahombaso ntɛmɔla Jehowa lo mɛtɛ ndo monga la kɔlamelo?
17 Oko wasalaso la wolo dia ntɛmɔla Nzambi lo mɛtɛ ndo monga la kɔlamelo, sho kondjaka etombelo w’ɛlɔlɔ efula. Omembi w’esambo akafunde ɔnɛ: “Untu laha l’unungu la ntundu ka [Jehowa], ndu laha la lukesu l’utema andi, eli la otshoko.” (Osam. 32:2) Wanɛ wasala diaha monga la dungi pende, wekɔ l’ɔngɛnɔngɛnɔ ndo wayoyokondja ɔngɛnɔngɛnɔ wa pondjo lo nshi yayaye.
18 L’etena kakandashikikɛ, Jehowa ayotondja sɛkɛ wanɛ tshɛ wasala awui wa kɔlɔ kana wasɛna lɔsɛnɔ la dungi pende lo mɛnya “[otshikitanu lam’asa] untu ololo la untu a kolo, one latotemolaka [Nzambi] la one lahatôtemolaka.” (Mal. 3:18) L’etena kasɛnaso kɛnɛ, ekɔ ohomba mbeya ɔnɛ “washo wa Jehowa wekɔ le anto w’ɛlɔlɔ ndo atoyi ande pokamɛka ɛsɛngɔsɛngɔ awɔ.”—1 Pet. 3:12.
^ od. 8 Ɛtɛkɛta wele lo Ɛnyɛlɔ 21:14 wakayofundamaka ɛnɔnyi akumi l’ɔkɔngɔ wa Pɔɔlɔ fundɛ Timɔte mikanda, tɛkɛtaka ‘di’ave w’ehikamelo’ 12 wofundami nkombo y’apɔstɔlɔ 12.
^ od. 12 Sawo diayela mɛnyaka woho wakokaso mbokoya Jehowa lo mpetsha akambo wa kɔlɔ.
