1, 2. (a) Tau ta be witnes tauna ena anina be dahaka, bona edena dala ai nius halasia oreadia ese edia gaukara idia karaia namonamo lasi? (b) Dahaka dainai Iehova be nius halasia oreadia dekenai ia tabekau lasi?

 BEMA ta idia gwauraia witnes tauna, unai ena anina be dahaka? Diksenari ta ia gwau: “Ia be ia vara gauna ta ia itaia bona ia ripotilaia tauna.” Hegeregere, South Africa ai, niuspepa ta ladana The Witness, be lagani 160 mai kahana lalodiai idia halasia noho. Unai be ladana maorona, badina niuspepa ena gaukara be tanobada ai idia vara gaudia edia sivarai momokanidia do ia ripotilaia. The Witness niuspepa ia torea tauna ginigunana ia gwau, unai niuspepa be “hereva momokani sibona do ia ripotilaia.”

² To madi, nius halasia oreadia momo be tanobada ai idia vara mai anina bada gaudia edia sivarai momokanidia idia ripotilaia lasi. To, Siahu Ibounai Diravana be unai nius halasia oreadia dekenai ia tabekau lasi. Ena peroveta tauna Esekiela amo ia gwau: “Bese idauidau do idia diba lau be Iehova.” (Ese. 39:7, BHḡ) Hari, iena Witnes taudia eit milion bamona ese bese idauidau dekenai Dirava bona Ia ese idaunegai bona hari ia karaia noho gaudia idia harorolaia. Unai ami bamona Witnes oreana be vaira neganai Dirava ese do ia mailaia hahenamo idauidau idia harorolaia danu. Bema ita be haroro gaukara ita goadalaia, ita be Iehova ena Witnes taudia Isaia 43:10, (NW) ena hereva hegeregerena. Ia gwau: “Iehova ia gwau, ‘Umui be  lauegu witnes taudia, oibe, lau ese oi lau abia hidi, egu hesiai tauna.’”

3, 4. (a) Edena negai Bible Student taudia ese ladana matamata idia abia, bona edia hemami be edena bamona? (Laulau ginigunana itaia.) (b) Inai stadi ai edena henanadai do ita herevalaidia?

³ Iehova ena ladana ita abia be hahenamo badana, badina ia be “noho hanaihanai King.” Dirava ia gwau: “Lau egu ladana be inai, ia lao hanaihanai, gabeai ia mai nega ibounai lalonai inai bamona lauegu ladana dohore umui gwauraia!” (1 Tim. 1:17; Eso. 3:15; Hadibaia Tauna 2:16 sekea.) Lagani 1931 ai, Bible Student taudia ese inai ladana Iehova ena Witnes taudia idia abia. Momo be unai ladana dainai idia moale bada. Hegeregere, Canada ai kongrigeisen ta be revareva ta ia torea bona ia gwau: “Ita ese inai ladana matamata ‘Iehova ena Witnes taudia’ ita abia ena sivarai ai kamonai neganai ai moale bada herea, bona unai ese ai ia hagoadaia Iehova ena ladana ia hanamoa mauri dalana ai badinaia totona.”

⁴ Edena dala ai oi hahedinaraia diba Dirava ena ladana oi abia dainai oi moale? Danu, oi diba dahaka dainai Isaia bukana ena hereva hegeregerena, Iehova ese ita ia gwauraia iena Witnes taudia, a?

5, 6. (a) Edena dala ai Israela tama sina be Iehova ena “witnes” taudia bamona? (b) Dirava ese Israela tama sina dekenai dahaka hahegani ia henia, bona dahaka dainai hari tama sina ese unai idia badinaia be namo?

⁵ Isaia ena negai, Dirava ese Israela besena ia abia hidi ena “hesiai tauna” ai idia lao, bona Israela taudia ta ta be iena “witnes” taudia. (Isa. 43:10) Dala ta be, Israela tama sina ese edia natudia dekenai Dirava ese edia tubudia dekenai ia karaia gaudia idia hadibaia, unai dala amo tama sina be witnes taudia bamona. Hegeregere, Dirava ese Israela taudia ia hamaorodia lagani ta ta ai Pasova aria do idia karaia neganai, ia gwau: “Emui natudia do idia nanadaia umui dekenai, do idia gwau, ‘Inai tomadiho karana ena anina be dahaka?’ Do umui haere, umui  gwau, ‘Inai be Lohiabada ena Pasova boubou ena kara, Aigupito dekenai ia ese Israela taudia edia ruma ia raka hanaia lao, Aigupito taudia sibona mo ia alaia mase, bona iseda taudia ibounai ia hamauria.’” (Eso. 12:26, 27) Tama sina ese edia natudia idia hamaoroa Mose be nega ginigunana Aigupito ena king dekenai ia lao, bona ia noia Israela taudia do ia siaia tano gagaena dekenai Iehova do idia tomadiho henia neganai, Farao ia gwau: “[Iehova] be daika? Badina be dahaka iena hereva dohore lau kamonai?” (Eso. 5:2) Idia hamaorodia danu, Iehova ese Aigupito dekenai hisihisi ten ia havaraia, bona Davara Kakakakana ai Israela taudia be Aigupito ena tuari oreana amo ia hamauridia neganai, Ia hahedinaraia ia be Siahu Ibounai Diravana. Oibe, Israela taudia idia itaia Iehova be Dirava momokanina bona ena gwauhamata ia Hagugurudia Tauna.

⁶ Israela taudia be Iehova ena ladana idia abia dainai idia moale bada, bona idia vara gau namodia ibounai be edia natudia sibona lasi, to edia igui hesiai taudia dekenai idia hadibaia danu. Mai anina bada gauna ma ta be, Israela taudia ese edia natudia idia hadibaia edia mauri ibounai lalonai do idia helaga. Iehova ia gwau: “Do umui helaga, badina be lau Lohiabada, emui Dirava, lau be helaga.” (Lev. 19:2; Deu. 6:6, 7) Hari, Keristani tama sina dekenai unai be haheitalai namona. Namona be edia natudia idia hadibaia Dirava ena taravatu helagadia idia badinaia totona, unai amo Dirava ena ladana do idia hanamoa!—Aonega Herevadia 1:8; Efeso 6:4 duahia.

7. (a) Israela taudia ese Iehova idia badina neganai, bese ma haida be dahaka idia itaia? (b) Dirava ena ladana idia abia taudia ibounai edia maduna be dahaka?

⁷ Unai hegeregerena, Israela taudia ese Dirava idia badinaia neganai, bese ma haida idia itaia Dirava be ena taunimanima ia gimaia. Dirava ia gwau: “Unai neganai tanobada taudia ibounai ese do idia itaia, Lohiabada ese umui ia abia hidi vadaeni, iena bese korikori do umui lao, vadaeni umui dekenai do idia gari.” (Deu. 28:10) To madi, Israela taudia edia sivarai momo ese idia hahedinaraia Dirava idia badinaia lasi. Idia be kaivakuku idia tomadiho henia loulou. Danu, idia be Kanana taudia edia dirava idia tomadiho henia dainai, idia dagedage, natudia idia bouboulaia bona ogogami taudia idia hahisia. Unai ese ita ia hadibaia, namona be nega ibounai do ita helaga bona Helaga Herea Diravana do ita tohotohoa, badina ita be iena ladana ita abia!

8. Iehova ese Isaia dekenai dahaka hahegani ia henia, bona Isaia ena hemami be edena bamona?

⁸ Iehova be Isaia amo ia peroveta ia gwau, Israela taudia be Ia ese hoa dalanai Babulonia ena igui hesiai amo do ia ruhadia karana do idia itaia. (Isa. 43:19) Isaia bukana ena karoa ginigunadia siks be Ierusalema bona ia badinai idia noho hanuadia dekenai do ia vara dika ia herevalaia. Iehova be taunimanima edia kudouna ia itaia diba dainai, Ia ese Isaia ia hamaoroa unai hahemaoro herevana do ia harorolaia noho, ena be Israela taudia do idia ura lasi idia kamonai. Isaia ia lalohisihisi bona ia ura diba edena nega ai Israela taudia do idia helalo-kerehai. Dirava ia haere, ia gwau: “Ela bona Iuda hanua badadia be dika momokani, bona noholaia taudia be lasi momokani. Bona ruma ibounai, be mai edia taunimanima lasi. Bona tano be dika momokani, aniani do ia havaraia diba lasi tano do ia lao.”—Isaia 6:8-11 duahia.

9. (a) Isaia ena peroveta herevana Ierusalema totona be edena negai ia guguru? (b) Hari be edena bamona, bona dahaka dainai ita noga noho be namo?

⁹ Isaia ese ena peroveta gaukarana be King Usaia ena lohia lagani ginigabena, o lagani 778 B.C.E. bamona ai ia abia. Ia ese unai gaukara be lagani 46 lalodiai ia karaia ela bona lagani 732 B.C.E., King Hesekaia ena lohia negana lalonai. Unai murinai, Iehova ese ma lagani 125 lalonai ena taunimanima ia sisiba henia noho  ela bona lagani 607 B.C.E. ai, Ierusalema idia hadikaia. Oibe, Dirava ese ena taunimanima be nega bada ia do noho lalonai ia hadibadia Ierusalema be dika do ia davaria. Hari danu, Iehova ese ena hesiai taudia amo vaira neganai do idia vara gaudia be taunimanima dekenai ia hadibaia noho. Lagani 135 lalodiai, Gima Kohorona ginigunana amo ema bona hari, Iehova ena Witnes taudia ese taunimanima idia hadibaia do idia noga noho, badina Satani ena lohia negana be kahirakahira do ia ore, bona Iesu Keriso ena Lagani 1,000 Lohia Negana do ia matamaia.—Apok. 20:1-3, 6.

10, 11. Babulonia ai idia noho Israela taudia ese edena peroveta herevana ia guguru idia itaia?

¹⁰ Abidadama Iuda taudia haida be idia roho mauri, badina Iehova ena hahegani hegeregerena Babulonia tuari oreana dekenai sibona idia henia, bona Babulonia ai igui hesiai taudia bamona idia lao. (Ier. 27:11, 12) Bena lagani 70 murinai, idia ese peroveta herevana badana ta ena guguru dalana idia itaia. Isaia ia gwau: “Israela ena Dirava Helagana, umui ia hamauria noho Lohiabada ese ia hereva, ia gwau, ‘Umui do lau hamauria totona, tuari taudia Babulonia dekenai do lau siaia. Lau ese Babulonia hanua ena magu iduara do lau makohia.’”—Isa. 43:14.

¹¹ Unai peroveta herevana hegeregerena, October 539 B.C.E. ena hanuaboi ta ai, hoa gauna ta ia vara. Babulonia ena king bona ena lohia taudia be Ierusalema dubu ai idia abia kapusi helagadia amo wain idia inua, bona edia kaivakuku idia tomadiho henidia noho lalonai, Mede bona Parasa ese Babulonia idia hadarerea. Lagani 538 o 537 B.C.E. ai, Babulonia ia hadarerea tauna, Kurese ese Iuda taudia ia siaia Ierusalema dekenai Dirava ena dubu idia haginia lou totona. Unai ibounai be Isaia ese ia perovetalaia. Danu, Isaia ia peroveta Iehova ia gwauhamata ena helalo-kerehai taudia be Ierusalema dekenai idia giroa neganai, do ia naridia bona gimaia. Dirava ia gwau: “Bese be unai, lau karaia vadaeni, lauegu taudia inai, bona idia ese ane dekenai, egu ladana do idia hanamoa!” (Isa. 43:21; 44:26-28) Israela taudia be Ierusalema dekenai idia giroa bona Iehova ena dubu idia haginia lou murinai, idia hamomokania Iehova be Dirava momokanina bona nega ibounai ena gwauhamata ia hagugurua.

12, 13. (a) Israela taudia be dubu helaga idia haginia lou neganai, daidia ese idia bamodia danu? (b) Edena dala ai “mamoe ma haida” ese “Dirava ena Israela” idia durua, bona edia helaro be dahaka?

¹² Israela taudia be Ierusalema dekenai idia giroa bona dubu helaga idia haginia lou neganai, Idau Bese taudia momo herea be idia ida Iehova idia tomadiho henia. (Esr. 2:58, 64, 65; Est.  8:17) Unai hegeregerena hari, Iesu ena “hutuma bada” “mamoe ma haida” ese horoa Keristani taudia idia durua, idia be “Dirava ena Israela.” (Apok. 7:9, 10; Ioa. 10:16; Gal. 6:16) Unai horoa taudia bona mamoe ma haida be idia moale badina inai ladana Iehova ena Witnes taudia idia abia.

¹³ Keriso ena Lagani 1,000 Lohia Negana lalonai, hutuma bada taudia ese inai nega dokona ai Iehova ena Witnes taudia bamona idia noho ena sivarai be toreisi lou taudia dekenai do idia herevalaia. To unai hahenamo ita abia totona, namona be hari eda ladana hegeregerena ita haroro noho bona ita helaga. Danu, ena be ita hekwarahi Iehova ena taravatu helagadia ita badinaia totona, to ita be goevadae lasi dainai, namona be dina ta ta Dirava ita noia eda dika ia gwauatao totona. Namona be ita laloparara Dirava ena ladana helagana ita abia be hahenamo badana ta.—1 Ioane 1:8, 9 duahia.

14. Inai ladana Iehova ena anina be dahaka?

¹⁴ Dirava ena ladana ita abia ena hahenamo ita laloa bada totona, namona be ena anina ita laloa dobu. Inai ladana, “Iehova” be Heberu gado amo idia hahanaia. Ia be kara ta karaia karana ia herevalaia bona ena anina be “sibona ia halaoa.” Unai dainai, inai ladana Iehova ena anina be, “Ia ese Ia Halaoa.” Unai be maoro badina Iehova be iunives, aneru, bona taunimanima ia havaraia, bona ia be ena gwauhamata ia Hagugurua Tauna. Danu, bema Iehova ia gwau gau ta do ia karaia, Satani o ma ta be hegeregere lasi Iehova ena ura do ia guguru dalana idia koua totona.

15. Iehova ese Mose dekenai ena ladana ia gwauraia hedinarai karana amo dahaka ita dibaia? (Inai maua,  “Iehova Ena Ladana Ena Anina” itaia.)

¹⁵ Iehova ese Mose dekenai ena ladana ena anina ia hahedinaraia. Mose ia hagania Israela taudia be Aigupito amo do ia hamauria neganai, ia gwau: “Dahaka ai Lau Ura Sibona Lau Halaoa be Do Lau Halaoa.” Iehova ma ia gwau: “Israela taudia dekenai inai do oi gwauraia, ‘Do Lau Halaoa ese umui dekenai lau ia siaia.’” (Eso. 3:14, NW) Unai hegeregerena, Iehova be gau idauidau ai sibona ia halaoa diba, ena ura ia hagugurua totona. Iehova ese Israela taudia dekenai ia hamomokania ia be edia Hamauria Tauna, Gimaia Tauna, Hakaua Tauna, bona Gau Idauidau Ia Henia Tauna.

16, 17. (a) Edena dala ai ita hahedinaraia, Iehova ena ladana ita abia dainai ita moale? (b) Wiki vaira ena stadi ai dahaka do ita herevalaia?

¹⁶ Hari, Iehova ia idau lasi. Iena ladana ese ita ia hadibaia Ia be gau idauidau ai sibona ia halaoa diba iena taunimanima ia naria totona. To Iehova ena ladana ena anina be unai sibona lasi. Ena anina ma ta be, ia ese ia havaraia gaudia be gau idauidau ai ia halaoa diba iena ura ia hagugurua totona. Unai ita laloa dobu karana ese ita ia durua, iena ladana ena anina hegeregerena eda mauri ita gaukaralaia noho totona. Norway dekenai lagani 70 mai kahana ia haroro goadagoada taihu ta ladana Kåre, ena mauri lagani be 84, ia gwau: “Lau mamia Iehova, noho hanaihanai King, lau hesiai henia bona iena ladana helagana idia abia taudia huanai lau noho be hahenamo badana. Danu, lau moale badina Baibel ena hereva momokani be ma haida dekenai lau hadibaia, bona lau itaia idia moale bona laloparara. Hegeregere, lau moale badina Keriso ena boubou gauna ena anina, bona idia ia durua kara maoromaoro bona maino tanobada matamatana lalonai mauri hanaihanai idia abia diba dalana be idia dekenai lau hadibaia.”

¹⁷ Momokani, teritori haida dekenai idia ura Dirava idia dibaia taudia ita davaria be auka. To, herevana unai ia vara, Kåre bamona, kamonai tauna ta oi davaria bona Iehova ena ladana be ia dekenai oi hadibaia neganai, oi moale ani? To, edena dala ai ita be Iehova ena Witnes taudia bona ma Iesu ena witnes taudia danu? Wiki vaira ena stadi ai ita ese unai henanadai do ita haerelaia.