POPUN EKKÓCH RA TIPEMWARAMWAR: Inaamwo ika aramas ra fókkun osupwangen ouruur, nge ekkóch ra meefi pwe ika ra tingorei Kot pwe epwe angolong lón ar osukosuk me álisiir, iwe ra chék ekieki pwisin iir. Iei alon emén fefin itan Raquel, “Lupwen ua kúna chómmóngun aramas wóón fénúfan mi nóm lón watteen osukosuk, ua meefi pwe usun itá ai kewe osukosuk a kon kúkkún seni ar kana, iwe ua pireir le tingor án Kot álillis.”

MET ÁN KOT WE KAPAS A APASA: Fán eú napanap mi amwarar Kot a fen angolong pwe epwe álisi aramas me oururuur. Meinisin aramas wóón fénúfan ra álemwiri tipis, iwe rese tongeni unusen apwénúetá án Kot kewe allúk. Iwe nge, Kot “a echenikich o tinato Nöün we [Jesus Kraist] pwe i popun pwe ach tipis kana ra musala.” (1 Johannes 4:10) Me ren án Jesus asoresini manawan me máló, Kot a suuk ngenikich ach sipwe kúna omusomusen ach tipis, eáni eú mwelien letip mi liméch, me eáni ewe ápilúkúlúkún manaw esemuch lón eú fénúfan sefé mi kinamwe. * Nge itá ena asor a chék fis fán ásengesin chón fénúfan unus, are a pwal pwáraatá án Kot áfánni emén me emén kich aramas kapachelong pwisin en?

Nengeni pwóróusen aposel Paulus. Án Jesus we asor a fókkun achchúngú letipan, iwe iei met a makkeei: “Üa manau ren ai lükü ewe Nöün Kot mi echeniei o fangala manauan fän itei.” (Kalatia 2:20) Pwúngún pwe Jesus a máló me mwen án Paulus a wiliti emén Chón Kraist. Nge, Paulus a meefi pwe án Jesus na asor, ina pwisin án Kot liffang fán ásengesin i.

Án Jesus asorun máló, ina pwal án Kot pwisin liffang fán ásengesum. Ena liffang a pwáraatá úkúkún watteen án Kot aúcheanuk. A tongeni ngonuk ‘chipen letipom fansoun meinisin pwal om apilükülüköch,’ iwe, epwe ‘apöchökülok, pwe kopwe föri o apasa mine a mürina fansoun meinisin.’​—2 Tesalonika 2:16, 17.

Nge, Jesus a fen eáni asor manawan arapakkan 2,000 ier ra ló. Iwe, ikenái met a pwáraatá pwe Jiowa a mochen óm kopwe ririéch ngeni?