1, 2. (a) Siisay an pinakamarahay na saksi ni Jehova? (b) Ano an kahulugan kan pangaran na Jesus, asin paano namuhay an Aki nin Diyos kauyon kan kahulugan kan saiyang pangaran?

‘AKO namundag dahil kaini, asin ako napadigdi sa kinaban dahilan kaini, tanganing ako magpatotoo kan katotoohan.’ (Basahon an Juan 18:33-37.) Kan si Jesu-Cristo binibista, sinabi niya an mga tataramon na ini sa Romanong gobernador nin Judea. Sinabi pa sana ni Jesus na siya sarong hadi. Pakalihis nin dakul na taon, si apostol Pablo nagtaram dapit sa halimbawang ini nin kusog nin buot ni Jesus, “na bilang saksi nagtao nin marahay na kapahayagan sa publiko sa atubangan ni Poncio Pilato.” (1 Tim. 6:13, NW) Iyo, kun beses, kaipuhan an dakulang kusog nin buot tanganing magin “maimbod asin totoong saksi” sa kinaban ni Satanas na pano nin pagkaungis!—Kap. 3:14.

² Bilang miyembro kan Judiong nasyon, si Jesus saro nang saksi ni Jehova kan mamundag siya. (Isa. 43:10) Tunay nanggad, siya nagin an pinakanangungurog na saksing ibinangon nin Diyos kasuarin man para sa Saiyang pangaran. Sineryoso ni Jesus an kahulugan kan saiya mismong pangaran na itinao nin Diyos. Kan sabihon kan anghel sa ama-amaan ni Jesus na si Jose na an ipinapangidam ni Maria paagi sa banal na espiritu, idinagdag kan anghel: ‘Siya mangangaki nin sarong aking lalaki, asin aapudon mo an saiyang pangaran Jesus, huli ta ililigtas niya an saiyang banwaan sa saindang mga kasalan.’ (Mat. 1:20, 21) An mga iskolar sa Bibliya sa pangkagabsan minauyon na an  pangaran na Jesus hali sa Hebreong pangaran na Jeshua asin may pinahalipot na porma kan pangaran nin Diyos; iyan nangangahulugan na “Si Jehova Kaligtasan.” Kauyon kan kahulugan kan saiyang pangaran, tinabangan ni Jesus an ‘mga nalagalag na karnero kan harong ni Israel’ na magsulsol kan mga kasalan ninda tanganing makua giraray an pag-uyon ni Jehova. (Mat. 10:6; 15:24; Luc. 19:10) Sa katuyuhan na ini, maigot na nagpatotoo si Jesus manungod sa Kahadian nin Diyos. An kagsurat nin Ebanghelyo na si Marcos nagbareta: ‘Si Jesus nagdatong sa Galilea, na naghuhulit kan ebanghelyo nin Diyos, na an sabi: “An panahon nautob na, asin an Kahadian nin Diyos harani na. Magsurulsol kamo asin magturubod sa ebanghelyo.”’ (Mar. 1:14, 15) May kusog man nin buot na kinondenar ni Jesus an Judiong mga lider nin relihiyon, na nagin sarong dahilan na ipinagadan ninda siya sa harigi.—Mar. 11:17, 18; 15:1-15.

3. Ano an nangyari kan ikatulong aldaw pagkagadan ni Jesus?

³ Pero makangangalas nanggad! Sa ikatulong aldaw pagkatapos kan maringis na kagadanan ni Jesus, binuhay siya liwat ni Jehova, bako bilang tawo, kundi bilang sarong imortal na espiritung linalang. (1 Ped. 3:18) Bilang pruweba kaini, an Kagurangnan na si Jesus nagsulot nin pisikal na hawak asin nagtaong ebidensiya na siya binuhay liwat. Sa mismong aldaw kan siya binuhay liwat, kisiyera limang beses siyang nagpahiling sa lain-lain na disipulo.—Mat. 28:8-10; Luc. 24:13-16, 30-36; Juan 20:11-18.

4. Anong pagtiripon an pinanginutan ni Jesus pagkatapos siyang buhayon liwat, asin anong paninimbagan an lininaw ni Jesus sa saiyang mga disipulo?

⁴ An ikalimang beses na pagpahiling ni Jesus iyo an sa mga apostol niya asin sa iba pang nagtitiripon kaiba ninda. Sa dai malilingawan na okasyon na iyan, pinanginutan niya an, garo baga, pag-adal kan Tataramon nin Diyos. ‘Binukasan niya an saindang mga isip tanganing makasabot sinda kan Kasuratan.’ Huli kaini, nasabutan ninda na an kagadanan niya sa kamot kan mga kaiwal nin Diyos asin an saiyang milagrosong pagkabuhay liwat nakahula sa Kasuratan. Sa katapusan kan pagtiripon na iyan pagkatapos siyang buhayon liwat, lininaw ni Jesus sa mga nagdadangog sa saiya kun ano an paninimbagan ninda. Sinabihan niya sinda na paagi ‘sa saiyang pangaran, ihuhulit an pagsulsol asin an pagpatawad nin mga kasalan sa gabos na nasyon—magpuon sa Jerusalem.’ Sinabi pa niya: ‘Kamo [magigin] mga saksi kan mga bagay na ini.’—Luc. 24:44-48.

5, 6. (a) Taano ta sinabi ni Jesus: ‘Kamo magigin mga saksi ko’? (b) Anong bagong aspekto kan katuyuhan ni Jehova an kaipuhan na ipaaram kan mga disipulo ni Jesus?

⁵ Kaya, pakalihis nin 40 aldaw, sa pangultimong pagpahiling ni Jesus, posibleng nasabutan kan saiyang mga apostol kun ano an buot niyang sabihon sa saiyang simple pero mapuwersang pagbuot: ‘Kamo magigin mga saksi ko digdi sa Jerusalem, asin sa bilog na Judea asin Samaria, patin sagkod sa kapuro-puruhi kan daga.’ (Gui. 1:8) Taano ta sinabi ni Jesus: ‘Kamo magigin mga saksi ko,’ asin bako ni Jehova? Puwede man kutanang sabihon ni Jesus na magigin mga saksi sinda ni Jehova, pero mga Israelita an kaulay ni Jesus kaya huli kaiyan, mga saksi na sinda ni Jehova.

⁶ Kaipuhan na ngunyan kan mga disipulo ni Jesus na ipaaram an sarong bagong aspekto kan katuyuhan ni Jehova—sarong bagay na mas dakula pa kisa kan pagliligtas sa mga Israelita sa pagkauripon sa Ehipto asin sa pagkabihag sa Babilonya kan huri. An pagkagadan asin pagkabuhay liwat ni Jesu-Cristo nagtao nin basehan para makatalingkas sa pinakamaraot na pagkabihag, na iyo an pagkauripon sa kasalan asin kagadanan. Kan Pentecostes 33 C.E., ipinaaram kan bagong lahidan na mga disipulo ni Jesus an makangangalas na mga bagay nin Diyos, asin dakul na nakadangog an naghimati. Kaya, hali sa may tuo kan saiyang Ama sa langit, nahiling ni Jesus  na nagkakaigwa nin urog na kahulugan an saiyang pangaran huli sa rinibong nagsulsol asin nagtubod sa saiya bilang an paagi nin Diyos sa pagliligtas.—Gui. 2:5, 11, 37-41.

7. Ano an pinatunayan kan mga pangyayari kan aldaw nin Pentecostes 33 C.E.?

⁷ An mga pangyayari kan aldaw nin Pentecostes kan 33 C.E. nagpatunay na may kabuutan na inako ni Jehova an halaga kan perpektong atang ni Jesus bilang pambayad, o pantakop, sa kasalan. (Heb. 9:11, 12, 24) Arog kan ipinaliwanag ni Jesus, nagdigdi siya, bakong ‘para paglingkudan, kundi para maglingkod, asin itao an buhay niya [bilang] pantubos para sa dakul.’ (Mat. 20:28, An Banal na Biblia) Bako sanang an nagsusulsol na mga Judio an kabilang sa ‘dakul’ na makikinabang sa pantubos ni Jesus. Kundi, kabutan nin Diyos na ‘an gabos na [klase] nin tawo makaligtas,’ huling an pantubos ‘naghahali kan kasalan nin kinaban!’—1 Tim. 2:4-6; Juan 1:29.

8. Sagkod sain nakapagpatotoo an mga disipulo ni Jesus, asin paano ini nagin posible?

⁸ May kusog daw nin buot an inot na mga disipulo ni Jesus tanganing padagos na magpatotoo manungod sa saiya? Iyo nanggad, pero ginibo ninda iyan bako sa sadiri sana nindang kusog. An makapangyarihan na banal na espiritu ni Jehova nagpahiro asin nagpakusog sa sainda na padagos na magpatotoo. (Basahon an Guibo 5:30-32.) Mga 27 taon pakalihis kan Pentecostes 33 C.E., masasabi na an mensahe kan ‘katotoohan kan ebanghelyo’ nakaabot na sa mga Judio asin Hentil, ‘sa gabos na linalang na nasa irarom nin langit.’—Col. 1:5, 23.

9. Arog kan ihinula, ano an nangyari sa orihinal na Kristiyanong kongregasyon?

⁹ Pero, makamumundo, an orihinal na Kristiyanong kongregasyon luway-luway na naatian. (Gui. 20:29, 30; 2 Ped. 2:2, 3; Jud. 3, 4) Arog kan ipinaparisa ni Jesus, an apostasyang iyan, na pinalakop kan ‘maraot’ na si Satanas, matalubo asin matahob sa tunay na Kristiyanismo sagkod sa ‘katapusan’ kan sistema nin mga bagay. (Mat. 13:37-43) Dangan papatukawon ni Jehova sa trono si Jesus bilang Hadi sa kinaban nin katawuhan. Nangyari iyan kan Oktubre 1914, na iyo an kapinunan kan ‘huring mga aldaw’ kan maraot na sistema ni Satanas.—2 Tim. 3:1.

10. (a) Anong mahalagang petsa an sinabi kan linahidan na mga Kristiyano sa presenteng panahon? (b) Ano an nangyari kan Oktubre 1914, asin paano iyan nagin risang-risa?

¹⁰ Patiinot na sinabi kan linahidan na mga Kristiyano sa presenteng panahon na an Oktubre  1914 sarong mahalagang petsa. Ibinasar ninda ini sa hula ni Daniel manungod sa sarong dakulang kahoy na pinutol asin matubo giraray pakalihis nin “pitong panahon.” (Dan. 4:16) Inapod ni Jesus an iyo man sanang peryodo nin panahon bilang an “itinalaan na mga panahon kan mga nasyon” sa saiyang hula dapit sa presensiya niya asin sa ‘katapusan’ kan sistema nin mga bagay. Puon pa kan mahalagang taon na iyan nin 1914, an tanda kan presensiya ni Jesus bilang an bagong Hadi kan daga malinaw nang nahihiling kan gabos. (Mat. 24:3, 7, 14; Luc. 21:24, NW) Kaya puon kaidto kaiba na sa makangangalas na mga bagay nin Diyos an pagpatukaw ni Jehova ki Jesus sa trono bilang Hadi sa kinaban nin katawuhan.

11, 12. (a) Ano an pinunan na gibuhon kan bagong Hadi kan daga kan 1919 pagkatapos nin giyera? (b) Ano pa an nagin risang-risa kan kabangaan kan dekada nin 1930? (Hilingon an ritrato sa kapinunan kan artikulo.)

¹¹ Bilang an bagong Hadi kan daga, tulos na ilinigtas ni Jesu-Cristo an saiyang linahidan na mga parasunod sa pagkabihag sa ‘Dakulang Babilonya.’ (Kap. 18:2, 4) Pakatapos nin giyera, kan 1919, nabukasan an posibilidad para sa pagpapatotoo sa bilog na kinaban manungod sa paagi nin Diyos sa pagliligtas asin sa maugmang bareta kan naestablisar na Kahadian. Inaprobetsaran kan linahidan na mga Kristiyano an oportunidad na ini na makapagpatotoo, na nagresulta sa pagkatipon nin rinibo pang linahidan na magigin kaibang mga paramana ni Cristo.

¹² Puon kan kabangaan kan dekada nin 1930, risang-risa na pinunan nang tipunon ni Cristo an minilyon niyang ‘ibang mga karnero,’ na makompuwesto sa “dakulang kadaklan” na hali sa lain-lain na nasyon. Sa paggiya kan linahidan na mga Kristiyano, inaarog man kan dakulang kadaklan na ini an kusog nin buot ni Jesus asin hayagan na ipinapaisi na utang ninda an saindang kaligtasan sa Diyos asin ki Cristo. Paagi sa padagos na pagpapatotoo asin pagtubod sa pantubos ni Cristo, an mga ini magkakapribilehiyong maligtas sa ‘dakulang kahurasaan,’ na matapos sa kinaban ni Satanas.—Juan 10:16; Kap. 7:9, 10, 14.

13. Bilang mga Saksi ni Jehova, ano an determinado tang gibuhon, asin paano kita makakasiyerto na magigin mapanggana kita?

¹³ Padagos lugod niyatong pakamahalon an satong pribilehiyong magin mga Saksi kan makangangalas na mga bagay na ginibo ni Jehova Diyos asin kan saiyang mga pangako para sa puturo. Totoo, bako pirming pasil an siring na pagpapatotoo. Dakul sa mga tugang ta an naghuhulit sa mga teritoryo na kadakul an mayo nin interes, nagtutuya, o nagpepersegir. Puwede tang gibuhon an ginibo ni apostol Pablo asin kan saiyang kairiba. Si Pablo nagsabi: “Nagpakapusuan kami paagi sa satong Diyos na sabihon sa saindo an maugmang bareta nin Diyos sa ibong nin grabeng pagtumang.” (1 Tes. 2:2, NW) Kaya dai kita nuarin man sumuko. Imbes, magin determinado lugod kitang utubon an satong  pagdusay mantang pabagsak na an sistema ni Satanas. (Isa. 6:11) Dai ta ini magigibo sa sadiri sana niyatong kusog, pero bilang pag-arog sa halimbawa kan inot na mga Kristiyano, dapat tang ipamibi ki Jehova na tawan kita, paagi kan saiyang banal na espiritu, nin ‘kapangyarihan’ na labi sa ordinaryo.—Basahon an 2 Corinto 4:1, 7; Luc. 11:13.

14, 15. (a) Paano trinato an mga Kristiyano kan inot na siglo C.E., asin ano an sinabi ni apostol Pedro sa sainda? (b) Ano an maninigong magin sabuot niyato kun bakong marahay an pagtrato sa sato huling mga Saksi ni Jehova kita?

¹⁴ Minilyon ngunyan an naghihingakong Kristiyano, ‘alagad sa saindang mga gibo sinda nagpapainda sa Diyos, huling sinda makababaldi asin masumbikal patin bakong maninigo sa gabos na marahay na gibo.’ (Tito 1:16) Marahay na girumdumon ta na kan inot na siglo, an tunay na mga Kristiyano ikinaungis, kun bako kan mayoriya, kan dakul na kakontemporanyo ninda. Iyan an dahilan na nagsurat si apostol Pedro: ‘Kun kamo pinag-uulog-ulog huli kan pangaran ni Cristo, [maugma] kamo, huli ta an espiritu nin Diyos nag-uuntok diyan sa saindo.’—1 Ped. 4:14.

¹⁵ Aplikado daw sa mga Saksi ni Jehova ngunyan an ipinasabong na mga tataramon na iyan? Iyo nanggad, huling nagpapatotoo kita manungod sa pagkahadi ni Jesus. Kaya, kun ikinakaungis kita huli sa pagdara kan pangaran ni Jehova, kapareho iyan kan ‘pag-ulog-ulog sa sato huli kan pangaran ni Jesu-Cristo,’ na nagsabi sa saiyang mga paratumang: ‘Napadigdi ako sa pangaran kan sakong Ama, asin dai nindo ako inaako.’ (Juan 5:43) Kaya sa sunod na mapaatubang ka sa pagtumang sa saimong paghuhulit, kusugi an buot mo. An siring na pagtrato pruweba na inuuyunan ka nin Diyos asin na an saiyang banal na espiritu ‘nag-uuntok diyan sa saimo.’

16, 17. (a) Ano an naeeksperyensiyahan kan mga lingkod ni Jehova sa dakul na parte kan kinaban? (b) Ano an determinado mong gibuhon?

¹⁶ Kasabay kaiyan, girumdumon na igwa nin marahayon na mga pag-uswag sa dakul na parte kan kinaban. Dawa sa pirmi nang nagigibong mga teritoryo, nakakanumpong pa man giraray kita nin mga andam na maghinanyog asin puwede niyatong paabutan kan mensahe manungod sa kaligtasan. Magin mahigos lugod kita na dumalaw liwat sa mga interesado asin, kun posible, magkondukta nin pag-adal sa Bibliya sa sainda, na tinatabangan sindang mag-uswag sagkod na sinda magdusay asin magpabawtismo. Posibleng marhay na namamatian mo an namamatian ni Sarie na taga South Africa, na aktibong nagpapatotoo sa laog na nin labing 60 taon. Sinabi niya: “Nagpapasalamat akong marhay na paagi sa atang na pantubos ni Jesus, puwede akong magkaigwa nin marahay na relasyon ki Jehova, an Soberano kan uniberso, saka maugma ako na naipapamidbid ko an saiyang mamuraway na pangaran.” Dakul an natabangan niya asin kan agom niyang si Martinus na magin parasamba ni Jehova, kaiba an saindang tulong aki. Sabi pa ni Sarie: “Mayo na nin ibang gibuhon na nagtatao nin dakulang satispaksiyon, asin paagi kan saiyang banal na espiritu, itinatao ni Jehova sa sato gabos an kinakaipuhan na kusog na magpadagos sa nagliligtas-buhay na gibuhon na ini.”

¹⁷ Baga man kita bawtisadong Kristiyano o may pasuhan na magpabawtismo, igwa kita kan gabos na dahilan na magin mapagpasalamat sa pribilehiyong magin kabtang kan pambilog na kinaban na kongregasyon nin mga Saksi ni Jehova. Kun siring, padagos na lubos na magpatotoo mantang nagmamaigot kang magdanay na malinig sa maraot na kinaban ni Satanas. Sa paggibo kaiyan, matatawan mo nin onra an satong mamumuton na Ama sa langit, na an mamuraway na pangaran pribilehiyo niyatong darahon.