1. I roto i ta tatou haamoriraa, e tuhaa taa ê to te aha?

 NA TE ao atoa, e itehia te iˈoa Iehova i nia i te mau paturaa e i te taihaa rau e vai ra i roto i te mau fare vairaa taihaa tahito. Eaha paha oe i te oaoa mai te peu e ua ite aˈena oe i te reira! Ei Ite no Iehova, e tuhaa taa ê to te iˈoa o te Atua i roto i ta tatou haamoriraa. Aita ˈtu e pǔpǔ taata e faaohipa ra i te iˈoa o te Atua mai ia tatou. Eita râ e navai ia faaohipa noa i to ˈna iˈoa. I te mea e e fanaˈoraa taa ê ta tatou e riro ei Ite no te Atua, o ta tatou ïa hopoia ia faahanahana ia ˈna ma to tatou haerea.

2. Ei taata o te amo ra i to te Atua iˈoa, eaha ta tatou hopoia?

² No te fanaˈo i ta te Atua farii maitai, eita e navai ia faaohipa noa i to ˈna iˈoa. E mea tia atoa ia pee tatou i ta ˈna mau ture aveia i te pae morare e ia “haapae i te ino.” (Sal. 34:14) Ua haapapu maitai Paulo i teie hopoia a papai ai: “O te taata atoa e faahiti i te iˈoa o te Fatu ra [o Iehova], e faarue anaˈe ratou i te parau ino.” (A taio i te Timoteo 2, 2:19.) Ei tavini a te Atua, e nafea ia papu e te ‘faarue ra tatou i te ino’?

3, 4. Mea fifi no vetahi ia taa i teihea mau parau, e no te aha?

³ I roto i te Timoteo 2, 2:19, ua faahiti Paulo i “te niu a te Atua.” E piti parau tei tapaohia i nia i teie niu. A tahi, “Ua ite te Fatu i to ˈna ihora,” no roto mai i te Numera 16:5. (A hiˈo i to na mua ˈtu tumu parau.) Nohea mai râ te piti o te parau, oia hoi “O te taata atoa e faahiti i te iˈoa o te Fatu ra, e faarue anaˈe ratou i te parau ino”? Mea fifi no vetahi ia taa i teie mau parau. No te aha?

⁴ Ia hiˈohia te mau parau a Paulo, te faahiti ra o ˈna i te tahi atu tuhaa o te mau Papai Hebera. Teie râ, e au ra e aita e irava e tuea ra i tera parau. Te faahiti ra ïa te aposetolo i te aha a parau ai e “O te taata atoa e faahiti i te iˈoa o te Fatu ra, e faarue anaˈe ratou i te parau ino”? No roto mai te parau matamua a Paulo i te Numera pene 16 o te faataa ra i te orureraa hau a Kora. Hoê â atoa anei no te piti o te parau a Paulo?

5-7. I roto i te Timoteo 2, 2:19, ua faahiti Paulo i teihea mau tupuraa i te tau o Mose? (A hiˈo i te hohoˈa matamua.)

⁵ Ua apiti Datana e Abirama ia Kora no te aratai i te orureraa hau. (Num. 16:1-5) Mea faatura ore ratou ia Mose e ua patoi ratou i te tiaraa ta te Atua i horoa ia ˈna ra. Ua riro ratou ei fifi atâta no te mau Iseraela no te mea tei roto noâ ratou i te nunaa. Hou Iehova a faaite ai o vai to ˈna feia haamori taiva ore, ua horoa o ˈna i te hoê faaueraa taa maitai.

⁶ Te na ô ra te Bibilia: “Ua parau maira Iehova ia Mose, na ô maira, E parau atu oe i teie nei amuiraa, e na ô atu oe, E haere ê outou i te atea ê i te mau puhapa o Kora, e to Datana, e to Abirama. Ua tia aˈera Mose, haere atura ia Datana raua o Abirama ra; ua pee maira te hui tavana o Iseraela ia ˈna. Ua parau atura oia i taua amuiraa ra, na ô atura, Teie ta ˈu parau ia outou, e haere ê outou i te puhapa o teie nei pue taata parau ino, eiaha e rave noa ˈtu i te hoê mea iti a ratou ra, a pohe outou i to ratou pohe i ta ratou hara. Ua haere ê anaˈe ihora ratou, to te tahi pae e te tahi pae i taua na puhapa o Kora, e to Datana, e to Abirama ra.” (Num. 16:23-27) I reira, haamou aˈera Iehova i te feia orure hau atoa. Ua ora mai râ te feia taiva ore i te Atua. Mea nafea? Ua ‘faarue ratou i te ino’ ma te faaatea ê mai i te feia orure hau.

⁷ Ua faahiti Paulo i te mau parau o te Numera 16:5 a papai ai: “Ua ite te Fatu i to ˈna ihora.” E peneiaˈe ua manaˈo o ˈna i te mau tupuraa i roto i te Numera 16:5, 23-27 a faahiti ai i te parau: “O te taata atoa e faahiti i te iˈoa o te Fatu ra, e faarue anaˈe ratou i te parau ino.” Mea tano ïa ia manaˈo e ua taaihia na parau e piti i roto i te Timoteo 2, 2:19 i te hoê â mau tupuraa. Eaha te haapii mai i teie na parau? Te ite ra Iehova eaha to roto i te aau. Ua ite o ˈna o vai ta ˈna mau tavini taiva ore e te hinaaro ra o ˈna ia faaatea ê mai ratou i te feia ino.

8. Hau atu i te faaohiparaa i to te Atua iˈoa e te riroraa ei melo o te hoê amuiraa, eaha ˈtu â te titauhia ia rave?

⁸ Ua faaohipa atoa Paulo i te mau tupuraa i te tau o Mose no te haamanaˈo ia Timoteo i te faufaaraa ia paruru i to ˈna mau taairaa e o Iehova. I te tau o Mose, aita i navai ia faaohipa noa te mau tavini a te Atua i te iˈoa o Iehova. Oia atoa eita e navai ia riro noa ei melo o te amuiraa. E mea tia ia faarue te mau tavini taiva ore atoa a te Atua i te ino. Eaha ïa te auraa no  Timoteo? E eaha te nehenehe e haapii mai i te aˈoraa a Paulo?

9. Mea nafea te mau ‘aimârôraa maamaa faufaa ore’ i te ohiparaa i nia i te amuiraa Kerisetiano matamua?

⁹ I roto i ta Paulo rata ia Timoteo, ua horoa o ˈna i te aˈoraa î i te paari no nia i te ravea no te faarue i te ino. Ei hiˈoraa, ua parau Paulo ia Timoteo ‘ia ore e mârô i te parau’ e ‘ia patoi i te parau rii iino faufaa ore.’ (A taio i te Timoteo 2, 2:14, 16, 23.) Eaha te auraa? I roto i te amuiraa, i haapii na vetahi i te tahi atu i te mau haapiiraa apotata. I haapurara atoa na vetahi ê i te mau manaˈo o tei faatupu i te aimârôraa. Aita vetahi o teie mau manaˈo i patoi tia ˈtu i te mau haapiiraa Bibilia, ua haafifi râ te reira i te auhoêraa o te amuiraa. No reira Paulo i faaitoito ai ia Timoteo ia faaatea ê mai i te mau “ui rii [aore ra aimârôraa] maamaa faufaa ore.”

10. Eaha te mea tia ia rave ia û tatou i te ohipa apotata?

¹⁰ I teie mahana, e ere i te mea matauhia ia ite i te ohipa apotata i roto i te amuiraa. E nehenehe noâ râ tatou e faarooroo i te mau manaˈo o te patoi ra i ta te Bibilia e haapii ra. Noa ˈtu nohea mai te reira, e faaoti papu anaˈe e faaatea ê mai i te reira. E ere i te haerea paari ia tauaparau e te mau apotata ma te farerei roa ˈtu ia ratou aore ra ma te faaohipa i te Internet aore ra te tahi atu ravea. Noa ˈtu e te hinaaro ra tatou e tauturu i tera taata, e faaroo ore tatou i te Atua a tauaparau ai e o ˈna. Te faaue maira hoi te Atua ia faaatea ê roa mai i te ohipa apotata.

11. Eaha te nehenehe e amahamaha i te hoê amuiraa? E nafea te mau matahiapo e horoa ˈi i te hoê hiˈoraa maitai?

¹¹ Te vai ra te tahi atu mau mea te nehenehe e haafifi i te hau o te amuiraa taa ê atu i te mau manaˈo apotata. Ei hiˈoraa, te vai ra paha te manaˈo taa ê no nia i te faaanaanataeraa e tano no te hoê Kerisetiano. E nehenehe te mau ‘aimârôraa maamaa faufaa ore’ e tupu ia faahepo tatou i te tahi atu ia farii i to tatou manaˈo. Ia aha râ mai te peu e te faaitoito ra te hoê melo o te amuiraa i te hoê faaanaanataeraa o te patoi ra i te mau ture aveia morare a te Atua? Eita te mau matahiapo e vaiiho i te reira no te ore e aimârô. (Sal. 11:5; Eph. 5:3-5) E ara te mau matahiapo eiaha e faaite i to ratou iho manaˈo. E pee râ ratou i te aˈoraa Bibilia: “A faaamu i te nǎnǎ a te Atua i roto ia outou na, . . . eiaha ma te faahepo i nia iho i te tufaa a te Atua ra, ei aveia râ outou no te nǎnǎ.”—Pet. 1, 5:2, 3; a taio i te Korinetia 2, 1:24.

12, 13. (a) E nafea te mau Ite no Iehova e faaoti ai eaha te faaanaanataeraa e maiti, e eaha te mau aratairaa Bibilia e faaohipa? (b) E nafea te mau aratairaa Bibilia i roto i te paratarafa 12 e tano ai no te mau tuhaa na te taata iho e maiti?

¹² Eita ta tatou faanahonahoraa e hiˈopoa i te mau hohoˈa teata, hauti video, buka aore himene a faaoti atu ai teihea te ore e hiˈo, e hauti, e taio aore ra e faaroo. No te aha? Te parau ra hoi te Bibilia i te taata taitahi ia haamataro i to ˈna manaˈo haava ia ‘ite i te maitai e te ino.’ (Heb. 5:14) E nehenehe e faaohipa i te mau aratairaa Bibilia no te tauturu ia tatou ia rave i te mau faaotiraa î i te paari no nia i te faaanaanataeraa. I roto i tera mau faaotiraa atoa, mea faufaa ia “itea ia [tatou] te mea au i te Fatu.” (Eph. 5:10) Te haapii atoa maira te Bibilia e e hopoia ta te upoo o te utuafare. E nehenehe ïa o ˈna e faaoti eiaha e farii i te tahi faaanaanataeraa no to ˈna utuafare. *—Kor. 1, 11:3; Eph. 6:1-4.

 ¹³ E tauturu mai te mau aratairaa Bibilia faahitihia i na mua ˈtu ia rave i te mau faaotiraa î i te paari i roto i te tahi atu mau tuhaa o te oraraa. Ei hiˈoraa, ua rau te manaˈo no nia i te faaahuraa e te faaneheneheraa, te ea e te maa e i te tahi mau mea na te taata iho e maiti. E hinaaro vetahi e faahepo i te tahi atu ia farii i to ratou mau manaˈo no nia i teie mau ohipa a tupu atu ai te peapea. Teie râ, aita anaˈe e aratairaa Bibilia i ofatihia, aita e tumu no te aimârô no nia i tei titauhia ia rave te Kerisetiano taitahi. Te na ô ra te Bibilia e “e ore hoi te tavini o te Fatu nei e tia ia mârô; ia mǎrû râ oia i te taata atoa nei.”—Tim. 2, 2:24.

14. Mea nafea Paulo i te faahohoˈaraa i te faufaaraa ia ape i te mau amuimuiraa ino?

¹⁴ E nafea ˈtu â te mau tavini a te Atua e ‘faarue ai i te ino’? Ma te ape i te mau amuimuiraa ino. Mea nafea Paulo i te faahohoˈaraa i te reira? I muri iho i te faahitiraa i “te niu a te Atua,” ua papai o ˈna no nia i te hoê “fare rahi.” I roto i tera fare, te vai ra te mau “farii.” “E ere râ . . . te farii auro anaˈe e te ario [to roto], e farii raau râ vetahi e te repo; e no te maitai hoi te tahi pae, e no te ino hoi te tahi.” (Tim. 2, 2:20, 21) Faaitoito aˈera Paulo i te mau Kerisetiano ia “tamâ maite” ia ratou iho, aore ra ia faaatea ê mai, i te mau “farii” faaohipahia no te “ino.”

15, 16. Eaha te haapii mai i te faahohoˈaraa o te hoê “fare rahi”?

¹⁵ Eaha te auraa o te faahohoˈaraa a Paulo? E nehenehe te “fare rahi” e faaauhia i te amuiraa Kerisetiano e te mau “farii” i te melo taitahi o te amuiraa. I roto i te hoê fare, mea atâta te tahi mau taihaa ia viiviihia te reira. E mea tia ïa ia faataa ê te fatu fare i te mau taihaa tei viiviihia i te mau taihaa mâ, mai te mau taihaa ta ˈna e faaohipa ra no te tunu i te maa.

 ¹⁶ Hoê â huru no te mau tavini a te Atua i teie mahana. Ia hinaaro tatou e vai viivii ore i roto i te mau tuhaa atoa o te oraraa, e mea tia ia faaatea ê mai i te mau melo o te amuiraa o te patoi noa ra i te pee i te mau aratairaa a Iehova. (A taio i te Korinetia 1, 15:33.) Mai te peu e mea tia ia ape i te feia i roto i te amuiraa o te faaroo ore ra i te Atua, e mea tia ia na reira atoa e te feia i rapaeau mai i te amuiraa. No te aha? No te mea mea nounou moni te rahiraa o te taata i rapaeau mai i te amuiraa, mea faaroo ore i te metua, mea taiva, mea pari haavare noa, mea ino, aita ratou i au i te mea maitai, mea haavare e te hinaaro nei ratou i te mau mea e navenave ai ra aore e hinaaro i te Atua.—Tim. 2, 3:1-5.

17. Mea nafea te mau Iseraela taiva ore i te ‘faarueraa i te ino’?

¹⁷ I to Iehova faaueraa ia “haere ê . . . i te atea ê i te mau puhapa o Kora, e to Datana, e to Abirama,” “ua haere ê anaˈe ihora” te mau Iseraela taiva ore. (Num. 16:24, 27) Ma te ore e faataere e ma te ore e feaa, ua faaatea ê mai ratou i te feia orure hau. “Ua haere ê anaˈe ihora ratou, to te tahi pae e te tahi pae.” Ua auraro oioi atu te feia taiva ore ma to ratou aau atoa. Ua faaite papu ratou e te turu ra ratou ia Iehova e te patoi ra i te ino. Eaha te haapii mai i teie hiˈoraa?

18. Eaha ta Paulo i hinaaro e parau a na ô ai ia Timoteo ia “maue ê . . . i te mau hinaaro o te apîraa”?

¹⁸ Mea faufaa roa to tatou auhoaraa e o Iehova no tatou. E mea tia ia haa oioi no te paruru i te reira. O ta Paulo ïa i hinaaro e parau a na ô ai ia Timoteo ia “maue ê . . . i te mau hinaaro o te apîraa.” (Tim. 2, 2:22) Peneiaˈe e 30 tiahapa matahiti to Timoteo. Teie râ, e ‘hinaaro maamaa o te apîraa’ atoa to te taata paari. Ia tupu noa mai tera mau hinaaro, e mea tia ia “maue ê” Timoteo i te reira. E mea tia ia ‘faarue o ˈna i te ino.’ Hoê â huru parau ta Iesu i faahiti: “Te hapa ra oe i to mata, e ohiti e faarue ê atu.” (Mat. 18:9) Ia aha te mau Kerisetiano e hinaaro ra e pee i teie aˈoraa e e paruru i to ratou auhoaraa e te Atua? E mea tia ia haa oioi ratou e ma te papu.

19. Mea nafea vetahi i te parururaa i to ratou auhoaraa e o Iehova?

¹⁹ Mea nafea vetahi mau Kerisetiano i te parururaa i to ratou mau taairaa e o Iehova? Ua faaoti vetahi o tei fifi na e te ava eiaha e inu faahou. E vetahi ê, no te tahi paruparu, e ore e apiti i te mau faaanaanataeraa o te faaara i te mau hinaaro tano ore. (Sal. 101:3) Ei hiˈoraa, hou a riro mai ai ei Ite no Iehova, mea au na te hoê taeae e haere i te mau fare oriraa i reira e haerea morare ore to te taata. I muri iho i te iteraa i te parau mau, ua faaoti o ˈna eiaha e ori faahou noa ˈtu e na te mau Ite no Iehova i faanaho i te tamaaraa. Aˈunei paˈi te mau hinaaro e manaˈo tano ore e hoˈi faahou mai. E ere i te auraa e eiaha te mau Kerisetiano atoa e inu i te ava, e ori aore ra e rave i te tahi atu mau mea e ere i te mea ino. Teie râ, e mea tia ia haapao maitai e ia paruru tatou paatoa i to tatou taairaa e o Iehova.

20. Noa ˈtu e e ere i te mea ohie ia ‘faarue i te ino,’ eaha te tamahanahana mai ia tatou?

²⁰ E fanaˈoraa taa ê ia amo i to Iehova iˈoa e e hopoia atoa. E mea tia ia ‘faarue tatou i te ino’ e ia “haapae i te ino.” (Sal. 34:14) E ere noa i te mea ohie ia na reira. Teie râ, mea mahanahana ia ite e e here noa Iehova i to ˈna mau taata o te auraro ia ˈna.—Tim. 2, 2:19; a taio i te Paraleipomeno 2, 16:9a.