Na go be go kwagala gore Dafida a letele gore Modimo a mo šetše? Na Modimo o a go šetša? Batho ba bantši ba thatafalelwa ke go dumela gore Modimo ramatlaohle o a ba kgahlegela. Ka baka la’ng?

Lebaka le lengwe ke gore Modimo o phagame kudu go feta batho ka moka. Ka ge Jehofa a le boemong bjo bo phagamego, ditšhaba di “etša lerothi le le lego kgamelong; di etšwe go etša lerole leo le lego dikaleng.” (Jesaya 40:15) Moswayadiphošo yo mongwe wa bodumedi wa mehleng yeno o ile a ba a phetha ka gore: “Go dumela gore go na le Modimo yo a kgahlegelago le go šetša dilo tšeo re di dirago e tloga e le boikgogomošo.”

Ka lehlakoreng le lengwe, batho ba bangwe ba nagana gore boitshwaro bja bona bo dira gore ba ikwe ba sa swanelwe ke go šetšwa ke Modimo. Ka mohlala, monna yo a bitšwago Jim o laodiša gore: “Ke dula ke rapela gore ke be le khutšo le boitshwaro, eupša go se go ye kae, ke boela mokgweng wa ka wa go galefa. Mafelelong, ke ile ka phetha ka gore ke be ke tloga ke le yo kgopo ka go fetišiša le gore Modimo o be a ka se kgone go nthuša.”

Na Modimo o kgole kudu le rena moo a palelwago ke go re šetša? Ge e le gabotse, Modimo o ikwa bjang ka batho ba gagwe bao ba sa phethagalago? Ntle le gore Modimo a ikutolle, ga go motho yo a ka bolelelago Modimo le go araba dipotšišo tšeo. Lega go le bjalo, Beibele e lego molaetša wo o buduletšwego woo Modimo a re ngwaletšego wona, e re kgonthišetša gore Modimo ga a kgole le batho e bile o tloga a tshwenyegile ka bona. Beibele e re: “Ge e le gabotse ga a kgole le yo mongwe le yo mongwe wa rena.” (Ditiro 17:27) Dihlogong tše nne tše di latelago, re tla ahlaahla seo Modimo a re botšago sona ka go re kgahlegela ga gagwe le kamoo a ilego a bontšha kgahlego e bjalo go batho bao ba swanago le wena.