“Una Tɔk bɔt Mi”
“Jizɔs ansa dɛn se, ‘. . . Una tɔk bɔt mi . . . ɔlɔbɔt na [di] wɔl.’”—AKT 1:7, 8.
1, 2. (a) Udat na di men pɔsin we de tɔk bɔt Jiova? (b) Wetin Jizɔs in nem min? Wetin i bin du fɔ sho wetin in nem min?
WE DƐN bin want fɔ kil Jizɔs Krays, i bin gɛt kɔrej fɔ tɛl wan Roman Gɔvnɔ na Judia we nem Pɔnchɔs Paylet, se: “A bɔn kam na [di] wɔl fɔ tɔk wetin tru.” (Rid Jɔn 18:33-37.) Jizɔs Krays bin tɔk dis, jɔs afta i dɔn mek Paylet no se in na kiŋ. Afta sɔm tɛm, di apɔsul Pɔl bin tɔk bɔt di kɔrej we Jizɔs bin gɛt. I bin se Jizɔs “nɔ fred fɔ tɔk bɔt insɛf bifo da gɔvna we dɛn kɔl Pɔnchɔs Paylet.” (1 Tim. 6:13) Na Setan de rul dis wikɛd wɔl we wi de. So fɔ lɛ wi kɔntinyu fɔ prich, wi nid fɔ gɛt kɔrej lɛk Jizɔs we nɔ bin de fred fɔ “tɔk tru ɔltɛm.”—Rɛv. 3:14.
2 Bikɔs Jizɔs na bi Ju so in na bin Jiova in witnɛs, jɔs lɛk ɔl di ɔda Ju pipul dɛn. (Ayz. 43:10) Bɔt Jizɔs bin kam fɔ bi di witnɛs we pas ɔl di ɔda witnɛs dɛn we de tɔk bɔt Jiova. I bin du wetin in nem min. Afta wan enjɛl bin tɛl Jizɔs in stɛp papa, we na Josɛf, se di bɛlɛ we Meri gɛt na bikɔs oli spirit bin kam pan am, di enjɛl tɔk bak se: “Meri go bɔn bɔy pikin ɛn yu go kɔl di pikin Jizɔs; bikɔs i go sev Gɔd in pipul dɛn frɔm dɛn sin.” (Mat. 1:20, 21) Masta sabi bukman dɛn we de stɔdi di Baybul, dɔn gri se Jizɔs in nem kɔmɔt frɔm wan Ibru nem we na Jɛshwa. Jizɔs in nem min “Na Jiova De Sev.” Fɔ sho se Jizɔs bin de du wetin in nem min, i bin de ɛp di “pipul na Izrɛl, we tan lɛk ship we dɔn lɔs,” fɔ lɛf fɔ du bad so dat Jiova go gladi fɔ dɛn bak. (Mat. 10:6; 15:24; Lyuk 19:10) Fɔ mek Jizɔs go ebul fɔ du dis, i bin de prich wit zil bɔt Gɔd in Kiŋdɔm. Mak bin rayt se: “Jizɔs bigin go ɔlɔbɔt na Galili de tɛl pipul di Gud Nyuz we Gɔd sɛn. I bin de se, ‘Di tɛm dɔn rich. Di tɛm we Gɔd go rul wi, dɔn kam klos. Una tap fɔ du dɛn bad tin we una de du ɛn biliv di Gud Nyuz.’” (Mak 1:14, 15) Jizɔs bin gɛt maynd fɔ tɛl di Ju bigman dɛn we bin de bifo pan Gɔd biznɛs, bɔt di bad tin dɛn we dɛn bin de du. So na dis bin mek dɛn kil am.—Mak 11:17, 18; 15:1-15.
“DƐN BIG WOK WE GƆD DE DU”
3. Tri dez afta Jizɔs day, wetin bin apin?
3 Tri dez afta Jizɔs day, Jiova bin du wan wɔndaful wɔndaful tin! Wetin i bin du? I bin gi Jizɔs layf bak wit spirit bɔdi. (1 Pit. 3:18) Fɔ lɛ Jizɔs sho se i dɔn gɛt layf bak, i bin de apia wit mɔtalman bɔdi. Di fɔs de we Jizɔs gɛt layf bak, i bin apia lɛk fayv tɛm so to difrɛn difrɛn disaypul dɛn.—Mat. 28:8-10; Lyuk 24:13-16, 30-36; Jɔn 20:11-18.
4. Wetin apin we Jizɔs apia to in disaypul dɛn? Wetin i tɛl dɛn fɔ du?
4 Di nɔmba fayv tɛm we Jizɔs bin apia na to in apɔsul dɛn ɛn ɔda pipul dɛn we bin gɛda wit dɛn na wan ples. Da tɛm de, i bin stɔdi dɛn Gɔd in Wɔd gud gud wan. “Jizɔs opin dɛn ed fɔ mek dɛn ɔndastand wetin dɛn rayt na Gɔd in Buk.” So dɛn bin kam fɔ ɔndastand se Gɔd in Wɔd bin dɔn tɔk lɔn lɔn tɛm se, Jizɔs in ɛnimi dɛn go kil am, ɛn afta dat Gɔd go gi am layf bak. We Jizɔs bin dɔn tich dɛn dɔn, i bin mek dɛn no klia wan bɔt di wok we dɛn gɛt. I tɛl dɛn se, ‘fɔseka di tin we i du ɛn se, dɛn fɔ go na Jerusɛlɛm fɔs, ɛn ɔlsay na di wɔl fɔ go tɛl pipul dɛn fɔ lɛf fɔ sin so dat Gɔd go fɔgiv dɛn.’ Jizɔs tɔk bak se: “Unasɛf dɔn si ɔl dɛn tin ya ɛn una fɔ tɛl ɔda pipul dɛn bɔt dɛn.”—Na wi mek am italiks; Lyuk 24:44-48.
5, 6. (a) Wetin mek Jizɔs se: “Una tɔk bɔt mi”? (b) Us nyu we Jiova de sev mɔtalman we Jizɔs in disaypul dɛn fɔ tɔk bɔt?
5 Afta 40 dez, Jizɔs bin apia to in apɔsul dɛn fɔ di las tɛm. Dɛn bin kam fɔ ɔndastand klia wan di nɛks tin we i tɛl dɛn. I bin tɛl dɛn wan simpul tin we bin rili impɔtant fɔ lɛ dɛn du. I se: “Una tɔk bɔt mi na Jerusɛlɛm, na Judia, na Sameria ɛn ɔlɔbɔt na [di] wɔl.” (Akt 1:8) Wetin mek Jizɔs se: “Una tɔk bɔt mi,” bɔt i nɔ tɛl dɛn fɔ tɔk bɔt Jiova? Jizɔs nɔ tɛl dɛn fɔ tɔk bɔt Jiova bikɔs di disaypul dɛn we i bin de tɔk to na bin Izrɛlayt dɛn so dɛn ɔl na bin Jiova in witnɛs.
As Jizɔs in disaypul dɛn, wi de kɔntinyu fɔ tɛl pipul dɛn bɔt wetin Jiova dɔn tɔk se i go du tumara bambay (Luk na paregraf 5 ɛn 6)
6 Naw Jizɔs in disaypul dɛn go bigin fɔ tɛl ɔda pipul dɛn bɔt di nyu we aw Jiova de sev mɔtalman. Dis nyu we bɛtɛ pas di we aw Jiova bin sev di Izrɛlayt dɛn di tɛm we dɛn bin de as slev na Ijipt ɛn Babilɔn. Di day we Jizɔs Krays day ɛn di layf we i gɛt bak, dɔn fri wi frɔm di ɛnimi we bad pas ɔl. Dis ɛnimi na sin ɛn day. Insay di ia 33, Jiova bin anɔynt Jizɔs in disaypul dɛn wit oli spirit. Dat bin apin di de we na Pɛntikɔst. Ɛn dɛn bin bigin fɔ tɛl pipul dɛn bɔt “dɛn big wok we Gɔd de du,” ɛn bɔku pipul dɛn we yɛri, bin jɔyn di disaypul dɛn fɔ wɔship Jiova. We Jizɔs bin sidɔm na in Papa in rayt an na ɛvin, i bin de si aw bɔku bɔku pipul dɛn bin de lɛf fɔ du bad ɛn put fet pan am bikɔs na in Jiova bin de yuz fɔ sev mɔtalman.—Akt 2:5, 11, 37-41.
JIZƆS “GI IN LAYF FƆ SEV PLƐNTI PLƐNTI PIPUL”
7. Di tin dɛn we apin Pɛntikɔst 33, wetin dɛn de sho wi?
7 Di tin dɛn we apin Pɛntikɔst 33 bin sho se Jiova bin rili gladi fɔ tek di pafɛkt sakrifays we Jizɔs mek fɔ pul wi kɔmɔt pan sin. (Ibru 9:11, 12, 24) Na dat mek Jizɔs bin se i “nɔ kam fɔ mek mɔtalman bi in savant, bɔt i kam fɔ bi dɛn savant ɛn fɔ gi in layf fɔ sev plɛnti plɛnti pipul.” (Mat. 20:28) Nɔto di Ju dɛn nɔmɔ go bɛnifit frɔm Jizɔs in day. “Gɔd want mek ɔlman sev.” Na dat mek i sɛn Jizɔs fɔ kam day so dat i go ‘fɔgiv mɔtalman sin.’—1 Tim. 2:4-6; Jɔn 1:29.
8. Wetin bin ɛp Jizɔs in disaypul dɛn fɔ kɔntinyu fɔ tɔk bɔt am? Wetin sho se dɛn bin rili prich bɔt Jizɔs?
8 Yu tink se Jizɔs in fɔstɛm disaypul dɛn bin gɛt kɔrej fɔ de tɔk bɔt am? Yɛs, dɛn bin gɛt kɔrej, bɔt nɔto bay dɛn yon pawa dɛn bin de tɔk bɔt am. Na Jiova in oli spirit bin de gi dɛn kɔrej fɔ kɔntinyu fɔ prich. (Rid Di Apɔsul Dɛn Wok [Akt] 5:31, 32.) Afta lɛk 27 ia so afta Pɛntikɔst 33, ‘ɔlman na di wɔl bin dɔn yɛri’ “di Gud Nyuz.”—Kɔl. 1:5, 23.
9. Wetin Jizɔs bin se go apin to di kɔngrigeshɔn we bin de trade?
9 Afta sɔm tɛm, sɔm Kristian dɛn na di kɔngrigeshɔn bigin tich lay lay tin dɛn. (Akt 20:29, 30; 2 Pit. 2:2, 3; Jud 3, 4) Jizɔs bin se dɛn Kristian ya, we “Setan” de kɔntrol, go bɔku ɛn dɛn go ivin mek i nɔ izi fɔ lɛ pipul dɛn no udat rili na tru Kristian. Ɛn dis tin go kɔntinyu te “di tɛm we di wɔl go dɔn.” (Mat. 13:37-43) Insay Ɔktoba 1914, Jiova mek Jizɔs bi Kiŋ fɔ di wan ol wɔl. Na da tɛm de, Setan in wikɛd wɔl bigin fɔ dɔn.—2 Tim. 3:1.
10. (a) Us impɔtant det di anɔyntɛd Kristian dɛn we de na wi yon tɛm bin tɔk bɔt? (b) Wetin bin apin insay Ɔktoba 1914? Aw ɔlman dɔn si klia wan wetin apin?
10 Di anɔyntɛd Kristian dɛn we de na wi yon tɛm bin dɔn de tɔk lɔn lɔn tɛm se Ɔktoba 1914 go bi impɔtant det na di wɔl. Dɛn bin de tɔk dis bikɔs dɛn bin dɔn stɔdi wetin di prɔfɛt Daniɛl bin rayt bɔt wan big tik we dɛn bin kɔt bɔt we gro bak afta “sɛvin ia.” (Dan. 4:16) We Jizɔs insɛf bin de tɔk bɔt di tɛm we i go kam bak ɛn di tɛm we “di wɔl de dɔn,” i bin tɔk sɔntin we gɛt fɔ du wit da “sɛvin ia” we Danɛl bin tɔk bɔt. I bin se na dis tɛm “dɛn pipul we nɔ sabi Gɔd, go pwɛl Jerusɛlɛm ɔltogɛda, te dɛn kɔmɔt na pawa.” Frɔm di ia 1914, ɔlman de si di “sayn” we de sho se Jizɔs Krays dɔn bi Kiŋ. (Mat. 24:3, 7, 14; Lyuk 21:24) Ɛn wan ‘big wok we Gɔd dɔn du,’ na we i mek Jizɔs bi Kiŋ fɔ rul mɔtalman.
11, 12. (a) Wetin Jizɔs Krays bin bigin fɔ du insay 1919? (b) Us ɔda tin bin apin insay 1935? (Luk di pikchɔ nia dis atikul in taytul.)
11 Jɔs afta Jizɔs Krays bi Kiŋ fɔ rul mɔtalman, i bigin fɔ pul di anɔyntɛd Kristian dɛn kɔmɔt insay “Babilɔn . . . we ɔlman no,” we na lay lay rilijɔn. (Rɛv. 18:2, 4) Insay 1919, jɔs afta Wɔl Wɔ Wan bin dɔn, di anɔyntɛd Kristian dɛn bin gɛt mɔ fridɔm fɔ prich ɔlsay na di wɔl. Dɛn bin de prich bɔt Gɔd in Kiŋdɔm ɛn di we aw Gɔd de sev mɔtalman. Dis prich we di anɔyntɛd Kristian dɛn bin de prich, bin ɛp fɔ lɛ plɛnti ɔda pipul dɛn lan bɔt Jiova. Ɛn Jiova bin anɔynt dɛnsɛf so dat dɛn go rul as Kiŋ wit Jizɔs Krays na ɛvin.
12 Insay 1935, Krays bigin fɔ gɛda bɔku bɔku pipul dɛn we na in “ɔda ship dɛn.” Dɛn “bɔku bɔku pipul” ya de ɔlsay na di wɔl. Dɛn de fala wetin di anɔyntɛd Kristian dɛn de tɛl dɛn. Ɛn dɛn de falamakata Jizɔs ɛn mek ɔlman no se na Gɔd ɛn Krays nɔmɔ go mek dɛn sev. Dɛn bɔku bɔku pipul ya no se if dɛn bia we dɛn de du dis prichin wok ɛn kɔntinyu fɔ sho se dɛn gɛt fet pan Jizɔs Krays in day wan, dɛn go sev we “da big trɔbul” go kam fɔ dɔnawe wit Setan ɛn in wikɛd wɔl.—Jɔn 10:16; Rɛv. 7:9, 10, 14.
‘NƆ FRED FƆ TƐL PIPUL DƐN DI GUD NYUZ’
13. As Jiova Witnɛs dɛn, wetin wi fɔ mekɔp wi maynd fɔ du? Aw wi go ebul du wetin wi dɔn prɔmis?
13 Lɛ wi ɔl kɔntinyu fɔ valyu di wok we wi gɛt fɔ tɔk bɔt “dɛn big wok” we Jiova Gɔd dɔn du ɛn di tin dɛn we i dɔn prɔmis fɔ du tumara bambay. Bɔt rili, i nɔ kin izi fɔ tɔk bɔt Jiova ɔltɛm. Plɛnti pan wi brɔda dɛn kin prich na say dɛn we bɔku pipul dɛn nɔ kin gri fɔ lisin; dɛn kin provok dɛn ɛn ivin du bad tin to dɛn. Bɔt i go fayn mek wi du di sem tin we di apɔsul Pɔl ɛn di ɔda Kristian dɛn bin du. Pɔl bin se: “Pan ɔl we pipul tray fɔ tap wi mek wi nɔ tɔk, Gɔd ɛp wi mek wi nɔ fred fɔ tɛl una di Gud Nyuz.” (1 Tɛs. 2:2) So lɛ wi nɔ ɛva taya. Bifo dat, i go fayn lɛ wi mekɔp wi maynd fɔ du wetin wi bin dɔn prɔmis Gɔd di tɛm we wi bin baptayz, ɛn wi fɔ tinap tranga wan te dɛn dɔnawe wit Setan in wikɛd wɔl. (Ayz. 6:11) Wi nɔ go ebul du fɔ dis bay wi yon pawa, so wi fɔ falamakata di Kristian dɛn we bin de trade fɔ de pre to Jiova lɛ i gi wi in spirit we go mek wi gɛt “di pawa fɔ kɔntrol ɔltin.”—Rid Sɛkɛn Lɛta Fɔ Kɔrint 4:1, 7; Lyuk 11:13.
14, 15. (a) Aw dɛn bin de si di Kristian dɛn we bin de trade trade? Wetin di apɔsul Pita tɔk bɔt dɛn? (b) Aw wi fɔ fil if pipul dɛn de trit wi bad bikɔs wi na Jiova Witnɛs?
14 Tide, bɔku pipul dɛn kin tɔk se dɛn no Gɔd, “bɔt di tin dɛn we dɛn de du sho se dɛn nɔ no am. Dɛn gɛt bad at, dɛn nɔ de yɛri wɔd, dɛn nɔ fit fɔ du ɛnitin we gud.” (Tay. 1:16) I go fayn fɔ lɛ wi mɛmba se bɔku pipul dɛn bin et di tru Kristian dɛn we bin de trade. Na dat mek di apɔsul Pɔl bin ɛnkɔrej dɛn se: “Una gɛt blɛsin wɛn pipul tɛl una tin we go at una bikɔs una biliv pan Krays, dat sho se Gɔd in Spirit, . . . de insay una.”—1 Pit. 4:14.
15 Fɔ se dɛn wɔd ya we Pɔl bin tɔk gɛt sɔntin fɔ du wit Jiova Witnɛs dɛn tide? Yɛs, i gɛt sɔntin fɔ du wit wi, bikɔs wisɛf de tɔk bɔt Jizɔs. So if pipul dɛn et wi bikɔs wi de tɔk bɔt Jiova na di sem tin if dɛn et wi bikɔs wi de tɔk bɔt Jizɔs Krays. Na dat mek Jizɔs bin tɛl di wan dɛn we de du am bad, se: “Na mi Papa sɛn mi, . . . bɔt una nɔ gri lisin to mi.” (Jɔn 5:43) So di nɛks tɛm we pipul dɛn du yu bad tin bikɔs yu de prich, nɔ fil bad. Di bad tin we dɛn du to yu de sho se Gɔd gladi fɔ yu ɛn in spirit de wit yu.
16, 17. (a) Wetin Jiova in pipul dɛn dɔn de si de apin na plɛnti say dɛn na di wɔl? (b) Wetin wi dɔn rɛdi fɔ du?
16 Mɛmba bak se bɔku pipul dɛn de lan bɔt Jiova ɔlsay na di wɔl. Ivin we wi kin prich na eria dɛn we wi dɔn prich bɔku tɛm, wi kin stil mit pipul dɛn we rɛdi fɔ lisin to di gud nyus we de ɛp pipul dɛn fɔ sev. So lɛ wi tray fɔ go bak to di pipul dɛn we wi bin dɔn tɔk to ɛn tray fɔ stɔdi di Baybul wit dɛn ɛn ɛp dɛn fɔ gi dɛn layf to Jiova ɛn baptayz. Sɔntɛm, yu go dɔn de fil lɛk wan wi sista we nem Sari. Sari de na Sawt Afrika, ɛn i dɔn de prich wit zil fɔ di pas 60 ia. Na dis i bin se: “A rili gladi we Jizɔs in day dɔn mek a gɛt tayt padi biznɛs wit Jiova, we na di Rula fɔ di wan ol wol ɛn a gladi bak we a ebul fɔ tɔk bɔt in wɔndaful nem.” Sari ɛn in man, Matinas, dɔn ɛp dɛn tri pikin dɛn ɛn bɔku ɔda pipul dɛn fɔ kam wɔship Jiova. Sari tɔk bak se: “No ɔda wok nɔ de we de mek pɔsin fil fayn rich di prichin wok, ɛn bikɔs Jiova de gi wi in oli spirit, dat de ɛp wi fɔ kɔntinyu fɔ du dis wok we de sev layf.”
17 Ilɛksɛf wi dɔn baptayz ɔ wi de tray fɔ baptayz, wi fɔ tɛl Jiova tɛnki we i mek wi de gɛda wit in Witnɛs dɛn we de ɔlsay na di wɔl fɔ wɔship am. So wi fɔ kɔntinyu fɔ prich gud gud wan ɛn tray tranga wan nɔ fɔ put an pan ɛni bad tin we go mek wi nɔ klin na Gɔd in yay, insay Setan dis in dɔti wɔl. If wi de du ɔl dis, wi go briŋ ɔnɔ to wi Papa we de na ɛvin, we dɔn put in wɔndaful nem pan wi.
