1. Kolim wanpela stori bilong Baibel we i soim klia olsem wanpela kain tingting giaman i bin pundaunim sampela man long lain bilong God. (Lukim piksa long kirap bilong stadi.)

 WANPELA moning, Hetpris Aron i sanap long dua bilong haus lotu sel bilong Jehova na em i holim plet bilong kukim paura i gat gutpela smel. Kora na 250 man i sanap klostu long em, na ol tu i holim plet bilong kukim paura i gat gutpela smel na ol i kukim paura olsem ofa i go long Jehova. (Nam. 16:16-18) Long ai bilong ol man, i luk olsem olgeta dispela man i stap gut long lotuim Jehova. Tasol ol dispela narapela man i no wankain olsem Aron, long wanem, ol i gat pasin antap na ol i laik mekim ol yet i kamap pris. (Nam. 16:1-11) Ol i giamanim ol yet na ting olsem God bai orait long wok lotu bilong ol. Tasol Jehova inap lukim tingting i stap long bel bilong ol na luksave long pasin giaman bilong ol, olsem na em i no orait long wok lotu bilong ol.—Jer. 17:10.

2. Moses i bin tok profet long wanem samting? Tok bilong em i kamap tru, o nogat?

² Long de paslain, i stret Moses i bin tok olsem: “Tumora long moningtaim Bikpela bai i soim yumi husat ol man i bilong em.” (Nam. 16:5) Jehova i truim tok bilong em na soim klia husat ol man i bihainim stretpela pasin na husat ol man i bihainim pasin giaman, na em “i salim paia i kam na i kukim [Kora na] dispela 250 man i mekim ofa  bilong kamapim smok i gat gutpela smel.” (Nam. 16:35; 26:10) Jehova i lukautim laip bilong Aron na long dispela rot em i soim olsem em i orait long Aron i mekim wok pris na lotuim God.—Ritim 1 Korin 8:3.

3. (a) Wanem hevi i bin kamap long taim bilong aposel Pol? (b) Planti handret yia i go pinis, Jehova i bin mekim wanem na dispela i stap olsem piksa bilong samting bai painim ol bikhetman?

³ Wankain samting i bin kamap 1 tausen 5 handret yia bihain, long taim bilong aposel Pol. Sampela man husat i kolim ol yet olsem Kristen, ol i kisim ol bilip giaman, tasol ol i bung yet wantaim kongrigesen. Long ai bilong ol man, i luk olsem ol dispela apostet i wankain olsem ol narapela long kongrigesen. Tasol pasin apostet bilong ol inap bagarapim bilip bilong ol Kristen. Ol dispela wulf i pasim skin bilong sipsip na ol i “wok long bagarapim bilip bilong sampela.” (2 Tim. 2:16-18) Tasol Jehova i no save lukluk nating, na ating Pol i save long dispela, long wanem, em i save long olsem wanem God i bin givim strafe long ol bikhetman long bipo, em Kora na lain bilong em. Orait nau yumi bai skelim wanpela tok bilong Baibel na luksave long ol skul yumi inap kisim long en.

4. Pol i bilip tru long wanem samting? Olsem wanem em i soim klia dispela bilip bilong em long Timoti?

⁴ Pol i save olsem Jehova inap luksave long ol man i bihainim pasin giaman long lotuim em, na tu, Pol i bilip tru olsem Jehova inap luksave long ol man i bihainim tok bilong Em. Olsem na taim holi spirit i kirapim em long raitim pas i go long Timoti, em i bin skelim gut ol tok em bai yusim. Pol i tokaut olsem ol apostet i wok long bagarapim bilip bilong sampela long kongrigesen, na bihain em i tok: “God i planim pinis strongpela pos, na dispela pos i stap strong na i gat hap rait long en olsem: ‘Jehova i save gut long ol manmeri bilong em yet,’ na ‘Olgeta man i singaut long nem bilong Jehova ol i mas givim baksait long ol pasin i no stret.’”—2 Tim. 2:18, 19.

5, 6. Taim Pol i tok, “God i planim pinis strongpela pos,” wanem samting i narapela kain long dispela tok? Ating dispela hap tok i bin mekim wanem long Timoti?

⁵ Wanem samting i narapela kain long ol tok Pol i bin yusim long dispela skripsa? Dispela skripsa tasol i kolim dispela hap tok, “God i planim pinis strongpela pos.” Baibel i yusim dispela hap tok, “strongpela pos,” olsem tok piksa bilong makim kain kain samting. Olsem, em i yusim dispela hap tok olsem tok piksa bilong makim kongrigesen. (1 Tim. 3:15) Na tu, taim Baibel i stori long wok em Jisas i mekim bilong kamapim samting Jehova i tingting pinis long mekim, em i kolim ol hap tok olsem “as bilong haus” na “as ston bilong kona bilong haus.” (1 Kor. 3:11; 1 Pita 2:6) Pol i tingim wanem samting taim em i tok olsem “God i planim pinis strongpela pos”?

⁶ Long wankain ves we Pol i mekim dispela tok olsem “God i planim pinis strongpela pos,” em i kolim tu hap tok em Moses i bin mekim long Kora na lain bilong em, olsem i stap long Namba 16:5. I luk olsem Pol i tingim ol samting i bin kamap long taim bilong Moses, long wanem, em i laik strongim Timoti na kirapim em long tingim olsem Jehova inap luksave na daunim ol man i bihainim pasin bikhet. Planti handret yia i go pinis, Kora i no inap pasim Jehova long kamapim samting Em i tingting pinis long mekim, na olsem tasol, ol apostet long kongrigesen i no inap long mekim olsem. Pol i no stori long mining bilong dispela hap tok olsem “God i planim pinis strongpela pos.” Tasol yumi ken bilip olsem dispela hap tok i bin strongim Timoti long trastim na bilip tru long pasin bilong Jehova long mekim wok.

7. Bilong wanem yumi ken bilip olsem Jehova bai mekim stretpela pasin na inapim tok bilong em?

⁷ Ol stiatok bilong Jehova i no save senis. Song 33:11 i tok: “Taim Bikpela i tok long mekim wanpela samting, orait tok bilong en i stap strong oltaim. Em i tingting long mekim wanpela samting, na dispela tingting i stap oltaim oltaim.” Ol narapela skripsa i stori long wok king bilong Jehova, pasin bilong em long laikim ol wokman bilong em, em i save mekim stretpela pasin, na bihainim  tok bilong em oltaim. (Kis. 15:18; Sng. 106:1; 112:9; 117:2) Malakai 3:6 i tok: “Mi tasol mi Bikpela na mi no save senisim tingting bilong mi.” Na tu, Jems 1:17 i tok olsem Jehova “i no save senis senis olsem sedo i save senis senis.”

8, 9. Yumi inap kisim wanem skul long “hap rait” Pol i kolim long tok piksa?

⁸ Tok piksa bilong Pol long 2 Timoti 2:19 i kirapim yumi long piksaim strongpela pos, olsem as ston bilong haus, i gat hap rait i stap antap long en. Long taim bipo, ol man i save raitim wanpela hap tok long strongpela pos bilong haus, na ating dispela i tokaut long husat i wokim dispela haus na haus em i papa bilong dispela haus. Namel long ol man i bin raitim Baibel, Pol em namba 1 man long yusim dispela tok piksa. a I gat hap rait i stap long dispela “strongpela pos,” na em i gat 2-pela tokaut. Namba 1: “Jehova i save gut long ol manmeri bilong em yet.” Namba 2: “Olgeta man i singaut long nem bilong Jehova ol i mas givim baksait long ol pasin i no stret.” Dispela i kirapim yumi long tingim tok i stap long Namba 16:5.—Ritim.

⁹ Yumi inap kisim wanem skul long “hap rait” Pol i kolim long tok piksa? Ol manmeri bilong God i save olsem ol lo na ol stiatok bilong Jehova i kamapim 2-pela bikpela tok i tru: (1) Jehova i laikim ol man husat i stap gut long em, na (2) Jehova i heitim ol man husat i no bihainim stretpela pasin. Olsem wanem dispela skul inap stiaim tingting yumi holim long pasin apostet insait long kongrigesen?

10. Long taim bilong Pol, ol bilipman i bin pilim olsem wanem long pasin bilong ol apostet?

¹⁰ Ating Timoti na ol arapela bilipman i no amamas long pasin ol apostet i mekim insait long kongrigesen. Ating sampela Kristen i tingting planti long wai na ol dispela man i stap yet long kongrigesen. Ol bilipman i laik save olsem Jehova i luksave long pasin bilong ol long stap gut long em na pasin giaman bilong ol apostet, o nogat.—Apo. 20:29, 30.

11, 12. Olsem wanem pas bilong Pol i strongim bilip bilong Timoti?

¹¹ Pas bilong Pol i bin strongim bilip bilong Timoti bikos em i kirapim Timoti long tingim gen samting i bin kamap taim God i stretim gutnem bilong Aron na kamapim klia pasin giaman bilong Kora na lain bilong em, na em i sakim ol na bagarapim ol. Tok bilong Pol i makim olsem maski i gat ol giaman Kristen i stap namel long ol, Jehova bai luksave long husat ol i manmeri bilong em, wankain olsem em i bin mekim long taim bilong Moses.

¹² Pasin bilong Jehova i no save senis, olsem  na yumi inap bilip tru long em. Em i heitim ol man i no save bihainim stretpela pasin, na em bai givim strafe long ol man i mekim rong na ol i no tanim bel. Timoti “i singaut long nem bilong Jehova,” na tok bilong Pol i kirapim em long tingim olsem em yet i gat wok long sakim pasin nogut bilong ol giaman Kristen. b

13. Yumi inap bilip tru long wanem samting?

¹³ Tok bilong Pol inap strongim bilip bilong yumi tu. Yumi amamas long save olsem Jehova i luksave long pasin bilong yumi long stap gut long em. Dispela i makim olsem Jehova i tingim tru ol manmeri bilong em. Baibel i tok: “Ai bilong Jehova i save lukluk long ol manmeri i stap long olgeta hap bilong graun bilong helpim na strongim ol man i givim bel olgeta long em.” (2 Sto. 16:9, NW) Olsem na yumi ken bilip tru olsem sapos yumi gat “klinpela bel” na mekim wok bilong Jehova, wok bilong yumi i no inap lus nating.—1 Tim. 1:5; 1 Kor. 15:58.

14. Jehova i heitim tru ol man i bihainim wanem kain pasin na lotuim em?

¹⁴ Yumi amamas tu long save olsem Jehova i heitim tru ol man husat i bihainim pasin giaman na lotuim em. “Ai bilong Jehova i save lukluk long ol manmeri i stap long olgeta hap bilong graun,” olsem na em inap luksave long ol manmeri em ol i no “givim bel olgeta long em.” Sindaun 6:16, 17 i tok Jehova “i no laikim tru ol man i . . . mekim tok giaman,” kain olsem ol man husat i giaman long bihainim tok, tasol tru tru ol i wok long mekim sin long pasin hait. Wanpela man inap giamanim tru ol narapela inap sotpela haptaim, tasol Jehova i gat olgeta strong na em i save mekim stretpela pasin, olsem na yumi ken bilip tru olsem “sapos man i ting long haitim sin bilong en, orait em i no inap i stap gut.”—Snd. 28:13; ritim 1 Timoti 5:24; Hibru 4:13.

15. Yumi mas abrusim wanem kain pasin? Bilong wanem?

¹⁵ Planti manmeri long lain bilong Jehova i givim bel tru long lotuim em. Olsem na i no gat wanpela long kongrigesen inap bihainim pasin giaman long lotuim God. Tasol dispela hevi i bin kamap long taim bilong Moses na long taim bilong ol Kristen bilong pastaim, olsem na wankain hevi inap kamap tu long nau. (2 Tim. 3:1, 5) Tasol yu ting yumi mas saspek nating long ol wanbilip Kristen na kisim 2-pela tingting long ol olsem ol i stap gut long Jehova, o nogat? Nogat, yumi no ken mekim olsem! I no stret long saspek nating long ol bratasista bilong yumi. (Ritim Rom 14:10-12; 1 Korin 13:7.) Sapos yumi holim 2-pela tingting long ol bratasista, dispela inap bagarapim pasin bilong yumi long pas gut wantaim God.

16. (a) Yumi olgeta wan wan i ken mekim wanem long rausim pasin giaman long bel bilong yumi? (b) Yumi inap kisim wanem ol skul long blok “ Oltaim Yupela i Mas Skelim Yupela Yet”?

¹⁶ Olgeta wan wan Kristen i mas “skelim wok bilong ol yet.” (Gal. 6:4) Laik bilong mekim sin i stap long yumi, olsem na yumi inap bihainim ol pasin i no stret. (Hib. 3:12, 13) Olsem na olgeta taim yumi mas skelim astingting bilong yumi long mekim wok bilong Jehova. Yumi ken askim yumi yet olsem: ‘Mi lotuim Jehova, long wanem, mi laikim em tru na mi soim rispek long em olsem nambawan bos? O mi tingting tasol long ol blesing mi bai kisim long Paradais?’ (Rev. 4:11) Taim yumi skelim ol pasin bilong yumi yet na rausim olgeta liklik pasin giaman long bel bilong yumi, dispela bai helpim yumi.

17, 18. Bilong wanem yumi mas stap gut long lotuim Jehova?

¹⁷ Taim yumi wok strong long stap gut long lotuim God, yumi bai kisim planti blesing. Man bilong raitim song i tok: “Sapos Bikpela i tok olsem, dispela man i no gat rong nau, na dispela man i no save bihainim pasin giaman, orait dispela man i ken amamas.” (Sng. 32:2)  Yes, ol man husat i rausim pasin giaman long bel bilong ol, ol bai stap amamas tru long nau, na ol bai inap long stap amamas moa yet long bihain.

¹⁸ Jehova bai kamapim klia husat ol man i bihainim pasin nogut na pasin giaman, na ol arapela bai luksave olsem “stretpela man i narapela kain long man nogut, na man i mekim wok bilong God i narapela kain long man i no bin mekim wok bilong God.” (Mal. 3:18, NW) Long nau, yumi amamas long save olsem “ai bilong Jehova i save lukluk long ol stretpela man, na em i save putim yau long ol taim ol i beten strong long em.”—1 Pita 3:12.