«Lakgapaskgoy nkimPuchinakan wa nti ntapakgsinikgoy»
«Lapi wi nti mpaxkiy Dios, [...] Dios [lakgapasa].» (1 COR. 8:3)
1. Kawanti pulaktum nema limasiya la xakstukan taʼakgskgawikgonit makgapitsi kskujnanin Dios (kaʼakxilhti xapulana dibujo).
AARÓN, xapuxku sacerdote, xya ama tsisa kxlakatin niku laktanukan kxtabernáculo Jehová chu xchipanit pumajinin. Anta lakatsu, Coré chu 250 lakchixkuwin na klhkuyunimakgo incienso Jehová, xputumkan xchipakgonit xpumajininkan (Núm. 16:16-18). Xtasiya pi xputumkan kskujnin Jehová xwankgonit tiku ni makgxtakgkgo. Pero Coré chu tiku xtatayakgo, laktlankajwa xwankgonit, xlakatsalakgo limapakgsin, kaj xtlawaputunkgo tuku xlakaskinkgo chu sacerdote xlitaxtuputunkgo xlakgxokgo Aarón (Núm. 16:1-11). Akstu xkaʼakgskgawikanit, xlakpuwankgo pi Dios xʼama makgamakglhtinan xtakakninkan. Pero tuku xlakaskinkgo, lu nitlan xakxilha Jehová tiku tlan akxilha naku chu xkatsi pi kaj xlimasiyamakgo pi xkakninanikgo (Jer. 17:10).
2. 1) ¿Tuku xwanit Moisés pi xʼama la? 2) ¿La kgantaxtulh tuku wa Moisés?
2 Xalikgotana, Moisés xwanit: «Chali tsisa, Jehová nawan tiku tapakgsini» (Núm. 16:5). Chuna la Moisés xwanit, liwana litasiyalh tiku xlikana kskujnani chu tiku kaj xlimasiyakgo. ¿La litasiyalh? «Jehová makamincha lhkuyat chu kalhkuyulh [Coré chu] akgtiy ciento tipuxamakaw lakchixkuwin tiku xmastamakgo incienso» (Núm. 16:35; 26:10). Pero Jehová ni makgnilh Aarón, chuna limasiyalh pi wa sacerdote tiku xla tlan xakxilha chu xlilakgapasa la xaxlikana kskujni (kalikgalhtawakga 1 Corintios 8:3).
3. 1) ¿Tuku lalh kxkilhtamaku apóstol Pablo? 2) ¿Tuku kinkamasiyaniyan xlakata Jehová tuku katlawanilh Coré chu tiku ni kgalhakgaxmatkgolh?
3 Titaxtulh akgtum mil akgkitsis ciento kata, kxkilhtamaku apóstol Pablo, wi tuku lalh xtachuna tuku aku lichuwinaw. Makgapitsi lakchixkuwin tiku xkalilakgapaskan kstalaninanin Cristo tsukukgolh masiyakgo tuku ni xaxlikana tamasiy, pero antiya xmakgtapakgsikgo kcongregación. Maski xtasiya pi xtachuna xwankgonit la amakgapitsi kstalaninanin Cristo, tuku ni xaxlikana xmasiyamakgo kalipekua xwili xtakanajlakan amakgapitsin. Xlitaxtukgo la lobos nema lilhakganankgonit xmakgxuwa borrego chu xmaxlajwanimakgo «xtakanajlakan amakgapitsin» (2 Tim. 2:16-18). Pero Pablo, tiku xkatsi tuku xtlawakgonit Coré chu tiku xtatayakgo, xkatsi pi Jehová ni litaʼakgskgawi tuku kaj tasiya. Kaʼakxilhwi tuku lu xlakaskinka wanilh Timoteo chu tuku kinkamasiyaniyan.
«AKIT JEHOVÁ; NI KTALAKGPALINIT»
4. 1) ¿Tuku liwana xkatsi Pablo? 2) ¿Tukuya tachuwin maklakaskilh Pablo xlakata xwa tuku liwana xkatsi?
4 Pablo liwana xkatsi pi Jehová tlan akxilha tiku xlikana xkakninanikgo chu tiku kaj xlimasiyakgo. Wa xlakata laksakli tachuwin nema tsokgli akxni malakgachanilh carta Timoteo. Akxni xlichuwinanita tuku nitlan xkatlawanimakgolh kxtakanajlakan natalan, tiku xmakgxtakgkgonit xaxlikana takanajla chu xlakatayakgo, Pablo wa: «Wampi wa xtankgaxekga Dios, lu[...] tliwakglh wi, sampi kgalhiy xliukxilhtit wa ntu limalulokga [o sello], wa cha yuma ntu nama wan: “Lakgapaskgoy nkimPuchinakan wa nti ntapakgsinikgoy”, chu na wan: “Katamakgatlinikgolh ntalakgalhin xlipaks wa nti [mapakuwi xtukuwani Jehová]”» (2 Tim. 2:18, 19).
5, 6. 1) ¿Tuku xlakata lu xlakaskinka pi Pablo limaklakaskilh tachuwin «xtankgaxekga Dios, lu[...] tliwakglh wi»? 2) ¿La makgtayalh Timoteo tachuwin nema Pablo maklakaskilh?
5 ¿Tuku xlakata lu xlakaskinka tachuwin nema laksakli Pablo akxni tsokgli tuku lichuwinamaw? Pi kaj watiya uma tatsokgni xalak Biblia limaklakaskin tachuwin «xtankgaxekga Dios, lu[...] tliwakglh wi». Biblia pulaklhuwa la limaklakaskin tachuwin tankgaxekga, akgtum liʼakxilhtit, wa akxni lichuwinan kachikin Jerusalén niku xtapakgsi xamakgan Israel o tuku Jesús lakgaya xlakata nakgantaxtu tuku Dios lakapastaknit natlawa (Sal. 87:1, 2; 1 Cor. 3:11; 1 Ped. 2:6). Wa xlakata, ¿tuku xkilhchanima Pablo akxni limaklakaskilh tachuwin «xtankgaxekga Dios, lu[...] tliwakglh wi»?
6 Apóstol limaklakaskilh uma tachuwin akxnitiya xlichuwinama tuku Moisés lichuwinalh xlakata Coré chu tiku xtatayakgo nema tatsokgtawilanit kNúmeros 16:5. Xlichuwinama tuku lalh kxkilhtamaku Moisés, xlakata xlimakgpuwantinilh Timoteo chu xmalakapastakama pi Jehová kalakgapasa tiku ni kgalhakgaxmatkgo chu ni katimastalh talakaskin natlawakgo tuku lakaskinkgo. Chuna la Coré nila laktlawalh xtalakaskin Dios, tiku xmakgxtakgkgonit xaxlikana takanajla nema xwilakgo kcongregación na nila xlaktlawakgolh xtalakaskin Dios. Pablo ni lichuwinalh putum tuku xwamputun tachuwin «xtankgaxekga Dios, lu[...] tliwakglh wi». Pero xtachuwin xlikana makgtayalh Timoteo nakanajla chu nalipawan pi Jehová putum kilhtamaku tlawa chuna la xlilat.
7. ¿Tuku xlakata liwana katsiyaw pi Jehová putum kilhtamaku natlawa tuku xaʼakgstitum chu nawan tuku xaxlikana?
7 Xtastakyaw Jehová nikxni talakgpali. Salmo 33:11 wan: «Tu lakpuwanit natlawa kintikukan Dios, kanikxniwa tayanij; tu tlawaputun ixnaku namakgantaxti nak ixlatamatkan lakchixkuwin, lata [latamatilhakgo]». Atanu textos xalak Biblia lichuwinankgo pi la mapakgsinan Jehová, xtapaxkit nema ni makgxtakgnan, tuku akgstitum tlawa chu xaxlikana tuku wan, kanikxniwa makgapala (Éx. 15:18; Sal. 106:1; 111:3; 117:2). Malaquías 3:6 wan: «Akit Jehová; ni ktalakgpalinit». Chu Santiago 1:17 liwana kinkawaniyan pi «ni ukxni talakgpaliy ni mpala tsinu».
SELLO NEMA TLAWA PI TLAKG NAKANAJLANIYAW JEHOVÁ
8, 9. ¿Tuku kinkamasiyaniyan sello nema lichuwinalh Pablo kxliʼakxilhtit?
8 Tuku Pablo lichuwinan 2 Timoteo 2:19, wa xlakata akgtum tankgaxekga nema kgalhi akgtum tamakatsinin nema lhkawilikanit la lilhkawilikan sello. Makgasa xtalismani pi xtankgaxekga o niku xlitiju akgtum lanka chiki xwilinika akgtum tatsokgni, max xlakata nakatsikan tiku xtlawanit o tiku xtapakgsini. Pablo wa pulana limaklakaskilh uma liʼakxilhtit akxni tsokgli Biblia. * Sello nema talhkatawilanit «[k]xtankgaxekga Dios, lu[...] tliwakglh wi» limin pulaktiy tamakatsin. Xapulana wa «Lakgapaskgoy nkimPuchinakan wa nti ntapakgsinikgoy», chu xlipulaktiy, «Katamakgatlinikgolh ntalakgalhin xlipaks wa nti [mapakuwi xtukuwani Jehová]». Uma kinkamalakapastakayan tuku likgalhtawakgayaw kNúmeros 16:5 (kalikgalhtawakga).
9 ¿Tuku kinkamasiyaniyan sello, o tamakatsin nema lhkawilikanit, nema lichuwinalh Pablo kxliʼakxilhtit? Pi xpalakatakan tiku tapakgsinikgo Dios, xtastakyaw chu xlimapakgsin Dios pulaktiy lu xlakaskinka niku takilhti: 1) Jehová kapaxki tiku ni makgxtakgkgo chu 2) Jehová ni akxilhputun tuku ni xaʼakgstitum. ¿Tuku xlakata akxtum natalichuwinanaw uma tuku aku lichuwinaw chu tiku makgxtakgkgonit xaxlikana takanajla nema wilakgo kcongregación?
10. ¿La xmakgkatsikgo kstalaninanin Cristo tiku ni xmakgatsankgananikgo Dios xlakata tuku xtlawakgo tiku xmakgxtakgkgonit xaxlikana takanajla?
10 Xlikana pi Timoteo chu amakgapitsi kstalaninanin Cristo tiku ni xmakgatsankgananikgo Jehová xlilakgaputsamakgo tuku xtlawamakgo tiku xmakgxtakgkgonit xaxlikana takanajla chu xlakatayakgo. Max makgapitsi ni xʼakgatekgskgo tuku xlakata xkamaxkikan talakaskin antiya xtapakgsikgolh kcongregación. Max asta akstu xkakgalhskinkan komo Jehová xlikana xakxilha pi xlakan ni xmakgatsankgananikgo chu tiku xmakgxtakgkgonit xaxlikana takanajla kaj xlimasiyakgo pi xkakninanikgo (Hech. 20:29, 30).
Timoteo ni chuna likatsilh la xlikatsikgo tiku xmakgxtakgkgonit xaxlikana takanajla (Kaʼakxilhti párrafos 10 asta 12)
11, 12. ¿Tuku xlakata matliwakglhli xtakanajla Timoteo carta nema malakgachanilh Pablo?
11 Carta nema malakgachalh Pablo, xlikana lu matliwakglhli xtakanajla Timoteo, xlakata malakapastakalh pi Jehová kamalakgsputulh Coré chu tiku xtatayakgo xlakata ni xlikana xkakninanikgo. Chuna limasiyalh pi xkalakgmakganit. Pero xlimasiyanit pi tlan xakxilha Aarón tiku ni xmakgatsankganani. Apóstol wa pi maski kcongregación xtawilakgolh ni xaxlikana kstalaninanin Cristo, Jehová xʼama limasiya tiku xlikana xtapakgsinikgo chu tiku ni, chuna la tlawalh kxkilhtamaku Moisés.
12 Jehová nikxni talakgpali, tlan nalipawanaw. Xla ni akxilhputun tuku ni xaʼakgstitum chu akxni nachan kilhtamaku, nakamalakgaxokge lakgalhinanin tiku ni makgxtakgkgo tuku nitlan tlawamakgo. Chu xlakata Timoteo xmapakuwi xtukuwani Jehová, Pablo na malakapastakalh pi xlitamakgatlinit xwanit “talakgalhin”, xlakgaya nalakgmakgan nixatlan xtayatkan nixaxlikana kstalaninanin Cristo. *
JEHOVÁ KASIKULUNATLAWA TIKU XLIKANA KAKNINANIKGO
13. ¿Tuku katsiyaw pi tlawa Jehová?
13 Akinin na tlan nalitatliwakglhaw tachuwin nema Dios matsokgnilh Pablo. Xlipulaktum, kinkamakgpuwantiniyan xlakata katsiyaw pi Jehová akxilha pi ni makgxtakgaw. Ni kajwatiya katsi tiku tapakgsiniyaw, wata lu xlikana kinkapaxkiyan. Biblia wan pi «Jehová lakputsama xlikalanka katiyatni xlakata nalimaklakaskin xlitliwakga xlakata nakalimakgtaya tiku xliputum xnaku skujnanikgo» (2 Crón. 16:9). Wa xlakata, tlan nalipawanaw pi tuku tlawayaw xpalakata Jehová, nema «ntsukuy kxachakgani [kinakujkan]», tlan nakitaxtu, xlakata putum kilhtamaku kinkasikulunatlawayan (1 Tim. 1:5; 1 Cor. 15:58).
14. ¿Tukuya takaknin ni makgamakglhtinan Jehová?
14 Xlipulaktiy, tuku wa Pablo kinkamalakapastakayan pi Jehová ni makgamakglhtinan takaknin nema kaj litasiya pero ni xlikana. Xlakata xlakgastapu «lakputsama xlikalanka katiyatni», xla liwana kaʼakxilha tiku ni xliputum xnaku kakninanikgo. Proverbios 3:32 wan pi Jehová ni akxilhputun «tiku kaj limasiya pero ni xlikana tlan xtayat», tiku limasiya pi kgalhakgaxmatninan pero tsekg tlawa talakgalhin. Maski uma chixku max tlan nakaʼakgskgawi amakgapitsin, xlitliwakga chu tuku xaʼakgstitum tlawa Jehová kinkamasiyaniyan pi «tiku matsekga xtalakgalhin nitlan kitaxtuniyacha» (Prov. 28:13; kalikgalhtawakga 1 Timoteo 5:24 chu Hebreos 4:13).
15. ¿Tuku ni kilitlawatkan, chu tuku xlakata?
15 Tlakg lhuwa kskujnin Jehová xaxlikana kakninanikgo. Kaj min kilhtamaku wi tiku makgtapakgsi kxkachikin Dios lakkaxwili nalimasiya pi kakninani pero ni xlikana. Pero, xlakata chuna lalh kxkilhtamaku Moisés chu akxni aku xtsukunit congregación kxapulana siglo, la uku max na wi tiku chuna natlawa (2 Tim. 3:1, 5). Pero, ¿wamputun uma pi xlilat natsukuyaw nitlan kalakpuwaniyaw kinatalankan, chu nalakpuwanaw pi makgatsakgananimakgo Jehová? ¡Ni! Ni xlilat natsukuyaw nitlan kalakpuwaniyaw komo nitu litasiya pi tlawama tuku nitlan (kalikgalhtawakga Romanos 14:10-12 chu 1 Corintios 13:7). Komo lismaniyaw nitlan nakalakpuwaniyaw kinatalankan, uma natlawa nialh tlan natalalinaw Jehová.
16. 1) ¿Tuku kilitlawatkan xlakata kinakujkan ni kaj nalimasiya pi kakninani Jehová pero ni xlikana? 2) ¿Tuku kinkamasiyaniyan recuadro « Chuntiya kakaliʼakxilhkantit»?
16 Chatunu kstalanina Cristo xliʼakxilhat «xtatlaw» (Gál. 6:4). Putum akinin makglakgalhinanin. Wa xlakata, putum akinin max nipara katikatsiw akxni nialh xaxlikana nakakninaniyaw Dios (Heb. 3:12, 13). Wa xlakata, ni xlititaxtut lhuwa kilhtamaku, kiliʼakxilhatkan tuku wi kkinakujkan. Tlan akstu nakinkakgalhskinkanan: «¿Kkakninani Jehová xlakata kpaxki chu kkatsi pi wa lakgchan namapakgsinan? ¿O tlakg xlakaskinka kakxilha tasikulunalin tuku tlan naklipaxuwa kParaíso?» (Apoc. 4:11). Komo kalilakpuwanaw umakgolh takgalhskinin ni namastayaw talakaskin pi kinakujkan nalimasiya pi kakninanimaw Jehová pero ni xlikana.
AKXNI NI MAKGXTAKGAW DIOS PAXUWAYAW
17, 18. ¿Tuku xlakata xliputum kinakujkan nakakninaniyaw Jehová?
17 Akxni xaxlikana kakninanikan Dios limin lhuwa tasikulunalin. Anta kSalmo 32:2 likgalhtawakgayaw: «Snun paxawa lama nama chixku ti Dios ni liyawa ixtalakgalhin, ti nak ixtapuwan ni lakgaskgawinan, [wata wani] Dios tu nitlan tlawanit». Xlikana, tiku ni kaj limasiya, wata xlikana kakninani Dios xliputum xnaku, tlakg paxuwa la uku chu kkilhtamaku nema aku mima, tlakg nakgalhi xaxlikana tapaxuwan.
18 Akxni nalakgchan kilhtamaku, kinTlatkan xalak akgapun namasiya tiku kaj limasiyakgo pi kakninanikgo chu putum tiku lismanikgo tlawakgo tuku nitlan. Ama kilhtamaku liwana natasiya pi ni lakxtum «tiku tlan likatsi chu tiku lixkajni likatsi, tiku lakskujnani Dios chu tiku ni a lakskujnani» (Mal. 3:18). Pero xlakata nina chan uma kilhtamaku, kinkamatliwakglhan xlakata katsiyaw pi Jehová «kgayaj lakanikgoy wanti ntlan ntu ntlawakgoy, chu na akgaskgalalh kgaxmatnikgoy xʼoracionkan» (1 Ped. 3:12).
^ párr. 8 Apocalipsis [Revelación] 21:14, Hua Xasasti Talaccaxlan, 1999, nema tsokgka lhuwa kata alistalh akxni Pablo xtsokgnita cartas nema malakgachanilh Timoteo, lichuwinan «xtankgaxekga xla akgkutuy laktitlanka chiwix» niku kalhkawilikanit xtukuwanikan kgalhkutiy apóstoles.
^ párr. 12 Kʼartículo nema aku mima nakatsiyaw la tlan natlawayaw la Jehová chu nalakgmakganaw tuku ni xaʼakgstitum.
