1. Iseda tomadiho lalonai dahaka be mai anina bada?

 NEGA ta oi be ruma badana ta ai Iehova ena ladana idia torea oi itaia, a? Reana oi hoa bona oi moale. Oibe, ita be Iehova ena Witnes taudia dainai, eda tomadiho lalonai Dirava ena ladana be mai anina bada! Tanobada hegegemadai ita sibona be Iehova ena ladana ita gaukaralaia. To, Iena ena ladana ita abia dainai, eda kara amo ia ita hanamoa be namo.

2. Iehova ena ladana ita abia dainai, dahaka ita karaia be namo?

² Iehova ena lalonamo ita abia totona, iena ladana ita gaukaralaia sibona be hegeregere lasi. Namona be iena kara maoromaoro taravatudia ita badinaia danu. Unai dainai, Baibel ese ita ia hadibaia, Iehova ena taunimanima ese “dika do [idia] rakatania” be gau badana. (Sal. 34:14) Aposetolo Paulo be inai hakaua herevana ia gwauraia: “Iehova ena ladanai idia boiboi taudia ibounai ese kara dika idia dadaraia be namo.” (2 Timoteo 2:19 duahia.) Ita be Iehova ena Witnes taudia dainai, taunimanima ibounai idia diba ita be Iehova ena ladanai ita boiboi taudia. To, kara dika be edena bamona do ita dadaraia?

3, 4. Baibel idia diba bada taudia be edena Baibel siri idia daradaralaia, bona dahaka dainai?

³ Mani Paulo ena hereva 2 Timoteo 2:19 dekenai ita laloa. Unai siri be “Dirava ese ia haginia badina aukana” bona ia latanai idia noho toretore rua ia herevalaidia. Idia be: (1) “Iehova be ena taunimanima ia diba” bona unai be Numera 16:5 amo ia abia, (vanegai stadi itaia.) bona (2) “Iehova ena ladanai idia boiboi taudia ibounai ese kara dika idia dadaraia be namo.” Baibel idia diba bada taudia be unai toretore iharuana dekenai idia daradara. Dahaka dainai?

⁴ Toana be Paulo ese Heberu Toretoredia ena kahana ma ta amo unai hereva ia abia. To, Heberu Toretoredia lalonai Paulo ena hereva hegeregere sirina ta ia noho lasi. Vadaeni, Paulo ese inai hereva, “Iehova ena ladanai idia boiboi taudia ibounai ese kara dika idia dadaraia be namo” ia gwauraia neganai, ia be edena sivarai ia herevalaia? Unai hereva ia gwauraia murinai, Paulo be Numera karoa 16 ena hereva ta ia gwauraia. Unai karoa ese Kora ena gwau-edeede sivaraina ia herevalaia. Vadaeni, unai toretore iharuana be Kora ena gwau-edeede karana ia herevalaia danu, a?

5-7. Paulo be 2 Timoteo 2:19 ia torea neganai, edena sivarai ia herevalaia? (Laulau ginigunana itaia.)

⁵ Baibel ia gwau Eliaba ena natudia, Datana bona Abirama be Kora ena kahanai idia gini, bona Mose bona Arona idia gwau-edeede henidia. (Num. 16:1-5) Idia ese Mose idia gwauraia dika bona Dirava ese ia dekenai ia henia dagi idia matauraia lasi. Unai gwau-edeede taudia be Dirava ena taunimanima huanai idia noho, bona abidadama taudia edia gini goada karana idia hadikaia. Iehova ese auka lasi oda ta ia henia, unai amo ia idia badinaia taudia bona ia idia gwau-edeede henia taudia edia idau ia hahedinaraia.

⁶ Baibel ia gwau: “Lohiabada ese Mose ma ia hereva henia, ia gwau, ‘Taunimanima do oi hamaoroa, Kora, bona Datana bona Abirama edia palai ruma dekena amo do idia raka siri.’ Vadaeni Mose ia toreisi, Datana bona Abirama dekenai ia lao, Israela gunalaia taudia be Mose ena murinai idia raka. Mose ese hebou taudia ia hamaoroa, ia gwau, ‘Inai kara dika taudia edia palai ruma dekena amo do umui raka siri, bona edia gau ta do umui dogoatao lasi, idia edia dika dekena amo umui danu umui dika garina.’ Unai dainai idia be Kora bona Datana bona Abirama edia palai ruma dekena amo idia raka siri.” (Num. 16:23-27) Bena Iehova ese gwau-edeede taudia ibounai ia hamasea. To, ia idia badinaia taudia ibounai idia mauri, badina idia ese ‘kara dika idia dadaraia’ bona gwau-edeede taudia amo idia raka siri.

⁷ Timoteo Iharuana 2:19 ai Paulo ese inai hereva, “Iehova be ena taunimanima ia diba” ia gwauraia neganai, unai be Numera 16:5 amo ia abia. Bona ia gwau, “Iehova ena ladanai idia boiboi taudia ibounai ese kara dika idia dadaraia be namo” neganai, ia be Numera 16:23-27 ese ia gwauraia sivaraina ia herevalaia. Unai dainai, ita gwau diba unai toretore rua be Kora ena gwau-edeede sivaraina idia herevalaia. Vadaeni Paulo ena hereva amo dahaka ita diba? Ita diba gauna be inai: Iehova be taunimanima edia kudouna lalonai idia noho gaudia ia diba! Ia diba daidia be ia idia badinaia momokani, bona ia ura idia ese kara dika taudia amo do idia raka siri.

8. Dahaka dainai Iehova ena ladanai ita boiboi, o Keristani kongrigeisen lalonai ita noho sibona be hegeregere lasi?

⁸ Paulo be Mose ena negai idia vara gaudia ia herevalaia neganai, ia ura Timoteo ia hadibaia kara ta do ia karaia iena hetura karana Iehova ida ia gimaia totona. Mose ena negai Israela taudia be Iehova ena ladanai idia boiboi sibona be hegeregere lasi. Unai hegeregerena  Keristani taudia be kongrigeisen lalonai idia noho sibona be hegeregere lasi. Namona be abidadama taudia ese edia lalona idia hadaia kara dika do idia dadaraia. Timoteo dekenai unai ena anina be dahaka? Bona hari, Iehova ena taunimanima be Paulo ena sisiba amo dahaka idia diba?

9. Edena dala ai “kavakava bona anina lasi hepapahuahu” ese Keristani kongrigeisen ginigunana ia hadikaia?

⁹ Baibel ese sisiba ia henia Keristani taudia ese edena kara dikadia idia dadaraia totona. Hegeregere, 2 Timoteo 2:19 ai, Paulo ese Timoteo ia hamaoroa ‘hereva idauidau dainai do ia hepapahuahu lasi’ bona ‘anina lasi herevadia do ia dadaraia.’ (2 Timoteo 2:14, 16, 23 duahia.) Kongrigeisen lalonai haida be aposteit herevadia idia hadibaia. Danu, ma haida be hepapahuahu idia havaraia lalohadai idia gwauraidia. Ena be unai lalohadai be Baibel ena taravatu idia utua lasi, to kongrigeisen ena lalotamona karana idia hadikaia. Idia be hereva idauidau idia heailaia bona hepapahuahulaia dainai, kongrigeisen ena lalotamona idia hadikaia. Unai dainai, Paulo ese Timoteo ia sisiba henia, “kavakava bona anina lasi hepapahuahu [ia] dadaraidia” be namo.

10. Aposteit herevadia ita kamonai neganai, dahaka ita karaia be namo?

¹⁰ Hari, kongrigeisen lalodiai aposteit karadia idia vara momo lasi. To, herevana daika ese hahediba hereva koikoidia ia herevalaia, namona be ita dadaraia. Aonega karana be Intanet o dala ma ta ai aposteit taudia ida do ita hepapahuahu lasi. Ena be reana ita ura unai aposteit tauna ita durua, to bema ita hereva henia, ita be hari ita stadilaia Baibel ena sisiba ita utua. To, ita be Iehova ena taunimanima dainai, namona be aposteit karana ita dadaraia vaitani.

11. Dahaka dainai “anina lasi hepapahuahu” idia vara diba, bona edena dala ai elda taudia be haheitalai namona idia hahedinaraia diba?

¹¹ Aposteit karana sibona lasi, to gau ma haida ese kongrigeisen ena maino idia hadikaia diba. Hegeregere, moale karadia dekenai ta ta eda lalohadai be idauidau dainai, “kavakava bona anina lasi hepapahuahu” idia vara diba. To, bema ta be Iehova ena kara maoromaoro taravatudia ia utua moale karana ia karaia, Keristani elda taudia ese idia sisiba henia be namo. Namo lasi idia itaia sibona, badina idia laloa sisiba idia henia neganai, hepapahuahu do idia havaraia. (Sal. 11:5; Efe. 5:3-5) To, namo lasi elda taudia be sibodia edia lalohadai idia gwauraia. Namona be Baibel ena sisiba idia badinaia, ia gwau: “Dirava ena mamoe oreana, emui henari henunai idia noho be do umui naria. . . . Dirava ese umui dekenai ia henia taudia do umui biagua auka lasi, to mamoe oreana dekenai haheitalai namona do umui hahedinaraia.”—1 Pet. 5:2, 3; 2 Korinto 1:24 duahia.

12, 13. (a) Iehova ena Witnes taudia edia lalohadai moale karadia dekenai be dahaka, bona edena hakaua herevadia idia badinaia? (b) Paragraf 12 ai idia noho hakaua herevadia be edena gau ma haida dekenai ita badinaia diba?

¹² Iseda orea be muvi, vidio gadara, buka o ane idia sekea bena ita idia hamaoroa edena do ita dadaraia, a? Lasi. Dahaka dainai? Baibel ese taunimanima ta ta ia hagoadaia “edia darana idia gaukaralaia . . . unai amo maoro bona kerere edia idau idia dibaia diba.” (Heb. 5:14) Keristani tauna ta be moale karadia ia ura abia hidi neganai, Baibel ena hakaua herevadia ia badinaia be namo. Iseda mauri lalonai, gau iboudiai dekenai do ita “tahua namonamo noho edena gaudia be Lohiabada ese ia abia dae.” (Efe. 5:10) Baibel ia hahedinaraia ruma bese kwaradia be mai edia siahu, unai dainai idia ese ruma bese lalonai moale karadia haida idia taravatua diba. a—1 Kor. 11:3; Efe. 6:1-4.

¹³ Ataiai ita herevalaia Baibel ena hakaua herevadia be gau ma haida dekenai ita badinaia  diba danu. Hegeregere, iseda dabua, tauanina ena toana, helt, aniani bona gau ma haida dekenai eda lalohadai be idauidau dainai, hepapahuahu idia vara diba. To, bema Baibel ena hakaua hereva ta idia utua lasi, namo lasi unai gauna ita hepapahuahulaia. Baibel ia gwau: “Lohiabada ena igui hesiai tauna ia heai be anina lasi, to gau badana be taunimanima ibounai ia hebogahisi henia.”—2 Tim. 2:24.

14. Hebamo dikadia dadaraia karana ia herevalaia neganai, Paulo ese edena haheitalai ia gaukaralaia?

¹⁴ Edena dala ma ta ai “Iehova ena ladanai idia boiboi taudia ibounai ese kara dika idia dadaraia” diba? Idia ese kara dika idia karaia taudia idia bamoa lasi. Paulo be “Dirava ese ia haginia badina aukana” ena haheitalai ia herevalaia murinai, haheitalai ma ta ia gwauraia. Ia gwau: “Ruma badana ta lalonai, golo bona siliva urodia sibona idia noho lasi, to au bona raro urodia danu. Bona haida be mai anina bada gaukaradia totona, to haida be anina maragi totona idia gaukaralaia.” (2 Tim. 2:20, 21) Bena ia ese Keristani taudia ia sisiba henidia, unai “anina maragi” urodia amo do idia “noho daudau” o gini siri.

15, 16. “Ruma badana” ena haheitalai amo dahaka ita diba?

¹⁵ Unai haheitalai ena anina be dahaka? Paulo ia gwau Keristani kongrigeisen be “ruma badana ta” bamona, bona kongrigeisen lalonai idia noho taudia ta ta be ‘uro’ o ruma lalonai idia gaukaralaia kohudia bamona. Ruma ta lalonai idia noho ‘uro’ idia miro diba, bema idia lalonai miro o bodaga gauna ta ia noho. Ruma tauna ese unai bamona uro be uro namodia, hegeregere aniani nadua urodia amo do ia atoa siri.

¹⁶ Unai hegeregerena, hari Iehova ena taunimanima idia gaukara goada kara maoromaoro mauri dalana idia badinaia totona. Unai dainai, namona be kongrigeisen lalonai Iehova ena hakaua herevadia idia utua loulou taudia do ita bamoa lasi. (1 Korinto 15:33 duahia.)  Bema kongrigeisen lalonai hebamo dikana ita dadaraia be namo, vadaeni anina be kongrigeisen murimurinai hebamo dikana amo do ita “raka siri” be gau badana. Badina idia momo be ‘moni idia mataganigani henia, tamadia bona sinadia idia kamonai henia lasi, ma haida idia badinaia lasi, haida edia ladana idia hadikaia kava, idia dagedage, kara namodia idia ura henia lasi, edia turana idia samania, bona lebulebu karadia idauidau idia ura henia bada, to Dirava idia ura henia maragi’!—2 Tim. 3:1-5.

17. Dirava idia badinaia Israela taudia ese edena bamona idia hahedinaraia idia be kara dika idia dadaraia?

¹⁷ Baibel be Israela taudia ese “Kora, Datana bona Abirama edia palai rumadia amo [idia] raka siri” ena oda herevana idia badinaia karana ia herevalaia. Ia gwau, “idia be karaharaga . . . idia raka siri.” (Num. 16:24, 27, NW) Idia daradara lasi o naria lasi. Baibel ia gwau idia be palai rumadia edia “kahana ibounai amo idia raka siri.” Dirava idia badinaia taudia be mai edia kudouna ibounai ida unai oda herevana idia badinaia. Idia hahedinaraia idia be Iehova idia badinaia bona kara dika idia dadaraia. Unai sivarai amo dahaka ita diba?

18. Paulo ese Timoteo ia sisiba henia “matamata taudia ese vaia idia abia ura idauidau” amo do ia “heau siri” ena anina be dahaka?

¹⁸ Iseda hetura karana Iehova ida ita gimaia totona, namona be karaharaga kara ta ita karaia. Paulo ese Timoteo ia sisiba henia, “matamata taudia ese vaia idia abia ura idauidau amo oi heau siri” neganai, iena hereva anina be Timoteo be kara ta do ia karaia. (2 Tim. 2:22) Unai nega ai, Timoteo ena mauri lagani be 30 bamona. To, “matamata taudia ese vaia idia abia ura idauidau” be taunimanima badadia ese idia abia danu. Unai dainai, Timoteo ese unai ura idauidau ia abia neganai, idia amo ia “heau siri” be namo. Anina be Timoteo ese ‘kara dika do ia dadaraia.’ Mataio 18:9 ai Iesu ese unai bamona hereva ta ia gwauraia danu. Ia gwau: “Bema emu matana ese oi ia hahekwakwanaia noho, oi kokia bona oi negea.” Hari inai negai, unai sisiba idia badinaia Keristani taudia be idia daradara lasi, to edia hetura karana Iehova ida idia hadikaia diba gaudia be karaharaga idia dadaraia.

19. Haida be edia hetura karana Iehova ida idia gimaia totona, dahaka idia karaia?

¹⁹ Guna haida be Witnes taudia ai idia do lao lasi neganai, idia be kekero taudia, to hari edia lalona idia hadaia kekero muramura do idia inua lou lasi. Danu, ena be moale karadia haida be idia dika lasi, to haida ese idia dadaraia badina idia dekenai ura kereredia idia havaraia diba. (Sal. 101:3) Hegeregere, tadikaka ta be Witnes tauna ai ia do lao lasi neganai, matabodaga pati gabudia dekenai ia lao momo. To hereva momokani ia dibaia neganai, lalona ia hadaia do ia mavaru lou lasi. Tadikaka taihu edia moale karadia dekenai danu ia mavaru lasi, badina ia ura lasi guna ia karaia gaudia ia laloa lou o ura dikadia ia abia lou. Momokani, Baibel ese Keristani taudia ia taravatua lasi kekero muramuradia, mavaru o idia kerere lasi moale karadia haida idia karaia totona. To, namona be iseda lalona do ita hadaia, bona kara ta ita karaia eda hetura karana Iehova ida ita gimaia totona.

20. Ena be ‘kara dika ita dadaraia’ be mai ena hekwarahi, to dahaka dainai ita lalogoada?

²⁰ Iehova ena ladana ita abia be hahenamo ta, to ia be mai ena maduna danu. Ita ese ‘kara dika do ita dadaraia’ bona ‘dika do ita rakatania.’ (Sal. 34:14) Momokani, unai bamona ita karaia be mai ena hekwarahi. To, ita lalogoada badina ita diba Iehova be hanaihanai “ena taunimanima” bona iena kara maoromaoro daladia idia badinaia taudia ia lalokau henia.—2 Tim. 2:19; 2 Sivarai 16:9a duahia.