1. Nuuni nu goynuwaara gayttidaagan xoqqu oottidi xeelliyoobay aybee?

ALAMIYAN darosan Yihoowa giya sunttay issi issi gita keettaa bollinne muuziyeemetun deˈiya issi issibaa bolli xaafettidaagee deˈana danddayees. Hegaa mala sohuwan he sunttaa beˈidaba gidikko garamettennan aggakka. SHin nuuni Yihoowa Markka gidiyo gishshawu, nu goynuwaara gayttidaagan Xoossaa sunttaa xoqqu oottidi xeelloos. Alamiyan, nuugaadan Xoossaa sunttaa goˈettiya asi baawa. SHin a sunttaa xeegiyoogaa xallay gidenna. Nuuni a Markka gidiyo maataa demmido gishshawu, a bonchissiya ogiyan deˈana koshshees.

2. Nuuni Xoossaa sunttan xeegettiyo gishshawu nuuppe koyettiyaabay aybee?

² Xoossaa sunttaa xeegiyoogaa xallay nuuni Yihoowan nashettanaadan oottenna. Nuuni i kessido kandduwaa maaraa kaallana koshshees. Geeshsha Maxaafay Yihoowa asay ‘iitaappe shaahettanaadan’ zoriyoy hegaassa. (Maz. 34:14) Kiitettida PHawuloosi, “Yihoowa sunttaa xeegiya ubbay iita ooso aggibayo” yaagidi xaafido wode hegaa loytti qonccissiis. (2 Ximootiyoosa 2:19, NW nabbaba.) * Nuuni Yihoowa Markka gidiyo gishshawu,  a sunttaa xeegiyoogan erettoos. SHin nuuni iita oosuwaappe waani haakkana danddayiyoo?

3, 4. Geeshsha Maxaafaa eranchati daro wodiyawu akeekanawu metootido xiqisee awugee, qassi aybissi?

³ PHawuloosi 2 Ximootiyoosa 2:19n deˈiya qofaa xaafiyo wode ay hassayidi xaafidaakko qoppa. Ha xiqisee ‘Xoossay baasido mino baasuwaabaa’ yooti simmidi, hegaa bolli xaafettida naaˈˈubaa yootees. Koyroogee, “Yihooway baageeta erees” yaagees; ha qofay Qoodaabaa 16:5ppe ekettidoogee qoncce. (Hagaappe kasetiya huuphe yohuwaa xeella.) “Yihoowa sunttaa xeegiya ubbay iita ooso aggibayo” yaagiya naaˈˈanttoogee Geeshsha Maxaafaa eranchata giyo issoti issoti akeekanawu metootiyo qofa. Aybissi?

⁴ PHawuloosi xaafido ogee i he qofaa harasaappe ekkidi xaafidoogaa bessees. SHin i xaafidoogaara issi mala gidida qofay Ibraawetto Geeshsha Maxaafaa xuufetun deˈiyaaba milatenna. Yaatin, PHawuloosi, “Yihoowa sunttaa xeegiya ubbay iita ooso aggibayo” giido wode ay gaana koyidee? PHawuloosi he qofaappe kasetidi yootidobaa, Qoraahi makkalidoogaa yootiya, Qoodaabaa shemppo 16ppe ekkidi xaafiis. Naaˈˈantto qofaykka he makkala hanotaara gayttidabeeshsha?

5-7. PHawuloosi 2 Ximootiyoosa 2:19n deˈiya qofaa Muuse wode hanida aybaa qoppidi xaafidee? (Ha huuphe yohuwaa doomettan deˈiya misiliyaa xeella.)

⁵ Geeshsha Maxaafay Eliˈaaba naati Daataaninne Abiiraami Qoraahaara zuppetidi, asay Muuse bollinne Aaroona bolli denddanaadan oottidoogaa yootees. (Qoo. 16:1-5) Eti Muusanne Xoossay ayyo immido maataa karidosona. He makkalanchati Xoossaa asaa giddon uttidi, ammanettida asata ayyaanaaban qohidosona. Yihooway ammanettidi baayyo goynniyaageetanne makkalanchata shaakkiyo wodee gakkin, qoncce azazuwaa immiis.

⁶ He taarikee hagaadan gees: “GODAI Muusa, ‘Neeni maabaraa, “Qoraaha, Daataananne Abiiraama dunkkaanetuppe kichchite” yaagada yoota’ yaagiis. Muusee denddidi, Daataanakkonne Abiiraamakko bin, Israa7eela cimati a kaallidosona. Maabaraa i, ‘Ha iita asatu dunkkaanetuppe kichchite; etabaa gididabaa aibaanne bochchoppite. Hinkkoode eta nagaraa ubbaa gaasuwan inttekka pitetti xayana’ yaagidi minttidi yootiis. Yootin eti Qoraaha, Daataananne Abiiraama dunkkaanetuppe kichchidosona.” (Qoo. 16:23-27) Yaatin, Yihooway he makkalanchata ubbaa xayssiis. SHin baayyo ammanettidi iita oosuwaappe haakkidaageeta ashshiis.

⁷ Yihooway asa wozanaa beˈees. I baageeti assi ammanettidi deˈiyoogaa akeekees. Gidoppe attin, ayyo ammanettidaageeti iita asatuppe shaahettidi deˈana koshshees. Hegaa gishshawu, PHawuloosi, “Yihoowa sunttaa xeegiya ubbay iita ooso aggibayo” yaagidi xaafido qofay Qoodaabaa 16:5, 23-27n deˈiya taarikiyaara gayttidaba gidennan aggenna. PHawuloosi, “Yihooway baageeta erees” yaagidi xaafido qofaykka he hanotaara gayttidaba gidiyo gishshawu, hegaadan qoppiyoogee bessiyaaba.—2 Xim. 2:19.

8. Yihoowa sunttaa goˈettiyoogaa xallay woy gubaaˈiyaa yara gidiyoogaa xallay gidennay aybissee?

⁸ PHawuloosi Muuse wode hanida he taarikiyaa yootiyoogan, Ximootiyoosi Yihoowaara deˈiya dabbotaa mintti oyqqana koshshiyoogaa hassayissiis. Muuse wode Yihoowa sunttaa xeegiyoogaa xallay goˈˈibeennaagaadan, nuunikka gubaaˈiyaa yara gidiyoogaa xallay goˈˈenna. Ammanettidi Yihoowawu oottiyaageeti iita ooso  aggibayana bessees. He qofay Ximootiyoosa waati goˈˈidee? PHawuloosi geeshsha ayyaanaa kaaletuwan yootido zoriyaappe ha wodiyan deˈiya Yihoowa asay ay tamaarana danddayii?

9. Beni wode, ‘eeyyatu palamay’ gubaaˈiyaa waati qohidee?

⁹ Xoossaa Qaalay Kiristtaaneti aggana woy haakkana bessiyo iita oosota xeelliyaagan qoncce zoriyaa yootees. Leemisuwawu, 2 Ximootiyoosa 2:19 yuushuwan deˈiya qofay, Ximootiyoosi “qaalan palamettenna mala,” qassi “pattenna haasayaappe” bana naagana mala PHawuloosi zoridoogaa yootees. (2 Ximootiyoosa 2:14, 16, 23 nabbaba.) He wode gubaaˈiyan deˈiya issi issi asati kaddidaageetu qofaa tamaarissoosona. Qassi harati issi issiban palamettennan waayi aggana. Eti palamettiyoobay Geeshsha Maxaafaa qofaa phalqqiyaaba gidana xayikkokka, shaahotettaa medhiyaaba. Eti qaalan palamettosonanne ooyettoosona; hegee ayyaanaaban qohees. PHawuloosi, ‘eeyyatu palamaappenne aynne erennaageetu palamaappe baqatanaadan’ Ximootiyoosa zoridoy hegaassa.

10. Kaddidaageetuura gayttidaagan nuuni ay oottana koshshii?

¹⁰ Ha wodiyan, gubaaˈe giddon kaddidaageeti darotoo deˈokkonna. SHin, nuuni Geeshsha Maxaafaa timirttiyaa phalqqiyaabaa siyiyo wode, he qofay awuppe yiyaaba gidikkokka appe haakkana koshshees. Kaddidaageetuura palamettiyoogee, eti Intternneetiyan xaafidobawu nu zaaruwaa kiittiyoogee woy hara ogiyan etaara gayttiyoogee eeyyatetta. Nuuni izaawa maaddanaassi qoppidi hegaadan oottiyaaba gidikkokka, yaatiyoogee nuuni ha huuphe yohuwan tamaarido Geeshsha Maxaafaa qofaa phalqqiyaaba. Nuuni Yihoowa asa gidiyo gishshawu, kaddidaageetuppe muleera haakkoos.

11. ‘Eeyyatu palamaa’ denttana danddayiyaabay aybee, qassi gubaaˈe cimati hegaara gayttidaagan waanidi loˈˈo leemiso gidana danddayiyoonaa?

¹¹ Gubaaˈiyaa sarotettaa moorana danddayiyay kaddidaageetu xalla gidokkona. Leemisuwawu, wodiyaa aattiyoobaara gayttidaagan issuwaa qofay haraagaappe dummatiyoogee ‘eeyyatu palamaa’ denttana danddayees. Wodiyaa aattiyoobaara gayttidaagan, issi uri Yihooway kessido kandduwaa maaraa kaallennaba gidikko, cimati palamettennan agganawu qoppidi hegaa malabaa coˈˈu gookkona. (Maz. 11:5; Efi. 5:3-5) SHin cimati harati eta qofaa kaallanaadan minttettokkona. Eti gubaaˈe cimatuyyo imettida kaallidi deˈiya zoriyaa oosuwan peeshshanawu baaxetoosona: “Intte giddon de7iya Xoossaa dorssaa wudiyaa Xoossai koyiyoogaadan heemmite. . . . Dorssaa wudiyau intte leemiso gidanaappe attin, heemmiyoogeeta wolqqan haaroppite.”—1 PHe. 5:2, 3; 2 Qoronttoosa 1:24 nabbaba.

12, 13. (a) Yihoowa Markkati wodiyaa aattiyoobaa waatidi dooriyoonaa, qassi hegawu maaddiya Geeshsha Maxaafaa maaray awugee? (b) Mentto 12n tobbido maaraa dumma dumma allaalliyaara gayttidaagan waati oosuwan peeshshana danddayiyoo?

¹² Wodiyaa aattiyoobaara gayttidaagan, ay mala biiduwaa beˈanaakko, ay mala biiduwaa kaassaa kaaˈanaakko woy ay mala maxaafaa nabbabanaakko, woy qassi ay mala muuziqaa siyanaakko nu dirijjitee higgiyaa kessenna. Aybissi? Geeshsha Maxaafay ubba asaykka huuphiyan huuphiyan “iitaa kehaa” shaakki eranawu ba akeekaa abbiyaa loohissanaadan minttettees. (Ibr. 5:14) Geeshsha Maxaafaa maaray nuuni wodiyaa aattiyoobaara gayttidabaa suure kuuyanaadan maaddees. Nuuni nu deˈo macara ubban “Godaa ufaissiyaabai aibakko” erana koshshees. (Efi. 5:10) Geeshsha Maxaafay so asawu huuphe gidiyaageetuyyo aawatettay deˈiyoogaa yootiyo  gishshawu, eti issi issiban bantta soo asay wodiyaa aattennaadan kuuyana danddayoosona.—1 Qor. 11:3; Efi. 6:1-4.

¹³ Qommoora beˈido Geeshsha Maxaafaa maaray wodiyaa aattiyoobaa dooranaassa xalla gidennan harabawukka maaddees. Maayiyoobaaranne alleeqettiyoobaara, payyatettaaranne miyoobaara, qassi hara buzo allaalliyaara gayttidaagan asay palamettana danddayees. Issi uri Geeshsha Maxaafaa higgiyaa kanttana xayikko, Yihoowa asay hegaa malaban palamettiyoogaappe haakkiyoogan aadhida erancha gidiyoogaa bessees; aybissi giikko, “Godaa ashkkarai ubbaayyo kehiyaagaa . . . gidanau besseesippe attin, ooyettanau bessenna.”—2 Xim. 2:24.

14. Iita laggetuppe haakkana koshshiyoogaa qonccissanawu PHawuloosi ayba leemisuwaa yootidee?

¹⁴ “Yihoowa sunttaa xeegiya ubbay iita ooso” aggibayana danddayiyo hara ogee awugee? Iitabaa oottiya asatuura laggetennan aggiyoogaa. Hegaa qonccissanawu, PHawuloosi “Xoossay baasido mino” baasuwaabaa yooti simmidi, hara leemisuwaakka yootiis. I ‘issi gita keettaabaa’ yootiis; he keettan “worqqaappenne biraappe merettida miishsha xalaala gidennan, mittaappenne urqqaappe merettida miishshatikka de7oosona. Hegeetuppe baggati bonchcho oosuwaa etan oottanau, qassi baggati tooshettiyaabaa etan oottanau merettidosona.” (2 Xim. 2:20, 21) PHawuloosi Kiristtaaneti “tooshettiyaabaa” oottiyo miishshatuppe ‘banttana geeshshanaadan’ woykko haakkanaadan zoriis.

15, 16. ‘Gita keettaa’ leemisuwan qonccidabaappe ay tamaarana danddayiyoo?

¹⁵ Ha leemisoy qonccissiyoobay aybee? PHawuloosi he leemisuwan gubaaˈiyaa “gita keettan,” qassi gubaaˈiyan deˈiyaageeta so giddon deˈiya dumma dumma miishshan leemissiis. Issi keettan deˈiya amarida miishshay harggiyaa oyttiyaaban woy qitan hambbalaashettana danddayees. Keettaaway he miishshata qumaa kattanawu  goˈettiyoogaa mala geeshsha miishshatuppe haassees.

¹⁶ Hegaadankka, ha wodiyan geeshsha gididi deˈanawu baaxetiya Yihoowa asay gubaaˈe giddon deˈiya, ubbatoo Yihoowa higgiyaa kaallanawu koyenna asatuura laggetana koshshenna. (1 Qoronttoosa 15:33 nabbaba.) Gubaaˈe giddon deˈiya hegaa mala asatuura laggetana bessennaba gidikko, gubaaˈiyaappe kareera deˈiyaageetuppe ‘shaahettana’ bessiyoogee qoncce; he asatuppe daroti ‘miishshaa siiqiyaageeta, banttana yelidaageetuyyo azazettennaageeta, geeshshatetti baynnaageeta, zigirssanchata, kehennaageeta, loˈˈobaa dosennaageeta, kashi erikke giyaageeta, qassi Xoossaappe aattidi, ufayttiyoobaa dosiyaageeta.’—2 Xim. 3:1-5.

17. Ammanettida Israaˈeelati iitabaappe ay keenaa haakkidonaa?

¹⁷ “Qoraaha, Daataananne Abiiraama dunkkaanetuppe” kichanaadan azazettido wode, Israaˈeelati oottido ubbabaa Geeshsha Maxaafay yootees. Xoossaa Qaalay, “Eti sohuwaara haakkidosona” yaagees. (Qoo. 16:24, 27, NW) Eti mammottibookkona. Geeshsha Maxaafay eti muleera haakkidoogaakka yootees. Eti “ubbabaappe haakkidosona.” He ammanettida asati shemppo miyaaba oottanawu koyibookkona. Eti kumetta wozanaappe azazettidosona. Eti Yihoowayyo exatidi iita oosuwaappe haakkidosona. Nuuni ha hanotaappe ay tamaarana danddayiyoo?

18. Ximootiyoosi ‘iita wodallatetta amuwaappe baqatanaadan’ PHawuloosi zorido wode gaana koyidobay aybee?

¹⁸ Yihoowaara deˈiya dabbotaa mooriyaabaappe nuuni eesuwan haakkana bessees. PHawuloosi, “Iita wodallatetta amuwaappe baqata” yaagidi Ximootiyoosa zorido wode hegaa hassayissana koyiis. (2 Xim. 2:22) He wode Ximootiyoosassi layttay 30ppe bolla gidennan aggenna. Gidikkokka, ‘iita wodallatetta amoy’ naatuwaa cimaa geenna. Ximootiyoosi hegaa mala amuwaappe baqatana koshshees. Hegee Ximootiyoosi ‘iita ooso aggibayana’ koshshees giyoogaa. Yesuusi, “Ne aifee nena balettikko, neeppe wooca ola” yaagido wode hegaara issi malabaa yootiis. (Maa. 18:9) Ha wodiyan, ha zoriyaa kaalliya Kiristtaaneti banttana ayyaanaaban qohiyaabaappe sohuwaara haakkoosona; eti mammottokkona.

19. Ha wodiyan, issoti issoti banttana ayyaanaaban qohiyaabaappe naaganawu waatidonaa?

¹⁹ Yihoowa Markka gidanaappe kase ushshancha gidida issoti issoti haˈˈi cammiya ushshaa mule uyennan agganawu qofaa qachidosona. Harati qassi, wodiyaa aattiyo issi issibay iita giyooba gidana xayikkonne, eti iitabaa amottanaadan oottiyaaba gidiyo gishshawu hegaappe haakkoosona. (Maz. 101:3) Leemisuwawu, issi ishay Yihoowa Markka gidanaappe kase, shori baynna durssaa duriyoosaa darotoo bees. SHin i tumaa siyi simmidi, kaseegaadan shori baynnabaa amottennan agganawu, ishantti issippe shiiqiyoosaa gujjin, awankka durennan agganawu qofaa qachiis. Kiristtaaneti ushshaa uyiyoogaa, duriyoogaa woy bala geetettibeenna harabaa oottiyoogaa digettibeennaagee qoncce. Gidikkokka, nuuni ubbay ayyaanaaban nuna qohiyaabaappe naagettana koshshees.

20. ‘Iita ooso aggibayiyoogee’ metana danddayikkokka, nuna minttettiyaabay aybee?

²⁰ Nuuni Yihoowa Markka gidiyo maataa demmido gishshawu, a bonchissiya ogiyan deˈana koshshees. Nuuni ‘iitaappe shaahettana,’ qassi ‘iita ooso aggibayana’ koshshees. (Maz. 34:14) Yaatiyoogee issi issitoo metana danddayiyoogee qoncce. SHin Yihooway “baageeta” woykko ba xillo ogiyaa kaalliyaageeta ubba wode siiqiyoogaa eriyoogee nuna keehi minttettees.—2 Xim. 2:19; 2 Hanidabaa Odiya 16:9a nabbaba.